Category: მსოფლიო

აშშ-ის სახელმწიფო მდივანმა მაიკ პომპეომ, 3 მაისს ტელეარხ ABC-ის სატელევიზიო ეთერში განაცხადა, რომ საკმარისი საფუძველი არსებობს კორონავირუსის ჩინეთში, ლაბორატორიიდან გავრცელების შესახებ.

“არსებობს საკმარისი მტკიცებულება, რომ ეს [კორონავირუსი] ვუჰანის ლაბორატორიიდან გავრცელდა”, – განაცხადა პომპეომ.

სახელმწიფო მდივნის განცხადება, ფაქტობრივად უარყოფს დაზვერვის სააგენტოების დასკვნას. “საუკეთესო ექსპერტები ამ ეტაპზე ფიქრობენ, რომ [კორონავირუსი] ადამიანის მიერაა შექმნილი”, – თქვა სახელმწიფო მდივანმა.

აშშ-ს დაზვერვის დირექტორის დასკვნა ამბობს, რომ ახალი კორონავირუსი ადამიანის მიერ შექმნილი ან გენეტიკურად მოდიფიცირებული არ არის. როდესაც მაიკ პომპეოს ჟურნალისტმა უთხრა, რომ სადაზვერვო სამსახურებმა საწინააღმდეგო დაასკვნეს, პომპეომ უკან დაიხია.

“მე ვნახე ის, რაც დაზვერვის წარმომადგენლებმა დაასკვნეს. არ მაქვს საფუძველი ვიფიქრო, რომ ისინი ცდებიან”, – თქვა მან.

სახელმწიფო მდივნის მსგავსად, პრეზიდენტი დონალდ ტრამპი აცხადებდა, რომ შესაძლოა ვირუსი ჩინეთში “შეცდომით” გავრცელდა. პრეზიდენტმა ამის შესახებ თეთრ სახლში ჟურნალისტებს 30 აპრილს განუცხადა.

“შესაძლოა ჩინეთმა შეცდომა დაუშვა, შეიძლება შეცდომით დაიწყო და შემდეგ კიდევ შეეშალათ, ან შესაძლოა ეს ვინმემ განზრახ გააკეთა”, – თქვა პრეზიდენტმა და დაამატა, რომ შეერთებული შტატები ეცდება “შეისწავლოს როგორ გავრცელდა” ვირუსი.

ამავე ბრიფინგზე, პრეზიდენტმა ტრამპმა ჟურნალისტის კითხვაზე, თუ უნახავს მტკიცებულება და რამდენად დამაჯერებელია მისთვის ის ფაქტი, რომ ვირუსი ვუჰანის ვირუსოლოგიური ლაბორატორიიდან გავრცელდა, უპასუხა, რომ ეს მისთვის საკმაოდ დამაჯერებელია. მას დეტალებზე არ უსაუბრია. “ვერ გეტყვით, არ მაქვს უფლება გითხრათ”, – თქვა მან როცა ჟურნალისტმა თხოვა მისი კომენტარი განემარტა.

მიუხედავად იმისა, რომ მეცნიერები თანხმდებიან, რომ ვირუსი ჩინეთში, ვუჰანის პროვინციაში წარმოიშვა და იქიდან გავრცელდა, კვლავ უამრავი სპეკულაციაა იმის თაობაზე, თუ როგორ გაჩნდა ახალი კორონავირუსი: ის ცხოველიდან ადამიანზე გავრცელდა, შეიქმნა ლაბორატორიაში და შემთხვევით გავრცელდა, თუ როგორც შეთქმულების თეორიის ავტორებს მიაჩნიათ, გამიზნულად, სპეციალურად იყო შექმნილი და დამუშავებული.

ამერიკის დაზვერვის სააგენტოებმა, 3 აპრილს გავრცელებული განცხადებით ეს უკანასკნელი ვერსია გამორიცხეს, და თქვეს, რომ ეთანხმებიან ფართო სამეცნიერო კონსენსუსს იმის თაობაზე, რომ კოვიდ-19 არ იყო ადამიანის მიერ შექმნილი ან გენეტიკურად მოდიფიცირებული ვირუსი. ამის შესახებ ეროვნული სადაზვერვო სამსახურის დირექტორმა ისაუბრა.

დაზვერვის სამსახურების მიერ გავრცელებულმა ცნობებმა ღიად დატოვა ის საკითხი, აქვს თუ არა ჩინეთში წარმოშობილ ვირუსს კავშირი ჩინელ მკვლევარებთან.

“სადაზვერვო საზოგადოება განაგრძობს ინფორმაციის გულდასმით შესწავლას იმის დასადგენად თუ როგორ გავრცელდა ეპიდემია: ინფიცირებულ ცხოველთან ადამიანის კონტაქტით თუ ვუჰანის ლაბორატორიაში მომხდარი გარკვეული შემთხვევით”, – აცხადებენ ამერიკული დაზვერვის ხელმძღვანელები.

ჩინეთის მთავრობა, ვუჰანის ვირუსულოგიის ინსტიტუტს გამუდმებით უცხადებს მხარდაჭერას და უარყოფს ბრალდებებს იმის თაობაზე, რომ შესაძლოა ის ყოფილიყო კოვიდ-19-ის თავდაპირველი აფეთქებისა და გავრცელების წყარო. მათი ექსპერტების პოზიციით, ვირუსი სავარაუდოდ ცხოველიდან ადამიანს ლაბორატორიასთან ახლოს მდებარე ცხოველთა ბაზარში გადაედო.

ვუჰანის ვირუსოლოგიის ინსტიტუტი 1950 წელს დაარსდა. ინსტიტუტში მდებარეობს ქვეყნის პირველი, მეოთხე დონის ბიოუსაფრთხოების ლაბორატორიაც. ამგვარ ლაბორატორიებში მაღალი რისკის შემცველი, ძლიერ სახიფათო პათოგენები ინახება, რომელთათვისაც ჯერჯერობით ვაქცინა თუ სამკურნალო საშუალებები არ არსებობს. დაწესებულების ნაწილში კი ღამურებიდან გადამდებ კორონავირუსებს იკვლევენ.

ტრამპი გამუდმებით ეჭვქვეშ აყენებს ჩინეთის მიერ ამ პოზიციების უარყოფას და პეკინსა და ჯანდაცვის მსოფლიო ორგანიზაციას მთელი დანარჩენი მსოფლიოს შეცდომაში შეყვანაში ადანაშაულებს.

“ბევრი თეორია არსებობს. ამჟამად, ვფიქრობ, ჩინეთი ცდილობს გარკვეულწილად გამჭვირვალე იყოს ჩვენთან”, – ამბობს პრეზიდენტი და დასძენს, რომ ჩინეთის მთავრობის წევრებმა უნდა შეწყვიტონ მთავარი დეტალების დამალვა.

ამ დრომდე, მსოფლიოს გარშემო ვირუსს 246 000 ადამიანი ემსხვერპლა. შეერთებულ შტატებში გარდაცვლილია 67 000-ზე მეტი ადამიანი.

ბელორუსის პრეზიდენტი, ალექსანდრ ლუკაშენკო კორონავირუსის პანდემიის გამო 9 მაისის სამხედრო აღლუმის გაუქმებას არ აპირებს. ლუკაშენკო მსოფლიოს იმ მცირერიცხოვან ლიდერთა შორის არის, რომლებიც ჯანდაცვის მსოფლიო ორგანიზაციის რეკომენდაციებს არაფრად აგდებს, არ აპირებს კარანტინი შემოიღოს და არც სოციალურ დისტანციას იცავს.

“ჩვენ აღლუმს ვერ გავაუქმებთ. უბრალოდ არ შეგვიძლია. დიდხანს ვფიქრობდი ამაზე. რა თქმა უნდა, ეს ემოციონალური, ღრმად იდეოლოგიური რამ არის.“– თქვა ლუკაშენკომ. ოფიციალური მონაცემებით ქვეყანაში კოვიდ19–ით 16 ათასზე მეტი  ინფიცირებული და 99 გარდაცვლილია. ბელორუსის მოსახლეობა ბოლო აღწერით 9 500 000–ს შეადგენს.

გერმანიაში საკვირაო მსახურებისთვის ეკლესიები იხსნება, თუმცა რიგი შეზღუდვებით. ჯერჯერობით აკრძალულია გალობა. ხელისუფლება თვლის, რომ სიმღერამ შეიძლება ვირუსის გავრცელების პროვოცირება გამოიწვიოს. შეზღუდულია დამსწრეთა რაოდენობა. ადამიანები ერთმანეთისგან ორ მეტრიანი დისტანციით უნდა იყვნენ დაშორებული. მღვდელმსახურებისთვის ნიღბები სავალდებულოა. სინაგოგებში და მეჩეთებშიც ჰიგიენის ახალი წესები დაინერგება.

გერმანიაში ბევრი მაღაზია, რომელიც 22 მარტიდან დახურული იყო გასულ კვირას გაიხსნა, თუმცა ამ დრომდე დაკეტილია რესტორნები, ბარები და სასტუმროები.  ჯერჯერობით არც სპორტული ღონისძიებები განახლებულა.

გასულ კვირას ხელისუფლებამ განაცხადა, რომ მალე საბავშვო მოედნები, მუზეუმები, ზოოპარკები და სხვა კულტურულ–დასასვენებელი ადგილები გაიხსნება.

გერმანიაში რობერტ კოხის ინსტიტუტის ინფორმაციით ბოლო დღეღამეში გარდაცვალების 74 შემთხვევა და 793 ახალი დაინფიცირებული დაფიქსირდა.

ქალაქ ნიუ იორკის მოსახლეობის 19.9%–ს ახალი კორონავირუსის ანტისხეულები აღმოაჩნდა. ამის შესახებ ტესტების მონაცემებზე დაყრდნობით ნიუ იორკის შტატის გუბერნატორმა, ენდრიუ კუომომ განაცხადა. ნიუ იორკი აშშ–ში კორონავირუსის ეპიცენტრია.  შტატში  ამ დროისთვის 319,213         ინფიცირებული და 24,368 გარდაცვლილია, რაც აშშ–ს საერთო მაჩვენებლის მესამედია.

კუომოსი განცხადებით ხელისუფლებამ ანალიზები ანტისხეულების არსებობაზე მოსახლეობას მთელი შტატის მაშტაბით აუღო. სულ ამ მომენტისთვის 15 000 ადამიანია გატესტილი. შტატის მაშტაბით კვლევამ აჩვენა, რომ მოსახლეობის 12.3%–ს კორონავირუსის ანტისხეულები აქვს.

რაც შეეხება ქალაქ ნიუ იორკს, ანტისხეულები მისი მოსახლეობის 19.9 %–ს აღმოაჩნდა. ყველა მონაცემები წინასწარია და გასაშუალოებული.

“თუ ნიუ იორკს ავიღებთ, იქ ყველაზე მეტ ადამიანს აღმოაჩნდა ანტისხეულები: 27.6% ბრონქსში, 19.2% ბრუკლინში, 17.3% მანჰეტენზე, 18.4% ქუინსში, 19.2% სტატენ აილენდზე“– განაცხადა კუომომ. მისი თქმით, ხელისუფლება მომავალში შეისწავლის, რატომ არის ბრონქსში ეს მაჩვენებელი ქალაქის სხვა რაიონებზე უფრო მაღალი.

დემოკრატთა სავარაუდო საპრეზიდენტო კანდიდატმა დღეს უარყო მის მიმართ წაყენებული სექსუალური შევიწროების ბრალდება. “ეს არასდროს მომხდარა”, – თქვა შეერთებული შტატების ყოფილმა ვიცე-პრეზიდენტმა ჯო ბაიდენმა ინტერვიუში, რომელიც მან ტელეკომპანიას “ემ-ეს-ენ-ბი-სი” (MSNBC) მისცა.

ამერიკის სენატის ყოფილი თანამშრომელი ტარა რიადი ამბობს, რომ მასზე მაშინ სენატორის რანგში მყოფმა ჯო ბაიდენმა მასზეე სექსუალურად 1993 წელს იძალადა. რიადის ორი ყოფილი თანამშრომელი ადასტურებს, რომ მან ამ შემთხვევის შესახებ მათ ადრევე უამბო.

ბაიდენის საპრეზიდენტო კამპანიის წარმომადგენლები ბრალდებებს ადრეც უარყოფდნენ, მაგრამ თავად ყოფილ ვიცე-პრეზიდენტს კომენტარი აქამდე არ გაუკეთებია. ბაიდენმა ეროვნული არქივებიდან გამოითხოვა ბრალდების ამსახველი დოკუმენტები, თუკი ასეთი რამ არსებობს.

“თუ სადმე მსგავსი საჩივარია, ჩანაწერი იქ იქნება… მე დასამალი არაფერი მაქვს” – აცხადებს ჯო ბაიდენი.

წყარო: ამერიკის ხმა

რუსეთის მშენებლობისა და კომუნალურ–საცხოვრებელი მეურნეობების მინისტრს, ვლადიმირ იაკუშევს კორონავირუსი დაუდგინდა. ამის შესახებ რუსული მედია წერს. მინისტრი საავადმყოფოში გადაიყვანეს. პრესსამსახური ამ ინფორმაციას ადასტურებს და ამბობს, რომ მინისტრი ხაზზე რჩება.

მინისტრის გარდა ახალი კორონავირუსი მის მოადგილეს, დიმიტრი ვოლკოვსაც აღმოაჩნდა.

კორონავირუსზე ტესტი სამინისტროს მთელ ხელმძღვანელობას ჩაუტარდა. დადებითი შედეგი მხოლოდ მინისტრის და მისი ერთი მოადგილის ტესტმა აჩვენა. უწყებაში აღნიშნავენ, რომ 23 მარტიდან ყველა თანამშრომელი, უმაღლესი თანამდებობის პირების გარდა დისტანციურად მუშაობს. შენობაში შესვლის უფლება მხოლოდ იმ თანამშრომლებს აქვთ, რომელთა საქმიანობის განხორციელება დისტანციურად შეუძლებელია.

ქალაქ ნიუ-იორკის მეტრო, ხმაურიანი და გამაღიზიანებელი სისტემა, რომელიც ნიუ-იორკელებს და ტურისტებს ერთნაირად არ უყვართ, ისტორიულ ნაბიჯს დგამს და ღამით მომსახურებას წყვეტს, რათა მატარებლების ვაგონების დეზინფექცია მოხდეს. როგორც ჩანს, ეს დიდი ცვლილებების პრელუდიაა იმ დროს, როდესაც ამერიკის უდიდესი საზოგადოებრივი ტრანსპორტის სისტემა, პანდემიით გამოწვეული ვითარებიდან გამოსვლას ცდილობს, რამაც მგზავრების ნაკადი შეამცირა.

ხუთშაბათს, შტატის გუბერნატორმა ენდრიუ კუომომ თქვა, რომ მეტროს სისტემა, რომლის 965 კილომეტრიანი ლიანდაგები ქალაქ ნიუ-იორკს ყველა მიმართულებით კვეთს, 6 მაისიდან, ღამის 1 საათიდან, დილის 5 საათამდე დაკეტილი იქნება, რათა ბრიგადებს ყოველ ღამე ვაგონების დეზინფექციის საშუალება მიეცეს. ამ გადაწყვეტილების მიზანი კოვიდ-19-ის შემდგომი გავრცელების შეფერხებაა. მან ასევე თქვა, რომ ქალაქის ავტობუსების დეზინფექციაც ყოველ ღამე მოხდება.

სატრანსპორტო უწყების გეგმა, “მგზავრები დაიბრუნოს”, ყურადღებას გაამახვილებს უსაფრთხოებაზე. სააგენტოს პრესმდივანმა ები კოლინსმა თქვა, რომ “მგზავრებს სთხოვენ ჩვევები შეიცვალონ და ამაში სახის დაფარვაც შედის.”

ნიუ-იორკის მეტრომ, კორონავირუსთან ბრძოლის პერიოდში მგზავრების ნაკადის 90 პროცენტზე მეტი დაკარგა. სააგენტომ, საკუთარი მძღოლების დასაცავად, ავტობუსებში მგზავრობის საფასურის მოკრებაც შეწყვიტა, რის გამოც შემოსავალი კიდევ უფრო შემცირდა.

წყარო: ამერიკის ხმა