მოქალაქეების ლიდერმა ალეკო ელისაშვილმა პარლამენტის პირველ სხდომაზე საკუთარი ტელეფონის ნომერი გამოაცხადა.
მისი თქმით, ამით იმის დამტკიცება სურს, რომ პარლამენტის სავარძელმა არ მოხიბლა და იქ პრივილეგიების გამო არ შეიტყუეს.
“გამარჯობა. რთულად მოვედით, მოგეხსენებათ ალბათ, მე და ლევან იოსელიანი ამ დარბაზამდე. მძიმე გზა გამოვიარეთ, დინების საწინააღმდეგოდ აღმაცურვა მოგვიწია, ბევრი სირთულის გაძლება, ბევრი სიძულვილი კიდევ წინ გველის, მაგრამ ჩვენ ვამბობდით, რომ რისიც გვწამს და გვჯერა, გავაკეთებთ ყოველთვის იმას. გვჯერა და გვწამს, რომ ოპოზიცია აქ უნდა იყოს, ასე ჭირდება უკეთეს საქართველოს და ასე იქნებოდა და ასე იქნება სწორი.
ზოგს ჰგონია ალბათ და ვერც დავაჯერებთ ბევრს, რომ ამ სავარძელმა არ მოგვხიბლა და აქ რაღაც პრივილეგიებით არ შემოგვიტყუეს. ამას, რა თქმა უნდა, დრო გამოავლენს, მაგრამ ამის დასტურად მარტივ რამეს ვიტყვი. არ ვიცი, შესაძლოა წინასაარჩევნოდ ადევნებდით თვალყურს, რომ ჩვენ გვქონდა უცნაური კამპანია, ტელეფონის ნომერი მქონდა გამოქვეყნებული და მთელი ჩვენი გუნდი ხალხს ვპასუხობდით. გავიმეორებ ჩემს ტელეფონის ნომერს. ამ სხდომის დასრულების შემდეგ ისევ ჩართული მექნება ნომერი. ვიღაც გამლანძღავს, ვიღაც შემაქებს, პრობლემას გვეტყვიან. 593 58 40 52 არის ტელეფონი ნომერი, რომელსაც ყოველთვის ვუპასუხებ. 4 წლის განმავლობაში ვუპასუხებ როგორც დეპუტატი”,– ამბობს ელისაშვილი.
