გარემოს დაცვისა და სოფლის მეურნეობის მინისტრი, ლევან დავითაშვილი ამბობს, რომ ონის კასკადზე პოლიტიკური ჯგუფებისა და არასამთავრობო ორგანიზაციების გავრცელებული ინფორმაცია ,,მოღალატეობრივია” და ,,დეზინფორმაციულია.
მისი თქმით, არც მთები ფეთქდება და არც მდინარე რიონი იკარგება.
“გარემოს დაცვითი ყველა პირობა ჩვენს ნებართვაში 100 პროცენტით გათვალისწინებულია. როდესაც საუბარია, რომ რამდენიმე წელი მიმდინარეობდა განხილვა და მარტში გაიცა [ნებართვა], ეს იყო რამდენჯერმე გადავადებული იმიტომ, რომ რამდენიმეწლიანი შესწავლა უძღოდა გადაწყვეტილებას”, — თქვა დავითაშვილმა.
მინისტრი აღნიშნავს, რომ რიონი მილებში არ მოექცევა და ჰესები იმ პირობით აშენდება, რომ შენარჩუნდეს მდინარის კალაპოტი და ეკოსისტემა.
,,მდინარე რიონი ინარჩუნებს თავის კალაპოტს და იმ ეკოსისტემას აუცილებლად შევინარჩუნებთ, მხოლოდ ამ პირობით აშენდება ჰესი. ასევე ჰესის აშენებას. ჰესის აშენების პირობაა ასევე ის, რომ მინერალური წყლები, რომლებიც რაჭაშია და რომლითაც რაჭა ამაყობს უნდა იყოს დეტალურად შესწავლილი და არც ერთი სამშენებლო სამუშაო არ უნდა ჩატარდეს ისე, რომ რაიმე ტიპის ზემოქმედება მოხდეს ასეთ წყლებზე. ასე რომ ხშირ შემთხვევაში დეზინფორმაცია, რომელსაც ჩვენ ვისმენთ, უბრალოდ არის ძალიან უპასუხისმგებლო“, – განაცხადა დავითაშვილმა.
,,ონის კასკადის” განმარტებით, მარტში სამინისტრომ არა მშენებლობის ნებართვა, არამედ გარემოსდაცვითი გადაწყვეტილება გამოსცა, რაც მშენებლობის ნებართვის პროცედურის ერთ-ერთი ნაწილი. კომპანიის ინფორმაციით, პროექტით იჩეხება არა 25 ჰექტარი ტყე, არამედ 1,064 მ3 მერქნული რესურსი. ისინი უარყოფენ, რომ გვირაბი სოფლის თავზე გავა და ამისთვის მთებს აფეთქებენ, კასკადის მშენებლობისთვის არ იგეგმება მდინარე რიონის დაშრობა და არც უწერის მინერალური წყლები განადგურდება.
მდინარე რიონზე ონის ჰესების კასკადს სს „ონის კასკადი“, შპს „ფერი“ და თანაინვესტირების ფონდი აშენებს. პროექტის მიხედვით, დაგეგმილია ორსაფეხურიანი, მდ. რიონის ბუნებრივ ჩამონადენზე (წყალსაცავის გარეშე) მომუშავე ჰესების კასკადის მშენებლობა და ექსპლუატაცია. კასკადის მშენებლობას ადგილობრივი მოსახლეობა, გარემოს დამცველები და არასამთავრობო სექტორი აკრიტიკებს.
