Category: მსოფლიო

საქართველოს პარლამენტის თავმჯდომარის უკრაინაში ვიზიტის პირველი დღის ბოლოს უკრაინის რადას სპიკერი, რუსლან სტეპანჩუკი ფეისბუქზე პოსტს და ქართული დელეგაციის უკრაინაში ყოფნის ამსახველ ფოტოებს აქვეყნებს:

„საქართველო რუსეთს არანაირად არ დაეხმარება. საქართველოს პარლამენტის სიკერმა ამას ხაზი გაუსვა, როცა ბუჩაში და ირპენში მომხდარი საკუთარი თვალით ნახა. კიევის რეგიონის ქალაქების მსხვერპლთა შემზარავი ისტორია გულგრილს ვერავის ტოვებს. აქ, როგორც სარკეში ისე ჩანს რუსული არმიის ნამდვილი სახე.“– წერს სტეფანჩუკი.

საქართველოს პარლამენტის თავმჯდომარის დელეგაცია კიევში იმყოფება. დელეგაციის შემადგენლობაში ოპოზიციური პარტიების წარმომადგენლებიც შედიან. მათ შორის არ არის ნაციონალური მოძრაობა.

რომის პაპი ფრანცისკი დარწმუნებულია, რომ მსოფლიოში უკრაინელ ლტოლვილებს კეთილგანწყობილად მხოლოდ რასისტული სტერეოტიპების გამო ხვდებიან.

რომის პაპი თვლლის, რომ უკრაინელი ლტოლვილების მიმართ მსოფლიოს უკეთესი დამოკიდებულება აქვს, ვიდრე სხვა ქვეყნებიდან ლტოლვილების მიმართ, სადაც ასევე ომები მიმდინარეობს. მისი აზრით, ლტოლვილებს კლასებად ყოფენ. ამის შესახებ ფრანცისკმა გამოცემა vatican.va–სთვის მიცემულ ინტერვიუში განაცხადა.

ჟურნალისტის კითხვაზე, ნიშნავს თუ არა უკრაინელებისი გულთბილად მიღება დასავლურ ქვეყნებში იმას, რომ რომ მსოფლიო სტერეოტიპულად უყურებს ლოლვილებს პლანეტის სხვადასხვა რეგიონებიდან, პაპმა დადებითად უპასუხა.

“ეს სიმართლეა. ლტოლვილებს ახარისხებენ. არის პირველი კლასი, მეორე კლასი, კანის ფერი, არიან თუ არა ისინი განვითარებული ქვეყნიდან. ჩვენ რასისტები ვართ, და ეს ცუდია. ლტოლვილების პრობლემა იესოსაც აწუხებდა, იმიტომ რომ ბავშვობაში ის ეგვიპტიდან ლტოლვილი იყო. სიკვდილს გაექცა“.

შეგახსენებთ, რომ უკრაინაში რუსეთის შეჭრიდან დღემდე ქვეყანა მინიმუმ 5 მილიონმა ადამიანმა დატოვა.

უკრაინის თავდაცვის მინისტრის მოადგილის, ანა მილიარის თქმით, უკრაინის ტერიტორიაზე  ოკუპანტების მიერ გაშვებული რაკეტების უმეტესობა ჩამოგდებულია.

• “თუ გავითვალისწინებთ იმას, რისი გაკეთება შეეძლო რუსეთს და იმას, თუ როგორ შეძლეს შეიარაღებულმა ძალებმა მისი შეჩერება, უპირატესობა უკრაინის არმიის მხარესაა. მიუხედავად იმისა, რომ რუსული არმიის ყოველი სარაკეტო დარტყმა ჩვენთვის ძალიან მტკივნეული იყო, გაცილებით უფრო მეტი რაოდენობის სარაკეტო დარტყმა იქნა თავიდან აცილებული”, – თქვა ანა მალიარმა.

გაეროს მსოფლიო სურსათის პროგრამის ხელმძღვანელმა თქვა, რომ ალყაშემორტყმულ უკრაინულ ქალაქ მარიუპოლში ადამიანები „შიმშილით იხოცებიან“. მისი პროგნოზით, მომავალ კვირებში, როდესაც რუსეთი ამ მიმართულებით თავდასხმას გააძლიერებს, კრიზისი სავარაუდოდ გაუარესდება.

მსოფლიო სურსათის პროგრამის აღმასრულებელმა დირექტორმა დევიდ ბისლიმ კიევში, „ასოშეიტედ პრესთან“ ინტერვიუში გაფრთხილება გამოთქვა, რომ მარცვლეულის ექსპორტიორ უკრაინაში რუსეთის შეჭრა, უკრაინიდან ბევრად მოშორებული ქვეყნების დესტაბილიზაციის რისკს ქმნის და შესაძლოა იმ ქვეყნებიდან მიგრანტების ტალღები წარმოშვას, რომლებიც ცხოვრების უკეთესი პირობების ძებნას სხვაგან დაიწყებენ. მან  წუხილი გამოთქვა, რომ მსოფლიო სურსათის პროგრამას და დახმარების სხვა ორგანიზაციებს, რომლებიც გაჭირვებაში მყოფთა დახმარებას ცდილობენ, ამ ადამიანებთან წვდომა არ აქვთ.

• „ვერ ვხედავ, რომ რამე იოლდება. უბრალოდ ვერ ვხედავ, რომ ახლა ეს ხდება“,-თქვა მან.

ბისლიმ განსაკუთრებული შეშფოთება აზოვის ზღვის საპორტო ქალაქ მარიუპოლის შესახებ გამოხატა, სადაც უკრაინელი დამცველების სულ უფრო მცირე რიცხვი რუსულ ალყას იგერიებს და სადაც 100 000-ზე მეტი სამოქალაქო პირია მომწყვდეული, რომელთაც გადაუდებლად სჭირდება საკვები, წყალი და გათბობა.

რუსულმა ძალებმა, რომელიც ქალაქის მისადგომებს აკონტროლებს, ქალაქში ჰუმანიტარული დახმარება არ შეუშვა, მიუხედავად იმისა, რომ მსოფლიო სურსათის პროგრამამ დაშვება მოითხოვა.

• „მარიუპოლის ხალხს და სხვა ხალხს, ვისთანაც ვერ მივაღწიეთ, ჩვენ არ მივატოვებთ, მაგრამ ვითარება წარმოუდგენელია: ადამიანები შიმშილით იხოცებიან“ – თქვა ბისლიმ.

მსოფლიო სურსათის პროგრამის ხელმძღვანელმა ასევე აღნიშნა, რომ ომით გამოწვეულმა სურსათის გლობალურმა ნაკლებობამ შეიძლება ისეთი მასიური მიგრაცია გამოიწვიოს, როგორიც მეორე მსოფლიო ომის შემდეგ არავის უნახავს.

წყარო: ამერიკის ხმა 

უკრაინის პრემიერი, დენის შმიგალი და სხვა მაღალჩინოსნები ფინანსური სფეროდან მომავალ კვირას ვაშინგტონში ჩავლენ. ამის შესახებ სააგენტო როიტერი საკუთარ წყაროებზე დაყრდნობით წერს და აზუსტებს, რომ შმიგალის გარდა ვაშინგტონში ჩავლენ ფინანსთა მინისტრი, სერგეი მარჩენკო და ცენტრობანკის თავმჯდომარე კირილ შევჩენკო. მათი ვიზიტი ამერიკის დედაქალაქში საერთაშორისო სავალუტო ფონდის და მსოფლიო ბანკის საგაზაფხულო შეხვედრების დროს შედგება.

როიტერის მონაცემებით უკრაინული დელეგაცია ორმხრივ შეხვედრებს გამართავს დიდი შვიდეულის ქვეყნების ფინანსური უწყებების ჩინოვნიკებთან, ასევე მონაწილეობას მიიღებს უკრაინასთან დაკავშირებულ მრგვალ მაგიდაში, რომლის ორგანიზატორი მსოფლიო ბანკია.
ვიზიტი ომის დაწყების შემდეგ პირველი შესაძლებლობა იქნება უკრაინული მხარისთვის პირადად შეხვდნენ განვითარებული ეკონომიკის ქვეყნების ფინანსური უწყებების წარმომადგენლებს, აღნიშნავს სააგენტო.

შეერთებული შტატები განაგრძობს მცდელობას, რომ რუსეთმა ვერ შეძლოს სანქციებისთვის თავის არიდება. ამის შესახებ ამერიკის პრეზიდენტის მრჩეველი უსაფრთხოების საკითხებში, ჯეიკ სალივანი აცხადებს.

“მომავალი დღეების განმავლობაში ჩვენ განსაკუთრებულ ყურადღებას გავამახვილებთ რუსეთის მიერ სანქციებისთვის თავის არიდების საკითხზე”, – თქვა სალივანმა ვაშინგტონის ეკონომიკური კლუბის ფარგლებში მიცემული ინტერვიუსას. მისივე განმარტებით, მომავალ კვირებში მეტი იქნება ცნობილი იმის შესახებ, თუ როგორ აპირებს ამერიკა ამ კუთხით მუშაობას, როგორც რუსეთის შიგნით, ისე მის ფარგლებს გარეთ. თუმცა, გეგმების შესახებ მეტი დეტალი სალივანს არ გაუმხელია.

თეთრი სახლის მრჩეველმა თქვა, რომ ვაშინგტონი არ აპირებს პუტინთან დაკავშირებული ოლიგარქებისთვის ჩამორთმეული ქონების უკან დაბრუნებას. “ჩვენი მიზანია, რომ ეს ქონება გამოვიყენოთ უკეთესი მიზნებით. მაგრამ მინდა, რომ ფრთხილად ვისაუბრო ამის შესახებ, რადგან ახლა მუშავდება პოლიტიკა იმასთან დაკავშირებით, თუ როგორ უნდა მოგვარდეს ეს საკითხი. თუმცა, გარწმუნებთ, მიზანი არ არის, რომ ისინი შევინახოთ და შემდეგ უკან დავაბრუნოთ”.

სალივანის თქმითვე, ნებისმიერი ძალისხმევა რუსეთის მხრიდან, უკრაინისთვის იარაღის მიწოდების პროცესის შესაფერხებლად, ვითარებას გაამწვავებს. “ამერიკა არ მოქმედებს უკრაინის ტერიტორიის შეგნით, მაგრამ თუკი რუსები იერიშს მიიტანენ ნატოს ტერიტორიაზე, სადაც მასალები იწყობა, ეს მეხუთე მუხლის ამოქმედებას გამოიწვევს და სრულად შეცვლის ვითარებას”, – თქვა თეთრი სახლის მრჩეველმა უსაფრთხოების საკითხებში.

წყარო: ამერიკის ხმა

სიტუაცია მარიუპლოში კრიტიკულია. მისი დამცველების გადარჩენა ან სასწრაფო სამხედრო ოპერაციას, ან პოლიტიკურ გადაწყვეტილებას შეუძლია. ამის შესახებ 36–ე საზღვაო ფეხოსანთა ბრიგადის მეთაურმა, სერგეი ვოლინამ უკრიანსკაია პრავდას განუცხადა. ის თვლის, რომ მარიუპოლის განბლოკვა ჯერ კიდევ შესაძლებელია, თუმცა ასეთი ოპერაცია უმოკლეს ვადებში უნდა ჩატარდეს გამოცდილი მეთაურების და აუცილებელი საშუალებების გამოყენებით. ამასთან, ვოლინამ განაცხადა, რომ მისი ბატალიონის მებრძოლები ტყვედ ჩაბარებას არ აპირებენ.

რუსეთის თავდაცვის სამინისტრომ ამ კვირაში განაცხადა, რომ მარიუპოლში ტყვედ ჩაბარდა 1026 საზღვაო ქვეითი. უკრაინის პრეზიდენტის ოფისის მრჩეველმა, ალექსეი არესტოვიჩმა დაადასტურა, რომ რამდენიმე სამხედრო მართლაც ჩავარდა ტყვედ, როცა ალყის გარღვევას და აზოვთან შეერთებას ცდილობდნენ, თუმცა საუბარია ბევრად ნაკლებ ადამიანზე.

14 აპრილს აზოვის ბატალიონის მეთაურის მოადგილემ, სვიატოსლავ პალამარმა თქვა, რომ მარიუპოლის ბლოკადის მოხსნა შესაძლებელია, თუმცა მებრძოლები სამხედრო–პოლიტიკური ხელმძღვანელობის მოქმედებას ელიან.

რუსეთის თავდაცვის სამინისტრომ პარასკევს დილით განაცხადა, რომ რუსმა სამხედროებმა და თვითაღიარებული რესპუბლიკის ძალებმა, მოახერხეს ილიჩის სახელობის მეტალურგიული კომბინატის დაკავება.

დღესვე დილით მარიუპოლის ქალაქის საბჭომ განაცხადა, რომ რუსმა სამხედროებმა მშვიდობიანი მარიუპოლელების ცხედრების ეგსჰუმაცია დაიწყეს, რომლებსაც საცხოვრებელი სახლების ეზოებში მარხავდნენ. ქალაქში დარჩენილ მოსახლეობაზე დაყრდნობით, ქალაქის საბჭო ამტკიცებს, რომ სამხედროები ახლა გარდაცვლილების დაკრძალვის უფლებას არავის აძლევენ.

“ყოველ ეზოში მეთვალყურე დააყენეს, რომელიც მარიუპოლელებს გარდაცვლილი ახლობლების დამარხვის უფლებას არ აძლევენ. რატომ ხდება ეგსჰუმაცია და სად მიაქვთ ცხედრები უცნობია“– ამბობენ ქალაქის საბჭოში.

მანამდე უკრაინის ხელისუფლება აცხადებდა, რუსმა სამხედროებმა მარიუპოლში 13 მობილური კრემატორიუმი ჩაიტანეს, რათა სამხედრო დანაშაულის კვალი დამალონ.

CNN-ი პენტაგონში საკუთარ წყაროზე დაყრდნობით წერს, რომ აშშ-ის სამხედრო დახმარების ახალი პარტია უკრაინაში უახლოეს 24 საათში ჩავა.

უკრაინელები მას საზღვარზე მიიღებენ და ქვეყანაში შემდეგ გადაანაწილებენ. შეიარაღების ზუსტი სია ჯერჯერობით უცნობია, თუმცა აშშ-ის ოფიციალური პირები აცხადებდნენ, რომ უკრაინაში პირველ რიგში ის შეიარაღება გაიგზავნება, რაც მათ ყველაზე მეტად სჭირდებათ.

”მათ შორის ჰაუბიცები და მასთან დაკავშირებული საბრძოლო მასალები, ასევე რადარები.” – წერს CNN-ი.