ვაშინგტონ პოსტი. აშშ.
6.12.2018
ავტორი: ადამ ტეილორი
ცოტა ხნის წინ 25 ქვეყანაში ჩატარებულმა გამოკითხვებმა აჩვენა, რომ მსოფლიოში რუსეთის ლიდერის, ვლადიმერ პუტინის მიმართ ნეგატიური განწყობაა. ამავე დროს, გამოკითხულთა აზრით მსოფლიო არენაზე რუსეთის გავლენა იზრდება.ამაზე მეტყველებს ამერიკული ორგანიზაცია Pew Research Center –ის მიერ 6 დეკემბერს გამოქვეყნებულიახალი კვლევა.
{{ARTICLEIMAGE}}
კვლევის შედეგებით მიუხედავად იმისა, რომ რუსეთი მრავალ პრობლემას ეჯახება, მათ შორის აშშ–ს სანქციებს, გეოპოლიტიკურ იზოლაციას და დაუნდობელი ქვეყნის რეპუტაცია აქვს, პუტინმა მოახერხა მთელ მსოფლიოში რუსეთის გავლენის პროეცირების საშუალებები მოეძებნა.
ისეთ საკვანძო რეგიონებში, როგორიც არის მაგალითად ახლო აღმოსავლეთი მოსკოვს დღეს აშკარად ისეთი გავლენა აქვს, რომელიც საბჭოთა კავშირის დროიდან არ ჰქონია და ხშირად ამერიკულ ინტერესებს ეჯახება.
საინტერესოა, რომ ქვეყნების უმეტესობაში ტრამპისა და პუტინის დადებითი შეფასებების ურთიერთგადაფარვა შედარებით უმნიშვნელო იყო. ფილიპინები ერთადერთი ქვეყანა აღმოჩნდა, სადაც რესპოდენტთა უმრავლესობის (54%) განცხადებით მათ ჯერათ, რომ ეს ორი ლიდერი საერთაშორისო ასპარეზზე სწორად იქცევა.
პუტინის მიმართ, რომელსაც ბრალს სდებენ საერთაშორისო პოლიტიკის მნიშვნელოვან მოვლენებში პირად მონაწილეობაში – მაგალითად აშშ–ს 2016 წლის საპრეზიდენტო არჩევნებზე გავლენის მოხდენაში ან ბრიტანეთის ტერიტორიაზე რუსეთის სამხედრო დაზვერვის ყოფილ ოფიცერზე თავდასხმაში, უკიდურესად ნეგატიური განწყობაა იმ ქვეყნების უმრავლესობაში, სადაც კვლევა ჩატარდა. ოცდახუთივე ქვეყანაში საშუალოდ გამოკითხულთა მხოლოდ 26% თვლის, რომ პუტინი საერთაშორისო პოლიტიკაში სწორ ნაბიჯებს დგამს. საპირისპირო პოზიცია აქვს გამოკითხულთა 63%–ს.
ეს ციფრები არსებითად დაბალი მაჩვენებელია სხვა მსოფლიო ლიდერების მაჩვენებლებთან შედარებით, როგორებიც არიან მაგალითად მერკელი და მაკრონი. თუმცა მცირედით მაინც აღემატება ტრამპის მაჩვენებლებს. მხოლოდ ორი ქვეყანაა, სადაც პუტინის მიმართ უმრავლესობა დადებითად არის განწყობილი – ფილიპინები (63%) , ტუნისი (55%)
რაც შეეხება ზოგადად რუსეთის მიმართ დამოკიდებულებას, ის ცოტა უკეთესი აღმოჩნდა, ვიდრე პირადად პუტინის მიმართ დამოკიდებულება. საშუალოდ 34% რუსეთის მიმართ დადებითად არის განწყობილი, 54% კი უარყოფითად. ფილიპინები (63%), ტუნისი (55%), სამხრეთ კორეა (53%) და საბერძნეთი (52%) არიან ქვეყნები, სადაც მოსახლეობის უმრავლესობამ რუსეთის მიმართ დადებითი დამოკიდებულება გამოხატა.
ბოლო წლების მანძილზე ქვეყნების უმეტესობაში არსებითად შემცირდა იმ ადამიანების რიცხვი, რომლებიც პუტინის და რუსეთის მიმართ დადებითად არიან განწყობილი. შვედეთში რესპოდენტთა წილი, რომლებიც რუსეთის მიმართ უარყოფითად არიან განწყობილი 2007 წელს 59% იყო, 2018 წელს კი 79%.
ქვეყნების უმეტესობაში პუტინის მიმართ ნდობა, რომელიც ისედაც დაბალი იყო, კიდევ უფრო დაეცა. მაგრამ ზოგიერთ ქვეყანაში გაიზარდა – პირველ რიგში ფილიპნებზე, სადაც 2014 წელს არსებული 34% ნდობა 2018 წლისთვის 61% მდე გაიზარდა.
თუმცა რუსეთის ნეგატიური რეიტინგის ზრდის მიუხედავად, ასევე იზრდება რესპოდენტთა წილი, რომლებიც თვლიან რომ მსოფლიოში რუსეთის გავლენა გაიზარდა. კვლევის შედეგების მიხედვით საშუალოდ გამოკითხულთა 42 % თვლის, რომ ამჟამად მოსკოვი მსოფლიოში ბევრად უფრო მნიშვნელოვან როლს თამაშობს, ვიდრე ათი წლის წინ. შედარებისთვის, გამოკითხულთა მხოლოდ 19% თვლის, რომ რუსეთის როლი შემცირდა, 28% კი დარწმუნებულია, რომ იგივე დარჩა.
აშკარაა, რომ პირდაპირი კავშირი რუსეთის გავლენის ზრდასთან დაკავშირებულ რწმენასა და მის მიმართ დადებით დამოკიდებულებას შორის არ არსებობს. მხოლოდ ფილიპინელ რესპოდენტთა 23 % თვლის, რომ რუსეთი ამჟამად უფრო მნიშვნელოვან როლს თამაშობს, ვიდრე 10 წლის წინ. 22% თვლის, რომ მისი როლი შემცირდა. მაგრამ საბერძნეთში და ტუნისში გამოკითხულთა უმრავლესობა პასუხობს, რომ რუსეთი დღეს უფრო მნიშვნელოვან როლს თამაშობს. (65% და 59% შესაბამისად).
საშუალოდ, გამოკითხულთა 31% თვლის, რომ ამჟამად ამერიკა ბევრად მნიშვნელოვან როლს თამაშობს მსოფლიო ასპარეზზე, ვიდრე 10 წლის წინ. ამასთანავე, საშუალოდ 70% დარწმუნებულია, რომ საერთაშორისო საქმეებში ჩინეთის როლი გაიზარდა.
რუსეთს არ გააჩნია ზესახელმწიფოს ისეთი სტატუსი, რომელიც აშშ–ს და ჩინეთს აქვთ. მიუხედავად უზარმაზარი ტერიტორიისა და მოსახლეობის დიდი რაოდენობისა, მისი მშპ მხოლოდ 1,5 ტრილიონი დოლარია, რაც სამხრეთ კორეისა და კანადის მშპ–ს უტოლდება.
თუმცა რუსეთმა როგორც ძვირადღირებული ნაბიჯები – მაგალითად სირიი სამხედრო კამპანია – ასევე ნაკლებხარჯიანი ნაბიჯები – როგორიც არის მაგალითად დეზინფორმაციის გავრცელების მრავალი აქტი – გადადგა, რომლებმაც საერთაშორისო მოვლენებზე შესამჩნევი გავლენა მოახდინეს.
კრემლის იმიჯმეიკერებმა ასევე გაათამაშეს პუტინის პიროვნების კარტი, რათა უცხოურ აუდიტორიაზე შთაბეჭდილება მოეხდინათ. “ჩვენ განზრახ ვქმნიდით იდუმალების ატმოსფეროს პუტინის პიროვნების გარშემო – განაცხადა პუტინის ყოფილმა პოლიტტექნოლოგმა გლებ პავლოვსკიმ ვაშინგტონ პოსტთან ინტერვიუში. – უნდა შექმნილიყო ძლიერი სახე სუსტ სახელმწიფოში.“
რუსეთის შიგნით პუტინი კვლავ ძალიან პოპულარულ ფიგურად რჩება. ბოლო დროს მისი რეიტინგი რუსეთში ოდნავ შემცირდა – 66% –მდე. თუმცა ასეთი რეიტინგი ალბათ ბევრ დასავლელ ლიდერს შეშურდებოდა. საინტერესოა, რომ პრობლემების უმეტესობა, რომელსაც პუტინი ეჯახება შიდაპოლიტიკური ხასიათისაა. თუმცა ის თავისი პოპულარობის შესანარჩუნებლად საგარეო პოლიტიკას იყენებს. Pew research center – ის კვლევის თანახმად რუსეთის მოქალაქეთა 72% თვლის, რომ დღეს რუსეთი საერთაშორისო არენაზე ბევრად დიდ როლს თამაშობს, ვიდრე 10 წლის წინ.
ორგანიზაციამ გამოკითხვა 2018 წლის მაისიდან აგვისტოს ჩათვლის ჩაატარა. მასში თითოეული ქვეყნის 915–დან: 2521–მდე მოქალაქე მონაწილეობდა. ყოველ ქვეყანაში ცდომილება +- 2.8 –5.1% –ს შეადგენს.
სტატიის ორიგინალი
