Category: სხვადასხვა

მსოფლიო ოკეანის დონის აწევა არაერთი მძაფრსიუჟეტიანი ფილმის თემად იქცა, გვინახავს სიუჟეტები, როცა გიგანტური ტალღები მეგაპოლისებს შთანთქავენ.

თუმცა, როგორც აშშ–ს გეოლოგიური სამსახურის (USGS) გეოფიზიკოსმა, ტომ პარსონსმა გაარკვია, საფრთხე მხოლოდ ეს არ არის. როგორც ირკვევა დიდი ქალაქები ისედაც საკუთარი სიმძიმით “იძირება“.

მისი გათვლებით სან ფრანცისკომ არსებობის მანძილზე მიწაში 80 მილიმეტრით დაიძირა. თუ გავითვალისწინებთ, რომ 2050 წლისთვის წყლის დონე ყურეში შეიძლება 300 მილიმეტრით აიწიოს, ეს უკვე სერიოზულ შეშფოთებას იწვევს.

“იმის გამო, რომ მოსახლეობის არაპროპორციულად დიდი ნაწილი ეძალება სანაპიროს, დამატებითი დაძირვა ოკეანის დონის აწევის პარალელურად წყალდიდობის რისკებს ზრდის“ – წერს პირსონი საკუთარ ნამუშევარში, რომელიც AGU Advances–ში გამოქვეყნდა.

მაგალითად შეგვიძლია მოვიყვანოთ სან ფრანცისკოს აეროპორტი, რომელიც ქალაქის ყველაზე მძიმე შენობაა. აშენების შემდეგ ის მიწაში 4 მილიმეტრით ჩაიწია.

თუ გავითვალისწინებთ სან ფრანცისკოს ყველა შენობას და მათ შემადგენელს, ასტრონომიული რიცხვი – 1.6 ტრილიონი კილოგრამი გამოდის. ეს სრულიად საკმარისია იმისათვის, რომ ლითოსფერო გაიღუნოს, რომელზეც მეგაპოლისია განთავსებული, და რაც ბევრად უფრო საშიშია, ტექტონიკური ფილები გადაადგილდეს, რამაც დედამიწის ქერქის მსხვრევა გამოიწვიოს.

და ეს მაშინ, როცა 80 მილიმეტრით დაძირვა ყველაზე მოკრძალებული გათვლებია, რომელშიც არ არის გათვალისწინებული ტრანსპორტისა და ადამიანების წონა, რომლებიც შენობების გარეთ არიან. უფრო მეტიც, ადგილობრივი გეოლოგიური პირობებიდან გამომდინარე მნიშვნელოვანი დაწევა შესაძლოა პლანეტის სხვა დიდ ქალაქებშიც ხდებოდეს.

მართალია კონტინენტების სიღრმეში ლითოსფერო როგორც წესი უფრო სქელი და მყარია, სან ფრანცისკოს ყურეში კვლევების შედეგები ყველა მსხვილი ქალაქის მიმართ შეიძლება გამოვიყენოთ – ვარაუდობს პარსონსი.

პარიზში ფართო საზოგადოების წინაშე პირველად გამოფინეს ვან გოგის ნამუშევარი, რომელიც ყოველთვის კერძო კოლექციებში ინახებოდა და ამიტომაც ძირითადად უცნობი იყო კრიტიკოსებისთვის და მხატვრის შემოქმედების მოყვარულთათვის.

ტილო სახელწოდებით „ქუჩის სცენა მონმარტრზე“ 1887 წელს შეიქმნა და მას შემდეგ მას ძირითადად ერთი ოჯახის წევრები ფლობდნენ. თუმცა ახლა ის გასაყიდად არის გამოტანილი და მისი დემონსტრირება სოთბის აუქციონის სახლის პარიზის, ამსტერდამის და ჰონკონგის განყოფილებებში მოხდება. აუქციონი 25 მარტს გაიმართება. ექსპერტები ვარაუდობენ, რომ ნახატი 8 მილიონ ევროდ გაიყიდება.

ვან გოგის შემოქმედების ექსპერტი, მარტინ ბეილი ამბობს, რომ ახლა პირველად გაჩნდა შესაძლებლობა ეს ნამუშევარი “ხეირიანად დაათვალიერო“. წარსულში მისი რამდენიმე რეპროდუქცია გაკეთდა, ძირითადად შავ–თეთრი, თუმცა ნამუშევარი პრაქტიკულად უცნობი იყო.

“ეს ნახატი იმით არის საინტერესო, რომ ვან გოგის ჰოლანდიურ პერიოდს განეკუთვნება, როცა ის მუქ ტონებს იყენებდა. ის ერთგვარ გარდამავალ პერიოდში შეიქმნა, ჰოლანდიურ და პროვანსის პერიდებს შორის, როცა მისი ტონები მკვეთრად შეიცვალა. პარიზში ის იმპრესიონისტებს შეხვდა, რამაც ფერებთან დაკავშირებული ექსპერიმენტებისკენ უბიძგა“– ამბობს ექსპერტი.

ვან გოგის ეს ნამუშევარი იმ პერიოდს განეკუთვნება, როცა ის ძმასთან, თეოსთან ერთად 1886–87 წლებში მონმარტრის სიახლოვეს ცხოვრობდა.

მოსალოდნელი ფასი – 8 მილიონი ევრო ბევრად დაბალია ვან გოგის სხვა ნამუშევრების ფასთან შედარებით. თუმცა ეს არ არის საბოლოო ფასი და შესაძლოა მნიშვნელოვნად გაიზარდოს, რადგან მისი ნამუშევრების მიმართ დიდი ინტერესი არსებობს, მათ შორის ახლო აღმოსავლეთში.

სოთბის აუქციონის სახლის წარმომადგენლები ასეთი მაღალი კალიბრის ნამუშევრის გამოჩენას მნიშვნელოვან მოვლენას უწოდებენ.

საფრანგეთის პროკურატურამ კვლავ დაიწყო გამოძიება მსახიობ ჟერარ დეპარდიეს წინააღმდეგ ახალგაზრდა მსახიობის გაუპატიურების ბრალდებით. საქმე ეხება 2018 წელს დეპარდიეს პარიზის სახლში მომხდარ ამბავს. სავარუდო მსხვერპლის ვინაობა არ ხმაურდება.

მსახიობის ადვოკატმა სააგენტო ფრანს პრესს დაუდასტურა, რომ მის წინააღმდეგ გამოძიება მართლაც მიმდინარეობს, თუმცა განაცხადა, რომ დეპარდიე სრულად უარყოფს ბრალდებებს  და პროკურორების მოქმედებების შესახებ ინფორმაცია საიდუმლოდ უნდა დარჩეს.

ორი წლის წინ მსახიობის ადვოკატმა ამ ბრალდებებს ასე უპასუხა: “ჟერარ დეპარდიე შეძრწუნებულია. ეს ბრალდებები წინააღმდეგობაში მოდის იმასთან, რასაც ის წარმოადგენს და იმასთან, რასაც ის პატივს სცემს.“

ფრანგული მედიის ინფორმაციით მსახიობმა დეპარდიეს წინააღმდეგ სარჩელი 2018 წლის აგვისტოს ბოლოს შეიტანა. 2019 წელს პარიზის პროკურორებმა ძიება დახურეს, მაგრამ 2020 წელს კვლავ განაახლეს.

ფორმალური გამოძიება დეპარდიეს წინააღმდეგ გასული წლის დეკემბერში დაიწყო. ამ პროცესის მიმდინარეობისას პროკურორებმა უნდა გადაწყვიტონ, არის თუ არა მსახიობისთვის ოფიციალური ბრალდების წაყენება საჭირო.

Le Monde–ის ინფორმაციით მსახიობი ქალის ოჯახი, რომელმაც დანაშაულის შესახებ განაცხადა დეპარდიეს იცნობს. “ამ ამბავს პროფესიონალურ ურთიერთობებთან საერთო არაფერი აქვს„– უთხრა გამოცემას ინფორმირებულმა წყარომ.

ჟერარ დეპარდიე ერთ–ერთი ყველაზე ცნობილი ფრანგი მსახიობია. ის 180 ფილმში მონაწილეობდა.

2013 წელს დეპარდიემ საფრანგეთში დიდი აღშფოთება გამოიწვია, როცა ქვეყანა მდიდრებისთვის მაღალი გადასახადების მიმართ პროტესტის ნიშნად დატოვა და რუსეთის მოქალაქეობა მიიღო.

2013 წელს მითვის რუსეთის მოქალაქეობის მინიჭების შესახებ ბრძანებას პირადად ვლადიმერ პუტინმა მოაწერა ხელი.

მაშინვე დეპარდიე სარანსკში ჩავიდა, სადაც მორდოვიის ხელმძღვანელობამ მას ბინა ან სახლი შესთავაზა. იმავე თვეს მიანიჭეს “საპატიო უდმურტელის“ წოდება.

2013 წლის თებერვალში დეპარდიემ ჩეჩნეთის ლიდერის, რამზან კადიროვისგან რესპუბლიკის საპატიო მოქალაქის წოდება და გროზნოს ცენტრში ხუთოთახიანი ბინის გასაღები მიიღო. მოგვიანებით საცხოვრებელ კომპლექსში, სადაც მსახიობს ბინა ქონდა ხანძარი მოხდა.

საქართველოს საფეხბურთო ნაკრებს ვილი სანიოლი უხელმძღვანელებს. აღნიშნულის შესახებ ინფორმაცია საქართველოს ფეხბურთის ფედერაციის ვებ – გვერდზე ვრცელდება.ვილი სანიოლის დებიუტი საქართველოს ეროვნულ ნაკრებში 2021 წლის 25 მარტს შედგება.

„ 43 წლის ვილი სანიოლი საქართველოს ფეხბურთის ფედერაციის აღმასრულებელმა კომიტეტმა ეროვნული ნაკრების მთავარი მწვრთნელის პოსტზე 15 თებერვალს დაამტკიცა. ვილი სანიოლის დებიუტი საქართველოს ეროვნულ ნაკრებში 2021 წლის 25 მარტს შედგება. 2022 წლის მსოფლიო ჩემპიონატის საკვალიფიკაციო ეტაპის პირველ ტურში საქართველოს ნაკრები სტუმრად შვედეთს დაუპირისპირდება. საქართველოს ნაკრების ახალი მთავარი მწვრთნელი საფეხბურთო კარიერის დროს, საფრანგეთის ნაკრებთან ერთად მსოფლიოს ვიცე ჩემპიონი (2006) და კონფედერაციის თასის ორგზის გამარჯვებული გახდა (2001, 2003). ვილი სანიოლმა მიუნხენის ბაიერნის შემადგენლობაში უეფას ჩემპიონთა ლიგა (2001) და გერმანიის ჩემპიონის ტიტული ხუთჯერ (2001, 2003, 2005, 2006, 2008) მოიგო. ფრანგი სპეციალისტი 2011-2013 წლებში საფრანგეთის ნაკრების ტექნიკური დირექტორის პოსტს იკავებდა. 2013-2014 წლებში საფრანგეთის 21-წლამდე ნაკრების მთავარი მწვრთნელი იყო. ვილი სანიოლმა მწვრთნელის რანგში საკლუბო კარიერა დაიწყო და 2014-16 წლებში ფრანგულ ბორდოს ხელმძღვანელობდა“, – აღნიშნულია ფეხბურთის ფედერაციის მიერ გავრცელებულ ინფორმაციაში.

„საქართველოს ნაკრებს ვილი სანიოლი უხელმძღვანელებს. ისეთი მთავარი მწვრთნელის მოძიება, რომელიც ყველა საჭირო კრიტერიუმს აკმაყოფილებს, ძალიან რთული იყო. აქედან გამომდინარე მოხარული ვარ, რომ ეს პროცესი ჩვენთვის სასურველი შედეგით დასრულდა.ვილი სანიოლს ძალიან წარმატებული საფეხბურთო კარიერა ჰქონდა, რაც ვფიქრობ, რომ ნაკრების მოთამაშეებისთვის საკმაოდ მნიშვნელოვანი ფაქტორია. ჩვენი გუნდის მომავალ მთავარ მწვრთნელს გამარჯვებულის მენტალიტეტი აქვს, რაც საფეხბურთო კარიერის განმავლობაში არაერთხელ დაუმტკიცებია. აქტიური საფეხბურთო კარიერის შემდეგ სანიოლი საფრანგეთის ფეხბურთის ფედერაციის ტექნიკური დირექტორის პოსტზე მუშაობდა. ასევე მწვრთნელის რანგში წარმატებულად უმუშავია საფრანგეთის ახალგაზრდულ ნაკრებში და საფეხბურთო კლუბ ბორდოში. მიუნხენის ბაიერნში კი, იგი კარლო ანჩელოტის თანაშემწე გახლდათ. მნიშვნელოვანი ფაქტორია, რომ მისი საფეხბურთო ფილოსოფია და თამაშის სტილი ძალიან ახლოს დგას ჩვენს ფეხბურთთან. გადაწყვეტილების მიღების პროცესში დიდი როლი ითამაშა იმ ფაქტმა, რომ ვილი სანიოლი ახალგაზრდა და ამბიციური მწვრთნელია, რომელსაც ბევრი რამ აქვს დასამტკიცებელი. მოლაპარაკების პროცესში მომავალი მთავარი მწვრთნელი სრულად გაეცნო ინფორმაციას ჩვენი გუნდის შესახებ. მან ნახა საქართველოს ეროვნული ნაკრების მონაწილეობით მატჩები და ამ ყველაფრის საფუძველზე ვილი სანიოლს სჯერა ამ გუნდის. ჩვენთვის მნიშვნელოვანი იყო, რომ საქართველოს ნაკრების პოტენციალის გაცნობის შემდეგ მიიღო მან თანამშრომლობის გადაწყვეტილება. ბევრი მიმართულებით ჩვენი შეხედულებები ერთმანეთს დაემთხვა. ფეხბურთის ფედერაციისთვის მნიშვნელოვანია, რომ მთავარ მწვრთნელთან შედეგზე ორიენტირებული ხელშეკრულება გაფორმდა. ნაკრებში ახალი მწვრთნელის ხელმძღვანელობით კონკრეტული მიზნების მიღწევის შემთხვევაში, უკვე არსებულ ორწლიან კონტრაქტს, კიდევ ორწლიანი თანამშრომლობა დაემატება“, – განაცხადა სფფ-ის ვიცე-პრეზიდენტმა, ალექსანდრე იაშვილმა.

2011-2013 წლებში სანიოლი საფრანგეთის ნაკრების ტექნიკური დირექტორი იყო; 2013-2014 წლებში – საფრანგეთის 21-წლამდე ნაკრების მთავარი მწვრთნელი; 2014-2016 წლებში ბორდოს მთავარი მწვრთნელი, ხოლო 2017 წელს მიუნხენის ბაიერნის მწვრთნელის ასისტენტი.

რაც შეეხება ვილი სანიოლის საფეხბურთო კარიერას 2000-2008 წლებში საფრანგეთის ნაკრებში თამაშობდა (58); ასევე არის მსოფლიოს ვიცე ჩემპიონი (2006); კონფედერაციის თასის ჩემპიონი (2001, 2003). 1995-1997 წლებში – სენტ ეტიენი; 1997-2000 წლები – მონაკო. 1997 წელს – საფრანგეთის სუპერთასი, ხოლო 2000 წელს საფრანგეთის ჩემპიონი. 2000-2009 წლებში ის მიუნხენის ბაიერნში მოღვაწეობდა.

2001 წელს – უეფას ჩემპიონთა ლიგის მფლობელი გახდა; ამავე წელს საკონტინეტთაშორისო თასის მფლობელი; 2001, 2003, 2005, 2006, 2008 წლებში გერმანიის ბუნდესლიგის ჩემპიონი; ხოლო 2003, 2005, 2006, 2008 წლებში – გერმანიის თასის მფლობელი; 2001 წელს კი, გერმანიის ლიგის თასის მფლობელი.