Category: მსოფლიო

აშშ–ს რამდენიმე პოლიტიკოსმა და ჟურნალისტმა პოლიტიკური სპექტრის ორივე ფლანგიდან რესპუბლიკელ სენატორს, რიჩარდ ბერს თანამდებობიდან საკუთარი ნებით წასვლისკენ მოუწოდეს. მას ბრალს სდებენ აქციებით ვაჭრობაში და კორონავირუსის პანდემიის შესახებ მნიშვნელოვანი ინფორმაციის დაფარვაში.

როგორც გამოცემა ProPublica–მ გაარკვია, ბერმა, რომელიც სენატის დაზვერვის კომიტეტს ხელმძღვანელობს, წელს 13 თებერვალს მისი და მისი ცოლის კუთვნილი აქციების გაყიდვა დაიწყო, რომელთა ღირებულება დაახლოებით 700 000–დან 1 700 000 დოლარამდეა შეფასებული. ფასიანი ქაღალდები 33 სხვადასხვა გარიგებით გაიყიდა.

კონგრესის წევრებს, ისევე როგორც ნებისმიერ ფედერალური თანამდებობის პირს ინსაიდერული ვაჭრობა ეკრძალებათ. ეს აკრძალვა დადგენილია კანონით: “კონგრესის ცოდნაზე დაფუძნებული ვაჭრობის“ შესახებ, რომელიც ობამას ადმინისტრაციის დროს, 2012 წელს მიიღეს. მაშინ ბერი ერთ–ერთი იყო სამ სენატორს შორის, ვინც კანონს ხმა არ მისცა.

სენატის დაზვერვის კომიტეტის ხელმძღვანელობა რიჩარდ ბერს შესაძლებლობას აძლევდა აშშ–ს სპეცსამსახურებისგან სრულიად საიდუმლო ინფორმაცია მიეღო. როგორც სააგენტო როიტერი ამტკიცებს, ამ წლის თებერვალში ამერიკის დაზვერვის სამსახურები ყოველდღიურ რეჟიმში აწვდიდნენ სენატორებს ანგარიშებს ვირუსის საფრთხის და გავრცელების სისწრაფის შესახებ.

თებერვლის შუა პერიოდიდან ამერიკის საფონდო ბაზარი ისტორიული მაქსიმუმების სიახლოვეს იყო. მარტში კი, მას შემდეგ, რაც ბერმა ყველა აქცია გაყიდა, ბირჟებმა კატასროფული ვარდნა განიცადეს , რამაც ბოლო წლებში მიღებული მთელი მოგების ლიკვიდაცია გამოიწვია.

მიმდინარე კვირას ამერიკის საზოგადოებრივმა რადიომ, NPR–მ თავის ინტერნეტ გვერდზე გამოაქვეყნა ბერის და რესპუბლიკური პარტიის მაღალჩინოსანი მხარდამჭერების შეხვედრის აუდიოჩანაწერი, რომელიც 27 თებერვალს ჩრდილოეთ კაროლინის შტატში შედგა. სწორედ ამ შტატს წარმოადგენს სენატორი. ბერი ამბობს, რომ რადიომ მისი გამოსვლა “შეგებულად და უპასუხისმგებლოდ დაამახინჯა.“

მანამდე ერთი დღით ადრე დონალდ ტრამპმა გამოაცხადა, რომ ახალი პანდემიის გამო შეშფოთება გაზვიადებულია და ახლო მომავალში კორონავირუსით ინფიცირების მაჩვენებელი კლებას დაიწყებდა.

“ეს ყველაფერი გაქრება. ერთხელაც მოხდება სასწაული, და ეს ყველაფერი გაქრება“ – თქვა თეთრი სახის მეთაურმა და პირობა დადო, რომ ახალი ვირუსით სიკვდილიანობის მაჩვენებელი აშშ–ში ნოლს არ ასცილდებოდა.

მეორე დღეს, საკუთარ მხარდამჭერებათან შეხვედრისას კი ბერი ასეთ ოპტიმისტურ სურათს არ ხატავდა:

“ერთი რამ მინდა გითხრათ დღევანდელ პრობლემაზე – ეს ვირუსი ბევრად უფრო აგრესიულია და ბევრად უფრო სწრაფად გადაეცემა, ვიდრე ოდესმე აქამდე ისტორიის მანძილზე გსმენიათ. შესაძლოა სიტუაცია უფრო უარესი იყოს, ვიდრე ეს 1918 წელს (ესპანური პანდემიის დროს) იყო.“– თქვა სენატორმა.

მანამდე რამდენიმე დღით ადრე, 7 თებერვალს სენატორმა ბერმა გავლენიან სენატორთან, ლამარ ალექსანდრთან ერთად ტელეკომპანია fox–ის საიტზე გამოაქვეყნა სტატია, რომელშიც ამტკიცებდა, რომ აშშ მსოფლიოს სხვა სახელმწიფოებზე უკეთ არის მომზადებული ნებისმიერ ეპიდემიასთან საბრძოლველად.

სამხრეთ კორეა, ჩინეთი, სინგაპური და აზიის სხვა ქვეყნები COVID19-ის ეპიდემიასთან ბრძოლაში წარმატებებს აღწევენ, თუმცა ახლა ისინი შესაძლოა ახალი საფრთხის წინაშე აღმოჩნდნენ– ვირუსი აზიაში ამიერიდან ევროპიდან და აშშ–დან შეიძლება “დაბრუნდეს“.

არადა, ვითარება აზიურ ქვეყნებში თითქოს გამოსწორდა. იაპონიაში მხოლოდ ერთეული შემთხვევები ფიქსირდება, ჰოკაიდოს პრეფექტურაში კი, სადაც 154 დაინფიცირებული ფიქსირდება საგანგებო მდგომარეობა გააუქმეს.

უხანში, საიდანაც პანდემია დაიწყო ბოლო დღეებში არცერთი ახალი შემთხვევა არ დაფიქსირებულა. ექვსი კვირის მანძილზე იზოლაციაში მყოფ ქალაქის მაცხოვრებლებს ახლა უკვე ქუჩაში გამოსვლაც შეუძლიათ.

ვირუსის გავრცელების დინამიკა იცვლება. პანდემიის კერად უკვე ევროპის ქვეყნები იქცნენ იმ დროს, როცა აზიამ მისი პიკი უკვე გადაიტანა. ამ ფონზე უკვე შესაძლოა აზიურ ქვეყნებს დაჭირდეთ საკუთარი საზღვრების ჩაკეტვა.

ჩინეთში, სამხრეთ კორეაში და რეგიონის სხვა ქვეყნებში იზრდება “იმპორტირებული“ დაინფიცირების შემთხვევები. ჩინოვნიკები და ექსპერტები ამბობენ, რომ ადგილობრივი ჯანდაცვის სისტემები ამისათვის მზად უნდა იყვნენ.

ვირუსის მიგრაცია

ჩინეთში ცოტა ხნის წინ პირველად აღინიშნა 24 საათიანი პერიოდი ახალი დაინფიცირებულების გარეშე.

სინგაპურში კი ერთი დღეღამის განმავლობაში 47 შემთხვევა დაფიქსირდა, საიდანაც 33 ქვეყანაში უცხოეთიდან ჩასულმა სინგაპურის მოქალაქეებმა ჩაიტანეს.

სამხრეთ კორეაში გუშინ დაინფიცირებულთა რაოდენობამ უცებ იმატა – 152 ახალი შემთხვევა დაფიქსირდა. თუმცა დაკავშირებულია თუ არა ქვეყანაში მოგზაურობიდან დაბრუნებულებთან უცნობია.

ჩინეთის მიგრაციის სააგენტომ კვირის დასაწყისში განაცხადა, რომ 11 მარტიდან, ანუ მას შემდეგ, რაც ჯანმომ პანდემია გამოაცხადა, ჩინეთში ყოველდღიურად 120 000 ადამიანი შედის.
ექსპერტების უმრავლესობა თანხმდება, რომ ჩინეთმა პიკის გადატანა მოახერხა, თუმცა ამისათვის ხელისუფლებამ უსასტიკეს ზომებს მიმართა – მთელი ქალაქების იზოლაცია და მოქალაქეების სავალდებულო კარანტინი გამოაცხადა.

“ბევრი ხვდება, რომ ეს წარმატება დროებითია. შეკავება რთულდება იმით, რომ ყველა ამ ქვეყანაში იზრდება “იმპორტირებული“ დაინფიცირების შემთხვევები, ამ ეტაპზე ძირითადად ევროპიდან, თუმცა მომავალში შესაძლოა სხვა რეგიონებიდანაც“– განაცხადა Financial Times–თან საუბარში ჰონკონგის უნივერსიტეტის ეპიდემიოლოგიის პროფესორმა ბენ კოულინგმა.

სტატისტიკა მეტყველებს, რომ აზიაში ვირუსის აფეთქებამ მართალია პიკი გადაიარა, მაგრამ დასრულებისგან ჯერ შორს არის. ყველაზე ნათელი მაგალითია სამხრეთ კორეა, რომელმაც მართლაც წარმატებით შეაჩერა ვირუსი. ინფექციის კვალის გამოკვლევა ეფექტურად ხდებოდა, ტარდებოდა ბევრი ტესტები, დაინფიცირების იზოლირება სწრაფად ხდებოდა.

თუმცა ბოლო დღეებში იქ დაინფიცირებულთა რიცხვმა ზრდა ისევ დაიწყო.

სამხრეთ კორეის ჯანდაცვის სამინისტრო ისევ აფრთხილებს ხალხს, რომ ჯერ მოდუნება ნაადრევია და მოუწოდებს მათ ჯგუფურ შეკრებებს თავი აარიდონ, არ იარონ კაფეებში, რესტორნებში და ეკლესიებში.

გარდა ამისა, კორონავირუსით დაინფიცირდა კორეის ფარიკაობის ნაკრების სამი სპორტსმენი, რომლებიც ტურნირზე ბულგარეთში მიდიოდნენ. ამჟამად შემოწმებას მთელი ნაკრები გადის.

ევროკავშირი Netflix–ს და სხვა სტრიმინგ პლატფორმებს სთხოვს შეწყვიტონ მაღალი გარჩევადობის ვიდეოების ტრანსლირება, რათა კორონავირუსის პანდემიის გამო ინტერნეტის უპრეცედენტო გადატვირთვა შეამსუბუქოს.

მრავალ ქვეყანაში კორონავირუსის პანდემიის გამო გამოცხადებული კარანტინის გამო ასობით მილიონი ადამიანი სახლიდან მუშაობს, ინტერნეტით მიმდინარეობს სასწავლო პროცესიც კი, ამიტომ ევროკავშირის ჩინოვნიკები შეშფოთებულნი არიან ინტერნეტის უპრეცედენტო მოხმარებით და მისი შეზღუდული გამტარუნარიანობით, რაც მის შეფერხებას იწვევს.

ევროკომისარმა ტერი ბრეტონმა, რომელიც ევროკავშირის შიდა ბაზარზე აგებს პასუხს, ტვიტერში დაწერა, რომ ელაპარაკა Netflix–ის გენერალურ დირექტორს, რიდ ჰასტინგსს. მან მოუწოდა ხალხს და კომპანიებს, როცა HD ხარისხი აუცილებელი არ არის, სტანდარტული გარჩევადობის ფორმატში უყურონ ვიდეოს, რათა ინტერნეტთან წვდომა ყველას შეუფერხებლად ქონდეს. ბრეტონმა დღევანდელ განცხადებაში თქვა, რომ უპრეცედენტო სიტუაციის გათვალისწინებით სტრიმინგ პლატფორმები, ქსელის ოპერატორები და მომხმარებლები – ყველა ერთნაირად არის პასუხისმგებელი ზომების მიღებაზე, რათა ინტერნეტმა ვირუსთან ბრძოლის პერიოდში უხარვეზოდ იმუშაოს. Netflix –ის დირექტორმა CNN Business–ს განუცხადა, რომ კომისარი ბრეტონი მართალია, როცა ხაზს უსვამს ინტერნეტის შეუფერხებლად მუშაობის მნიშვნელობას ამ კრიტიკულ მომენტში.

“ჩვენ კონცენტრირებულნი ვიყავით ქსელის ეფექტურობაზე მრავალი წლის განმავლობაში, მათ შორის ღია კავშირის მიწოდების უფასო მომსახურებაზე სატელეკომუნიკაციო კომპანიებისთვის. “– ამბობს ის.

Netflix აცხადებს, რომ უკვე დაიწყო სტრიმინგის ხარისხის რეგულირება ქსელების გამტარუნარიანობის გათვალისწინებით და სპეციალური მიწოდების ქსელს იყენებს, რომელიც მომხმარებელს არსებულ ბიბლიოთეკასთან წვდომას უადვილებს, თუმცა დიდ რესურსს არ მოიხმარს.

ევროკომისია აცხადებს, რომ მართალია ბოლო კვირებში ინტერნეტის მოხმარება მკვეთრად გაიზარდა, ჯერჯერობით არ ყოფილა დარეგისტრირებული სერიოზული ხარვეზი და მძიმე შედეგი.
ევროკავშირის ჩინოვნიკები აცხადებენ, რომ იმუშავებენ კომუნიკაციის სფეროს მარეგულირებლებთან სპეციალური მექანიზმების შესაქმნელად, რათა ინტერნეტ ტრაფიკს მონიტორინგი გაუწიონ და პრობლემების შემთხვევაში სწრაფი რეაგირება მოახდინონ.

ჩინეთმა სამშაბათს განაცხადა, რომ ის ამერიკული სამი მთავარი გამოცემის ჟურნალისტებს ქვეყნიდან აძევებს. „ნიუ-იორკ თაიმსის“, „ვაშინგტონ პოსტის“ და „უოლ-სტრიტ ჯორნალის“ ჟურნალისტებს ქვეყანაში მუშაობა ეკრძალებათ. პეკინის განცხადებით, ეს პასუხია „ჩინური მედია სააგენტოებისთვის დაწესებულ უკანონო აკრძალვებზე”.

დამატებით, პეკინმა ორ სააგენტოს, „თაიმსს“ და ამერიკის მთავრობის მიერ დაფინანსებულ „ამერიკის ხმას“ მოუწოდა, რომ ჩინეთის მთავრობას დეტალური ინფორმაცია მიაწოდონ მათი საქმიანობის შესახებ.

„ნიუ-იორკ თაიმსის“, „უოლ-სტრიტ ჯორნალის“ და „ვაშინგტონ პოსტის“ ჟურნალისტების აკრედიტაცია წლის ბოლოს სრულდებოდა. პეკინმა მათ მოუწოდა, პრესის ბარათები 10 დღის ვადაში ჩააბაროს ქვეყნის მთავრობას.

ჩინეთმა განაცხადა, რომ ამერიკელ ჟურნალისტებს „არ ექნებათ უფლება გააგრძელონ ჟურნალისტებად მუშაობა ჩინეთის სახალხო რესპუბლიკაში, მათ შორის ჰონგ-კონგსა და მაკაოს ადმინისტრაციულ რეგიონებში”. ამ ტერიტორიებს პეკინისგან გარკვეული ავტონომია აქვთ და მათი მედია გარემო შედარებით უფრო თავისუფალია, ვიდრე საკუთრივ ჩინეთის.

სახელმწიფო მდივანმა მაიკ პომპეომ, ჩინეტის გადაწვეტილება გააკრიტიკა: „ჩინეთის დღევანდელი გადაწვეტილება, რომ უფრო მეტად შეზღუდოს მსოფლიოს მცდელობა თავისუფალი მედია საქმიანობა აწარმოოს ჩინეთში, მე მამწუხრებს, რადგან ეს ჩინელი ხალხისთვის ძალზედ კარგი იქნებოდა. ეს სამწუხაროა. იმედი მაქვს ისინი ამას გადახედავენ“, – თქვა შეერთებული შტატების სახელმწიფო მდივანმა.

ამ გამოცემების ჟურნალისტები აქტიურად აშუქებდნენ კორონავირუსის გავრცელებას, რომელიც ჩინეთში, ქალაქ ვუჰანში დაიწყო. ასევე აქტიურად მუშაობდნენ ჩინეთის მთავრობისთვის სხვა სენსიტიურ საკითხებზეც, მათ შორის მუსლიმი მოსახლეობის იზოლაციაზე და ბანაკებში განთავსებაზე, თუ კომუნისტური პარტიის ლიდერების, მათ შორის პრეზიდენტ სი ძინპინის ბიზნეს საქმიანობაზე.

“ნიუ-იორკ თაიმსის” მთავარმა რედაქტორმა დინ ბაკეტმა, ჟურნალისტების გაძევება მკაცრად გააკრიტიკა და თქვა, რომ ეს „განსაკუთრებით უპასუხისმგებლოა იმ დროში, როცა მსოფლიოს სჭირდება კორონავირუსის პანდემიის შესახებ სანდო ინფორმაციის თავისუფალი და ღია მოძრაობა“.

გადაწვეტილება ასევე დაგმეს „უოლ-სტრიტ ჯორნალის“ და „ვაშინგტონ პოსტის“ რედაქტორებმა.

კოლეგების მსგავსად, განცხადება გაავრცელა „ამერიკის ხმამაც“ და ჩინეთის მიერ მისი საქმიანობის შეზღუდვა გააკრიტიკა.

„ნიუ იორკ თაიმსის“, „ვაშინგტონ პოსტის“ და „უოლ სტრიტ ჯორნალის“ კოლეგების მსგავსად, ვრჩებით ჩვენი საქმიანობის ერთგულნი ჩინეთში და ვგმობთ მისი შეზღუდვის მცდელობას. ჩვენ გავაგრძელებთ ჩინურ ენაზე მოსაუბრე ჩვენი აუდიტორიისთვის ახალი ამბების სანდო, სარწმუნო და ავტორიტეტულ წყაროდ ყოფნას“, – განაცხადა „ამერიკის ხმამ“.

თებერვალში, შეერთებულმა შტატებმა განაცხადა, რომ ხუთ ჩინურ სახელმწიფო ახალი ამბების სააგენტოს, შეზღუდვას უწესებდა თანამშრომლების რაოდენობაზე. მხოლოდ 100 ადამიანს შეეძლებოდა შეერთებულ შტატებში მათ წარმომადგენლად მუშაობა.

პომპეოს თქმით, ამ გადაწვეტილების მიზეზი ისაა, რომ ეს სააგენტოები „ჩინური პროპაგანდის ნაწილია“ და ამერიკული კანონმდებლობით ისინი „უცხო ქვეყნის მისიას“ წარმოადგენენ.

წყარო: ამერიკის ხმა

მსოფლიოში ერთ-ერთი ყველაზე ცნობილი სოციალური ქსელი Facebook-ი თავის 45 ათასმდე თანამშრომელს კორონავირუსის პანდემიის დროს მხარდასაჭერად 1000 დოლარს დაურიცხავს.

აღნიშნულ პრემიას მხოლოდ სრულ განაკვეთზე მომუშავე თანამშრომლები მიიღებენ, მათ შორის ისინი, ვინც საკუთარ მოვალეობას დისტანციურად ასრულებს.

კომპანიამ თვის დასაწყისში განაცხადა, რომ კვლავ გააგრძელებს იმ თანამშრომლებისთვის ხელფასის იგივე რაოდენობით გადახდას, ვისაც დისტანციურ რეჟიმზე გადასვლის გამო, იგივე დატვირთვით მუშაობა არ უწევთ. მაგალითად, დამლაგებლებს და კაფეტერიის თანამშრომლებს.

კომპანია Securities and Exchange Commission-ის მიხედვით, Facebook-ის თანამშრომლების წლიური საშუალო ხელფასი დაახლოებით 228,651 აშშ დოლარია.

ცნობისთვის, დიდმა ტექნოლოგიურმა კომპანებმა, როგორიცაა Twitter-ი, Google-ი, Facebook-ი, Amazon-ი, თანამშრომლებს გასულ კვირას დისტანციურად მუშაობისკენ მოუწოდეს, თუკი მათ სამსახურში დაკავებული პოზიცია ამის შესაძლებლობას აძლევდათ.

ნევადას შტატის ქალაქ ლას-ვეგასში დღეიდან ყველა კაზინო, ბარი და რესტორანი დაიკეტება. გადაწყვეტილება გუბერნატორმა სტივ სისოლაკმა მიიღო.

გუბერნატორის თქმით, აღნიშნული გადაწყვეტილება კორონავირუსის პრევენციისთვის არის საჭირო. აკრძალვა 30 დღის განმავლობაში გაგრძელდება.

,,დღეს აშკარაა, რომ აუცილებელია დამატებითი ნაბიჯების გადადგმა, რათა შევაჩეროთ სასიკვდილო ვირუსი ჩვენს სახელმწიფოში”,- თქვა სისოლაკმა ლას-ვეგასში გამართულ პრესკონფერეციაზე და მოსახლეობას სახლში დარჩენისკენ მოუწოდა.

„ჩვენ ან ნაბიჯს ვდგამთ თითოეული ნევადელის ჯანმრთელობისა და უსაფრთხოებისთვის. გთხოვთ, მიუდგეთ მოცემულ მდგომარეობას სერიოზულად, თქვენი და თქვენი ახლობლების სიცოცხლე თქვენს ხელშია. გთხოვთ დარჩეთ სახლში“, – აღნიშნა სისოლაკმა თავის მიმართვაში.

სისოლაკის განმარტებით, აკრძალვის პერიოდში მომსახურების გაწევა შეეძლებათ სასურსათო მაღაზიებს, ბანკებს, აფთიაქებს და პროდუქტის მიწოდების სერვისებს.

ამ დროისთვის აშშ-ში COVID 19-ით ინფიცირების 8000-ზე მეტი შემთხვევა ფიქსირდება, გარდაცვლილი კი 124-ია.