Category: სხვადასხვა

მთავარი არხის წამყვანი, ეკა კვესიტაძე კარანტინის მიუხედაავად ეკლესიებში ხალხმრავლობას და ხელისუფლების პასიურობას ფეისბუქ სტატუსით აფასებს:

“მეგობრებო, ძალიან კარგად უნდა გვესმოდეს, რომ რასაც დღეს ეს ხელისუფლება აკეთებს, არის საკუთარი მოქალაქეების და პირველ რიგში, სამედიცინო პერსონალის წინააღმდეგ ჩადენილი ტერორისტული აქტი. ის ეროვნული წარმოების პირბადეები, რომელიც ერთჯერადი მოხმარებისთვის ექიმებს და ექთნებს დაურიგეს, არის სრულიად უვარგისი და არის ამ ადამიანების გაწირვა მძიმე დაინფიცირებისთვის. ანუ ექიმების დიდი ნაწილი არის სრულიად დაუცველი ვირუსთან საბრძოლველად. ამ ფონზე რელიგიური რიტულების დაშვება არის პირველ რიგში, სამედიცინო პერსონალის და მერე ჩვენი მსხვერპლად შეწირვა პოლიტიკური კონიუქტურისთვის. ეს არის წარმოუდგენლად დიდი დანაშაული საკუთარი ხალხის მიმართ, რომელიც აუცილებლად, აუცილებლად სათანადოდ უნდა დაისაჯოს. ექიმებო, ამოიღეთ ხმა, პირველ რიგში, თქვენი სიცოცხლეა საფრთხის ქვეშ.“– წერს ეკა კვესიტაძე

როგორ ატარებს თეონა კონტრიძე თვითიზოლაციას: რუსეთში მცხოვრებმა ქართველმა მომღერალმა თვითიზოლაციის პერიოდზე, მსოფლიო პანდემიის შესახებ მის მოსაზრებებზე, რუსეთში არსებულ ვითარებაზე მთავარი არხის ეთერში ისაუბრა. ის ამბობს, რომ პროფესიაში გამომუშავებული დისციპლინა ამ პერიოდში ძალიან დაეხმარა. ყოველდღე იღვიძებს 9 საათზე და დღეში 7–დან 9 კილომეტრამდე სახლში სარბენ ბილიკზე დარბის. მისი აზრით დღეს გადარჩენა დისციპლინაშია.

“მოსკოვი შეშინებულია. ისე არა რა თქმა უნდა, როგორც ევროპა, იმიტომ რომ ეტყობა ჩვენ, საბჭოელებს კიდევ სხვა იმუნიტეტი გვაქვს. არც შიმშილის გვეშინია და არც ავადმყოფობის, ჩვენს გენომში ეს სტრესი იმდენად შესულია, რომ ზემოქმედება ვერ მოახდინა ისეთი სიძლიერით და ისეთი ტემპებით, როგორც ევროპაზე, ვერც შთაბეჭდილება.

ხვალ იქნება ერთი თვე, რაც კონცერტი არ მქონია.

15 წლიდან ვმუშაობ და არასდროს ასეთი ფაზა არ მქონია. სქელ წიგნებს დავერიე და დავბდღვენი, საღვთისმეტყველო ლიტერატურას ვკითხულობ იმას, იმას რასაც ვერასოდეს ვერ ვუთმობდი დროს ჩვეულებრივი ყოფის დროს.

ასკეტიზმი ჩემთვის ძალიან ორგანული ამბავია. ბუდისტები.. ინდუისტები… რა მონასტრებში აღარ ვარ ნაცხოვრები. ჩემთვის სიჩუმე და განცალკევება არ არის პრობლემა. აი, უმუშევრობაა დიდი პრობლემა.

მე მაქვს დანაზოგი და  უფულობის შიში მაინც არ მაქვს, ამიტომ მივიღე გადაწყვეტილება ყოველთვიურად ჩემს შვიდ ბიჭს, ჩემს მუსიკოსებს გადავურიცხო ფული. და ყველა მომღერალმა, ვისაც აქვს დანაზოგი ეს უნდა გააკეთოს,  იმიტომ რომ ეს არის გადარჩენა. იმიტომ რომ მე არ ვიცი როგორ შეიძლება პირში ლუკმა ჩავიდო, როცა ჩემი ბასისტი, ჩემი საქსაფონისტი, რომლებიც ჩემთან არიან 2002 წლიდან და გაიარეს ყველაფერი, ამხელა სიყვარულით, ამხელა პატივისცემით, როგორ შეიძლება ამ დროს მე ისინი დავივიწყო.

მუსიკოსები და ხელოვანი ადამიანები სპირიტუალური ასპექტით ვუდგებით ამ ყველაფერს, სხვა ვერტიკალში ვართ და გამომდინარე აქედან ვხვდებით, რომ ეს არ არის მხოლოდ გეოპოლიტიკური და ფარმაცევტული ომი. ეს არის სპირიტუალური ფრონოტი და ყველა ამას ძალიან კარგად ვხვდებით. ჩვენ მზად ვართ ამისთვის.

მე როგორც მუსიკოსი და არა მარტო მუსიკოსი, არამედ პროდიუსერი ვეტყოდი ჩემს კოლეგებს, რომ როგორც გული მიგრძნობს მომავალი არის პატარა ფორმის. პატარა ფორმაში გადავალთ ალბათ უფრო. ალბათ უფრო გაიხსნება ხელოვანი, რამეთუ  ფული არ იქნება ფიზიკურად რაღაც დიდი პერიოდი. ამიტომა ტვინი იფიქრებს სხვა მიმართულებით.

ჩვენ ძალიან გავთამამდით ივენთებით. მე მთლიანად გადავინაცვლე ივენთ ბიზნესში ჩემზე ბეტ მიდლერმა უფრო დიდი გავლენა მოახდინა, ვიდრე უიტნი ჰიუსტონმა. მე მომღერალ კომიკად უფრო ვგრძნობ თავს, ვიდრე რაღაცა , ჯაზის და სოულის შემსრულებლად, ეს მე აღარ მაინტერესებს. მე კაბარე ვარ.

სულ მინდოდა რომ ჩემი კაბარე მქონოდა და დადგება ახლა ალბათ ის დრო, როდესაც ჩვენ დავიწყებთ კაბარეზე ფიქრს, იმიტომ რომ პოსტმოდერნიზმი იმარჯვებს. ექნება დიდი ადგილი ცინიზმს, პოლიტიკურ სატირას.

რაღაც იბადება ისეთი, რაც ერთის მხრივ საშიშია ბევრისთვის და მეორეს მხრივ დაბრიდავს ბევრ რამეს, რაც აქამდე უნდა მომკვდარიყო.

გემოვნების მხრივ უკეთესობისკენ წავალთ. როდესაც ფული აღარ იქნება. რაც ნაკლები ფულია ქვეყანაში, მით უფრო მეტი გემოვნებაა.

როდესაც ფული გეგულება, ფიქრობ იმაზე ის ფული როგორ ჩაიგდო ხელში და შენს რეპერტუარსაც და შენს ქმედებასაც ადაპტაციას უკეთებ. და როდესც ფული ფიზიკურად არ არის, შენ ფიქრობ შენს რესურსზე და იმაზე, რა გინდა, იმიტომ რომ ფული მაინც არ არის.

ყველაზე დიდი ბედნიერება რუსეთის ცხოვრებაში რაც მოხდა, მოხდა ის, რომ ბარელი დავარდა, დაენარცხა, დედა ეტირა.რუსეთი  ყოველთვის ბუნებრივ რესურსზე იყო დამოკიდებული, რუსეთს ღმერთმა მისცა ყველაფერი გემოვნების გარდა. საქართველოს არაფერი არ მისცა გემოვნების გარდა.

ერთი თვის განმავლობაში რაზეც ვფიქრობთ მე, ჩემი მეუღლე და ჩემი შვილები არის საქართველოში წამოსვლა. ყოველთვის ვფიქრობდით, მაგრამ როდის დადგებოდა დრო არ ვიცოდით.

მე ჩემი ინტელექტუალური ინვესტიცია, ჩემი გამოცდილება, ყველაფერი, რაც დაგროვილი მაქვს მინდა რომ საქართველოს მოვახმარო, მინდა რომ გადავცე ხალხს რაც მე ვიცი.

გაიხსნას საზღვრები, დავფიქრდეთ მაგ თემაზე როგორ შემოვძვრეთ, იმიტომ რომ ჯერჯერობით პროგნოზები ცუდია მაგ თემაზე, საზღვრების გახსნაზე და ჩვენ დავიძვრებით და შევხედავ, როგორ შემიძლია ოკეანის შემდეგ პატარა მდინარეში ცხოვრება. ძალიან გადაჩვეული ვარ, ჩვიდმეტი წლიდან წასული ვარ ბაბილონში.“– ამბობს თეონა კონტრიძე.

ჰოსპიტალში მოხვედრილი კორონავირუსით დაინფიცირებული პაციენტები ხშირად საკმაოდ მძიმე ფსიქოლოგიურ მდგომარეობაში, შეშინებულები არიან. გარდა იმისა, რომ ახლობელ ადამიანებთან კონტაქტი არ აქვთ, საავადმყოფოს მედპერსონალის სახეებსაც კი ვერ ხედავენ – ისინი სპეციალურ ნიღბებში, სპეცტანსაცმელში, ქუდებში და სხვა დამცავ საშუალებებში არიან დამალული, რაც პაციენტებს კიდევ უფრო თრგუნავს.

რესპირატორულმა თერაპევტმა, რობერტო როდრიგესმა სან დიეგოს სქრიფს მერსის ჰოსპიტალიდან საკუთარი მომღიმარი ფოტოს ლამინირება გააკეთა და  მკერდზე დაიმაგრა. ამით სცადა პაციენტები კარგ ხასიათზე დაეყენებინა. საკუთარი იდეა მან ინსტაგრამზე გააზიარა და მოწონებაც დაიმსახურა:

“დამამშვიდებელი ღიმილი შეშინებული პაციენტისთვის ძალიან მნიშვნელოვანია. ამიტომაც გავაკეთე ჩემი უზარმაზარი ლამინირებული ბეიჯი ჩემი სამედიცინო ფორმისთვის. ასე რომ, ჩემს პაციენტებს შეუძლიათ დაინახონ ჩემი დამამშვიდებელი და გამამხნევებელი ღიმილი“–დაწერა მან.

როდრიგესის იდეამ სხვა მედიკოსების მოწონებაც დაიმსახურა. ლოს ანჯელესის საავადმყოფოს ექთანმა, დერეკ დე ვოლტმა და მისმა კოლეგებმა იდეას შესანიშნავი უწოდეს და კოლეგას მიბაძეს.

“კორონავირუსით დაავადებული პაციენტები ჰოსპიტალში სრულიად მარტო არიან. მნახველები მათთან არ დაიშვებიან. სამედიცინო პერსონალი კი თავიდან ბოლომდე შეფუთულია დამცავ საშუალებელში. როცა პაციენტი ხედავს, ვინ იმალება ნიღბების უკან უფრო მშვიდდება ამ მძიმე და სტრესით სავსე პერიოდში“– უთხრა მან სიენენს.

14 წლის ინდოელმა ასტროლოგმა ბიჭმა, აბიგიამ 2019 წლის 22 აგვისტოს მის იუთუბის არხზე ატვირთა ვიდეო სახელწოდებით სასტიკი საფრთხე მსოფლიოსთვის 2019 წლის ნოემბრიდან 2020 წლის აპრილამდე. ვიდეოში ახალგაზრდა ინდოელი ასტროლოგი ბევრ საკითხზე საუბრობს, ამავე დროს  ამბობს,  რომ 2020 წელს ბიოლოგიური ომი მოხდება. თინეიჯერი ასევე წინასწარმეტყველებს, რომ საავტომობილო ინდუსტრია 2020 წელს სერიოზულად დაზარალდება.

“ამ ვიდეოში მინდა მოგიყვეთ საფრთხის შესახებ , რომელიც ემუქრება დედამიწას დროით ჩარჩოში – 2019 წლის ნოემბერსა და 2020 წლის აპრილს შორის. მინდა მოგიყვეთ მოსალოდნელი კატასტროფის შესახებ. ამ წინასწარმეტყველებას ვაკეთებ ასტროლოგიის დახმარებით რომელიც ციური სხეულების მოძრაობას და ურთიერთმდებარეობას შეისწავლის.

სავარაუდოდ კრიზისის კულმინაცია 31 მარტი გახდება, ჩინეთში სერიოზული დაძაბულობა იქნება.

ვიეტნამი, ჩრდილოეთ კორეა, პაკისტანი , აშშ, გაერთიანებული სამეფო, ისრაელი, საუდის არაბეთი. მდიდარი და განვითარებული ქვეყნების ეკონომიკა დანგრეულია, ბევრი ადამიანის ცხოვრება ძალიან შეიცვლება. ეს გლობალური კარმის ანარეკლია და ის არასერიოზულად არ უნდა მივიღოთ. რა თქმა უნდა, პლანეტები არ აპირებენ ჩვენს მოკვლას და განადგურებას: 29 მაისს პლანეტარული ღერძი იცვლება და მსოფლიოში სიტუაცია გამოსწორდება. მე მჯერა, რომ ყველაფრიდან მოიძებნება გამოსავალი, თუმცა ადამიანებს დიდი ძალისხმევა დაჭირდებათ მის მოსაძებნად.“ – თქვა ბიჭმა.

ვიდეოსთვის თავიდან ყურადღება არავის მიუქცევია, სანამ კორონავირუსის შესახებ არ გახდა ცნობილი, რომელმაც მსოფლიოში ქაოსი გამოიწვია. ებიგიას ვიდეოს ყურების შემდეგ ბევრი ირწმუნება, რომ ახალგაზრდა ასტროლოგმა სწორედ კორონავირუსის ეპიდემია იწინასწარმეტყველა. ვიდეო ინტერნეტში ვირუსული გახდა, ბიჭის პოპულარობა კი იმდენად გაზარდა, რომ დასავლეთის ქვეყნებსაც მიაღწია.

ამის შემდეგ ბიჭმა კიდევ ერთი ვიდეო გამოაქვეყნა, რომელშიც თქვა, რომ მსოფლიო მომსწრე გახდება იმის, რომ მარტის ბოლოს და აპრილის დასაწყისში გამწვავების შემდეგ 29 მაისისთვის კორონავირუსის ეპიდემია დასრულდება.

რამდენიმე დღეში კი მან მესამე ვიდეო გამოაქვეყნა, რომელშიც მსოფლიოს 2020-2021 წლების წინასწარმეტყველებას მიუძღვნა, თუმცა ამ ვიდეოში მანამდელი წინასწარმეტყველების კორექტირებაც მოახდინა და თქვა, რომ 29 მაისს კორონავირუსი კი არ დასრულდება, არამედ შემცირებას დაიწყებს, რაც არ ნიშნავს რომ მაინცდამაინც ამ დღეს დასრულდება და ბევრმა მისი სიტყვების არასწორი ინტერპრეტირება მოახდინა.

რადიო თავისუფლების ჟურნალისტი, სალომე ასათიანი სოციალურ უთანასწორობაზე წერს, რომელიც პანდემიის დროს გამოცხადებული კარანტინის და თვითიზოლაციის ფონზეადამიანებს კიდევ უფრო უთანასწორო მდგომარეობაში აყენებს .

“მოვა დრო და ამ “დარჩი სახლში” ლოზუნგს რომელიმე სოციოლოგი აუცილებლად გამოიყენებს მძვინვარე უთანასწორობის და უსამართლობის გასაანალიზებლად. ინტერნეტი წაიღო სუპერმდიდარი “სელებრითების” ვიდეოებმა, რომელიმე ოკეანის ხედის ფონზე, სასახლეებიდან რომ მოგვიწოდებენ შინ დავრჩეთ და საკუთარ თავს მედიტაციურად ჩავუღრმავდეთ სიმშვიდის და “ცენტრის” მოსაპოვებლად. საშუალო კლასი – ვისაც გაუმართლა და სამსახური ჯერ კიდევ აქვს – ბინებშია გამოკეტილი, სტრესში, და დაძაბულად ცდილობს ზუმში შეხვედრების, იმეილების თუ ანგარიშების წერის შეთავსებას ენერგიული ბავშვების მოვლასთან და სახლის საქმესთან. “დაბალი” სოციალური კლასები კი სახლებში ვერ რჩებიან, რადგან მათ გარეშე მართლა ყველაფერი გაჩერდება. ექთნები, სანიტრები, დამლაგებლები, ხაბაზები, მუშები, მტვირთავები, გამყიდველები, აფთიაქარები მიზერულ ხელფასზე მუშაობას აგრძელებენ, საკუთარი ჯანმრთელობით გარისკვის ფასად. მართლა სევდიანია ეს ყველაფერი. თან სოციოლოგი კი დაწერს, მაგრამ შრომის დაფასება და უსამართლო გადანაწილება არ შეიცვლება, არც პანდემიის დასრულების მერე.“– წერს სალომე ასათიანი სოციალურ ქსელში.

ინტერნეტში სწრაფად გახდა პოპულარული ფოტო, რომელიც ტვიტერზე ინდოელმა სუდჰა რამენმა გამოაქვეყნა. ფოტო ერთ–ერთ საავადმყოფოშია გადაღებული და ექიმების წყვილის ემოციებს ასახავს, რომლებიც დამცავ სამოსში და ნიღბებში არიან გამოწყობილი. სუდჰა რამენმა ეს ფოტო იმ ადამანების თავდადების ხაზგასასმელად გამოაქვეყნა, ვინც კორონავირუსის პანდემიასთან ბრძოლის წინა ხაზეეა.

“მიესალმეთ მთელ მსოფლიოში სამედიცინო პერსონალს. ეს არის წყვილის ფოტო, რომელიც დღე და ღამე მუშაობს კოვიდ 19–თან გასამკლავებლად. ეს ფოტო ბევრზე მეტყველებს. მათ შეუძლიათ ერთმანეთს მხლოდ დამცავი ნიღბებით შეეხონ.“– წერს ის ტვიტერზე.