Category: სხვადასხვა

უკრაინელი ილია მიშენკო, რომელიც წლებია ოჯახთან ერთად საქართველოში ცხოვრობს და აქ ბიზნესი აქვს მის მიმართ რასისტულ დამოკიდებულებაზე წერს. ამის შესახებ მან საკუთარი კაფეს –“Lui Coffee/ლუი კოფი“ –ს გვერდზე დაწერა. მისი კაფე ჭავჭავაძის გამზირზე მდებარეობს. მიშენკო წერს, რომ მეზობელი მისი ბიზნესის გაჩერებას ცდილობს:

“გამარჯობათ .

მე მქვია ილია მიშენკო.

მე – ვარ უკრაინელი , რომელმაც მჭიდროდ დაუკავშირა ცხოვრება საქართველოს ჯერ კიდევ 2013 წელს , როცა მამაჩემთან ერთად გავაშენეთ ,ვაშლის ბაღები ბოლნისის რაიონში.
2017 წელს კი მუდმივად გადმოვედი საცხოვრებლად. მეუღლესთან და შვილთან ერთად .
2018 წელს , ფრთები შევასხით ჩვენს ოცნებას და გავხსენით ყავის ბარი “ლუი კოფე”.
2,5 წლის განმავლობაში გამოვიარეთ ბევრი სირთულე : ჭავჭავაძის გამზირის რეაბილიტაცია, კორონავირუსი, მერე ისევ გზის ხელახალი შეკეთება და მიუხედავად ამ ყველაფრისა ვაგრძელებდით მუშაობას ,რადგან გვჯეროდა იდეის , პროდუქტის და სერვისის .

სამწუხაროდ ამ კვირაში მოხდა ყველაზე უსიამოვნო ფაქტი. შევეჯახეთ პირდაპირი მნიშვნელობით რასიზმს მეზობელი ქალბატონისგან , რომელიც ცხოვრობს მე_5_ე სართულზე და ასევე არის ამ საცხოვრებელი კორპუსის ამხანაგობის თავჯდომარე. ის უკვე რამდენიმე კვირის განმავლობაში , წარმოუდგენელი აგრესიით და უშვერი სიტყვებით გვლანძღავს, პირდაპირ გვემუქრება დაკეტვით . ჩემი მეუღლის ულიანას მცდელობის მშვიდად ესაუბრათ , პასუხად მივიღეთ წავთრეულვიყავით რუსეთში და იქ გვეკეთებინა ჩვენი საქმე , ამ სიტყვებით გვლანძღავდა პატრულის თანამშრომლების წინაშეც , რომელიც ასევე თვითონ გამოიძახა . სიტყვა რუსების ხშირი გამოყენებით , ცდილობდა პატრულის თანამშრომლები ცუდად განეწყო ჩვენს მიმართ , რაც ნამდვილად არ გამოუვიდა და პირიქით ,არა ერთხელ მიუთითეს კორექტულად ესაუბრა ,მიუხედავად იმისა,რომ დანამდვილებით იცოდა უკრაინელები ვართ , რადგან წინა დღით ჩვენმა მენეჯერმა მიწერა ამის შესახებ .

ამ ქალბატონის გაღიზიანება კი გამოიწვია ,თითქოსდა კაფედან გამომავალმა სუნმა ,მაშინ , როცა მესამეზე და მეოთხეზე მაცხოვრებელი ადამიანები , ჩვენი ყოველდღიური მომხმარებლები არიან და არასოდეს გამოუთქვამთ მსგავსი პრობლემის შესახებ მეორე დღეს მას ესაუბრა ჩვენი მენეჯერი , იმედით ,რომ საღად და კონსტრუქციულად შეძლებდნენ პრობლემის გადაწყვეტას,რაზეც მან უარი გამოგვიცხადა და ასევე დაამატა , ვაკეში თან ასეთ პრესტიჟულ სახლებში საერთოდ არ უნდა იყოს კაფეები და აუცილებლად დაგვხურავს. .

ზემოაღნიშნული ქმედება პირდაპირ ითვალისწინებს საქართველოს სისხლის სამართლის კოდექსის 142(1) მუხლს (რასისტული დისკრიმინაცია) ,ჩვენ შევიტანეთ საჩივარი ამასთან დაკავშირებით და დაიკითხნენ მოწმეებიც .

ბოლო 2 დღის განმავლობაში , ამ ქალბატონის საჩივრების ნიადაგზე, ჩვენთან იყვნენ მუნიციპალური ინსპექციიდან , სურსათის უვნებლობიდან და მზად ვართ კიდევ ბევრი ინსპექციებისთვის .

დროებით შევაჩერეთ. მთელი რიგი კერძების მომზადება, რისთვისაც ბოდიშს გიხდით.

თავისი სურვილი , დაგვკეტოს ამ ქალბატონმა უკვე გამოთქვა .არ დაგვკეტა ჭავჭავაძის გამზირის რემონტმა, არ დაგვკეტა კორონავირუსმა , არც ეხლა არ დავიკეტებით .

ჩვენს მეზობელს კი ანდაზას ვეტყვით ,რომელიც ყოველთვის აქტუალურია :” რასაც დასთეს , იმას მოიმკი”– წერს მიშენკო.

58 წლის ასაკში გარდაიცვალა მსახიობი კელი პრესტონი, მსახიობ ჯონ ტრავოლტას ცოლი.

“ჩემი მშვენიერი ცოლი კელი დამარცხდა კიბოსთან ბრძოლაში, რომელიც ორი წელი გრძელდებოდა. ის თავდადებით იბრძოდა, სიყვარულით და ბევრი ადამიანის მხარდაჭერით გარშემორტყმული“ – დაწერა ინსტაგრამზე ჯონ ტრავოლტამ.

კელი პრესტონი ჰავაიში, ჰონოლულუში დაიბადა. პირველი როლი 1985 წელს შეასრულა

ჯონ ტრავოლტასთან ქორწინებაში 29 წელი გაატარა. მიუხედავად ქმრის დიდი პოპულარობისა, კელი მის ჩრდილში არ რჩებოდა. მან ითამაშა როლები ფილმებში: “ჯერი მაგუაიერი“ , “ ქუდიანი კატა“, “ტყუპები “, “შებინდებიდან განთიადამდე“.

ბოლო როლი პრესტონმა ქმართან ერთად 2018 წელს ფილმ “გოთი“–ში შეასრულა. ფილმს ისინი ერთად წარადგენდნენ კანის ფესტივალზე.

“ჩვენ დრო დაგვჭირდა, რათა ერთმანეთი კარგად გაგვეცნო. ქორწინება თავისთავად არ იქმნება. სიყვარული მუდმივად უნდა შექმნა. ჩვენ არაფერს ვართულებთ. არცერთ ჩვენგანს არ უყვარს ჩხუბი, ერთმანეთს მტკივნეულ წერტილებზე არ ვაწვებით“ – ეუბნებოდა კელი ჟურნალისტებს.

“მე ცოტა ხნით ჩამოვშორდები საქმეებს, რათა ჩვენს შვილებთან ერთად გავატარო დრო, რომლებიც უდედოდ დარჩნენ. წინასწარ გთხოვთ პატიებას ამის გამო: იცოდეთ, რომ ვიგრძნობ თქვენს მხარდაჭერას მთელი კვირების და თვეების განმავლობაში, სანამ ჩვენი ჭრილობა შეხორცდება“– დაწერა ტრავოლტამ ცოლის სიკვდილის შემდეგ.

2009 წელს ტრავოლტამ და პრესტონმა მძიმა დარტყმა გადაიტანეს: ბაჰამის კუნძულებზე ოჯახური დასვენების დროს მათი 16 წლის შვილი, ჯეტი გარდაიცვალა, რომელსაც ბავშვობიდან კავასაკის სინდრომი ჰქონდა.

წყვილს კიდევ ორი შვილი ყავს – 20 წლის ელა ბლიუ და 10 წლის ბენჯამინი.

ოჯახის წარმომადგენლის განცხადებით კელი პრესტონი საკუთარ დიაგნოზს საიდუმლოდ ინახავდა და ფართო საზოგადოებას არ უმხელდა. მისი თქმით, ოჯახის იმედი აქვს რომ მას გაგებით მოეკიდებიან და უახლოეს მომავალში არ შეაწუხებენ.

ოჯახს თანაგრძნობა უკვე მრავალმა კინოვარსკვლავმა გამოუთქვა.

ბრაზილიელი მოდელი ვალენტინა სამპაიო რამდენიმე წელია ამ პროფესიაში “ისტორიას ქმნის“. ამიერიდან ის პირველი ღიად გაცხადებული ტრანსგენდერი მოდელია, რომელიც ლეგენდარული გამოცემა Sports Illustrated Swimsuit–ის გარეკანზე გამოჩნდა. ყველაფერი საკულტო პრიალა ჟურნალის წესებით მოხდა – სექსუალობა, საცურაო კოსტუმი, პლაჟი, სველი თმა…

“ტრანსგენდერობა როგორც წესი ნიშნავს იმას, რომ დახურულ კარებებს, ადამიანების დახურულ გულებს და ტვინებს აწყდები. ჩვენ მუდმივად ვეჯახებით დაცინვას, შეურაცხყოფას, მტკივნეულ რეაქციებს და ფიზიკურ ზეწოლას მხოლოდ იმის გამო, რომ ვარსებობთ. ჩვენი შესაძლებლობები  გავიზარდოთ მოსიყვარულე და გემგებიან ოჯახში, მივიღოთ სკოლაში კარგი გამოცდილება ან ვიშოვნოთ ღირსეული სამსახური წარმოუდგენლად შეზღუდული და რთულია.“ – ამბობს ვალენტინა.

სამპაიო საკუთარ სამშობლოს – ბრაზილიას მშვენიერ ქვეყანას უწოდებს, თუმცა ამბობს, რომ ის ამავე დროს ძალიან საშიშია, რადგან ამ ქვეყანაში ტრადიციულად ტრანსგენდერების მიმართ მსოფლიოში ყველაზე დიდი რაოდენობით ძალადობრივი დანაშაული და მკვლელობა ხდება– სამჯერ მეტი, ვიდრე აშშ–ში.

2019 წელს ვალენტინა სამპაიო პირველი ღიად აღიარებული ტრანსგენდერი მოდელია, რომელიც Victoria’s Secret–ის რეკლამაში გადაიღეს.

ენერგეტიკული სასმელები თითქოს “დამუხტვაში“ გვეხმარებიან, მაშინ, როცა გვეძინება, მაგრამ საქმე გვაქვს და სიფხიზლე გვჭირდება. ან გვინდა მალე გამოვფხიზლდეთ ძილისგან. თუმცა, სამწუხაროდ ენერგეტიკული სასმელების ეფექტრი მხოლოდ დროებითი, ხანმოკლე სიფხიზლეა. ნახეთ, რატომ არ უნდა დავლიოთ ხშირად ენერგეტიკული სასმელი:

არაერთი კვლევის შედეგების გაანალიზებით მეცნიერები მივიდნენ დასკვნამდე, რომ ენერგეტიკული სასმელები ჯანმრთელობას არაერთ პრობლემას უქმნის. ალბათ შეგიმჩნევიათ, რომ მათი დალევის შემდეგ ცუდად გძინავთ, შეიძლება წნევამ აგიწიოთ, ხშირი მოხმარების შედეგად კი წონაშიც მოიმატოთ. გარდა ამისა, ასეთმა სასმელებმა შესაძლოა ფსიქიური პრობლემები გამოიწვიოს და დიაბეტის რისკი გაზარდოს, პრობლემა შეუქმნას კბილებს და თირკმელებს.

ენერგეტიკული სასმელების შემადგენლობაში შედის დიდი რაოდენობით შაქარი, სიმინდის წვენი, ხელოვნური არომატიზატორები. შაქრის გადაჭარბებული მოხმარების დროს ორგანიზმს მისი მონელება უჭირს, უფრო მეტი ინსულინი ჭირდება იმისათვის, რომ გლუკოზამ უჯრედებში შეაღწიოს. ამან კი შესაძლოა მეორე ტიპის დიაბეტის განვითარება გამოიწვიოს. სისხლში გადაჭარბებული შაქარი  ნერვულ ბოჭკოებს აზიანებს და სისხლის წნევაზე მოქმედებს, რაც გულისა და თირკმელების პრობლემებს იწვევს.

ენერგეტიკული სასმელები ასევე კოფეინის მაღალი შემცველობით გამოირჩევა– 100 მგ. სასმელში 300მგ.–მდე. ზრდასრული ადამიანის დღიური დოზა 400 მგ. –ია, ანუ შეიძლება ნახევარი ჭიქა ენერგეტიკული სასმელით დღიურ დოზას სრულად იღებთ. თუ ნორმას მუდმივად დაარღვევთ, სიმხნევის ნაცვლად შეიძლება შფოთვითი აშლილობა ან დეპრესია დაგემართოთ. კოფეინდამოკიდებულება ცუდად მოქმედებს განწყობაზე და ძილზე.

ნეგატიურად მოქმედებს ორგანიზმზე ენერგეტიკული სასმელების სხვა დანამატებიც, მაგალითად ტაურინი და გუარანო. მეცნიერები მათ მუდივად სწავლობენ და უფრო დეტალურ ინფორმაციას  შემდგომ წლებში დადებენ, როცა უფრო მეტი სტატისტიკური ინფორმაცია გაჩნდება ენერგეტიკული სასმელების მოხმარების შესახებ.  მეცნიერების თქმით, ვინაიდან ჯერჯერობით ენერგეტიკული სასმელის მასობრივი მომხმარებელი ახალგაზრდა, ჯანმრთელი ადამიანები არიან, რთულია შესაძლო შედეგების მთელი სპექტრის შეფასება.

ენერგეტიკული სასმელების იშვიათი და არა მუდმივი გამოყენება ორგანიზმს დიდ ზიანს არ აყენებს. თუმცა, მეცნიერების აზრით ჯობს ენერგიის მოსამატებლად სხვა საშუალებებს მივმართოთ.