ინდონეზიური ავიაკომპანია Sriwijaya Air–ის თვითმფრფინავმა, რომელიც ჯაკარტადან პონტიანაკში მიფრინვდა, აფრენიდან მალევე, 4 წუთში მკვეთრად –(10 წუთში 3 ათასი მეტრი) დაკარგა სიმაღლე და რადარების ეკრანებიდან გაქრა. არსებობენ კატასტროფის თვითმხილველები, თუმცა თვითმფრინავის ზღვაში ჩავარდნის ზუსტი ადგილი ჯერ დადგენილი არ არის.
ბორტზე 50 მგზავრი იმყოფებოდა, მათ შორის 10 სხვადასხვა ასაკის ბავშვი და ეკიპაჟის 12 წევრი, სულ 62 ადამიანი.
არსებული ინფორმაციით თვითმფრინავს ცენტრისთვის კატასტროფის მანიშნებელი სიგნალი არ გაუგზავნია. ინდონეზიის ხელისუფლება სამძებრო–სამაშველო ოპერაციას ატარებს.
ადგილობრივი მედია ტრანსპორტის მინისტრის პასუხს ციტირებს კითხვაზე, ადასტურებს თუ არა ის თვითმფრინავის ჩამოვარდნის შესახებ ინფორმაციას:
“დიახ, ეს კუნძულ მალეს სიახლოვეს მოხდა“.
თუმცა, ინდონეზიის ხელისუფლებას ჯერჯერობით ოფიციალური განცხადება არ გაუკეთებია.
ტრანსპორტის სამინისტროს განცხადებაში ნათქვამია, რომ დაკარგულ თვითმფრინავთან დაკავშირებით ამჟამად გამოძიება მიმდინარეობს ნაციონალურ სამაშველო სააგენტოსთან და ტრანსპორტის უსაფრთხოების ნაციონალურ კომიტეტთან კოორდინაციით.
მედიის ინფორმაციით საძიებო სამუშაოებში ჩართულია სამხედრო თვითმფრინავები და გემები.
ადგილობრივმა მეთევზემ მედიას უამბო, რომ კატასტროფის თვითმხიველი გახდა, რის შემდეგაც თევზსაჭერი გემის კაპიტანმა ხმელეთზე დაბრუნება გადაწყვიტა:
“თვითმფრინავი როგორც მეხი ისე დაეცა ზღვაში და წყალზე აფეთქდა. ეს ჩვენგან ძალიან ახლოს მოხდა. ნამსხვრევები კინაღამ ჩვენს ნავს მოხვდა“– თქვა მან.
ადგილობრივებმა ჟურნალისტებს აცნობეს, რომ ზღვაში უკვე ნაპოვნია ნამსხვრევები და ტანსაცმლის ფრაგმენტები. ჯერჯერობით არ არსებობს ოფიციალური დადასტურება, რომ ეს ნამსხვრევები დაკარგული თვითმრინავის არის.
საუბარია ბოინგ 737-500–ზე, რომელმაც პირველი ფრენა 1994 წელს შეასრულა. ეს იგივე მოდელია, რომელიც ბოლო ორი წლის მანძილზე ორი ავიაკატასტროფის გამო სკანდალში აღმოჩნდა გახვეული.
ინდონეზიის სანაპიროსთან დაკარგული ბოინგ 737 უფრო თანამედროვე 737 Max–ში არ უნდა აგვერიოს, რომლის გამოშვება 2018 და 2019 წლებში ორი ტრაგიკული შემთხვევის შემდეგ შეჩერდა, რომელთაგან ერთი ინდონეზიის სანაპიროსთან მოხდა.
რეისს Sriwijaya Air ბოინგის 737-500 მოდელის თვითმფრინავით ასრულებდა, რომელიც 737–ის მეორე თაობის, კლასიკურ სერიას მიეკუთვნება. ეს თვითმრფინავები 1980-1990 წლებში შეიქმნა. მან “მუშა ცხენის “ რეპუტაცია დაიმსახურა და უსაფრთხოების მაღალი პარამეტრები აქვს.
თვითმფრინავი 26 წლის იყო. მართალია ავიაკომპანიები ახალი თვითმფრინავების გამოყენებას ამჯობინებენ ექსპლუატაციის დაბალი ხარჯების გამო, მაგრამ ამ ასაკის ლაინერებსაც ხშირად შეხვდებით.
ინდონეზიას ფრენების უსაფრთხოების შედარებით დაბალი მაჩვენებელი აქვს. ამ რეგიონიდან ათზე მეტ გადამზიდავს ევროკავშირში ფრენა აკრძალული ქონდა. თუმცა მოგვიანებით ჩაითვალა, რომ ავიაფრენების სტანდარტი ქვეყანამ გააუმჯობესა და 2018 წლიდან ყველა ინდონეზიური ავიაკომპანია ევროკავშირის შავი სიიდან ამოიღეს.
