Category: მსოფლიო

პუტინის პრესმდივანმა, დიმიტრი პესკოვმა აღიარა, რომ რუსეთმა უკრაინასთან ომში მნიშვნელოვანი ზარალი განიცადა. ამის შესახებ მან დღეს, Sky News-ის ეთერში განაცხადა.

„ჩვენ გვაქვს ჯარის მნიშვნელოვანი დანაკარგი, ეს ჩვენთვის უდიდესი ტრაგედიაა“, – თქვა პესკოვმა.

მან იმედი გამოთქვა, რომ “ეს ოპერაცია” მიაღწევს თავის მიზნებს “უახლოეს დღეებში”. გარდა ამისა, პესკოვმა ბუჩაში რუსი ოკუპანტების მიერ მოწყობილ ხოცვა-ჟლეტვას სიყალბე უწყოდა.

„ჩვენ უარვყოფთ, რომ რუს სამხედროებს რაიმე საერთო აქვთ ამ სისასტიკესთან და რომ გვამები ბუჩას ქუჩებიდან აჩვენეს“, – განაცხადა მან და აღნიშნა, რომ ეს იყო “კარგად დადგმული ინსინუაცია, სხვა არაფერი”.

“რუსეთს გაეროს ადამიანის უფლებათა საბჭოში წევრობის უფლება ახლახან შეუჩერდა. ომის დამნაშავეების ადგილი არ არის გაეროს ორგანოებში, რომლებიც მიზნად ისახავს ადამიანის უფლებების დაცვას. მადლობა ყველა წევრ სახელმწიფოს, რომელმაც მხარი დაუჭირა გაეროს  რეზოლუციას და აირჩია ისტორიის სწორი მხარე”

ასე ეხმიანება უკრაინის საგარეო მინისტრი გაეროს მიერ რუსეთისთვის ადამიანის უფლებთა საბჭოს წევრობის უფლების შეჩერებას.

გაეროს გენერალურმა ასამბლეამ რუსეთს ადამიანის უფლებათა საბჭოს წევრობა შეუჩერა. კენჭისყრა დღეს გაიმართა – მომხრე 93 იყო, 24-მა საწინააღმდეგო პოზიცია დააფიქსირა, 58-მა კი თავი შეიკავა.

რეზოლუციის პროექტში გაეროს გენერალურმა ასამბლეამ აღნიშნა, რომ “შეუჩერებს ადამიანის უფლებათა საბჭოში წევრობის უფლებას იმ წევრს, რომელიც ჩაიდენს ადამიანის უფლებების უხეშ და სისტემატურ დარღვევას”.

რუსეთის წარმომადგენელმა, გენადი კუზმინმა დაგმო კენჭისყრა. წევრობის უფლების შეჩერებას მხარი არ დაუჭირა ბელარუსმა, სირიამ, ჩინეთმა და კიდევ 20-მა ქვეყანამ.

NATO-ს გენერალური მდივანი იენს სტოლტენბერგი აცხადებს, რომ ვლადიმერ პუტინმა არ მიატოვა უკრაინის კონტროლის გეგმა და ძირითადი ძალები აღმოსავლეთში გადაიყვანა დონბასის დასაპყრობად. ამის შესახებ ნატოს გენერალურმა მდივანმა ბრიუსელში მინისტერიალის დასრულების შემდეგ განაცხადა.

”ამ ომის დასრულების ყველაზე მარტივი გზა არის, პრეზიდენტმა პუტინმა გაიყვანოს ყველა ჯარი და ჩაერთოს სერიოზულ დიპლომატიურ ძალისხმევაში დიპლომატიური გადაწყვეტის მოსაძებნად. მაგრამ ჩვენ უნდა ვიყოთ რეალისტები – არ არსებობს იმის ნიშანი, რომ პრეზიდენტმა პუტინმა შეცვალა უკრაინის კონტროლის მთავარი მიზანი”,– განაცხადა სტოლტენბერგმა.

მანვე აღნიშნა, რომ NATO არ ხედავს რუსეთის უკანდახევას, არამედ მხოლოდ გადაჯგუფებას, მათი ძალების პოზიციების ცვლილებას, მოძრაობას უკრაინის ჩრდილოეთიდან აღმოსავლეთისკენ.

“და ჩვენ ველოდებით დიდ ბრძოლას დონბასში, რუსეთის დიდ შეტევას. სწორედ ამიტომ მოკავშირეებმა აღნიშნეს დღეს უკრაინას დამატებითი დახმარების სასწრაფო დახმარების აუცილებლობა”, – თქვა გენერალურმა მდივანმა.

მინისტერიალის შემდეგ უკრაინის საგარეო საქმეთა მინისტრმა განცხადა, რომ “დონბასისთვის ბრძოლა მეორე მსოფლიო ომს მოგაგონებთ“.

ნატოს გენერალურმა მდივანმა იენს სტოლტენბერგმა NATO-ს მინისტერიალის დასრულების შემდეგ განაცხადა, რომ „მოკავშირეები ბევრს აკეთებენ და გადაწყვეტილი აქვთ, გააკეთონ მეტი ახლო, საშუალო და გრძელვადიან პერსპექტივაში, რათა დაეხმარონ მამაც უკრაინელებს, დაიცვან თავიანთი სახლები და თავიანთი ქვეყანა და უკან დახიონ დამპყრობლები“.

მისივე თქმით, ალიანსის წევრები შეთანხმდნენ, გააძლიერონ პრაქტიკული მხარდაჭერა რუსეთის აგრესიის საფრთხის წინაშე მყოფი სხვა პარტნიორებისთვის, მათ შორის საქართველოსა და ბოსნია და ჰერცოგოვინასთვის, რათა ხელი შეუწყონ მათ მდგრადობას.

მანვე აღნიშნა, რომ NATO-საქართველოს მხარდამჭერი პაკეტი მოიცავს ისეთ სფეროებს, როგორებიცაა სიტუაციური ცნობიერება, უსაფრთხო კომუნიკაცია და კიბერუსაფრთხოება.

მინისტრები შეთანხმდნენ, რომ ნატოს შემდეგი სტრატეგიული კონცეფცია, რომელიც დასრულდება ივნისში მადრიდის სამიტზე, უნდა ითვალისწინებდეს ნატოს მომავალ ურთიერთობებს რუსეთთან და ჩინეთის მზარდ გავლენას მოკავშირეთა უსაფრთხოებაზე.

“დონბასისთვის ბრძოლა მეორე მსოფლიო ომს მოგაგონებთ დიდი საოპერაციო მანევრებით და ათასობით ტანკით, თვითმფრინავითა და ჯავშანტექნიკით”,– Reuters-ის ცნობით, თქვა უკრაინის საგარეო საქმეთა მინისტრმა, დმიტრო კულება დღეს ბრიუსელში.

მან მოუწოდა მოკავშირეებს, უკრაინას უახლოეს დღეებში დაეხმარონ.

”ან თქვენ დაგვეხმარებით ახლა – და მე ვსაუბრობ დღეებზე და არა კვირებზე – ან თქვენი დახმარება ძალიან გვიან მოვა და ბევრი ადამიანი დაიღუპება,” – განაცხადა კულებამ.

ცნობისთვის, უკრაინა ელოდება, რომ რუსეთი ემზადება აქტიური შეტევითი ოპერაციებისთვის დონბასში, მას შემდეგ, რაც რუსული ჯარების ნაწილი გავიდა კიევისა და ჩერნიგოვის რეგიონებიდან.

უკრაინის უსაფრთხოების სამსახურის ინფორმაციით, ომისგან თავის დასაღწევად რუსი ოკუპანტები მზად არიან, თავი დაისახიჩრონ.

უწყების ცნობით, ამას ადასტურებს რუსი ოკუპანტების სატელეფონო ზარები ოჯახის წევრებთან რუსეთში. სუს-ის განცხადებით, რუსი სამხედროების უმრავლესობისთვის ეს “სპეციალური ოპერაცია“ ჯოჯოხეთად გადაიქცა და ერთადერთი, რაზეც დამპყრობლები ოცნებობენ, ცოცხლად დარჩენაა.

უსაფრთხოების სამსახურის ინფორმაციით, ერთ-ერთ ოკუპანტთან სატელეფონო საუბრისას მისი დედა გაღიზიანებული იყო, რადგან რუსეთის თავდაცვის სამინისტრომ ხელშეკრულების არც ერთი პირობა არ შეასრულა, ამიტომ მოუწოდა თავის შვილს, უკრაინიდან დაბრუნებისთანავე შეწყვიტოს ხელშეკრულება.

რუსეთის საგარეო საქმეთა მინისტრის, სერგეი ლავროვის განცხადებით, 6 აპრილს კიევმა მოლაპარაკებების ჯგუფს წარუდგინა თავისი შეთანხმებების პროექტები, “რაც აშკარად აჩვენებს გადახვევას 29 მარტს სტამბოლის შეხვედრაზე დაფიქსირებული ყველაზე მნიშვნელოვანი დებულებებიდან”.

ლავროვი ირწმუნება, რომ სტამბოლის დოკუმენტში კიევმა მკაფიოდ ჩამოაყალიბა, რომ უკრაინის უსაფრთხოების სამომავლო გარანტიები არ ვრცელდება ყირიმსა და სევასტოპოლზე, გუშინ წარდგენილ პროექტს კი ეს დებულება აკლია.

ასევე, მისი თქმით, არსებობს მოსაზრება, რომ ყირიმის საკითხი პრეზიდენტების შეხვედრაზე უნდა გადაწყდეს, რაც რუსეთისთვის ასევე მიუღებელია.

ლავროვი ამტკიცებს, რომ პარტნიორები ვოლიდიმირ ზელენსკის საომარი მოქმედებების გაგრძელებისკენ უბიძგებენ.

„კიევის რეჟიმს აკონტროლებენ ვაშინგტონი და მისი მოკავშირეები, რომლებიც უბიძგებენ პრეზიდენტ ზელენსკის, გააგრძელოს საომარი მოქმედებები“, – თქვა ლავროვმა და აღნიშნა, რომ  რუსეთი ხელს შეუწყობს შეთანხმების პროექტს, “მიუხედავად ყველა პროვოკაციისა”.

უკრაინის თავდაცვის მინისტრის მოადგილე ანა მალიარი ამბობს, რომ რუსეთს უარი არ უთქვამს უკრაინის მთელი ტერიტორიის დაკავების გეგმებზე.

“რუსეთის ფედერაციის მთავარი მიზანი იყო და არის უკრაინის მთელი ტერიტორიის დაკავება. რუსეთი ამას სწრაფად აპირებდა, მაგრამ პუტინის ბლიცკრიგი ჩაიშალა. მიუხედავად ამისა, რუსეთი უარს არ ამბობს ამ ომის გაგრძელების გეგმებზე უკრაინის მთელ ტერიტორიაზე. რუსეთი ცდილობს შეჩერდეს ზოგიერთ მცირე მიზანზე, რათა რაიმე შედეგი აჩვენოს“, – განაცხადა მალიარმა.

მანვე აღნიშნა, რომ რუსეთი იყენებს ნებისმიერ მომენტს ძალების შესაგროვებლად, ჯარების გადაჯგუფებისა და შეტევის გასაგრძელებლად.

მისივე ინფორმაციით, ამჟამად რუსეთის მოკლევადიანი მიზანი უკრაინის აღმოსავლეთის დაკავებაა.