“მელიას გარშემო დედამიწა ნამდვილად არ ტრიალებს” – ქართული ოცნების საზოგადოებასთან ურთიერთობის სამსახურის მდივანი, შალვა პაპუაშვილი აცხადებს, რომ ნაციონალური მოძრაობის თავმჯდომარე, ნიკა მელიას გარშემო დედამიწა არ ტრიალებს, მათ შორის, არც ამნისტიის შესახებ შეთანხმებაში.
“მე იმედი მაქვს და ჩვენ ყველას იმედი გვაქვს ქართულ ოცნებაში და ყველაფერს ვაკეთებთ იმისთვის, რომ ეს იყოს როგორც ერთობლივი ინიციატივა, ასევე, ერთობლივად მიღებული საბოლოო ჯამში. ვინაიდან, ამ ამნისტიის მიზანი არ არის ნიკა მელიას გამოყვანა სასჯელაღსრულების დაწესებულებიდან. ეს არ არის ამ ამნისტიის მიზანი, ეს ამნისტია არის ნაწილი იმ შეთანხმებისა, რომელსაც ჰქვია წინსვლის გზა საქართველოსთვის და რომლის მთავარი არსი არის, რომ პოლარიზაცია დასრულდეს და გადავიდეთ თანამშრომლობაზე. ეს არის მთელი იდეა სხვადასხვა რეფორმის თუ საპარლამენტო თანამდებობების გადანაწილების. მთავარი არსი არის ეს, რომ პარტიები ქოშპობიდან და პოლარიზებიდან გადავიდნენ თანამშრომლობაზე.
ერთ-ერთი დეტალი არის ამნისტია და არა იმიტომ, რომ ნიკა მელია გამოვიდეს ციხიდან, არამედ ამნისტია, როგორც მექანიზმი, რომ 20 ივნისის გარშემო არსებული სხვადასხვა შეფასებები გადავდოთ გვერდზე და გავიხედოთ წინ. აი, ეს არის ამ ამნისტიის მიზანი. არა ნიკა მელიას გამოყვანა ციხიდან, არამედ 20 ივნისთან დაკავშირებით სხვადასხვა შეფასების გვერდზე გადადება და წინ გახედვა. იმიტომ, რომ იცით, ნიკა მელიას გარდა, მის გვერდით მყოფი სხვა ხალხი ძალადობაში ბრალდებული, მათ მიმართ არის საქმეები. ასე, რომ ნიკა მელიას გარშემო დედამიწა ნამდვილად არ ტრიალებს, მათ შორის, არც ამ შეთანხმებაში” – განაცხადა პაპუაშვილმა.
