Category: მსოფლიო

ახალი კორონავირუსი თეთრი სახლის, სულ ცოტა, ორ თანამშრომელს დაუდასტურდა. ერთი ვიცე-პრეზიდენტ მაიკ პენსის პრესმდივანი ქეით მილერია, მეორე კი – პრეზიდენტ დონალდ ტრამპის პერსონალური დამხმარე.

თეთრი სახლის თანამშრომელთა ნაწილი 14-დღიან კარანტინში გადავიდა. თუმცა, ვიცე-პრეზიდენტის ოფისი აცხადებს, რომ თავად მაიკ პენსი დღეს სამსახურში ბრუნდება. გავრცელებული ინფორმაციით, მან ანალიზი აიღო და კოვიდ-19 არ დაუდასტურდა.

“ვიცე-პრეზიდენტი პენსი გააგრძელებს თეთრი სახლის სამედიცინო განყოფილების რჩევებით ხელმძღვანელობას და ის კარანტინში არ იმყოფება” – განაცხადა კვირას ოფისის პრესსპიკერმა დევინ ომაილიმ. ვიცე-პრეზიდენტი დღეს შტატების გუბერნატორებთან ვიდეოკონფერენციას მართავს, რომლის მთავარი თემა ახალი კორონავირუსი და ქვეყნის ეკონომიკის ამუშავებაა.

იმის მიუხედავად, რომ ტესტზე მასაც უარყოფითი პასუხი მოუვიდა, თვითიზოლაციაში გადავიდა ექიმი ენტონი ფაუჩი, თეთრი სახლის მთავარი ექსპერტი კოვიდ-19-თან ბრძოლაში. კარანტინშია ასევე თეთრი სახლის სამუშაო ჯგუფის ორი წამყვანი წევრი: დაავადებათა კონტროლის და პრევენციის ცენტრის დირექტორი რობერტ რედფილდი და სტივენ ჰანი – საკვების და მედიკამენტების ადმინისტრაციის ხელმძღვანელი.

დღევანდელი მონაცემებით, შეერთებულ შტატებში 1 368 036 ადამიანია ინფიცირებული. კოვიდ-19-ის გამო გარდაიცვალა 80 789 პაციენტი და გამოჯანმრთელდა 256 336.

ნიუ-იორკის შტატი ჯერ ისევ ეპიცენტრად ითვლება, 345 406 ინფიცირებულით და 26 812 გარდაცვლილით. გუბერნატორ ენდრიუ კუომოს ბრძანებით, შტატის 600-მდე მოხუცებულთა სახლის თანამშრომლებს კოვიდ-19-ზე სავალდებულო ანალიზის აღება კვირაში ორჯერ მოუწევთ.

ამერიკაში, ახალი კორონავირუსით გარდაცვლილ ადამიანებს შორის, მეხუთედი ხანდაზმულია. ნიუ-იორკის გუბერნატორ ენდრიუ კუომოს ხშირად აკრიტიკებდნენ ამ ასაკობრივი ჯგუფისადმი არასათანადო ყურადღების მიქცევის გამო. კვირას გამართულ ბრიფინგზე კუომომ თქვა, რომ ვინც ამ პირობას არ შეასრულებს, სამუშაო ლიცენზიას დაკარგავს.

წყარო: ამერიკის ხმა

რუსეთში ბოლო 24 საათში კორონავირუსით დაინფიცირების 11656 ახალი შემთხვევა გამოვლინდა. დაინფიცირებულთა რაოდენობამ კი 221 344–ს მიაღწია.

ამგვარად რუსეთმა ინფიცირებულთა რაოდენობით ბრიტანეთს და იტალიას გაუსწრო და მსოფლიოში მესამე ადგილზე გავიდა აშშ–ს და ესპანეთის შემდეგ.

კორონავირუსის ახალი შემთხვევები რუსეთის 84 რეგიონში დარეგისტრირდა. 6169 შემთხვევა მოსკოვზე მოდის. სულ რუსეთის დედაქალაქში 115 909 დაინფიცირებულია.

ბოლო დღეღამის განმავლობაში რუსეთიში კორონავირუსით 94 პაციენტი გარდაიცვალა. ამგვარად, გარდაცვლილთა ჯამურმა რაოდენობამ 2009 შეადგინა.

გამოჯანმრთელებულია 39 801 ადამიანი.

ორშაბათს დილის მონაცემებით როსპოტრებნადზორის ინფორმაციით  რუსეთში 5.6 მილიონი ტესტია ჩატარებული.

გერმანიაში, სადაც ოთხშაბათიდან ხელისუფლებამ შემზღუდავი ზომები შეამსუბუქა, კორონავირუსით დაინფიცირების მაჩვენებელი გაიზარდა. რობერტ კოხის ინსტიტუტის მონაცემებით ვირუსის საბაზო რეპროდუქტიული მაჩვენებელმა, R–მა  1.1–ს გადააჭარბა, რაც იმას ნიშნავს, რომ ათ ინფიცირებულს ახლა 11 ადამიანის დაინფიცირება შეუძლია. მანამდე რეპროდუქციის სიჩქარე ერთზე ნაკლები იყო.  ამ დრომდე ქვეყანაში კორონავირუსი 169 ათას ადამიაზე მეტს დაუდგინდა. გარდაიცვალა 7395.

ინფექციის აფეთქება ბოლო დღეებში ჩრდილოეთ რეინ–ვესტფალიის  და შლევზიგ–გოლშტეინის მიწებზე მდებარე ხორცკომბინატებში შეინიშნება. ხელისუფლება იძულებული გახდა ეს საწარმოები დაეხურა. ტიურინგიაში 100 000 მოსახლეზე ახლა 80–ზე მეტი ინფიცირებულია.

შემზღუდავი ზომების შემსუბუქების შესახებ კანცლერმა ანგელა მერკელმა და 16 ფედერალური მიწის ხელისუფლებებმა 6 მაისს მოილაპარაკეს. სხვათა შორის, კანცლერი არ გამორიცხავდა კარანტინის რეჟიმის დაბრუნებას იმ რეგიონებში, სადაც ინფექციის ახალი კერები დაფიქსირდებოდა.

ახლა  ასეთი სცენარის ალბათობა გაიზარდა. ამ ფონზე ქვეყანაში შემზღუდავი ზომების წინააღმდეგ საპროტესტო აქციები გაიმართა. დემონსტრაციების მონაწილეები, რომელთაგან ერთ–ერთი შტუდგარტში გაიმართა ამბობენ, რომ მათი თავისუფლება საფრთხეშია, კორნავირუსის საფრთხე კი გაზვიადებული.

აშშ-ის ალერგიისა და ინფექციური დაავადებების ეროვნული ინსტიტუტის დირექტორი ენტონი ფაუჩი ორკვირიან თვითიზოლაციაში გადავიდა. ამის შესახებ ფაუჩიმ CNN-ს თავად განუცხადა.

მან ეს გადაწყვეტილება მას შემდეგ მიიღო, რაც 8 მაისს კორონავირუსი აშშ-ის ვიცე-პრეზიდენტის, მაიკ პენსის პრესსამსახურის წარმომადგენელს დაუდასტურდა.

გავრცელებული ინფორმაციით, ენტონი ფაუჩის კორონავირუსი პირველი ტესტირებისას არ დაუდასტურდა, თუმცა შემდგომი შემოწმებები ჩაუტარდება.

ამ დროისთვის აშშ-ში კორონავირუსით ინფიცირების მილიონ 347 ათასზე მეტი შემთხვევაა დადასტურებული, მათგან 80 ათასი ადამიანი გარდაიცვალა.

მილანის ნავილის რაიონი ამიერიდან პოლიციელებს მკაცრი ზედამხედველბის ქვეშ არის. ხუთშაბათს საღამოს ცნობილი არხების გასწვრივ იმდენი ხალხი შეიკრიბა, რომ ქალაქის მერი ჯუზეპე სალა დაიმუქრა – თუ მილანელები სოციალური დისტანციების წესებს არ დაიცავენ ის ქალაქის ამ ნაწილს დახურავს.

იტალისს სამხრეთით ქალაქ ბარიში, სადაც ვირუსის გავრცელების მხრივ არცთუ ისეთი მძიმე ვითარებაა, სანაპირო ხალხით არის სავსე.

“აღარ შემიძლია სახლში ჯდომა. პენსიონერი ვარ, მარტო ვცხოვრობ. ძალიან მოწყენილი ვარ. აღარ შემიძლია მოთმენა“ –ამბობს სასეირნოდ გამოსული ქალი. ამასთან, ბევრი ადგილობრივი მაცხოვრებელი იგნორირებას უკეთებს ხელისუფლების მოწოდებას ქუჩაში დამცავი ნიღბები ატარონ.

პორტუგალიაში პლაჟებზე შესვლა შეზღუდულია. უბრალოდ ცურვა და მზეზე გარუჯვა არ შეიძლება, ნებადართულია მხოლოდ სპორტული აქტივობები.

პოლიციელები ხალხს წესებს განუმარტავენ. თუმცა ზოგჯერ უშედეგოდ.

ევროპული ქვეყნების ხელისუფლებები მოსახლეობას აფრთხილებენ, რომ კორონავირუსის გავრცელება გრძელდება და თუ მოქალაქეები დადგენილ სანიტარულ ნორმებს არ დაიცავენ, მკაცრი კარანტინი დაბრუნდება.

საფრანგეთში სასწავლო წლის განახლებისთვის ემზადებიან. მომავალ კვირას ქვეყანაში საბავშვო ბაღები და დაწყებითი სკოლები გაიხსნება. სკოლებში ახალი სანიტარული უსაფრთხოების წესები იმოქმედებს: კლასში მოსწავლეთა რაოდენობა 10–15-ს არ უნდა აღემატებოდეს.

მეტი ყურადღება დაეთმობა ხელების დაბანას, სანიტარულ სიფრთხილის ზომებს, შენობების დალაგებას და დეზინფექციას.

მასწავლებლები ამბობენ, რომ საბოლოო ჯამში ეს ყველაფერი დიდ დროს წაიღებს, რაც სწავლის დროს მოაკლდება, თუმცა შეეცდებიან მაქსიმუმი გააკეთონ.

მიუხედავად იმისა, რომ საფრანგეთის ხელისუფლებამ ოფიციალურად სწავლის 11 მაისიდან განახლების ნებართვა გასცა, საბოლოო გადაწყვეტილებას გახსნის შესახებ ყოველი სკოლა დამოუკიდებლად იღებს. კლასში ბავშვების დასწრება აუცილებელი არ არის. მსურველებს შეუძლიათ სწავლა დისტანციურად განაგრძონ.