Category: მსოფლიო

გაზეთი კომერსანტი წერს, რომ რუსული სკოლების მასწავლებლებს დაურიგდათ რეკომენდაციები, როგორ უნდა ჩაატარონ გაკვეთილები თემაზე “ანტირუსული სანქციები და მათი გავლენა სამამულო ეკონომიკაზე“. პედაგოგებმა უნდა მოახდიონონ 5–9 და 10–11 კლასების მოსწავლეთათვის ამ თემაზე გაკვეთილების ორგანიზება. გაკვეთილზე მოსწავლეებს მოუყვებიან “სანქციების დადებით ეფექტზე“– ნათქვამია მასალაში.

კომერსანტის სტატიაში საუბარია იმაზე, რომ ასეთი გაკვეთილები დაიწყება პრეზიდენტ პუტინის ციტატით იმაზე, რომ “რუსეთზე უპრეცედენტო საგარეო ზეწოლა ხორციელდება“. მეთოდურ სახელმძღვანელოში ეს ზეწოლა დადებითად არის წარმოდეგნილი – მოსწავლეებს მოუყვებიან, რომ რუსეთული პროდუქციის წილი რამდენიმე სფეროში გაიზრდება, შემდეგ კი მოსწავლეებს მოთხოვენ შეფასებას იმის შესახებ, თუ რომელი ქვეყნები განიცდიან დიდ ეკონომიკურ დანაკარგებს რუსეთისთვის დაწესებული სანქციების გამო.

მეთოდურ სახელმძღვანელოში ნათქვამია, რომ მასწავლებელმა მოსწავლეებს “უნდა დაანახოს, რომ რუსეთს შეუძლია დასავლეთის ქვეყნების სანქციებით ზეწოლის უარყოფითი შედეგების დაძლევა ეკონომიკის სფეროზე“, და უნდა შეუქმნან წარმოდგენა “რუსეთის ფედერაციის ანტისასანქციო პოლიტიკის ძირითად მიმართულებებზე.“

წუხელ ამერიკული მუსიკალური პრემია “გრემის“ დაჯილდოების ცერემონიალზე უკრაინის პრეზიდენტის, ვლადიმირ ზელენსკის მიმართვა ჩართეს.

“რა გავს ყველაზე ნაკლებად მუსიკას? დანგრეული ქალაქების სიჩუმე და მოკლული ადამიანების დუმილი. დაგვიჭირეთ მხარი ნებისმიერი საშუალებით, ნუ გაჩუმდებით, და მაშინ ჩვენს ქალაქებში მშვიდობა მოვა“ – თქვა მიმართვაში ზელენსკიმ.

ზელენსკის ვიდეომიმართვის შემდეგ მაყურებლის წინაშე ჯონ ლეჯენდი, უკრაინელი მომღერალი მიკა ნიუტონი და პოეტი ლიუბა იაკიმჩუკი, ასევე სხვა უკრაინელი მომღერლები გამოვიდნენ.

ნიდერლანდელ ჟურნალისტს, დულმერს რობერტ ედვინ ლუიჩ მარშეს აკრედიტაცია ჩამოართვეს და  უკრაინიდან გააძევეს იმის გამო, რომ მან კანონი დაარღვია და ოდესის ოლქში სარაკეტო დაბომბვის კადრები გაავრცელა. ამის შესახებ უკრაინული მედია უკრაინის უსაფრთხოების სამსახურის წყაროებზე დაყრდნობით წერს.

საქმე ეხება ოდესის ოლქში კრიტიკული ინფრასტრუქტურის ობიეტებზე მიტანილი სარაკეტო დარტყმების შედეგების გადაღებას. ჟურნალისტს უკრაინაში შესვლა 3 წლით აეკრძალა. თავიდან ის უკრაინაში სამხედრ მოქმედებების გასაშუქებლად ჩავიდა, უკრაინის სამხედრო ძალების პრეს–ბარათი მიიღო და მუშაობა დაიწყო.

მედიის ცნობით, 3 აპრილს დულმერსმა მოქმედი კანონმდებლობა დაარღვია, რომელიც რუსეთის მხრიდან სარაკეტო დაბომბვების შედეგების შესახებ ინფორმაციის გავრცელებას კრძალავს. ის გაფრთხილებული იყო, რომ მსგავსი ინფორმაციის გამოქვეყნება არ შეიძლებოდა, თუმცა პირად პოსტებში მაინც გამოაქვეყნა ვიდეო კრიტიკული ინფრასტრუქტურის დაბომბვის შესახებ. ეს კი მისთვის აკრედიტაციის ჩამორთმევის მიზეზი გახდა.

ცოტა ხნის წინ პრეზიდენტმა ზელენსკიმ ხელი მოაწერა კანონს, რომლის თანახმად აკრძალულია სოციალურ ქსელებში სროლის, დაბომბვის, უკრაინული არმიის გადაადგილების, ასევე ქუჩების დასახელებების გამოქვეყნება.

მანამდე თავდაცვის მინისტრმა მოუწოდა უკრაინელებს არ გამოაქვეყნონ ინფორმაცია უკრაინისთვის პარტნიორების მიერ იარაღის მიწოდებასთან დაკავშირებით, რადგან ეს შეიძლება უარყოფითად აისახოს არმიის მიერ დამატებითი შესაძლებლობების მიღებაზე.

გერმანიის თავდაცვის მინისტრი, კრისტინ ლამბრეხტი თვლის, რომ ევროკავშირმა რუსეთის საოკუპაციო ჯარების მიერ კიევის ოლქში ჩადენილი სამხედრო დანაშაულის გამო სრულად უნდა თქვას რუსულ გაზზე უარი.

“ასეთი დანაშაული უპასუხოდ არ უნდა დარჩეს“– თქვა მან ტელეარხ ARD–სთან ინტერვიუში.

ლამბრეხტი გერმანიის სოციალ–დემოკრატიული პარტიის წარმომადგენელია, ისევე, როგორც კანცლერი ოლაფ შოლცი. ის ამბობს, რომ სკეპტიკურად ეკიდება მოსკოვის ნებისმიერ დაპირებას ცეცხლის შეწყვეტის შესახებ.

“ჩვენ ვნახეთ, როგორ ცრუობენ ადამიანები, როგორ გვატყუბდნენ, როგორ არ ასრულებდნენ დაპირებას. ამიტომაც ძალიან ფრთხილი და სკეპტიკური ვარ“– ამბობს ის.

ბუჩაში რუსული ჯარის მიერ მშვიდობიანი მოქალაქეების მიერ ჩადენილი სისასტიკე დაგმო გერმანიის კანცლერმაც. მან ყველას მოუწოდა ამ დანაშაულის გამოძიებისკენ და რუსეთის წინააღმდეგ ახალი სანქციების პირობა დადო. თუმცა, რუსული გაზის იმპორტის დაუყოვნებლივ შეწყვეტაზე ჯერ არაფერი უთქვამს. მანამდე გერმანიის მთავრობა აცხადებდა, რომ შეძლებს მთლიანად თქვას უარი რუსულ გაზზე 2024 წლის შუა პერიოდიდან.

აშშ–ს სახელმწიფო დეპარტამენტის წარმომადგენელმა, ნედ პრაისმა მიანიშნა, რომ “ძალიან მალე“ აშშ რუსეთის წინააღმდეგ დამატებით ნაბიჯებს გადადგამს. ამის შესახებ მან იმ კითხვის პასუხად განაცხადა, რომელიც უკრაინის პრეზიდენტის თხოვნას ეხებოდა G7–ის სანქციების გაძლიერების შესახებ ბუჩაში ჩადენილი სისასტიკის გამო.

“რაც შეეხება ჩვენს სანქციებს, ყოველთვის ვამბობდით, რომ გავაგრძელებთ ზეწოლას პრეზიდენტ პუტინზე, კრემლზე, ყველაზე, ვინც მის გარემოცვაშია, ოლიგარქების და ხელის შემწყობთა ჩათვლით, ვინც აძლიერებენ ამ ომს უკრაინის წინააღმდეგ, მანამ, სანამ კრემლი დეესკალაციაზე არ წავა, სანამ ძალადობა არ შემცირდება, მანამდე, სანამ ასეთი სიმხეცე არ შეწყდება. ამიტომაც, ვფიქრობ, ძალიან მალე ნახავთ დამატებით ზეწოლას“–თქვა პაისმა MSNBC–ს ეთერში.

“როცა საუბარია ბუჩას სურათებზე, ჩვენ უკვე შევაფასეთ, რომ რუსეთის არმიამ სამხედრო დანაშაული ჩაიდინა. რას ვაკეთებთ ახლა? ახლა ინფორმაციას ვაგროვებთ. პირველ რიგში იმისათვის, რომ ნათელი მოვფინოთ მათ ქმედებებს. მეორე– იმისათვის, რომ უზრუნველვყოთ ყველას პასუხისმგებლობა, ვინც ეს სიმხეცე ჩაიდინა, და ყველასი, ვინც ეს შეუკვეთა.  ეს არის ჩვენი მისია“– თქვა მან.

შაბათს სააგენტო ფრანს პრესმა გამოაქვეყნა შოკისმომგვრელი ფოტოები ბუჩადან, სადაც ჩანს მინიმუმ 20 დაღუპული მშვიდობიანი მოქალაქე, რომლებიც მხოლოდ ერთ ქუჩაზე იპოვნეს. ფოტოები იმ დღეს გამოქვეყნდა, როცა უკრაინამ ქალაქის რუსი სამხედროებისგან გათავისუფლების შესახებ გამოაცხადა. ვრცელდება ინფორმაციები, რომ რუსებმა შემზარავ დანაშაულები მშვიდობიანი მოსახლეობის წინააღმდეგ კიევის ოლქში, იმ ქალაქებში ჩაიდინეს, რომელთა დაუტოვებაც კიევის ალყის უშედეგო მცდელობის შემდეგ მოუწიათ.

პრაისმა რუსეთ–უკრაინის მოლაპარაკებების შესახებაც ისაუბრა და თქვა, რომ აშშ ვერ ხედავს ვერანაირ ნიშანს, რომ რუსეთი მართლაც სერიოზულად ეკიდება ომის დეესკალაციას.

პრაისმა ასევე უარყო ინფორმაცია იმის შესახებ, რომ სანქცების შემდეგ რუსული რუბლი დასტაბილურებას იწყებს: “ეს თითქმის მთლიანად ხელოვნურია. რუბლის დრაკონული ზომების საშუალებით აცოცხლებენ. კრემლი იძულებული იყო ეს ზომები მიეღო რუბლის კურსის შესანარჩუნებლად.“

რაც შეეხება რუსეთის ეკონომიკას, პრაისის თქმით, მხოლოდ ბოლო 5 კვირის განმავლობაში რუსეთის 30 წლიანი ეკონომიკური ინტეგრაცია წყალში ჩაიყარა.

ბრიტანეთის პრემიერმა ბორის ჯონსონმა მინისტრთა კაბინეტის წევრებს აცნობა, რომ უნდა უკრაინას საზღვაო ხომალდების საწინააღმდეგო რაკეტები გაუგზავნოს ოდესისა და ზღვის პირას მდებარე სხვა ქალაქების დასაცავად.  ამის შესახებ ბრიტანული გამოცემა Sunday Times წერს საკუთარ წყაროებზე დაყრდნობით.

ოფიციალურ ლონდონს ეს ინფორმაცია ჯერ არ დაუდასტურებია, თუმცა ბრიტანეთის დაზვერვის ბოლო ცნობებში საუბარია იმაზე, რომ რუსული ძალები კვლავ ფლობენ საზღვაო დესანტის გადამის პოტენციალს.

ეს ინფორმაცია განსხვავდება მანამდე წამყვანი ექსპერტების მიერ გამოთქმული მოსაზრებებისგან, რომლებიც თვლიან, რომ რუსეთის შეიარაღებულ ძალებს ახლა უკვე აღარ აქვთ ოდესაზე ზღვიდან შტურმის მიტანის შესაძლებლობა.

მოსკოვის და სრულიად რუსეთის პატრიარქმა კირილმა პადმასკოვიეში, კუბინკაში რუსეთის შეიარაღებული ძალების მთავარ ტაძარში გამართულ ლიტურგიაზე ქადაგება წაიკითხა და თქვა, რომ რუს ხალხი ხალხი არ ისწრაფვის ომისკენ და სხვების დაზიანებისკენ.

“ჩვენ მშვიდობისმოყვარე ქვეყანა ვართ, და ძალიან მრავალტანჯული ერი, რომელიც ომისგან ისე დაზარალდა, როგორც არცერთი ევროპული ქვეყანა. ჩვენ არ გვაქვს არანაირი სწრაფვა ომისკენ, ან იმისკენ, რომ გავაკეთოთ ისეთი რამ, რაც სხვებს ზიანს მიაყენებდა. მაგრამ ჩვენ ისე ვართ აღზრდილები ჩვენი ისტორიით, რომ გვიყვარს ჩვენი სამშობლო და მზად ვიქნებით ის დავიცვათ ისე, როგორც მხოლოდ რუსებს შეუძლიათ სამშობლოს დაცვა“–თქვა კირილმა.

უკრაინაში რუსეთის შეჭრის შემდეგ პატრიარი კირილი მწვავე კრიტიკის ობიექტი გახდა რუსული არმიის ქმედებების მხარდაჭერის და იმ დუმილის გამო, რომელსაც ის უკრაინის მშვიდობიანი მოსახლეობის მსხვერპლის და ტანჯვის შესახებ დღემდე ინარჩუნებს.

“მშვიდობისმოყვარე ერი ვართ, სხვისთვის ზიანის მიყენების სურვილი არ გვაქვს” – ამის შესახებ, რუსეთის პატრიარქმა კირილმა მოსკოვის მახლობლად მდებარე კუბინკაში რუსეთის შეიარაღებული ძალების მთავარ ტაძარში ქადაგებისას განაცხადა.

• “ჩვენ მშვიდობისმოყვარე ქვეყანა ვართ, და ძალიან მრავალტანჯული ერი, რომელიც ომისგან ისე დაზარალდა, როგორც არცერთი ევროპული ქვეყანა. ჩვენ არ გვაქვს არანაირი სწრაფვა ომისკენ, ან იმისკენ, რომ გავაკეთოთ ისეთი რამ, რაც სხვებს ზიანს მიაყენებდა. მაგრამ ჩვენ ისე ვართ აღზრდილები ჩვენი ისტორიით, რომ გვიყვარს ჩვენი სამშობლო და მზად ვიქნებით ის დავიცვათ ისე, როგორც მხოლოდ რუსებს შეუძლიათ სამშობლოს დაცვა“– განაცხადა რუსეთის პატრიარქმა. 

გაეროს ყოფილი მთავარი პროკურორი, კარლა დელ პონტე რუსეთის პრეზიდენტს, ვლადიმერ პუტინს ომის დამნაშავეს უწოდებს და მოუწოდებს სისხლის სამართლის საერთაშორისო სასამართლოს უკრაინაში პუტინის ქმედებების საპასუხოდ დაკავების საერთაშორისო ორდერი გამოიცეს.

ის ასევე ეხმაურება, უკრაინიდან გავრცელებულ კადრებს და აცხადებს , რომ კადრები “შოკისმომგვრელია”. მასობრივმა საფლავებმა იუგოსლავიაში მომხდარი მსგავსი სისასტიკე გაახსენა.

კარლა დელ პონტე რუანდასა და ყოფილ იუგოსლავიაში ომის დანაშაულების ტრიბუნალების ხელმძღვანელი იყო.

უკრაინა კვლავ სერიოზულ პრობლემებს უქმნის რუსულ საჰაერო და სარაკეტო ოპერაციებს, რუსული თვითმფრინავები კი დაუცველნი არიან უკრაინის ახლო და საშუალო სიშორის ჰაერსაწინააღმდეგო თავდაცვის სისტემების წინაშე. ამის შესახებ დიდი ბრიტანეთის თავდაცვის სამინისტრო აცხადებს.

რუსეთის უუნარობამ, აღმოაჩინოს და გაანადგუროს უკრაინის ჰაერსაწინააღმდეგო თავდაცვის სისტემები შეუძლებელი გახადა რუსეთის ფართო კონტროლი ჰაერში, რამაც თავის მხრივ დიდი გავლენა მოახდინა რუსეთი შესაძლებლობაზე, მის სახმელეთო ძალებს მხარი დაუჭიროს მთელ რიგ მიმართულებებზე – ნათქვამია სამინისტროს განცხადებაში, რომელიც ტვიტერზე გამოქვეყნდა.

ბრიტანეთის თავდაცვის უწყების დაზვერვა ასევე ავრცელებს ინფორმაციას რუსული ავიაციის კონცენტრირების შესახებ უკრაინის სამხრეთ–აღმოსავლეთით, სავარაუდოდ იმის გამო, რომ რუსეთმა მისი სამხედრო მოქმედებების ამ რაიონში კონცენტრირება გადაწყვიტა.

ამავე ინფორმაციით, რუსეთის სამხედრო–საზღვაო ძალები კვლავ ხელს უშლიან უკრაინის მომარაგებას ზღვიდან უკრაინის შავი ზღვის და აზოვის ზღვის სანაპიროების ბლოკადით, თუმცა, ბრიტანეთის უწყების ინფორმაციით, რუსული ძალების საზღვაო დესანტის გადმოსხმა სავარაუდოდ სულ უფრო სარისკო იქნება, უკრაინის კარგი მომზადების გამო.