Category: მსოფლიო

აშშ-ის ცენტრალური სადაზვერვო სააგენტოს (CIA) დირექტორმა, უილიამ ბერნსმა განაცხადა, რომ შეერთებული შტატები არ უყურებს მსუბუქად რუსეთის მიერ უკრაინაში ტაქტიკური ბირთვული იარაღის გამოყენების საფრთხეს.

„პრეზიდენტ პუტინისა და რუსეთის ხელმძღვანელობის პოტენციური სასოწარკვეთის გათვალისწინებით, იმ წარუმატებლობების გათვალისწინებით, რაც მათ აქამდე ჰქონდათ სამხედრო თვალსაზრისით, არც ერთ ჩვენგანს არ შეუძლია მსუბუქად აღიქვას ტაქტიკური ბირთვული იარაღის, ან დაბალი ეფექტურობის ბირთვული იარაღის პოტენციური გამოყენების საფრთხე”,– თქვა ბერნსმა CNN-ის ცნობით.

მისი განმარტებით, CIA ამას ძალიან დიდი ყურადღებით ადევნებს თვალს, თუმცა აშშ-ს ჯერ არ უნახავს რამე ნიშანი იმისა, რომ რუსეთი ემზადება ასეთი ნაბიჯის გადასადგმელად.

„მიუხედავად იმისა, რომ ჩვენ ვნახეთ კრემლის მხრიდან გარკვეული რიტორიკული პოზიცია ბირთვული განგაშის მაღალ დონეზე გადასვლის შესახებ, ჯერჯერობით არ გვინახავს პრაქტიკული მტკიცებულება იმ ტიპის სამხედრო განლაგების შესახებ, რომლებიც ამ შეშფოთებას გააძლიერებს, მაგრამ ჩვენ ამას ძალიან ყურადღებით ვაკვირდებით“, – აღნიშნა CIA-ს ხელმძღვანელმა.

აზოვის პოლკი მიიჩნევს, რომ მარიუპოლისთვის ბლოკადის მოხსნა შესაძლებელია. ამის შესახებ აზოვის პოლკის მეთაურის მოადგილემ რადიო თავისუფლებასთან განაცხადა.

„იმედი გვაქვს, ოპტიმიზმით ვიბრძვით და ველოდებით ჩვენი სამხედრო-პოლიტიკური ხელმძღვანელობის გადამწყვეტ ქმედებებს, რათა ქალაქის დებლოკადა მოვახდინოთ და მოვიგოთ ეს ომი. ჩვენ გვჯერა, რომ ეს [დებლოკადა] შესაძლებელია. არცერთ ექსპერტს და ანალიტიკოსს არ ეგონა, რომ მარიუპოლის დამცველთა მთელი ჯგუფი, მთელი გარნიზონი ამდენ ხანს გაძლებდა“, – თქვა სვიატოსლავ პალამარმა.

მანვე აღნიშნა, რომ მარიუპოლის დამცველებს ამჟამად აქვთ გამბედაობა, რათა იბრძოლონ და დაიცვან ქალაქი “როგორც საჭიროა”.

საგარეო მინისტრის, დმიტრო კულებას თქმით, მარიუპოლის განბლოკვისთვის უკრაინას მეტი იარაღი სჭირდება, ამიტომ მუშაობენ პარტნიორებთან მის მისაღებად.

უკრაინაზე რუსეთის თავდასხმის შემდეგ უკრაინულმა არმიამ რუსეთის 5260 ერთეულზე მეტი სამხედრო ტექნიკა გაანადგურა. მათ შორის არის კრეისერი “მოსკოვი“, რომელიც უკრაინასთან ომში ამ დრომდე რუსეთის ყველაზე ძვირადღირებული დანაკარგია.

14 აპრილის ღამეს უკრაინულმა რაკეტებმა “ნეპტუნი“ რუსეთის შავი ზღვის ფლოტის ფლაგმანი, ყველაზე ძლიერი შეიარაღების მქონე  ხომალდი გაანადგურეს. კრეისერი გადაბრუნდა და ჩაძირვა დაიწყო – ამბობს უკრაინის შეიარაღებული ძალების სამხრეთის ოპერატიული მეთაურობის ოფიციერი ნაზაროვი. “გაჩნდა ხანძარი. საზღვაო ქვედანაყოფების სხვა ერთეულები მის დახმარებას ცდილობდნენ, თუმცა შტორმმა და საბრძოლო მასალის ძლიერმა აფეთქებამ კრეისერი გადააბრუნა და მან ჩაძირვა დაიწყო“– ამბობს ნაზაროვი.

უკრაინული ფორბსის ინფორმაციით, დაზიანებული ხომალდი 750 მილიონი დოლარი ღირს. რედაქციამ სავარაუდო ღირებულება “მოსკოვის“ იმავე კლასის კრეისერ “უკრაინასთან“ შედარებით გამოითვალა, რომელიც 1995 წელს 720 მილიონი დოლარი ღირდა.

2020 წელს კრეისერი “მოსკოვი“ გაარემონტეს. რემონტის ზუსტი ღირებულება უცნობია, თუმცა რუსული სახელმწიფო მედიის ინფორმაციით სავარაუდო თანხა 30 მილიარდი რუბლია, რაც დღევანდელი კურსით 363 მილიონი დოლარია.

რუსული სახელმწიფო მედიის ინფორმაციით მთელი ეკიპაჟი ევაკუირებულია, რაც ფორბსის აზრით იმას ნიშნავს, რომ ხომალდი წყლის ზედაპირზე ვეღარ დარჩება და მას ჩაძირავენ.

ამ ხომალდის აფეთქებამდე უკრაინასთან ომში რუსეთის ყველაზე ძვირადღირებული დანაკარგი თვითმფრინავი Ил-76 იყო. მისი ღირებულება 86 მილიონი დოლარია. სულ უკრაინულმა არმიამ 160 რუსული თვითმფრინავი გაანადგურა, რომელთა საერთო ღირებულება 3.8 მილიარდი დოლარია.

Ил-76–ის შემდეგ ყველაზე ძვირადღირებული დანაკარგი სადესანტო გემი “სარატოვია“, რომელიც ბერდიანსკის პორტში აფეთქდა. უკრაინულმა ძალებმა მას დარტყმა 24 მარტს მიაყენეს. ეს იყო რუსეთის პირველი სამხედრო ხომალდი, რომელიც ოკუპირებულ პორტში შევიდა და ოკუპანტების სამხედრო ტექნიკა შეიტანა, მათ შორის ჯავშანმანქანები. “სარატოვის“ ღირებულება 75 მილიონი დოლარი იყო.

სულ ჯამში 5260 განადგურებულ ერთეულს შორის იყო:

144 ვერტმფრენი

160 თვითმფრინავი

753 ტანკი

1437 ერთეული საავტომობილო ტექნიკა

1968 საბრძოლო ბრონირებული მანქანა.

ფორბისის გათვლებით, უკრაინაში შეჭრის შემდეგ რუსეთმა მინიმუმ 10.8 მილიარდი დოლარის ტექნიკა დაკარგა. უკრაინულმა ძალებმა ისინი ჯართად აქციეს.

უკრაონის ეროვნული უსაფრთხოებისა და თავდაცვის საბჭოს მდივანმა ოლექსი დანილოვმა განაცხადა, რომ უკრაინის ხელისუფლებამ იცოდა უკრაინის წინააღმდეგ რუსეთის სრულმასშტაბიანი მოსალოდნელი ომის შესახებ, მაგრამ ელოდა, რომ რუსების შეჭრა დაიწყებოდა 22 თებერვალს და არა 24 თებერვალს.

„ჩვენ ვიცოდით, რა მოხდებოდა ჩვენს ქვეყანაში. უფრო მეტიც, თავდასხმის თარიღი იყო არა 24 თებერვალი, არამედ 22 თებერვალი. ისინი 22 თებერვალს უნდა დასხმოდნენ ჩვენს ქვეყანას თავს.

ერთადერთი, რასაც არ ველოდით, იყო ბელარუსის ტერიტორიის ჩარევა. იყო ამაზე მსჯელობა, მაგრამ საბოლოოდ ვიფიქრეთ, რომ სხვაგვარად იქნებოდა. მაგრამ მოხდა ისე, როგორც მოხდა”,- ამბობს დანილოვი BBC-თან ინტერვიუში.

მისივე განცხადებით, უკრაინის დადანაშაულება, რომ ომისთვის არ მოემზადა, არასწორია.

“ჩვენ არ შეგვეძლო გამოვსულიყავით და მოსახლეობისთვის საჯაროდ გვეთქვა: მეგობრებო, 22 თებერვალს ომი იწყება. ეს მიუღებელია საჯარო მმართველობის თვალსაზრისით. მაგრამ ჩვენ ვემზადებოდით.

შემიძლია ვთქვა, რომ როდესაც რუსული ტანკების პირველი კოლონა შევიდა ლუგანსკის ოლქის ტერიტორიაზე 24 თებერვალს დილის 5 საათზე – თუმცა შეჭრა რეალურად დაიწყო დილის 3:40 საათზე – როდესაც ეროვნული უსაფრთხოებისა და თავდაცვის საბჭოს წევრები შეიკრიბნენ სადღაც 5-დან 6 საათამდე, ყველა იურიდიული დოკუმენტი, რომელიც უნდა გაგვეღო, წინასწარ გვქონდა მომზადებული.

და ვინც ამბობს, რომ ჩვენ არ მოვემზადეთ, არ ესმის, როგორ ხდება ეს ყველაფერი”,- თქვა ეროვნული უსაფრთხოებისა და თავდაცვის საბჭოს მდივანმა.

უკრაინის უმაღლესი რადას თავმჯდომარე, რუსლან სტეფანჩუკი წერს, რომ უკრაინის უმაღლესმა რადამ რუსეთის ქმედებები გენოციდად აღიარა.

“უკრაინის უმაღლესმა რადამ რუსეთის ფედერაციის ქმედებები უკრაინელი ერის გენოციდად აღიარა”, – წერს სტეფანჩუკი Twitter-ზე.

The Verkhovna Rada of Ukraine recognized the actions of the Russian Federation as genocide of the Ukrainian Nation

— Ruslan Stefanchuk (@r_stefanchuk) April 14, 2022

რუსეთის უშიშროების საბჭოს თავმჯდომარის მოადგილემ, დიმიტრი მედვედევმა განაცხადა, რომ რუსეთი გააძლიერებს უსაფრთხოებას დასავლეთის საზღვრებთან, თუ შვედეთი და ფინეთი შეუერთდებიან NATO-s.

“თუ შვედეთი და ფინეთი შეუერთდებიან ნატოს, ალიანსის სახმელეთო საზღვრის სიგრძე რუსეთთან გაორმაგდება. ბუნებრივია, საჭირო იქნება ამ საზღვრების გაძლიერება”, – განაცხადა მან.

მედვედევმა განმარტა, რომ საჭირო იქნება სახმელეთო ჯარების და საჰაერო თავდაცვის სისტემის გაძლიერება და მნიშვნელოვანი საზღვაო ძალების განლაგება ფინეთის ყურეში.

“თუ ეს ასე იქნება, აღარ შეგვეძლება საუბარი ბალტიის არაბირთვულ სტატუსზე – ბალანსი უნდა აღდგეს“, – აღნიშნა რუსმა მაღალჩინოსანმა.

მისივე მტკიცებით, დღემდე რუსეთს არ მიუღია მსგავსი ზომები და არც აპირებდა ამის გაკეთებას, მაგრამ ახლა იძულებული ხდება.

მედვედევი იმედოვნებს, რომ ამ ქვეყნებში “საღი აზრი გაიმარჯვებს”, რადგან “არავის სურს უფრო მაღალი ფასები და გადასახადები, საზღვრების გასწვრივ დაძაბულობის გაზრდა, ისკანდერები, ჰიპერბგერითი იარაღი ან გემები, რომლებსაც ატომური იარაღი აქვთ სახლთან ახლოს”.

ცნობისთვის, ფინეთის პრემიერ-მინისტრმა სანა მარინმა ოთხშაბათს განაცხადა, რომ ნატოში გაწევრიანების გადაწყვეტილებას უახლოეს რამდენიმე კვირაში მიიღებენ. არსებული ინფორმაციით, შვედეთი და ფინეთი ალიანსს შესაძლოა ამ ზაფხულს შეუერთდნენ. NATO მზად არის მათ მისაღებად.

კოლუმბიის ხელისუფლება პირობას დებს, რომ დაეხმარება დასავლეთის ქვეყნების ნაწილობრივ ან მთლიანად თქვან უარი რუსულ ენერგორესურსებზე და ის კოლუმბიურით ჩაანაცვლონ. ამისათვის ქვეყანა ნავთობის, ქვანახშირის და გაზის მოპოვებას გაზრდის. ამის შესახებ კოლუმბიის პერზიდენტმა, ივან დუკემ სიენენთან საუბარში განაცხადა. მან რუსეთის უკრაინაში შეჭრას გენოციდი უწოდა.

“ჩვენ გვაქვს უზარმაზარი რესურსები, რომლებსაც არ ვიყენებთ. შეიძლება ითქვას, ყველაზე დიდი ქვანახშირის რესურსები გვაქვს, შეგვიძლია უფრო მეტი ნავთობი და გაზი მოვიპოვოთ. კოლუმბიას დღესვე შეუძლია გაზარდოს ქვანახშირის მოპოვება.

რუსეთის ქმედება უკრაინაში არის გენოციდი. ჩვენ ეს უნდა შევაჩროთ. ეს სიგიჟეა“–თქვა კოლუმბიის პრეზიდენტმა.

კოლუმბიის პრეზიდენტი სამდღიანი ვიზიტით ნიუ იორკში იმყოფება.

უკრაინის დაზვერვის ცნობით, რუს სამხედროებს, ვინც ავსებს უკრაინის წინააღმდეგ ომში ყველაზე მეტად დაზარალებულ დანაყოფებს, აძლევენ გამოუსადეგარ და ჩამოწერილ ჯავშანჟილეტებს.

“12 მარტს რუსეთის რკინიგზამ ახალწვეულებს გადასცა 5006 ტყვიაგაუმტარი ჟილეტისგან შემდგარი ტვირთი. ჩამოსვლისთანავე აღმოაჩინეს, რომ ჯავშნის ქსოვილი თითქმის მთლიანად დამპალი იყო, ლითონის ჯავშანი კი დაჟანგებული”,- აცხადებს სადაზვერვო სამსახური.

მათივე ინფორმაციით, ტყვიაგაუმტარი ჟილეტები ჩამოიტანეს “გრძელვადიანად შესანახი საცავიდან“, სადაც ის წლების განმავლობაში იყო მოთავსებული მაღალი ტენიანობის პირობებში.

“ამჟამად ჯავშანჟილეტებს ფიზიკურად არ შეუძლია ვინმეს რეალურად დაცვა”,- იუწყება დაზვერვა.

პენტაგონის პრესმდივანმა, ჯონ კირბიმ განაცხადა, რომ რუსულ კრეისერ “მოსკვაზე” “აფეთქება მოხდა”, მაგრამ აშშ ამ ეტაპზე ვერ ადგენს, რამ გამოიწვია ეს.

”ჩვენ არ ვართ ზუსტად დარწმუნებული, რა მოხდა იქ. ჩვენ ვაფასებთ, რომ მოხდა აფეთქება – სულ მცირე ერთი სერიოზული აფეთქება ამ კრეისერზე, რამაც გემს დიდი ზიანი მიაყენა“, – თქვა კირბიმ CNN-თან საუბრისას.

მისივე ცნობით, გემს შეუძლია საკუთარი გზის გავლა და ის ამას აკეთებს.

“ვფიქრობთ, ის ახლა უფრო აღმოსავლეთით მიდის. ჩვენ ვფიქრობთ, რომ ის სავარაუდოდ განთავსდება სევასტოპოლში სარემონტოდ, მაგრამ არ ვიცით, კონკრეტულად რამ გამოიწვია ეს [ აფეთქება]“, – აღნიშნა პენტაგონის წარმომადგენელმა.

ცნობისთვის, უკრაინული მხარე აცხადებს, რომ შავი ზღვის ფლაგმან კრეისერს ხომალდსაწინააღმდეგო 2 რაკეტა “ნეპტუნი” ესროლეს და გემი ჩაიძირა. რუსეთი ირწმუნება, რომ  გემზე საბრძოლო მასალა აფეთქდა, თუმცა ხანძრის ლოკალიზება მოხერხდა და ამჟამად მიმდინარეობს მუშაობა მის შესაკეთებლად.

საფრანგეთის პრეზიდენტი ემანუელ მაკრონი კვლავ ირწმუნება, რომ უკრაინაში რუსეთის ქმედებების გენოციდად შეფასება, მისი აზრით, “სიტყვიერი ესკალაციაა” და “არ დაეხმარება უკრაინას”.

მაკრონის თქმით, დღეს დილით ესაუბრა მაკრონს, რომელმაც ძალიან საწყენად მიიჩნია მისი უარი სიტყვა “გენოციდის” გამოყენებაზე.

“სიტყვას გენოციდს აქვს მნიშვნელობა უნდა იყოს კვალიფიცირებული იურისტების და არა პოლიტიკოსების მიერ. ის სახელმწიფოები, რომლებიც ამას გენოციდად თვლიან, უნდა ჩაერიონ საერთაშორისო კონვენციის მიხედვით. ეს არის, რაც ხალხს სურს?

ყველამ უნდა იცოდეს, როგორ შეინარჩუნოს გონიერება, ეს არ ეხმარება უკრაინას, შევიდეს სიტყვიერ ესკალაციაში ყოველგვარი შედეგის გარეშე“, – აღნიშნა მაკრონმა France Blue-თან ინტერვიუში.

ცნობისთვის, მას შემდეგ, რაც ჯო ბაიდენმა რუსეთის ქმედებებს გენოციდი უწოდა, ემანუელ მაკრონმა განაცხადა, რომ სიფრთხილით ეკიდება გენოციდის მსგავსი სიტყვების გამოყენებას უკრაინასთან მიმართებით, რადგან რუსები და უკრაინელები ძმები არიან. მისი განმარტებით, სურს ომის შეჩერება, ამიტომ არ არის დარწმუნებული, რომ “რიტორიკის ესკალაცია ამ მიზანს ემსახურება”.

უკრაინის საგარეო საქმეთა სამინისტრო მაკრონს უპასუხა, რომ უკრაინელ და რუს ხალხს შორის “ძმობის” მითი 24 თებერვლის შემდეგ დაიმსხვრა.