უკრაინის ენერგეტიკის მინისტრი ამბობს, რომ რუსმა ჯარისკაცებმა ჩერნობილში რადიაციის მაღალი დოზა მიიღეს, ამიტომაც მათ სხივური დაავადება და მტანჯველი სიკვდილი ელით. ასევე რადიაციით დასხივებულია დაახლოებით 10 ათასი ერთეული ტექნიკა.
ჯარისკაცები, რომლებიც ჩერნობილის გაუცხოების ზონაში ერთი თვე იმყოფებოდნენ, რადიაციის დიდ დოზებს იღებდნენ, სამხედრო ტექნიკაზე დარჩა რადიონუკლიდებიც, რადგან მეტალიც ექვემდებარება დასხივებას. უკრაინის ენერგეტიკის მინისტრის, გერმან გალუშენკოს კომენტარს ამის შესახებ მის ფეისბუქ გვერდზე უკრაინის ენერგეტიკის სამინისტრო აქვეყნებს.
“რუსი ჯარისკაცები ჩერნობილის ნაწილს სახლში მიიტანენ – მკვდრები ან ცოცხლები. მათი უგუნურება უმაღლეს ნიშნულზეა, ისევე როგორც დოზიმეტრები, რომლითაც ოკუპანტების დისლოკაციის ადგილებში რადიაციული ფონი შევამოწმეთ.“
გალუშენკოს თქმით, რუსები რადიაციით დაბინძურებულ მიწაში სანგრებს შიშველი ხელებით თხრიდნენ, რადიოაქტიურ მიწას ტომრებში ყრიდნენ გამაგრებისთვის და რადიაციული მტვრით სუნთქავდნენ.
მისი შეფასებით, ასეთი დასხივების პირობებში ერთი თვის გატარების შემდეგ ბევრი რუსი ჯარისკაცი ერთ წელზე მეტს ვერ იცოცხლებს და მათ მტანჯველი სიკვდილი ელით.
რუსმა სამხედროებმა ჩერნობილის სადგური და ადმინისტრაციული შენობებიც გაძარცვეს: გაიტანეს პრაქტიკულად ყველაფერი, რაც ნახეს – ჭურჭლით და სათადარიგო ნაწილებით დაწყებული, აპარატურით დამთავრებული.
რადიაციული დასხივებას დაექვემდებარა მთელი პირადი შემადგენლობა და სამხედრო ტექნიკა, რომელმაც ჩერნობილში გაიარა – ეს არის დაახლოებით 10 000 ერთეული. მეტალი დასხივებას ექვემდებარება და რადიაცია გადააქვს– ამბობს მინისტრი.
რუსი ჯარისკაცები ჩერნობილში უკრაინაში შეჭრის პირველ დღესვე შევიდნენ და იქაურობა ამ კვირის დასაწყისში დატოვეს. უკრაინის “ენერგოატომის“ თანამშრომლებმა გრუნტის შემოწმების შემდეგ დაასკვნეს, რომ რუსმა სამხედროებმა სადგურის გაუცხოების ზონაში ცეზიუმის და პლუტონიუმის მომაკვდინებელი დოზები მიიღეს. სხივური დაავადებისგან გარდაცვალება შეიძლება ელოდეთ სხვა ადამიანებსაც, ვისაც მათთან კონტაქტი ჰქონდა.