Category: მსოფლიო

დონალდ ტრამპის Facebook-ის და Instagram- ის ანგარიშები მინიმუმ  ორი კვირით იქნება დაბლოკილი–იქამდე, სანამ არჩეული პრეზიდენტი ჯო ბაიდენი ხელისუფლებას არ გადაიბარებს.

ამის შესახებ “ფეისბუკის” დამფუძნებელმა, მარკ ცუკერბერგმა სოციალურ ქსელში დაწერა.   ერთი დღით ადრე ტრამპს ანგარიშზე წვდომა შეუზღუდა “ტვიტერმა”. თავდაპირველად “ფეისბუკმა” ტრამპი მხოლოდ 24 საათით დაბლოკა, მაგრამ ვადის ამოწურვისთანავე სანქცია გაუგრძელა. ცუკერბერგი ამბობს, რომ ხელისუფლების გადაბარების პერიოდში ტრამპისათვის მათი პლატფორმის შეუზღუდავად დათმობა დიდ საფრთხეს შეიცავს:

“უკანასკნელი 24 საათის შოკისმომგვრელმა მოვლენებმა თვალნათლივ გვიჩვენა, რომ პრეზიდენტი ტრამპი ხელისუფლებაში დარჩენილი დროის გამოყენებას ძალაუფლების მშვიდობიანი და კანონიერი გადაბარების პროცესის საზიანოდ აპირებს. მისმა გადაწყვეტილებამ, ეს პლატფორმა კაპიტოლიუმში შეჭრილი მომხრეების წასაქეზებლად და არა დასაგმობად გამოიყენოს, სამართლიანად შეაშფოთა საზოგადოება აშშ-სა და მთელ მსოფლიოში. გუშინ მისი ეს განცხადებები წავშალეთ, რადგან მივიჩნიეთ, რომ მათი შედეგი – და სავარაუდოდ განხრაზვა – ახალი ძალადობის პროვოცირება იქნებოდა.

უკანასკნელი რამდენიმე წლის განმავლობაში პრეზიდენტ ტრამპს საშუალებას ვაძლევდით, ჩვენი პლატფორმით ესარგებლა. დრო და დრო მის ტექსტებს ვშლიდით, ან აღვნიშნავდით, თუ ტექსტების შინაარსი ჩვენს წესებს ეწინააღმდეგებოდა. ამას ვაკეთებდით იმიტომ, რომ გვჯერა, საზოგადოებას აქვს უფლება, ხელი მიუწვდებოდეს პოლიტიკურ სიტყვაზე, მათ შორის წინააღმდეგობრივ სიტყვაზეც. მაგრამ დღევანდელი კონტექსტი ფუნდამენტურად განსხვავებულია, ვხედავთ ჩვენი პლატფორმით ძალადობრივი ამბოხებისკენ მოწოდებას დემოკრატიულად არჩეული მთავრობის წინააღმდეგ.”– განაცხადა ფეისბუქის დამფუძნებელმა.

მისი თქმით კონგრესში არჩევნების შედეგების სერტიფიცირების შემდეგ, მთელი ქვეყნის პრიორიტეტი უნდა იყოს ის, რომ დარჩენილმა ცამეტმა დღემ და ინაუგურაციის შემდგომმა დღეებმა მშვიდობიანად და დამკვიდრებული დემოკრატიული ნორმების შესაბამისად ჩაიაროს.
“მიგვაჩნია, რომ ამ პერიოდში პრეზიდენტის მიერ ჩვენი მომსახურებით სარგებლობასთან დაკავშირებული საფრთხე მეტისმეტად დიდია. ამიტომ მის “ფეისბუკსა” და “ინსტაგრამზე” დადებულ შეზღუდვას განუსაზღვრელი ვადით და სულ ცოტა, ორი კვირით ვაგრძელებთ, სანამ ძალაუფლების მშვიდობიანი გადაცემა არ დასრულდება.”

6 იანვარს Facebook-მა წაშალა ვიდეო, რომელშიც ტრამპმა კაპიტოლიუმში შეჭრილ მხარდაჭერებს მიმართა, შემდეგ კი პრეზიდენტს 24 საათით Facebook-ის და Instagram-ის ანგარიშებით სარგებლობა შეუზღუდა.

Facebook-ის წარმომადგენლის გაი როსენის თანახმად ვიდეო შექმნილი “საგანგებო” ვითარებიდან გამომდინარე წაიშალა.

“ეს არის საგანგებო მდგომარეობა და ჩვენ ვიღებთ შესაბამის საგანგებო ზომებს, მათ შორის შედის პრეზიდენტ ტრამპის ვიდეოს წაშლას. ჩვენ ის წავშალეთ, რადგანაც გვჯერა, რომ ის ხელს უწყობს ძალადობას და არ ამცირებს მის რისკებს” – წერდა როსენი Twitter-ზე.

ევროპაში კორონავირუსის საწინააღმდეგო ვაქცინაცია ნელი ტემპებით მიმდინარეობს. იმ დროს, როცა ბრიტანეთსა და აშშ–ში უკვე მოსახლეობის 1–დან 2%–მდე აცრეს, ისრაელში კი 16%, ზოგიერთ ევროპულ ქვეყანაში ვაქცინაცია ჯერ ახლა იწყება.

ყველაზე უკეთესი სიტუაცია გერმანიაში, ესპანეთსა და იტალიაშია, მაგრამ ეს ქვეყნებიც ვაქცინაციის ტემპებით ახლოსაც არ არიან მსოფლიო ლიდერებთან.

საფრანგეთში,  სადაც მოსახლეობა ვაქცინაციას სკეპტიციზმით ეკიდება, ნამდვილი სკანდალი ატყდა. ჰოლანდიაში კი ვაქცინაცია სულ ორი დღის წინ დაიწყეს – ანუ ორი კვირის დაგვიანებით მას შემდეგ, რაც ვაქცინა ევროკავშირში გამოჩნდა.

რატომ ფერხდება ევროპაში ვაქცინაცია?

უნდობლობა ექიმების მიმართ

საშობაო დღესასწაულების დასრულებისთანავე, 27 დეკემბრის დილით პარიზის ჩრდილო–აღმოსავლეთით, პატარა ქალაქგარე საავადმყოფოში 78 წლის მორისეტმა საფრანგეთში პირველმა მიიღო კორონავირუსის ვაქცინის დოზა. როგორც ქალმა ჟურნალისტებს განუცხადა, მოხარულია, რომ “ცნობილი“ გახდა.

რამდენიმე დღეში მორისეტი მართლაც გახდა პოპულარული, თუმცა სხვა მიზეზით. ფრანგებმა ინტერნეტში გავრცელებული ვიდეოს ნაწყვეტები ნახეს, სადაც ჩანს, რომ ქალი ვაქცინაზე კითხვებს სვამს. ამის საფუძველზე ფრანგებმა გადაწყვიტეს, რომ საავადმყოფომ მორისეტს ვაქცინაზე სრული ინფორმაცია არ მიაწოდა. მოგვიანებით ექიმები ამტკიცებდნენ, რომ პაციენტმა ვაქცინაციაზე თანხმობა განაცხადა, თუმცა ჭორები ვეღარაფერმა შეაჩერა. განხილვებში აქტიურად ჩაერთნენ არა მხოლოდ შეთქმულების თეორიების მოყვარულები, არამედ სხვებიც.

პირველი ხუთი დღის მანძილე საფრანგეთში აცრა სულ 516 ადამიანს გაუკეთეს. ამ მომენტისთვის მეზობელ ბრიტანეთში უკვე 130 ათასი ადამიანი იყო აცრილი. 5 იანვრის მდგომარეობით, ვაქცინის პირველი დოზა 7 ათასამდე ადამიანმა მიიღო.  ეს კი ქვეყნის მოსახლეობის სულ 0.01 პროცენტია.

ვაქცინაციის ასეთი დაბალი ტემპი საფრანგეთში პრეპარატის დეფიციტით ვერ აიხსნება. ამ მომენტისთვის ქვეყანაში 560 ათასი გამოუყენებელი დოზა ინახება. ქვეყნის ხელისუფლება პირობას დებს, რომ იანვრის ბოლომდე საფრანგეთი ვაქცინაციის ტემპებით მეზობლებს დაეწევა, თუმცა გეგმის შესრულება ადვილი არ იქნება.

ბოლო კვლევების მიხედვით ქვეყნის მოსახლეობის მხოლოდ 39% არის მზად ვაქცინაციისთვის.

ვაქცინაცია კი სავალდებულო ვერ იქნება და ექიმები და პოლიტიკოსები საზოგადოების დარწმუნებას ცდილობენ მის აუცილებლობაში, რაც პროცესს ნამდვილად ვერ დააჩქარებს.

რთული პროცედურა ჭირდება ხანდაზმულთა სახლებში მცხოვრებთა აცრას. მათ ექიმის კონსულტაციის შემდეგ დრო უნდა მისცენ მოსაფიქრებლად, ასევე აქვთ უფლება ვაქცინაციაზე ახლობლის დასწრება მოითხოვონ, რაც ამ ვითარებაში შეუძლებელია.

ხელისუფლების კრიტიკოსები ამბობენ, რომ ვაქცინაციასთან დაკავშირებული მძიმე ვითარება ხელისუფლების ბრალია, რომელსაც საზოგადოებასთან დიალოგი არ შეუძლია, არადა საფრანგეთში კორონავირუსით უკვე 66 ათასი ადამიანი გარდაიცვალა, გავრცელების მიხედვით კი ქვეყანა 6–ე ადგილზეა მსოფლიოში.

საფრანგეთი თებერვლის ბოლომდე მილიონი ადამიანის ვაქცინაციას გეგმავდა, თუმცა ექსპერტებს ამ გეგმის რეალურობაში ეჭვი ეპარებათ. 140 ქვეყანას შორის, სადაც საზოგადოებრივი აზრის კვლევა ჩატარდა, საფრანგეთი ვაქცინაციისადმი მოსახლეობის უნდობლობის მხრივ უპირობო ლიდერია.

რეკორდსმენები და აუტსაიდერები

გარდა იმისა, რომ საფრანგეთში სპეციფიური პრობლემები არსებობს, ეს ქვეყანაც ევროკავშირის სხვა წევრების მსგავსად აშშ–სა და ბრიტანეთისგან განსხვავებით უფრო არახელსაყრელ მდგომარეობაში აღმოჩნდა.

ყველა ახალმა სამედიცინო პრეპარატმა ევროპის ბაზარზე ჯერ ევროპის წამლის სააგენტოს ნებართვა უნდა მიიღოს. ამ ეტაპზევე ევროკავშირსა და აშშ–ბრიტანეთს შორის აცდენა მოხდა. Pfizer – BioNTech–ის ვაქცინა ევროკავშირში ბრიტანეთზე სამი კვირით, აშშ–ზე კი ათი დღით  გვიან– 22 დეკემბერს დააამტკიცეს. ისევე, როგორც Moderna–ს ვაქცინა.

Economist წერს, რომ ევროპელებს მათმა სტრატეგიამაც შეუშალა ხელი. ადრეულ ეტაპზევე ევროკავშირის ქვეყნები შეთანხმდნენ, რომ ვაქცინას კოლექტიურად შეიძენდნენ. ამით ისინი ხელსაყრელი პირობების მიღწევას ვარაუდობდნენ, მათ შორის ეკონომიკური თვალსაზრისით. საბოლოოდ ევროპელებმა დაახლოებით 2 მილიარდი დოზა ვაქცინა შეუკვეთეს. ეს საკმარისია იმისათვის, რომ ევროკავშირში მცხოვრები ყველა ადამიანი რამდენჯერმე აიცრას, თუმცა, ჯერჯერობით აღიარებული Pfizer/BioNTech–ის ვაქცინა მცირე რაოდენობით არის შეძენილი.

რატომ არ შეექმნათ პრობლემები სხვა ქვეყნებს?

ვაქცინაციის ტემპებით აბსოლუტური რეკორდსმენი მსოფლიოში  ისრაელია.ის ერთ სულ მოსახლეზე აცრილთა რაოდენობით აშშ–საც უსწრებს.  ექსპერტები ამბობენ, რომ ქვეყანა თავიდანვე კარგად იყო მომზადებული მსგავსი ღონისძიებებისთვის.

ვაქცინის ტრანსპორტირების ლოგისტიკური ნაწილით სახელმწიფო იყო დაკავებული. მას შემდეგ კი, რაც ამპულები ქვეყანაში შევიდა, ექვსმა არაკომერციულმა ორგანიზაციამ ისინი სამედიცინო დაწესებულებებში გაავრცელა.

“ისრაელის ჯანდაცვის სისტემა იმგვარად არის მოწყობილი, რომ  ყოველ მოქალაქეს საკუთარი თერაპევტი ყავს, რომელსაც იცნობს და ენდობა. ყოველი პაციენტისთვის ელექტორნული ფაილი არსებობს, რომელშიც მის შესახებ ბოლო 20 წელში დაგროვილი ინფორმაცია ინახება. მას შეგვიძლია ნებისმიერ დროს დავუკავშირდეთ.“ – ამბობს პანდემიის საკითხებში ერთ–ერთი წამყვანი ექსპერტი და სახელმწიფოს მრჩეველი რან ბალისტერი. მისი თქმით, ისრაელის მოქალაქეები საკუთარ ჯანდაცვის სისტემას ენდობიან.

ევროკავშირში ჯერჯერობით ვაქცინაციის ტემპებით გერმანია ლიდერობს, სადაც ვაქცინაცია საფრანგეთის მსგავსად 27 დეკემბერს დაიწყო. ამჟამად ვაქცინა 316 ათას ადამიანს აქვს უკვე მიღებული, ძირითადად ხანდაზმულთა თავშესაფრების ბინადრებს.

ეს გადაწყვეტილება ასევე პრობლემური აღმოჩნდა გერმანიის ხელისუფლებისთვის. ერთია სპეციალიზებულ ცენტრებში ვაქცინაციის ჩატარება, ბევრად უფრო რთული კი სხვადასხვა წერტილებში მობილური ბრიგადების გაგზავნაა.

გერმანიაში ვაქცინაციის ტემპით ბევრი უკმაყოფილოა. ოპონენტები ხელისუფლებას შეყოვნებაში ადანაშაულებენ. ზოგი ვაქცინის წარმოების მოცულობის დაბალ მაჩვენებელზე აკეთებს აქცენტს, თუმცა რეალურად ამჟამად საქმე არა ვაქცინის რაოდენობაში, არამედ მის სწორად გავრცელებაშია. მაგალითად, გერმანიაში ამ დროისთვის 1.3 მილიონი აუთვისებელი ვაქცინის დოზა ინახება.

ექსპერტების თქმით მთავარი პრობლემა ლოჯისტიკაა. ბევრი ევროპული ქვეყანა ისრაელისგან განსხვავებით ვერ ჩამოყალიბდა, როგორ უნდა მოხვდეს ვაქცინა საბოლოო მომხმარებლამდე.

მართალია შესყიდვები ცენტრალიზებულია, დისტრიბუციით ხშირად ადგილობრივი ხელისუფლებები არიან დაკავებული. შედეგად, მაგალითად ესპანეთში ვაქცინა ქვეყნის მაშტაბით არათანაბრად ნაწილდება.

მადრიდმა გასულ კვირას მისი პირველი პარტიის მხოლოდ 6% გამოიყენა, ისევე, როგორც კატალონიამ. მთელიანად ესპანეთში კი ამ ეტაპზე ქვეყანაში არსებული ვაქცინის მარაგების 18% გაიხარჯა.

ევროპელ ლიდერებს შორის არის იტალია, რომელიც გერმანიას ფეხდაფეხ მიყვება. აქ 178 ათასი ადამიანი აცრეს, თუმცა ეს 60 მილიონიანი ქვეყნის მოსახლეობის მხოლდ 0.3%–ს შეადგენს. პოლიტიკოსები ამას ვაქცინის გალღობისთვის აუცილებელი დროის საჭიროებით ხსნიან. ასევე იმავე პრობლემით, რაც საფრანგეთშია – ხანდაზმულთა სახლებში მცხოვრებთა ნებართვის მიღება აქაც რთული პროცედურაა.

ექსპერტები კი ამბობენ, რომ პრობლემაა პერსონალის და ვაქცინის შესაყვანი სპეციალური ნემსების უკმარისობაც. იტალიის ლომბარდიის რეგიონში ჯანდაცვის სისტემის ხელმძღვანელს გადადგომისკენაც კი მოუწოდეს მას შემდეგ, რაც მან უარი თქვა ექიმების და ექთნების შვებულება შეეწყვიტა საავადმყოფოებში მედპერსონალის უკმარისობის გამო. არადა იტალიის სხვა რეგიონებში  სამუშაოდ პენსიაზე დიდი ხნის წინ გასულ ექიმებსაც კი დაუძახეს.

დონალდ ტრამპი კონგრესის მიერ ჯო ბაიდენის გამარჯვების ოფიციალურად დამტკიცებას ეხმიანება და ამბობს, რომ ის ძალაუფლებას კანონის დაცვით გადასცემს.

“მიუხედავად იმისა, რომ საერთოდ არ ვეთანხმები არჩევნების შედეგებს და ფაქტები მხარს მიმაგრებს, 20 იანვარს იქნება ძალაუფლების კანონიერი გადაცემა.

ყოველთვის ვამბობდი, რომ გავაგრძელებდით ჩვენს ბრძოლას იმის უზრუნველყოფისთვის, რომ ყველა კანონიერი ხმა დათვლილიყო. ეს წარმოადგენს საპრეზიდენტო ისტორიაში ყველაზე დიდებული პირველი ვადის დასასრულს, მაგრამ ეს მხოლოდ დასაწყისია ჩვენს ბრძოლაში გავხადოთ ამერიკა კვლავ დიდებული”,– განაცხადა დონალდ ტრამპმა.

კონგრესმა ჯო ბაიდენი პრეზიდენტად და კამალა ჰარისი ვიცეპრეზიდენტად ოფიციალურად დაამტკიცა. პრეზიდენტის ინაუგურაცია 20 იანვარს გაიმართება.

თანამედროვე ამერიკის ისტორიაში უპრეცედენტო მოვლენებმა, როცა ვაშინგტონში, პრეზიდენტ ტრამპის მხარდამჭერებმა კაპიტოლიუმის შენობა შტურმით აიღეს, მსოფლიოში შოკი გამოიწვია. ბევრი მსოფლიო მედია როგორც მემარჯვენე, ისე მემარცხენე მიმართულების, ამას დემოკრატიაზე თავდასხმას და პოსტიდან მიმავალი პრეზიდენტის მთავარ შეცდომას უწოდებს.

გაზეთი Times ისტორიას და აშშ–ს პირველ პრეზიდენტს, ჯორჯ ვაშინგტონს იხსენებს, რომელმაც 1797 წელს ნებაყოფლობით დატოვა პოსტი ორი ვადის შემდეგ, თუმცა არ იყო ვალდებული ეს გაეკეთებინა. კონსტიტუციის 22–ე შესწორება, რომელიც პრეზიდენტობას ორი ვადით ზღუდავს, მხოლოდ 1951 წელს იქნა რატიფიცირებული.

ვაშინგტონმა არ მოინდომა მონარქი გამხდარიყო, მიუხედავად კრიტიკოსების ვარაუდებისა.  200 წლის შემდეგ ეს გადაწყვეტილება კვლავ ითვლება ჯორჯ ვაშინგტონის ერთ–ერთი უდიდეს ნაბიჯად და კონსტიტუციური დემოკრატიის შექმნის პროცესში ერთ–ერთ არსებით მოვლენად. ვაშინგტონის მმართველობის დროსვე გადაწყდა, რომ პოლიტიკურ პროცესში წარმმართველი კანონი იქნებოდა და არა ძალადობრივი პროტესტები.

Times–ის აზრით დონალდ ტრამპმა პირველი პრეზიდენტის ორივე ტესტი ჩააგდო. მან ვერ შეძლო ნებაყოფლობით და ღირსეულად თავისი პოსტის დატოვება. იმის ნაცვლად, რომ ძალადობრივი პროტესტი შეეჩერებინა, მან ის წაახალისა. შტურმის მონაწილეებისადმი მიმართვის ვიდეო მეტისმეტად გვიან გამოჩნდა, და ეს არასაკმარისი იყო.

და თუ ვაშინგტონი მისი ნამდვილად ლიდერული ქცევებით ახსოვთ, რომელმაც მის შემდეგ ძლიერი რესპუბლიკა დატოვა, ტრამპი მუდმივად ემახსოვრებათ ვალდებულებების დარღვევითა და იმით, როგორ დაასუსტა ქვეყანა, რომლისთვისაც უნდა ემსახურა – წერს გამოცემა.

Guardian წერს, რომ ტრამპი შეეცადა სახელმწიფო გადატრიალება მოეწყო. გამოცემის აზრით მომხდარის მიზანი ბაიდენის გაპრეზიდენტებისთვის ხელშეშლა იყო და ეს მისი, როგორც პრეზიდენტის დელეგიტიმაციის და ახალი ადმინისტრაციის როლის შესუსტების კამპანიის ნაწილი იყო.

დემოკრატია –ეს შეთანხმებების სისტემაა, რომელიც საშუალებას გვაძლევს ერთობლივი გადაწყვეტილებები მივიღოთ და შედეგს პატივი ვიცეთ, როგორიც არ უნდა იყოს ის. ძალადობა, რომელიც ჩვენ კაპიტოლიუმის ქედზე ვნახეთ, ავტორიტარული ხასიათისაა. ეს არის საშუალება აიძულო სხვა ადამიანები აჯანყებულების ნებას დაემორჩილნონ – წერს გაზეთი

Independent  იხსენებს, რომ ტრამპმა ერთხელ განაცხადა ამერიკის მესამე სამყაროს სახელმწიფოდ გადაქცევის შესახებ. ახლა კი თვითონ გაუკეთა პროვოცირება მღელვარებას, რომელიც უფრო არასტაბილურ ქვეყნებში ძალაუფლების ძალადობრივ გადაცემასთან ასოცირდება.

კაპიტოლიუმის შიგნით კანონმდებლები განიხილავდნენ 1876 წლის პრეცედენტს და ცდილობდნენ აშშ–ს  კონსტიტუციის ავტორების სურვილების მიხედვით ემოქმედათ. შენობის გარეთ კი ბოლშევიკების მიმბაძველთა პატარა ჯგუფი “ზამთრის სასახლის“ შტურმისთვის ემზადებოდა. მათ წინ მხოლოდ რამდენიმე უწყინარი პოლიციელი ეღობებოდა. განსხვავება 1917 წლის პეტროგრადისგან ის იყო, რომ ამ “რევოლუციონერებმა“ მარმარილოს ბოძებთან სელფებიც გადაიღეს – წერს გაზეთი.

გამოცემის აზრით, სცენებმა ვაშინგტონიდან ამერიკელ ხალხს უნდა შეახსენოს, რატომ გაუშვეს ტრამპი სამსახურიდან და რატომ არ უნდა დაუშვან ამერიკელებმა არასოდეს მისი ძალაუფლებასთან მიახლოება.

Daily Telegraph  იმაზე მსჯელობს, როგორ აისახება ვაშინგტონში წუხელ განვითარებული მოვლენები ტრამპსა და რესპუბლიკურ პარტიას შორის ურთიერთობებზე. ბევრი მაღალჩინოსანი რესპუბლიკელი სვამს კითხვას, პანდორას რომელი ყუთი გახსნეს, როცა ტრამს მხარი დაუჭირეს. ამჟამად მათ პასუხი არ აქვთ– შედეგად მიიღეს მისი სურვილი ძალაუფლება ნებისმიერ ფასად მიიღოს და კონსტიტუცია არად ჩააგდოს.

კაპიტოლიუმის ინციდენტი აჩვენებს, რომ ტრამპიზმი არსად წასულა და ტრამპს მომავალშიც ექნება რესპუბლიკური პარტიის გაუწონასწორებელი ნაწილის მხარდაჭერა, თვითონ კი ალბათ ჩათვლის , რომ თეთრი სახლი დროებით დატოვა.– წერს გამოცემა.

New York Times წერს, რომ დონალდ ტრამპის პრეზიდენტობა, რომელიც თავიდანვე ბოროტებაში, განხეთქილებაში და შეთქმულების თეორიებში ჩაიძირა, იმით მთავრდება, რომ გამძვინვარებული, დამარცხებული, მთელი ძალით ძალაუფლებას ჩაბღაუჭებული ლიდერის მიერ წაქეზებული ბრბო კაპიტოლიუმს შტურმით იღებს. თითქოს ამერიკა ტიპიური ავტორიტარული ქვეყანა იყოს.

2021 წლის 6 იანვარს დაიმახსოვრებენ როგორც ერთ–ერთ შავბნელ დღეს ამერიკის შეერთებული შტატების ისტორიაში. იმის ნაცვლად, რომ ეს დღე ძალაუფლების მშვიდობიანი გადაცემის სიმბოლოდ ქცეულიყო, ის ისტორიაში შევა როგორც დღე, როცა პრეზიდენტ ტრამპის მიერ წაქეზებული ბრბო კაპიტოლიუმში შეიჭრა და ფანჯრები ჩაამსხვრია წარმომადგენელთა პალატაში, შეიარაღებული წინააღმდეგობის გზით.

ამერიკული დემოკრატიის ციტადელში – ვაშინგტონში ასეთი რამის წარმოდგენაც კი შეუძლებელი იყო. პოლიციელები იარაღს უმიზნებენ პროტესტანტებს, რათა კაპიტოლიუმის შენობაში არ შეუშვან. როტონდაში ცრემლსადენი გაზი გამოიყენება, კანონმდებლები კაბინეტებში იმალებიან, ექსტრემისტები სენატში ვიცე პრეზიდენტის ადგილზე დგანან და წარმომადგენელთა პალატის სპიკერის მაგიდასთან სხედან.– წერს გამოცემა.

Fox News–მა, რომელიც მემარჯვენე შეხედულებებით გამოირჩევა და ტრამპს უჭერდა მხარს, ამჯერად კაპიტოლიუმის შტურმს გამართლება ვერ მოუძებნა. მიმომხილველმა დეროი მერდოკმა მომხდარი საბოტაჟის შემზარავ აქტად შეაფასა. “ ამ იდიოტებმა ახლა უკიდურესად გაართულეს თითოეულ ჩვენგანის ცხოვრება, ვინც აღტაცებული იყო პრეზიდენტ ტრამპით იმის გამო, რომ მან დიდებული გამარჯვებები მოიპოვა საშინაო და საგარეო პოლიტიკაში“– დაწერა მანდ.

ახლა ნებისმიერ მოსაზრებაზე, ამერიკის ისტორიაში თითოეული ოჯახის ყველაზე მაღალი შემოსავლისა და სიღარიბის ყველაზე დაბალი დონის შესახებ, რომელიც ტრამპის პრეზიდენტობის დროს მოხდა, ჩვენ მივიღებთ პასუხად: თქვენ იმ ნაძირალას გულისხმობთ, რომლის ხალხი კაპიტოლიუმს თავს დაესხა? – ამბობს მიმომხილველი.

ოთხშაბათს განვითარებული მოვლენების შედეგებს მრავალი წლის განმავლობაში მოვიმკით, და მათი შესწავლა ისტორიკოსებს მოუწევთ – წერს Wall Street Journal.  გამოცემის აზრით შანსები, რომ პრეზიდენტის პოსტიდან წასვლის შემდეგ ტრამპი რესპუბლიკელების პარტიის ლიდერი გახდეს, მნიშვნელოვნად შემცირდა.

“როგორ თავად ტრამპმა სცადა საკუთარი მხარდამჭერებისთვის შეეხსენებინა ძალადობის გაღვივების შემდეგ, რესპუბლიკელებს უყვართ, როცა მათ კანონიერებისა და წესრიგის პარტიად აღიქვამენ, არადა ეს სულაც არ არის ის იმიჯი, რაც 6 იანვარს შეიქმნა.“– წერს გამოცემა.