Category: სხვადასხვა

აშშ-ში მცხოვრები ქართველი ექიმი ნანა გეგეჩკორი, რომელიც The Mount Sinai Hospital –ში მუშაობს,    ქართველ კოლეგებს კორონავირუსთან ბრძოლაში საკუთარ გამოცდილებას უზიარებს. ნანა გეგეჩკორი კორონავირუსით დაინფიცირებულ პაციენტებთან მუშაობდა, ვირუსი მასაც გადაედო და ცოტა ხნის წინ განიკურნა. ნანა გეგეჩკორი სოციალურ ქსელში წერს იმის შესახებ, როგორ ახერხებენ ამერიკაში სამედიცინო დაწესებულებები მედპერსონალის საჭირო რაოდენობის მობილიზაციას.

“თვალი მოვკარი წუხილს რამდენად ცოტა ინფექციონისტი ან რეანიმატოლოგი ჰყავს საქართველოს და რა მცირეა პაციენტების რიცხვი ვისი მოვლაც მათ შეუძლიათ.
მძიმე ეპიდემიის მართვისთვის არაა აუცილებელი ინფექციონისტების ან რეანიმატოლოგების არმია.

ჩემი ჰოსპიტლის გამოცდილებიდან…

პაციენტების პირველი ნაკადი მედიცინის დეპარტამენტმა მიიღო. როგორც კი მივხვდით ნაკადის გეომეტრიული პროგრესიით ზრდის ტენდენციას, სასწრაფოდ დაიწყო ჰოსპიტლის გადაწყობა ახალი რეალობის შესაბამისად. ქირურგიის, ორთოპედიის, გინეკოლოგიის, პედიატრიის, ფსიქიატრიის განყოფილებები გადაკეთდა კოვიდ უნიტებად და მედიცინის ჯგუფის უკვე გამოცდილი რეზიდენტები და ექიმები ჩაუდგნენ სათავეში ამ დეპარტამენტებს. ორ კვირაში გადავამზადეთ ორთოპედიის, ქირურგიის, ფსიქიატრიის, პედიატრიის რეზიდენტები იმ დონემდე რომ დამოუკიდებლად შეძლებოდათ კორონავირუსით გამოწვეული პათოლოგიის მართვა. ყველა ასეთ დეპარტამენტს ზედამხედველად ყავს მედიცინის მესამე წლის რეზიდენტი, რომელიც უკვე დამოუკიდებელი ექიმია (სულ რაღაც ორთვეში აქვს ყველას სალიცენზიო გამოცდა). მას ჰყავს ორი ან სამი (იუნიტის სიდიდის მიხედვით) ჯგუფი რეზიდენტების, რომელიც შედგება ერთი ჯუნიორ და ერთი სენიორ რეზიდენტისგან. ეს ნაკრები მართავს დაახლოებით 60 პაციენტს. მედიცინის რეზიდენტები მართავენ ასევე ახლადგახსნილ ინტენსიური თერაპიის განყოფილებებს.

რეზიდენტურაში ყველას გვაქვს ბრწყინვალე გამოცდილება ინტენსიური თერაპიის განყოფილების მართვის, იმდენად რომ მესამე წლის ნებისმიერ რეზიდენტს შეუძლია იყოს აბსოლუტურად დამოუკიდებელი ინტენსივისტი. კარდიოლოგიის, გასტროენტეროლოგიის, ენდოკრინოლოგიის, რევმატოლოგიის ფელოები მუშაობენ მედიცინის დეპარტამენტში და იკავებენ სენიორ რეზიდენტების ან უფროსი ექიმების პოზიციებს. ინექციურის ფელოები ასრულებენ კონსულტანტების როლს მთელი ჰოსპიტლისთვის. მათი უშუალო სიახლოვე პაციენტთან საერთოდ არაა საჭირო. უმეტესად ასეთ კონსულტაციას ვიღებთ ტელეფონით. ასევე ისინი მართავენ ტექნიკურად კლინიკურ კვლევებში პაციენტების ჩართვის პროცესს, რაც გულისხმობს რამდენიმე, უკვე ყველასთვის ცნობილი ახალი პრეპარატის გამოყენებას. ამ პრეპარატების გამოყენებას მათი წერილობითი დასტური სჭირდება. ეს უზრუნველჰყოფს პაციენტების ზედმიწევნით ზუსტად შერჩევას მკურნალობის ამა თუ იმ მეთოდისთვის.
მოკლედ ასეთი ფორმულით მუშაობს ჩემი ჰოსპიტალი. ჩვენ უკვე მოვემსახურეთ 800–ზე მეტ უმძიმეს პაციენტს. გავწერეთ 300-ზე მეტი კარგ მდგომარეობაში. ამ წუთას ჰოსპიტალში 180-მდე პაციენტია მართვით სუნთქვაზე.

ზოგადად ამერიკაში საუნივერსიტეტო ჰოსპიტლების გამწევი ძალა არის რეზიდენტი და ფელოუ. უფროსი ექიმი არის მხოლოდ ზედამხედველი. რეზიდენტი არის აბსოლუტურად დამოუკიდებელი გადაწყვეტილებების მიღების პროცესში, რა თქმა უნდა უფროსი ექიმი უმაგრებს ზურგს საჭიროების შემთხვევაში. პულმონოლოგიის და კრიტიკული მედიცინის ფელოები ზედამხედველობენ ინტენსიური თერაპიის განყოფილებებს, ასეთი 5 აქვს ამ წუთას ჰოსპიტალს.
მოკლედ, მთავარია დროზე გადაამზადონ სხვა და სხვა ვიწრო სპეციალობების ექიმები და გადააჯგუფონ ჰოსპიტლები შესაბამისად.

არ სჭირდება ეპიდემიის მართვას ინფექციონისტების და ინტენსივისტების არმია!
და კიდევ, მთავარია ექიმი იყოს ზედმიწევნით კარგად დაცული შესაბამისი აღჭურვილობით და არსებობდეს რეზერვის კარგად გათვლილი ჯგუფი ექიმების და ექთნების ავადმყოფობის პირობებში (რაც სამწუხაროდ გარდაუვალია).

და ყველაზე მთავარი, ქვეყანამ უნდა მოიმარაგოს საჭირო რაოდენობით მართვითი სუნთქვის აპარატები და გადაამზადოს ყველა ზემოთჩამოთვლილი სპეციალობის ექიმი მისი გამოყენებისთვის!“– წერს ნანა გეგეჩკორი.

შინაური ცხოველების, კერძოდ ძაღლების და კატების მფლობელებს უფრო ადვილად, ხშირ შემთხვევაში კი სრულიად უსიმპტომოდ გადააქვთ კორონავირუსი Covid19. ასეთი განცხადება გააკეთა პოლონელმა ექიმმა, საბინა ოლექს–კონდორმა, რომელიც მადრიდის ერთ–ერთ კლინიკაში მუშაობს.

მისი აზრი კორონავირუსით დაინფიცირებული 100 პაციენტისგან შემდგარ ჯგუფზე დაკვირვებას ეფუძნება. ექიმი ვარაუდობს, რომ ბეწვთან და ნერწყვთან მუდმივი კონტაქტის გამო ძაღლების და კატების პატრონთა იმუნიტეტი სხვადასხვა პათოგენების მიმართ უფრო მდგრადია.

“ეს საკითხი შემდგომ შესწავლას მოითხოვს, თუმცა არსებობს ვარაუდი, რომ შეიძლება საქმე გვქონდეს  მაღალ იმუნიტეტთან ცხოველებისთვის დამახასიათებელ სპეციფიურ კორონავირუსებთან  მუდმივი კონტაქტის გამო, რაც იმუნური სისტემის უფრო ეფექტურად მუშაობას იწვევს“– ამბობს ექიმი.

გარდა ამისა, ის აღნიშნავს რომ ასეთი ტენდენცია აღინიშნება მედიკოსებს შორისაც. კერძოდ, მათ შორის, ვისაც სახლში კატები ყავთ ყველაზე ნაკლები ინფიცირებულია მაშინ, როცა ყველაზე მეტად ის ექიმები ინფიცირდებიან, ვისაც სახლში ცხოველი არ ყავთ.

ერთ–ერთი თეორია კატების და ძაღლების მოყვარულთა მომეტებული მდგრადობის შესახებ საშიში დაავადების მიმართ ჯვარედინ რეაქციას ეფუძნება. ცნობილია, რომ კატებში არსებობს კატების კორონავირუსის ფორმა, რომელიც ადამიანზე არ გადადის. ამიტომაც შესაძლებელია ადამიანებს, ვისაც ყოველდღიური ახლო ურთიერთობა აქვთ ვირუსის მატარებელ კატებთან, კატის ვირუსის მიმართ ანტისხეულები გამოუმუშავდებათ. და ამ სხეულებს ადამიანის ვირუსის განადგურებაც შეუძლიათ. ეს მოვლენა ბუნებაში არსებობს და მას ჯვარედინ რეაქციას უწოდებენ. რა თქმა უნდა, ამ ვარაუდის დასადასტურებლად სიღრმისეული კვლევაა საჭირო.

ზოგადად კი მედიკოსები აღნიშნავენ, რომ კატებთან, ძაღლებთან, ჩიტებთან, თევზებთან, სხვა შინაურ ცხოველებთან ურთიერთობა და მათი მოვლა ადამიანის იმუნიტეტის გაძლიერებას ასტიმულირებს. ამას ხელს უწყობს ბეწვთან, ფრთებთან, ნერწყვთან და მიროორგანიზმებთან მუდმივი კონტაქტი, რომლებიც ცხოველების ორგანიზმში ბუდობენ. უფრო მეტიც, ის ადამიანები, ვინც ბეწვიან ცხოველებთან ერთად ცხოვრობენ, რომლებსაც მუდმივი გასეირნება ესაჭიროებათ, მუდმივად იღებენ კარგი იმუნიტეტისთვის საჭირო ფიზიკური აქტივობის აუცილებელ პორციას, რასაც თავისი წვლილი შეაქვს აორგანიზმის დაცვითი მექანიზმების ფორმირებაში.

საზოგადოებრივი კომუნიკაციების მართვის სპეციალისტი, არჩილ გამზარდია თვლის, რორმ ხელისუფლება პანდემიასთან დაკავშირებულ სიტუაციას საკუთარი ძალაუფლების გასამყარებლად იყენებს, საპატრიარქო კი ამაში ხელს უწყობს:

“ხელისუფლებას სინამდვილეში მაქსიმალურად აწყობს მიზეზები იმისთვის, რომ საგანგებო მდგომარეობაც გაახანგრძლივოს და შეზღუდვებიც უფრო და უფრო გაამკაცროს, თან სხვებს აბრალოს.

საპატრიარქოს ჰგონია რომ ხელისუფლება საპატრიარქოს თამაშს თამაშობს, სინამდვილეში კი ყველაფერი პირიქითაა. საპატრიარქო, თავის უგუნურებით უხვ და ნოყიერ მასალას აძლევს ხელისუფლებას კიდევ უფრო გაამკაცროს ძალაუფლება და ტოტალიტარიზმი სახელმწიფოში.

ამ უგუნურების გამო, საპატრიარქო გამოვა ყველაფერში დამნაშავე, მის წინააღმდეგ მიმართავს ხელისუფლება საზოგადოების რისხვას, ხელისუფლება კი უსუსურ, ჩაგრულ, მაგრამ კეთილგონიერი პერსონაჟის იმიჯს შეიქმნის.

ტელეკომპანია “მთავარი არხის” გენერალური დირექტორის, ნიკა გვარამიას დაცვის წევრმა სიცოცხლე სუიციდით დაარულა.

30 წლის თემო სამხარაძე, რომელიც ნიკა გვარამიას დაცვის წევრი და მძღოლიც იყო, დღეს თავი ჩამოიხრჩო. არსებული ინფორმაციით, მომხდარის მიზეზი ოჯახური კონფლიქტი გახდა.

“გუშინ, ამ დროს, ბედნიერი იყო. 6 საათზე მეგობრებს ეს ფოტო ჩაგვიგდო, თავისი საყვარელი საბასი.

არ ვიცი, რა მოხდა მერე, რა ჯოჯოხეთი დატრიალდა, მაგრამ ამ დილით გადაწყვიტა, რომ უნდა დავეტოვებინეთ და მუდმივი ტკივილი მოესაჯა ყველასთვის, ვისაც გვიყვარდა და გვჭირდებოდა.

დაცვის წევრი და მძღოლი არა, დავკარგე ახლო მეგობარი, მარჯვენა ხელი, ჩემი ოჯახის მოყვარული და გულშემატკივარი, ჩემი ბრძოლის თავდადებული ჯარისკაცი – თემო სამხარაძე.

არასდროს დამავიწყდები, იძინე მშვიდად,”- წერს ნიკა გვარამია სოციალურ ქსელში.

ფილოსოფოსი ზაზა ფირალიშვილი აფასებს საპატრიარქოს გადაწყვეტილებას, არ შეწყვიტოს ღვთისმსახურება და სასულიერო პირების მოწოდებას მრევლმა ტაძრებში იაროს. მისი აზრით, ყველას აქვს ინდივიდუალური არჩევანის უფლება, თუმცა არავის აქვს უფლება სხვისი სიცოცხლე საფრთხის ქვეშ დააყენოს ან მისცეს ტყუილი იმედი, რომ საფრთხე არ ემუქრება:

“გულწრფელად ვამბობ: ძალიან მიჭირს იმის თქმა, რასაც ახლა დავწერ.
ვერავინ დაუშლის ქრისტიანს ქრისტესთვის მოკვდეს. ქრისტიანობის ძალა იმთავითვე ეს იყო: ერთეულთა უნარი, სიხარულით შეხვედროდენ სიკვდილს და თავის ღმერთს. ეკლესია იმთავითვე ამ ადამიანების ძალას ეყრდნობოდა. ცხადია, არაქრისტიანებისათვის ეს გაუგებარი იყო. მათ არ ესმოდათ, რომ ქრისტიანებისათვის სიკვდილი არ იყო ყველაზე ცუდი, რაც შეიძლება დამართნოდათ, რადგან არ იცოდნენ სიკვდილითა სიკვდილის დამთრგუნველი ღმერთი. დღესაც ასეა.

მაგრამ, სულო ცოდვილო და, არ მახსენდება, ოდესმე სასიკვდილო საფრთხის წინაშე მყოფ წამებულებს ერთმანეთისათვის უდიდესი რამის – ღვთის სასუფევლის გარდა რაიმე სხვა იმედი მიეცათ, მითუმეტეს, სასწაულებრივ უსაფრთხოებას დაპირებოდნენ და რაიმე ისეთი გაეკეთებინათ, რაც სხვებს სასიკვდილო საფრთხის წინაშე დააყენებდა. მათ იცოდნენ, ვინ არის სიცრუის მამა და რომ ასეთი ტყუილი საფუძველშივე მოსპობდა ეკლესიის მიმართ ნდობას.
თუ ვინმე მზად არის ქრისტეს გზა გაიაროს და მისთვის მოკვდეს, მისი ნებაა. ქედს ვიხრი მის წინაშე. მაგრამ თუ ეს მავანი საკუთარ თავსაც და, მითუმეტეს, სხვებსაც უსაფრთხოებასა და სასწაულებრივად გადარჩენას ჰპირდება, და მოუწოდებს, მომყევითო, ის მართალს არ ამბობს და საფრთხის წინაშე აყენებს ეკლესიას.

ეპიდემიას მრავალი ჭეშმარიტი ქრისტიანი შეუწირავს. სწორედ ახლა გავიგე, რომ მეოთხე საუკუნეში პახუმი დიდი შავი ჭირის ეპიდემიის გამო გარდაცვლილა 135 მონაზონთან ერთად. მათ არ ჰქონიათ სასწაულებრივი გადარჩენის იმედი და ცრუ დაპირებით არ წაუქეზებიათ ერთმანეთი. არც ის მოუვიდოდათ აზრად, სხვებისთვისაც მოეწოდებინათ, არ შეშინებოდნენ სენს. საიდუმლოთა აღსრულება არ არის მიწიერი წარმატების მომტანი მაგიური რიტუალი. ასეთი გულუბრყვილო ჯადოსნობა მათთვის, როგორც ქრისტიანებისათვის, უცხო იყო. მათ დაინახეს, რომ უფალთან შეყრის დრო მოვიდა და რწმენით შეხვდნენ მას.

ჩინეთში ეპიდემიების დროს დაავადებულთა მოვლისას ათასობით ქრისტიანი მისიონერი იღუპებოდა. მათ კარგად იცოდნენ თავისი ნაბიჯის ფასი.

მესმის, როგორი მიუღებელი იქნება ბევრისთვის ეს აზრი, მაგრამ მაინც მე, საერო პირი, ვბედავ და ვამბობ: ვფიქრობ, კარგად უნდა გვესმოდეს, რისთვის მივდივართ ზიარებაზე: სასწაულებრივი უსაფრთხოების იმედით, თუ კარგად გააზრებით იმისა, თუ რა შეიძლება ამას მოჰყვეს და მზად ვართ თუ არა. დარწმუნებული ვარ, არიან მცირედნიც, ვინც მზადაა. ისინი ამ ნაბიჯს დგამენ მიუხედავად მოსალოდნელი შედეგებისა და არა სასწაულებრივი უსაფრთხოების გარანტიით. ალბათ, სწორედ ესაა რწმენა. ასეთები თავს უფლებას არ მისცემენ, სხვებსაც იმავესკენ მოუწოდონ, მითუმეტეს, უსაფრთხოების გარანტია მისცენ და საჯაროდ იხმაურონ ამის შესახებ. ცალკეულმა შეიძლება ქრისტესთვის სიცოცხლე დათმოს, რადგან იცის, რომ უფრო დიდი სიცოცხლე ელის, მაგრამ უფლება არა აქვს, სხვების სიცოცხლე საფრთხის წინაშე დააყენოს, თანაც სასწაულს დაჰპირდეს ან დააშინოს, რომ თუ ახლა არ ეზიარება, სამარადისო ტანჯვა ელის.
უფლის წინაშე წარმდგარი ადამიანი მარტოა. საჯარო ჟრიამულში და კოლექტივისტურ ვნებებში ეს ვერ მოხდება.

სასწაული შეიძლება მოხდეს, შეიძლება – არა. ეს ღვთის ნებაა და არაფრით არ არის დაკავშირებული ზიარების საიდუმლოს ჭეშმარიტებასთან.“– ამბობს ზაზა ფირალიშვილი.

როგორც ჩანს სასექსის ჰერცოგი და მისი მეუღლე ამერიკაში დასაფუძნებლად სერიოზულად ემზადებიან. ისინი ლოს ანჯელესში საცხოვრებელ სახლს არჩევენ. გასულ კვირას ჰოლივუდელმა უძრავი ქონების აგენტმა ანდრეა პაილოტმა თავის ინსტაგრამზე სენსაციური ამბავი გამოაქვეყნა: “პრინცი ჰარი და მაგანი მელ გიბსონის სახლს ყიდულობენ“. რიელტორი, რომელიც ცნობილი ვარსკვლავების უძრავი ქონების გაყიდვით არის დაკავებული “საუკუნის გარიგების“ გამო ემოციებს ვერ მალავდა. როგორც ჩანს მან პირადად აჩვენა წყვილს მალიბუში მდებარე სახლი ხუთი საძინებლით, რომლითაც მეგან მარკლი აღფრთოვანდა. თუმცა, აგენტს ნაადრევი სიხარული შესაძლოა ძვირი დაუჯდეს.

რამდენიმე საათში მისი ინსტაგრამ პოსტი გაქრა, კომპანია კი, სადაც ის მუშაობს კომენტარზე უარს აცხადებს.

გარიგების ფასი 12 მილიონ გირვანქა სტერლინგად ფასდება. ადგილი სამეფო ოჯახისგან განდგომილი წყვილისთვის ზედგამოჭრილია – ლოს ანჯელესისგან მოშორებით და მეგანის დედის, დორის სახლთან ახლოს.

მელ გიბსონის სახლს აქვს საოცარი ხედი წყნარ ოკეანეზე, ხუთი აკრი მიმდებარე ტერიტორია, ორი აუზი, სავარჯიშო დარბაზი და წევრობა ელიტურ სანაპირო კლუბში.  სახლი მელ გიბსონამდე დევიდ დუხოვნის ეკუთვნოდა.

შეგახსენებთ, რომ სამეფო უფლებამოვალეობებზე უარის თქმის შემდეგ ჰარი და მეგანი კანადაში გადავიდნენ საცხოვრებლად, სადაც ეს ზამთარი გაატარეს, ცოტა ხნის წინ კი გაირკვა, რომ ისინი ამერიკაში, კერძოდ კი კალიფორნიაში აპირებენ ცხოვრებას.

ინდონეზიის ერთ-ერთ სოფელში ახალგაზრდა მოხალისეები მოჩვენებების ფორმაში გადაცმულები გამოჩნდნენ.  ამ ხერხს ინდონეზიაში კორონავირუსის პანდემიისგან დასაცავად მიამრთეს რადგან ხალხს შეშინებოდა ქუჩაში გამოსვლა და სახლში დარჩენილიყვნენ. ამის შესახებ იფნორმაციას “Reuters” ავრცელებს. 

როგორც გამოცემა, წერს ქუჩაში გამოსულ მოქალაქეებს, მოჩვენებები დიდი ხნის მანძილზე აშტერდებიან. თავდაპირველად სოფელში მოჩვენებების გამოჩენამ, საზოგადოების ინტერესი გამოიწვია და ხალხი შეგნებულად გამოდიოდა გარეთ მათ სანახავად, თუმცა ამის შემდეგ ქუჩის მოჩვენებებმა დამალვა და მოულოდნელად გამოჩენა დაიწყეს რის შემდეგაც ხალხის რაოდენობამ სოფლის ქუჩებში იკლო.

ინდონეზიურ ფოლკლორში პოკონგის სახელით არსებობს  მოჩვენება.  ეს არის გარდაცვლილი ადამიანის მოჩვენება. ასეთი ფიგურები თეთრი სამოსით იფარება და სახეც თეთრად აქვთ შეღებილი.