ბოლო 24 საათში უკრაინელებმა რუსი ოკუპანტების 2 თვითმფრინავი და 1 ვერტმფრენი ჩამოაგდეს. შესაბამის ინფორმაციას, უკრაინის შეიარაღებული ძალების გენერალური შტაბი ავრცელებს.
“გასული დღე-ღამის განმავლობაში ჩვენმა ავიაციამ მიიტანა 5 დარტყმა მტრის ცოცხალი ძალის კონცენტრაციის წერტილებში. საჰაერო ძალებმა ჩამოაგდო CУ 25-ის ტიპის 2 რუსული თვითმფრინავი და KА 52-ის ტიპის 1 ვერტმფრენი და Орлан-ის ტიპის 1 უპილოტო საფრენი აპარატი და X59-ის ტიპის 2 საავიაციო ბაზირების რაკეტა”,- ნათქვამია განცხადებაში.
”სრულმასშტაბიანი ომის დაწყებიდან ზუსტად 11 თვე სრულდება. გავაერთიანებთ მთელს ჩვენს ძალისხმევას ერთი მიზნისთვის – გამარჯვებისთვის. დონბასისთვის ბრძოლა გრძელდება. გრძელდება ბრძოლა სამხრეთისთვის. ვხედავთ, რა ძალებს აგროვებს რუსეთი და ვიცით, როგორ ვუპასუხოთ.”
აცხადებს, უკრაინის პრეზიდენტი, ვოლოდიმირ ზელენსკი.
უკრაინის თავდაცვის მინისტრის მოადგილე ვიაჩესლავ შაპოვალოვი, რომელიც უკრაინის შეიარაღებული ძალების ლოჯისტიკაზე იყო პასუხისმგებელი, თანამდებობიდან გადადგა.
შაპოვალოვმა თანამდებობა დატოვა ჟურნალისტური გამოძიების შემდეგ, სადაც ნათქვამია, რომ თავდაცვის სამინისტრო სამხედროებისთვის საკვებს საცალო ფასებზე რამდენჯერმე მაღალ ფასებში ყიდულობს.
თავდაცვის სამინისტროს განცხადებით, “გაჟღერებული ბრალდებები უსაფუძვლო და დაუსაბუთებელია”, მაგრამ შაპოვალოვი მაინც ტოვებს თანამდებობას,”რათა არ შეუქმნას საფრთხე უკრაინის შეიარაღებული ძალების სტაბილურ მხარდაჭერას”.
შაბათს უკრაინულმა გამოცემმა Zn.ua-მ გამოაქვეყნა სტატია, რომელშიც ნათქვამია, რომ თავდაცვის სამინისტრო უკრაინის შეიარაღებული ძალებისთვის პროდუქციას გაბერილ ფასებში ყიდულობს. გამოცემაში ნათქვამია, რომ ფასები, რომლითაც სამხედროებისთვის პროდუქციის შესყიდვა ხდებოდა, ზოგჯერ ორ-სამჯერ აღემატებოდა საცალო ფასებს.
თავდაცვის მინისტრმა ალექსეი რეზნიკოვმა გადადგომის განცხადება უკვე დააკმაყოფილა.
გენერალ-მაიორი მიხაილო ტეპლინსკი აღარ არის უკრაინის ომის ერთ-ერთი მთავარი მეთაური, წერს ბრიტანული დაზვერვა ომის 335-ე დღეს ყოველდღიურ მოხსენებაში.
მაგრამ ის პასუხისმგებელი იყო ხერსონიდან დნეპრის მარცხენა სანაპიროზე საკმაოდ წარმატებულ უკან დახევაზე 2022 წლის ნოემბერში და მას რუსეთში ადიდებდნენ, როგორც ქმედუნარიან და პრაგმატულ მეთაურს, დასძენს ბრიტანეთის თავდაცვის სამინისტროს დაზვერვა.
ბოლო დროს ბევრი ჭორი გავრცელდა იმის შესახებ, რომ ტეპლინსკიმ,სხვა ყველაფერთან ერთად, დაკარგა საჰაერო სადესანტო ძალების ხელმძღვანელობა, სამხედრო ძალების ერთ-ერთი მთავარი სახეობა, რომლის მებრძოლები აქტიურად მონაწილეობენ უკრაინის ომში. მისი გადადგომის შესახებ „სამხედრო კორესპონდენტებმა“ და ომის მხარდამჭერებმა, ალექსანდრე გლადკოვმა და იური კოტენოკმა თავიანთ წყაროებზე დაყრდნობით განაცხადეს.
ტეპლინსკის გადაყენება, სავარაუდოდ, კიდევ ერთი ნიშანია უკრაინაში რუსული ოპერაციის ხელმძღვანელობაში მიმდინარე განხეთქილებისა.
ბრიტანული დაზვერვის მონაცემებით, გენერალი ვალერი გერასიმოვი ცდილობს მთელი კამპანია პირად კონტროლს დაუქვემდებაროს.
ევროპული საბჭოს თავმჯდომარე შარლ მიშელი ამბობს, რომ უკრაინაში ომში მომდევნო 2-3 კვირა გადამწყვეტი იქნება.
“მომდევნო ორი– სამი კვირა გადამწყვეტია. რაც მოხდება 2023 წელს, ბევრი რამ დამოკიდებულია მომავალ კვირებზე. ეს არის ის, რაც განსაზღვრავს ჩვენს მომავალს“- თქვა მან ესპანურ გამოცემა Mundo-სთან ინტერვიუში.
ევროკავშირის საბჭოს ხელმძღვანელმა ხაზგასმით აღნიშნა, რომ უნდა გაგრძელდეს კიევისთვის ყველა საჭირო დახმარების მიცემა.
პოლონეთის საგარეო საქმეთა ყოფილმა მინისტრმა რადოსლავ სიკორსკიმ განაცხადა, რომ ქვეყნის მმართველიმა პარტიამ დაუშვა უკრაინის ნაწილებად დაყოფის სცენარი. ამან გამოიწვია ვარშავის უმაღლესი თანამდებობის პირების აღშფოთება, ასევე რუსეთის ფედერაციის პროპაგანდისტებისა და დიპლომატების მხარდაჭერა.
სიკორსკიმ ეთერში გამოსვლისას განაცხადა, რომ რუსეთის ფედერაცია დღემდე სთავაზობს ოფიციალურ ვარშავას მოსკოვთან უკრაინის გავლენის ზონების გაყოფას:
„როდესაც ვთქვი, რომ პუტინი უცნაურ მინიშნებებს აკეთებს და ჟირინოვსკიმ (ვლადიმერ ჟირინოვსკი, რუსეთის ლიბერალ-დემოკრატიული პარტიის ხელმძღვანელი) უკრაინის დაყოფაც კი შემოგვთავაზა, თქვენ ამაზე სკანდალი ატეხეთ, არადა რუსები დღემდე ამას გვთავაზობენ“ – განაცხადა პოლიტიკოსმა.
თურქეთის პრეზიდენტმა რეჯეფ თაიფ ერდოღანმა თქვა, რომ შვედეთს არ უნდა ჰქონდეს მისი მხარდაჭერის იმედი ნატოში გაწევრიანების საკითხში შაბათის საპროტესტო აქციის შემდეგ, რომელიც სტოკჰოლმში თურქეთის საელჩოსთან გაიმართა, რომელსაც შემდგომ ყურანის დაწვა მოჰყვა.
“შვედეთი არ უნდა მოელოდეს, რომ ჩვენ მის ნატოში გაწევრიანებას დავუჭერთ მხარს”, – თქვა ერდოღანმა და პირველად გააკეთა კომენტარი აქციაზე, რომელიც შვედეთის პოლიციამ არ აღკვეთა, მიუხედავად თურქეთის აღშფოთებისა.
მანამდე თურქეთმა გააუქმა შვედეთის თავდაცვის მინისტრის ანკარაში მომავალ კვირისთვის დაგეგმილი ვიზიტი. თურქეთის თავდაცვის მინისტრმა ჰულუსი აკარმა ვიზიტს უაზრო უწოდა.
თურქეთი ჯერჯერობით თავს იკავებს შვედეთისა და ფინეთის ნატოში შესვლის რატიფიცირებისგან და სტოკჰოლმისგან 70-ზე მეტი ადამიანის ექსტრადირებას ითხოვს, რომლებიც ანკარაში ტერორისტებად ითვლებიან.
ლატვიის საგარეო საქმეთა სამინისტრომ განაცხადა, რომ ამ ქვეყანაში რუსეთის ელჩი მიხაილ ვანინი 24 თებერვლამდე უნდა დატოვოს.
ეს არის იანვარში დაწყებული დიპლომატიური კონფლიქტის გაგრძელება. ჯერ ესტონეთის საგარეო საქმეთა სამინისტრომ მოსკოვს რუსეთის საელჩოს თანამშრომელთა რვა დიპლომატამდე შემცირება მოსთხოვა.
რუსეთის საგარეო საქმეთა სამინისტრომ ამ მოთხოვნას რუსეთსა და ესტონეთს შორის დიპლომატიური ურთიერთობების სტატუსის შემცირებით უპასუხა . ეს ნიშნავს, რომ ქვეყნები ორმხრივად იწვევენ თავიანთ ელჩებს და დიპლომატიურ მისიებს დროებითი თანამდებობის პირები უხელმძღვანელებენ.
ლატვიამ დღეს დილით ასევე გამოაცხადა, რომ აპირებს რუსეთთან დიპლომატიური ურთიერთობების სტატუსის დაწევას, საღამოს კი თარიღები დაასახელა – რუსეთის ელჩმა ქვეყანა რუსეთის უკრაინასთან ომის წლისთავამდე უნდა დატოვოს.
რუსეთში, ნოვგოროდის რეგიონში, ქვეყნის პრეზიდენტის, ვლადიმერ პუტინის რეზიდენციის მახლობლად რუსებმა საჰაერო თავდაცვის სისტემების მონტაჟი დაიწყეს. აღნიშნულ ინფორმაციას რუსული მედია რუსული მედია Агентство Новости-ი ავრცელებს.
ნოვგოროდის ოლქის ქალაქ ვალდაის მაცხოვრებლებმა მედიას გასულ კვირას სოფელ იაშჩეროვოში გადაღებული ფოტო გაუგზავნეს. ფოტოზე ნაჩვენებია საჰაერო თავდაცვის სისტემა, რომელიც, ფოტოს ავტორის თქმით, სოფელში რამდენიმე კვირის წინ განათავსეს.
Агентство. Новости-ს ვარაუდით, ფოტოზე Панцирь-С1-ის ტიპის საზენიტო სარაკეტო სისტემაა გამოსახული. ამავე ინფორმაციით, მსგავსი თავდაცვითი სისტემები შენიშნეს მოსკოვის ცენტრალურ რაიონებსა და მის გარეუბნებში.
ჟურნალისტები ასკვნიან, რომ საჰაერო თავდაცვის სისტემა იაშჩეროვოში გამოჩნდა უკრაინული თვითმფრინავების მიერ რუსეთის სამხედრო აეროდრომებზე ქვეყნის შიგნით თავდასხმის შემდეგ.
“უკრაინისთვის ტანკების გადაცემის შესახებ გადაწყვეტილებას მალე მივიღებთ” – ამის შესახებ, გერმანიის თავდაცვის მინისტრმა, ბორის პისტორიუსმა განაცხადა.
“საჭიროა არა მხოლოდ ტანკების მიწოდება ან არ მიწოდება, არამედ უმოქმედობისა და მოქმედების შედეგების აწონვა. Leopard – ეს არის მძიმე ჯავშანტექნიკა, რომელიც შეტევის დროს გამოიყენება. და მათი გადაცემისას კარგად უნდა დაფიქრდეთ. გადაწყვეტილება მალე მიიღება, მაგრამ ეს ბევრ ფაქტორზეა დამოკიდებული”, – თქვა გერმანიის თავდაცვის მინისტრმა.