Category: მსოფლიო

სომხეთის პრემიერ-მინისტრი ნიკოლ ფაშინიანი აცხადებს, რომ მზად არის ჩაატაროს ვადამდელი საპარლამენტო არჩევნები, თუკი პოლიტიკური ძალები დათანხმდებიან ამ საკითხზე კონსულტაციებს. პრემიერის თქმით, კენჭისყრა აჩვენებს, რას მოითხოვს სომხეთის მოსახლეობა.

„მინდა, რომ ხალხმა მიიღოს ეს შესაძლებლობა. მინდა დარწმუნებული ვიყო, რომ გვპატიობთ და ახლა ვიწვევ საპარლამენტო ოპოზიციას. მოდით, წავიდეთ ვადამდელი საპარლამენტო არჩევნების გზით“, – განაცხადა ფაშინიანმა.

მისივე თქმით, შესაძლოა ქვეყანა საპარლამენტოდან ნახევრად საპრეზიდენტო მმართველობაზე გადავიდეს.

„ჩვენ უნდა ვიმუშავოთ იმაზე, რომ საყოველთაო რეფერენდუმის მეშვეობით მივიღოთ ახალი, ან რეფორმირებული კონსტიტუცია. ვუშვებ, რომ ქვეყანა გადავიდეს საპარლამენტოდან ნახევრადსაპრეზიდენტო მმართველობის ფორმაზე“, – განაცხადა ფაშინიანმა.

დღეს ერევანში, საპროტესტო აქციის მონაწილეები, რომლებიც პრემიერმინისტრ ნიკოლ ფაშინიანის გადადმომას მოითხოვენ, მთავრობის შენობაში შეიჭრნენ

სასამართლომ საფრანგეთის ექსპრეზიდენტი ნიკოლა სარკოზი კორუფციის ბრალდებით დამნაშავედ ცნო და სამწლიანი პატიმრობა მიუსაჯა. აქედან ორი წელი პირობითია.

სარკოზი მოსამართლე ჟილბერტ აზიბერტის მოსყიდვის მცდელობაში დაადანაშაულეს. კერძოდ, ბრალდების თანახმად, სარკოზმა მოსამართლეს, საკუთარ პოლიტიკურ პარტიასთან დაკავშირებით მიმდინარე გამოძიების შესახებ ინფორმაციის მიწოდების სანაცვლოდ მონაკოში პრესტიჟული სამსახური შესთავაზა.

ექსპრეზიდენტი განაჩენის გასაჩივრებას აპირებს, მას ამისთვის 10 დღე აქვს.

მედიის ინფორმაციით, 1–წლიანი პატიმრობა შეიძლება ელექტრონული სამაჯურის ტარებით ან შინაპატიმრობით ჩანაცვლდეს.

ვენეციის მთავარ პრობლემად როგორც წესი წყალდიდობები ითვლება, თუმცა წელს რეკორდული მიქცევების გამო ცნობილ იტალიურ ქალაქში საწინააღმდეგო მოვლენა მოხდა: ბევრი ვენეციური არხი წყლის გარეშე დარჩა.

შედეგად ბევრი გონდოლა, რომლებსაც ქალაქში ტურისტები დაყავთ, გაჩერდა. ვენეციაში გადაადგილება გართულდა ადგილობრივებისთვისაც, რომლებისთვისაც ნავები და კატერები ერთადერთი სატრანსპორტო საშუალებაა.

გრანდ კანალში, რომელიც ყველაზე დიდი არხია ვენეციის ლაგუნის კუნძულებს შორის, წყალი მაინც დარჩა, თუმცა მისი დონე მკვეთრად დაეცა.

რეკორდული მიქცევის გამო ვენეციაში წელს წყლის დონემ 48 სანტიმეტრით დაიწია.

კორონავირუსის პანდემიის გამო ვენეციის ქუჩები კვლავ თითქმის ცარიელია, თუმცა ტურისტები ქალაქში მაინც არიან.

არადა ვენეციაში ყველაზე ხშირად სწორედ ასეთი სცენების ნახვა შეიძლება. ფოტოზე  სან მარკოს მოედანი, და  2019 წლის ნოემბერში,  ბოლო 50 წლის განმავლობაში ყველაზე დიდი წყალდიდობაა ასახული.

ნიუ იორკის გუბერნატორს, ენდრიუ კუომოს უკვე მეორე თანაშემწე ადანაშაულებს სექსუალურ შევიწროებაში. 25 წლის ქალი ამბობს, რომ გუბერნატორი კითხვებს უსვამდა მის სექსუალურ ცხოვრებაზე, იმაზე, არის თუ არა მონოგამიური ურთიერთოებში და ქონია თუ არა სექსი ასაკით უფროს მამაკაცებთან.

შარლოტა ბენეტი შტატის გუბერნატორის ადმინისტრაციაში ჯანდაცვის პოლიტიკის თანაშემწე და მრჩეველი იყო გასული წლის ნოემბრამდე, ნოემბერში კი სამსახურიდან წავიდა. ქალი The New York Times–ს უყვება, რომ გუბერნატორი მას სექსუალურად ავიწროებდა გასული წლის გაზაფხულის ბოლოს, როცა შტატი კორონავირუსთან აქტიურ ბრძოლაში იყო ჩართული. ბენეტი ამბობს, რომ ყველაზე შემაშფოთებელი ეპიზოდი 5 ივნისს მოხდა, როცა ის კუომოსთან ერთად შტატის კაპიტოლიუმის ოფისში მარტო იყო. ინტერვიუების სერიაში მან თქვა, რომ გუბერნატორმა მას ბევრი კითხვა დაუსვა პირად ცხოვრებაზე, მათ შორის იმაზე, მისი აზრით აქვს თუ არა ასაკს მნიშვნელობა რომანტიულ ურთიერთობებში და თქვა, რომ ის მზად არის 20–25 წლის ქალებთან ურთიერთობისთვის. ეს კომენტარი ქალის ინტერპრეტაციით სექსუალური ურთიერთობების აშკარა შეთავაზება იყო.

თავად კუომო Times–სთვის გაკეთებულ განცხადებაში ამბობს, რომ ის მხოლოდ მენტორის სტატუსით მოქმედებდა და არასოდეს უცდია ქალბატონ ბენეტთან ფლირტი და გაუმართლებელი საქციელი. ის ამბობს, რომ მოითხოვა ამ საკითხის დამოუკიდებელი შესწავლა და თხოვა ნიუ იორკის მაცხოვრებლებს შედეგებს დაელოდონ, სანამ მას განსჯიან და დასკვნებს გააკეთებენ.

როგორც შარლოტა ბენეტი ამბობს,  ივნისის შეხვედრისას 63 წლის გუბერნატორმა მას შესჩივლა, რომ პანდემიის დროს მარტოობა აწუხებს და თქვა, რომ “ისიც კი არ შეუძლია ვინმეს ჩაეხუტოს“.

ქალი ამბობს, რომ კუომოს არასოდეს უცდია ფიზიკურად შეხებოდა, თუმცა მისი საუბრების ქვეტექსტი აშკარა იყო და ის თვლის, რომ გუბერნატორს მასთან სექსი უნდოდა, რის გამოც თავი უხერხულად იგრძნო და შეეშინდა.

“ვფიქრობდი, როგორ გამოვსულიყავი ამ სიტუაციიდან და გადავწყვიტე, რომ ეს ჩემი სამსახურის დასასრული იყო.“

ბენეტი ამბობს, რომ გუბერნატორ კუომოსთან ურთიერთობაზე მისი აპარატის ხელმძღვანელს, ჯილ დესროსიერს დაელაპარაკა,რის შემდეგაც სხვა სამუშაოზე გადაიყვანეს – ჯანდაცვის პოლიტიკის მრჩევლად, მისი ახალი ოფისი კი კაპიტოლიუმის მოპირდაპირე მხარეს იყო.

ბენეტი ამბობს, რომ ამის შემდეგ მალევე, ივნისის ბოლოს  ვრცელი  განცხადება შეიტანა გუბერნატორის სპეციალურ მრჩეველთან, ჯუდიტ მოგულთან.

თუმცა, როგორც ბენეტი ამბობს საბოლოოდ გადაწყვიტა გამოძიება აღარ მოეთხოვა, რადგან კმაყოფილი იყო ახალი სამუშაოთი და უნდოდა წინ წასულიყო. არანაირი ზომები გუბერნატორის წინააღმდეგ არ იქნა მიღებული.

თავის განცხადებაში გუბერნატორი კუომო შარლოტა ბენეტს შრომისმოყვარე და ფასეულ თანამშრომელს უწოდებს, რომელსაც სრული უფლება აქვს აზრი გამოთქვას. მისი თქმით, ქალი უყვებოდა, რომ სექსუალური ძალადობა გადაიტანა, რის შემდეგაც კუომომ სცადა მისთვის მხარდაჭერა და დახმარება აღმოეჩინა. კუომო ამბობს, რომ ყველაზე ნაკლებად ისურვებდა ქალს ის ეგრძნო, რის შესახებაც ახლა საუბრობს.

გუბერნატორი არ უარყოფს, რომ შარლოტა ბენეტს პირადი ხასიათის კითხვებს უსვამდა, თუმცა განცხადებაში ამბობს, რომ აღარ აპირებს ამ თემაზე კომენტარების გაკეთებას მოკვლევის დასრულებამდე.

შარლოტა ბენეტის განცხადებებს წინ უძღვოდა კიდევ ერთი მსგავსი ბრალდება გუბერნატორის წინააღმდეგ. შტატის ყოფილი ჩინოვნიკი, ლინდსი ბოილანი რომელიც ეკონომიკური განვითარების საკითხებზე მუშაობდა აცხადებს, რომ გუბერნატორი კუომო მას სექსუალურად ავიწროებდა 2016 და 2018 წლებში, ერთხელ კი მას მანჰეტენის ოფისში ტუჩებში აკოცა.

კუომოს ოფისი ბოილანის განცხადებებს სიცურეს უწოდებს, თუმცა მოითხოვს მისი განცხადებების გამოძიება მოხდეს.

ქალების მხრიდან სექსუალური ხასიათის ბრალდებების მიღმა ნიუ იორკის დემოკრატ გუბერნატორს, რომელიც უკვე მესამე ვადით არის არჩეული, სერიოზული პოლიტიკური პრობლემები აქვს. მას იმის გამო უყენებენ ბრალდებებს, რომ პანდემიის დროს შტატის ხანდაზმულთა სახლები სათანადოდ არ დაიცვა.

შარლოტა ბენეტმა ტვიტერზე გაიზიარა ბოილანის სტატუსი რომელშიც ის კუომოს წინააღმდეგ ბრალდებებზე წერდა, და საკუთარი კომენტარიც დაურთო : “ვისაც გაინტერესებთ, როგორია ბატონი კუომოს ადმინისტრაციაში მუშაობა, შეგიძლიათ წაიკითხოთ“.

მსოფლიო ოკეანის დონის აწევა არაერთი მძაფრსიუჟეტიანი ფილმის თემად იქცა, გვინახავს სიუჟეტები, როცა გიგანტური ტალღები მეგაპოლისებს შთანთქავენ.

თუმცა, როგორც აშშ–ს გეოლოგიური სამსახურის (USGS) გეოფიზიკოსმა, ტომ პარსონსმა გაარკვია, საფრთხე მხოლოდ ეს არ არის. როგორც ირკვევა დიდი ქალაქები ისედაც საკუთარი სიმძიმით “იძირება“.

მისი გათვლებით სან ფრანცისკომ არსებობის მანძილზე მიწაში 80 მილიმეტრით დაიძირა. თუ გავითვალისწინებთ, რომ 2050 წლისთვის წყლის დონე ყურეში შეიძლება 300 მილიმეტრით აიწიოს, ეს უკვე სერიოზულ შეშფოთებას იწვევს.

“იმის გამო, რომ მოსახლეობის არაპროპორციულად დიდი ნაწილი ეძალება სანაპიროს, დამატებითი დაძირვა ოკეანის დონის აწევის პარალელურად წყალდიდობის რისკებს ზრდის“ – წერს პირსონი საკუთარ ნამუშევარში, რომელიც AGU Advances–ში გამოქვეყნდა.

მაგალითად შეგვიძლია მოვიყვანოთ სან ფრანცისკოს აეროპორტი, რომელიც ქალაქის ყველაზე მძიმე შენობაა. აშენების შემდეგ ის მიწაში 4 მილიმეტრით ჩაიწია.

თუ გავითვალისწინებთ სან ფრანცისკოს ყველა შენობას და მათ შემადგენელს, ასტრონომიული რიცხვი – 1.6 ტრილიონი კილოგრამი გამოდის. ეს სრულიად საკმარისია იმისათვის, რომ ლითოსფერო გაიღუნოს, რომელზეც მეგაპოლისია განთავსებული, და რაც ბევრად უფრო საშიშია, ტექტონიკური ფილები გადაადგილდეს, რამაც დედამიწის ქერქის მსხვრევა გამოიწვიოს.

და ეს მაშინ, როცა 80 მილიმეტრით დაძირვა ყველაზე მოკრძალებული გათვლებია, რომელშიც არ არის გათვალისწინებული ტრანსპორტისა და ადამიანების წონა, რომლებიც შენობების გარეთ არიან. უფრო მეტიც, ადგილობრივი გეოლოგიური პირობებიდან გამომდინარე მნიშვნელოვანი დაწევა შესაძლოა პლანეტის სხვა დიდ ქალაქებშიც ხდებოდეს.

მართალია კონტინენტების სიღრმეში ლითოსფერო როგორც წესი უფრო სქელი და მყარია, სან ფრანცისკოს ყურეში კვლევების შედეგები ყველა მსხვილი ქალაქის მიმართ შეიძლება გამოვიყენოთ – ვარაუდობს პარსონსი.

300-ზე მეტი გოგო მოიტაცეს უცნობმა ბოევიკებმა ნიგერიი ჩრდილო–დასავლეთში მდებარე სკოლა ინტერნატიდან. პოლიცია თვლის, რომ სკოლის მოსწავლეები ტყეში წაიყვანეს. ამბავი პარასკევს დილით შტატ ზამფარას დასახლება ჯანგებეში მოხდა.

შეიარაღებული ბანდიტები ნიგერიაში ხშირად იტაცებენ სკოლის მოსწავლეების გამოსასყიდის მიღების მიზნით.

პრეზიდენტმა მუჰამადუ ბუჟარიმ გატაცება დაგმო და მას არაადამიანური და სრულიად მიუღებელი უწოდა. ის ამბობს, რომ ხელისუფლება არ დაემორჩილება ბანდიტების შანტაჟს, რომლებიც უდანაშაულო მოსწავლეებს გამოსასყიდის მიღების მიზნით იტაცებენ.

პრეზიდენტი ამბობს, რომ ხელისუფლება ბანდიტების წინააღმდეგ “უზარმაზარ ძალას“ გამოიყენებს, თუმცა არსებობს შიში, რომ ბანდიტები გოგოებს ფარად გამოიყენებენ.

გასულ კვირას მეზობელ ნიკერში ბოევიკებმა მინიმუმ 42 ადამიანი გაიტაცეს, მათ შორის 27 მოსწავლე. ისინი დღემდე არ გათავისუფლებულან.

2014 წელს “ბოკო ჰარამის“ ბოევიკებმა 276 სკოლის მოსწავლე გოგო გაიტაცეს ნიგერიის ჩრდილო–აღმოსავლეთში. ეს რადიკალური ისლამური დაჯგუფება საერო განათლების წინააღმდეგ გამოდის. მისი წევრები ხშირად თავს ესხმიან სკოლებს და სხვა საგანმანათლებლო დაწესებულებებს.

თავდასხმა პარასკევს ადგილობრივი დროით ღამის პირველ საათზე მოხდა. ადგილობრივი სააგენტო მასწავლებლის მონაყოლს აქვეყნებს, რომლის მიხედვით შეიარაღებული ადამიანების ჯგუფი სკოლას პიკაპებით და მოტოციკლებით დაესხა თავს. ზოგიერთი თავდამსხმელი უშიშროების სახელმწიფო ორგანოების უნიფორმებში იყო გამოწყობილი.

ზოგი მოწმე ამბობს, რომ თავდამხსმელთა რაოდენობა ასზე მეტი იყო და ისინი ფეხით მივიდნენ.

მათ სკოლის კარებები ჩამოანგრიეს და მცველებს ესროლეს, შემდეგ კი საერთო საცხოვრებელში შევიდნენ, გოგოები გააღვიძეს და უთხრეს, რომ ლოცვის დრო მოვიდა. გოგოები ტიროდნენ, ბოევიკებმა ისინი ერთად მოაგროვეს და ტყეში წაიყვანეს, გზად კი ჰაერში ისროდნენ.

ერთ–ერთი მასწავლებელი ამბობს, რომ სკოლის 421 მოსწავლიდან მხოლდ 55 გადაურჩა გატაცებას.

გატაცებულთა მოსაძებნად ჯანგებეში პოლიციის გაძლიერებული რაზმები და სამხედრო ქვედანაყოფები გაგზავნეს.

იუნისეფში აცხადებენ, რომ აღშფოთებულნი არიან ნიგერიაში სკოლის მოსწავლეების მასობრივი გატაცების მორიგი ფაქტით.

გასული წლის დეკემბერში მეზობელ შტატ კაცინაში ბოევიკებმა 300–ზე მეტი სკოლის მოსწავლე ბიჭი გაიტაცეს. ისინი საბოლოოდ მოლაპარაკებების შემდეგ გააავისუფლეს.