,,პატრიოტთა ალიანსის” ლიდერის, ირმა ინაშვილის თქმით, 8 მარტის შეხვედრაზე, როდესაც ხელისუფლებასა და ოპოზიციას შორის შეთანხმება შედგა, საუბარი კონკრეტული ადამიანების გათავისუფლების მექანიზმებზე იყო.
რაც შეეხება მექანიზმებს, მისი თქმით, ისაუბრეს ზურაბიშვილის შეწყალებაზე და სასამართლოსა და პროკურატურის მიერ გადაწყვეტილებების მიღებაზე.
“ე.წ. პოლიტპატიმრებზე საუბარი იყო ამ შეხვედრებზე, გვარებზეც იყო საუბარი, მექანიზმებზეც იყო იდეები, თუ როგორ უნდა მოხდეს მათი გათავისუფლება… მე გარიგებაზე როცა ვლაპარაკობ, ამ გარიგებაში ვგულისხმობ იმას, რომ ასეთი შეხვედრები იყო არამარტო ამერიკის ან სხვა ელჩების რეზიდენციებში, არამედ პირდაპირ ხვდებოდნენ ერთმანეთს სააკაშვილის და ბოკერიას პარტიის წარმომადგენლები და ქართული ოცნების უმრავლესობის ლიდერები.
საუბარი იმაზე, რომ პრეზიდენტმა უნდა შეიწყალოს, პროკურატურამ და სასამართლომ უნდა მიიღოს გადაწყვეტილებები, ამ ქვეყანაში მართლმსაჯულება არ არის, თუ როგორ არის საქმე? ქართული ოცნების მთავარი დანაშაული მდგომარეობს იმაში, რომ 2013 წელს არ დაიწყო ამ პირების დაკავება და მაინცდამაინც 2020 წლის არჩევნების წინა პერიოდს დაამთხვია” – განაცხადა ირმა ინაშვილმა.
ცნობისთვის, ,,ქართული ოცნება” უარყოფს, რომ პოლიტპატიმრების გათავისუფლებაზე ოპოზიციასთან ისაუბრეს და შეთანხმდნენ. ხელისუფლება ასევე უარყოფს, რომ ქვეყანაში პოლიტპატიმრები არსებობენ.
ოპოზიცია ამბობს, რომ მმართველ გუნდთან პოლიტპატიმრების გათავისუფლების კონკრეტულ გზებზე შეთანხმდნენ და ისინი ციხეს დატოვებენ. მათი განცხადებით, გიგი უგულავას პრეზიდენტი შეიწყალებს, თამლიანს, ოქრუაშვილისა და რურუას კი აღკვეთის ღონისძიებები შეეცვლებათ.
