Category: მსოფლიო

აშშ-ს სახელმწიფო მდივანმა ენტონი ბლინკენმა განაცხადა, რომ ვაშინგტონის აზრით ომი უკრაინაში შეიძლება 2022 წლის ბოლომდე გაგრძელდეს. ამის შესახებ ინფორმაციას CNN-ი  ორ ევროპელ წყაროზე დაყრდნობით ავრცელებს.

“CNN-თან საუბრისას ბევრმა ოფიციალურმა პირმა აღნიშნა, რომ რთულია ზუსტად ივარაუდო თუ რამდენ ხანს გაგრძელდება ომი. მაგრამ ზოგიერთი ოფიციალური პირის თქმით, არ არის არანაირი ნიშანი იმისა, რომ რუსეთის პრეზიდენტის, ვლადიმერ პუტინის საბოლოო მიზნები შეიცვალა, და ნაკლებ სავარაუდოა რომ ის დიპლომატიური მოლაპარაკების გზებს მიყვება, თუ სამხედრო მარცხს არ განიცდის” – წერს CNN-ი

კიევის ოლქში ჯამში 900 მშვიდობიანი მოქალაქის ცხედარი იპოვეს. ინფორმაციას ამის შესახებ,  ოლქის პოლიციის უფროსი, ანდრეი ნებიტოვი ავრცელებს. როგორც ნებიტოვი აცხადებს, ყველაზე მეტი ცხედარი ქალაქ ბუჩაში იპოვეს.

გაწმენდითი სამუშაოები ამ დრომდე მიმდინარეობს, ბოროდიანკასა და მაკაროვში და ვარაუდობენ, რომ ნანგრევებში  ცხედრებს კიდევ იპოვნიან.

საუბარია კიევის ოლქის იმ დასახლებულ პუნქტებზე, სადაც თებერვალ-მარტის განმავლობაში რუსი ოკუპანტები იმყოფებოდნენ.

რუსეთის უკრაინაში შეჭრიდან 50–ე დღეს რუსეთის უსაფრთხოების ფედერალურმა სამსახურმა მთავრობას თხოვნით მიმართა სამხედროების დაკრძალვისა და საფლავების მოწყობისთვის ასიგნებები 17%–ით გაზარდოს. რა უჯდებათ საბოლოო ჯამში რუს გადასახადის გადამხდელებს საკუთარი სამხედროების დაკრძალვა უცნობია: რუსული არმია დანაკარგების შესახებ ინფორმაციას იშვიათად ავრცელებს და უკრაინაში მოკლული ჯარისკაცების ცხედრებიც შერჩევითად გადააქვთ სამშობლოში.

ФСБ–ს მიერ წარდგენილი მთავრობის გადაწყვეტილების პროექტის მიხედვით, ერთი დაღუპული სამხედროს დაკრძალვის ხარჯები 7800–11000 რუბლიდან 56 400-74200 რუბლამდე იზრდება მისი სტატუსის და დაკრძალვის ადგილის მიხედვით.

ФСБ დამატებითი საბიუჯეტო თანხების გამოყოფის თხოვნას იმით ხსნის, რომ ეს ხარჯები ვერ მოხვდა ყოველწლიურად ინდექსირებად სოციალურ განაცემთა ჩამონათვალში.

ომის დაწყების შემდეგ რუსეთში ფასების ზრდა მკვეთრად დაჩქარდა დასავლეთის სანქციების, ბიზნესის გაქცევის, სამომხმარებლო პანიკის და მიწოდების შეფერხების გამო. წლიური გამოხატულებით მარტში ინფლაციამ თითქმის 17%–ს მიაღწია. სწორედ ამდენით ითხოვს ФСБ ასიგნების გაზრდას.

განსხვავება დანაკარგის შესახებ ციფრებში.

რუსეთის ხელისუფლებამ ომის დაწყებიდან სულ ორჯერ დაასახელა დაღუპული რუსი სამხედროების რაოდენობა. 2 მარტს თავდაცვის სამინისტრომ თქვა, რომ გარდაიცვალა 498 სამხედრო. 25 მარტს ახალი რაოდენობა – 1351 სამხედრო დაასახელა. 7 აპრილს პუტინის პრესმდივანმა, პესკოვმა სქაი ნიუსისთვის მიცემულ ინტერვიუში თქვა, რომ რუსულმა არმიამ უკრაინაში “მნიშვნელოვანი დანაკარგები“ განიცადა.

უკრაინის შეიარაღებული ძალები ბევრად უფრო დიდ ციფრს ასახელებს – 19 000–ზე მეტს.

რამდენი დაკრძალვის ანაზღაურება მოუწევს რუსეთის ბიუჯეტს ინედქსაციის შემდეგ, ჯერჯერობით უცნობია.

რუსული კანონებით სამხედრო სამსახურისას გარდაცვლილებს იმ ფედერალური ორგანოს ხარჯებით კრძალავენ, სადაც ის იმ მომენტში მსახურობდა.

სახელმწიფო ასეთ შემთხვევებში ყველა სარიტუალო მომსახურებას ანაზღაურებს – დოკუმენტების  გაფორმებით და მორგის ხარჯებით დაწყებული, თავად საფლავის და საფლავის ქვის ჩათვლით.

ФСБ–ს მიერ წარდგენილი პროექტი 20 აპრილს ანტიკორუფციულ ექსპერტიზას გაივლის, რის შემდეგაც დასამტკიცებლად მთავრობას გადაეცემა.

რაზე მეტყველებს რუსული ჯარის დანაკარგები

რუსეთში ყოველდღიურად მარხავენ უკრაინაში დაღუპულებს. დასავლური მედიის გათვლებით, დაღუპულთა 20%, რომელთა შესახებ რეგიონები იუწყებიან ოფიცრები არიან.

საჯაროდ ცნობილი შემთხვევების უმრავლესობაში სამხედროები სახლში გარდაცვალებიდან დაახლოებით 2–3 კვირის შემდეგ მიჰყავთ. მათი დამარხვა ხშირად ერთ თვეზე ადრე ვერ ხერხდება.

უკრაინის ოფიციალური პირები და თვითმხილველები ამტკიცებენ, რომ უკან დახევისას რუსული არმია მოკლული სამხედროების ცხედრებს ადგილზე ტოვებს.

უკრაინის პრეზიდენტი ამბობდა, რომ კიევს უნდა დაღუპული რუსი სამხედროების ცხედრები რუსეთს გადასცეს, თუმცა რუსეთმა თავიდან უარი თქვა, შემდეგ კი “რაღაც ტომრები გაგზავნა.“

მარტის მეორე ნახევარში ნიკოლაევსკის ოლქის ადმინისტრაციის ხელმძღვანელმა, ვიტალი კიმმა მოუწოდა ადგილობრივ მოსახლეობას, ხელისუფლებას შეატყობინონ რუსი სამხედროების ცხედრების შესახებ უკრაინის გათავისუფლებულ ტერიტორიებზე.

“ისინი ხშირად თან არ მიჰყვათ, და გაზაფხულ–ზაფხულში ეს ჩვენი პრობლემა გახდება. გთხოვთ შეგვატყობინოთ, სად არიან ცხედრები, შეძლებისდაგვარად მოაგროვოთ ტომრები. უნდა მოვაგროვოთ და მაცივრებში გადავიტანოთ, შემდეგ უკან გავგზავნოთ, რომ იდენტიფიცირება მოხდეს. ამ სამხედროებსაც ხომ ჰყავთ დედები“– თქვა მან.

შეერთებული შტატების ცენტრალური სადაზვერვო სამსახურის დირექტორი, ბილ ბერნსი აცხადებს, რომ რუსეთისგან ბირთვულ საფრთხეს სერიოზულად უნდა მოვეკიდოთ. ამის შესახებ, CIA-ის დირექტორმა, ჯორჯიის უნივერსიტეტში საჯარო გამოსვლისას განაცხადა. 

“მათი სამხედრო წარუმატებლობის ფონზე, ასევე  პუტინისა და რუსეთის ხელმძღვანელობის სასოწარკვეთის გათვალისწინებით, ვერც ერთი ჩვენგანი მსუბუქად ვერ მიიღებს რუსეთისგან მომდინარე საფრთხეს ტაქტიკურ ან დაბალი ეფექტურობის ბირთვულ იარაღზე”. – აღნიშნა ბერნსმა ჯორჯიის უნივერსიტეტში საჯარო გამოსვლისას.

ბილ ბერნსი ასევე აღნიშნავს, რომ მიუხედავად კრემლის რიტორიკისა ბირთვული განგაშის მაღალ დონეზე გადასვლის შესახებ, CIA-ის ჯერჯერობით არ უნახავს პრაქტიკული მტკიცებულება, ამ ტიპის სამხედრო განლაგების შესახებ, რომლებიც ამ შეშფოთებას გააძლიერებს.

“მოსახლეობამ გადაწყვეტილება მიიღო, დიდი ალბათობით ფინეთი  ნატოს შეუერთდება “- ამის შესახებ, ფინეთის მინისტრი ევროპულ საქმეთა საკითხებში ტიტი ტუპურაინენი აცხადებს. 

“როგორც ჩანს ფინეთის მოსახლეობამ გადაწყვეტილება უკვე მიიღო და უმრავლესობა ფინეთის ნატოში გაწევრიანების მომხრეა. რა თქმა უნდა ეს ყველაფერი არ არის. ჩვენ ვართ საპარლამენტო დემოკრატია, ამიტომ ეს საკითხი ჩვენს პარლამენტში უნდა განვიხილოთ. ამ ეტაპზე ვიტყოდი, რომ ამის დიდი ალბათობაა, მაგრამ გადაწყვეტილება ჯერ არ არის მიღებული,” – განაცხადა ტუპურაინენმა.

“ესენი ჩვენები არიან..” – რუსი ოკუპანტი მეუღლესთან, სატელეფონო საუბარში აღიარებს, რომ რუსები საკუთარ ქალაქებსა და ჯარებს თავად  ბომბავენ. ამის შესახებ ინფორმაციას, Focus-ი უკრაინის უსაფრთხოების სამსახურზე დაყრდნობით ავრცელებს. რუსი სამხედრო სატელეფონო საუბარში ასევე აღნიშნავს, რომ ამას რუსეთი უკრაინის დისკრედიტაციის მიზნით აკეთებს.

უწყება აცხადებს, რომ ოკუპანტების ბოლო დროინდელი საუბრები ადასტურებს, რუსეთის მიერ მოწყობილ პროვოკაციებს ბრაიანსკის ოლქის სოფელ კლიმოვოს დაბომბვით, რათა შემდეგ  უკრაინა დაადანაშაულოს.

„იგივე სისულელე მოხდა ჩეჩნეთის ომში. მოსკოვში ბინები ააფეთქეს, თითქოს ტერორისტები იყვნენ. სინამდვილეში, ეს  FSB ოფიცრებმა ჩაიდინეს. უბრალოდ, ახლა მათ კლიმოვომდე ასეთი მანძილიდან სროლა არ შეეძლოთ“, – ამბობს რუსი სამხედრო სატელეფონო საუბარში.

რუსი სამხედრო ცოლს ასევე ეუბნება, რომ მომხდარის შემდეგ აღარ სურს ომში უკრაინელების წინააღმდეგ ბრძოლა.

Focus- ი წერს, რომ, 14 აპრილს ბრაიანსკის ოლქის კლიმოვსკის რაიონის ერთიან სამორიგეო სადისპეტჩერო სამსახურმა განაცხადა, რომ მათ ტერიტორიაზე 2 ჭურვი ჩამოვარდა. რუსული მედია აცხადებს, რომ  დაბომბვის შედეგად, შვიდი ადამიანი დაშავდა, მათ შორის ორსული და ერთი ბავშვი. ბრაიანსკის ოლქის გუბერნატორი ალექსანდრე ბოგომაზი ამტკიცებს, რომ უკრაინის შეიარაღებულმა ძალებმა რეგიონში საცხოვრებელ შენობებს ცეცხლი გაუხსნეს. ასევე, 13 აპრილს რუსეთმა უკრაინა კურსკის რეგიონში სასაზღვრო გამშვები პუნქტის დაბომბვაში დაადანაშაულა.

დასავლელი ლიდერები კვლავ ფრთხილად ეკიდებიან უკრაინისთვის ზოგიერთი მძიმე შეიარაღების მიწოდებას  რუსეთის მხრიდან კონფლიქტის ესკალაციის საფრთხის გამო. თუმცა, მათ ამის არ უნდა ეშინოდეთ, იმიტომ რომ ვლადიმერ პუტინის მუქარები მხოლოდ ცარიელი სიტყვებია, ის ბლეფს მიმართავს და განზრახ აძლევს ამერიკელ მზვერავებს ასეთი მონაცემების “აღმოჩენის“ შესაძლებლობას. ამასოაბში კიევს მათი დახმარება ჭირდება, კოლექტიურმა დასავლეთმა რუსეთის მუქარების გამო უკან არ უნდა დაიხიოს – წერს ამერიკელი დიპლომატი, რუსეთში აშშ–ს ყოფილი ელჩი, მაიკლ მაკფოლი გამოცემა “The Washington Post”.–ის სვეტში.

რა ჭირდება უკრაინას ომში გამარჯვებისთვის

მაკფოლი თვლის, რომ ომის შემდგომი ფაზა – დონბასისთვის ბრძოლა მკვეთრად განსხვავებული იქნება წინა ფაზისგან. გაშლილი და ცარიელი სტეპები უკრაინის აღმოსავლეთით უკრაინელ მებრძოლებს ხელს უშლის გამოიყენონ ტაქტიკა “დაარტყი–გაიქეცი“, რომელიც მათ ასე კარგად გამოიყენეს აქამდე. ახლა უკრაინის შეიარაღებულლ ძალებს ტანკები და სხვა ჯავშანტექნიკა ჭირდებათ. უკრაინის არმიას განსაკუთრებით ესაჭიროება საბჭოთა T-72  ტანკები, რომელთა მიწოდება ვაშრავის ხელშეკრულების წევრ ყოფილ საბჭოთა ქვეყნებს – პოლონეთს, ჩეხეთს, სლოვაკიას, რუმინეთს და სხვებს შეუძლიათ.

უკრაინის შეიარაღებულ ძალებს ასევე ესაჭიროებათ შორსმსროლელი არტილერია 152 და 155 მილიმეტრიანი ჭურვებით, ზალპური ცეცხლის რეაქტიული სისტემები, ჰაერსაწინააღმდეგო თავდაცვის სისტემები C-300, ტანკსაწინააღმდეგო რაკეტები სანაპირო ქალაქების დასაცავად და გამანადგურებლები  МиГ-29. უკრაინა ინტენსიური ბრძოლების 50–ე დღეს ასევე საჭიროებს სხვადასხვა ეკიპირების შევსებას, ჩაფხუტების და პატრონების ჩათვლით.

ბირთვული შეტევის საფრთხე

მაიკლ მაკფოლი თვლის, რომ არსებოს რუსეთის მიერ ტაქტიკური ბირთვული იარაღის გამოყენების საფრთხე უკრაინის ტერიტორიაზე, თუ რუსეთი დონბასისთვის საკვანძო ბრძოლას წააგებს. ამგვარად, პუტინს უნდა ზელენსკი აიძულოს კაპიტულაცია გამოაცხადოს. თუმცა, დიპლომატი ასეთ სცენარს ნაკლებ სავარაუდოდ თვლის, რადგან ბირთვული დარტყმა უკრაინაზე რუსეთს შემორჩენილ მოკავშირეებსაც დააკარგვინებს, ჩინეთის ჩათვლით. გარდა ამისა, ბირთვული იარაღის გამოყენება საფრთხეს შეუქმნის თავად ქვეშყნის შიგნით ,რუსების მხრიდან ომის მხარდაჭერას.

“ანალიტიკოსების უმრავლესობა ვარაუდობს, რომ მსოფლიო ისტორიაში ბირთვული იარაღის მეორედ გამოყენება კიევს დანებებას აიძულებს. მე არ ვარ დარწმუნებული… ბირთვული შეტევის შემდეგ უკრაინელები სავარაუდოდ ფსონებს უფრო გააორმაგებენ, ვიდრე კაპიტულაციას გამოაცხადებენ, და შეიძლება ომის რუსეთის ტერიტორიაზე გადატანაც სცადონ“– თვლის მაკფოლი.

შეგახსენებთ, 14 აპრლილს დიმიტრი მედვედევი დაიმუქრა, რომ რუსეთი კალინინგრადის ოლქში ბირთვულ იარაღს განათავსებს, თუ შვედეთი და ფინეთი ნატოში შევლენ. ლიტვის თავდაცვის მინისტრმა, არვიდას ანუსაუსკასმა განაცხადა, რომ რუსეთმა კალინინგრადში ბირთვული იარაღი ჯერ კიდევ უკრაინასთან სრულმაშტაბიანი ომის დაწყებამდე განათავსა.

ამერიკის შეერთებული შტატების ინფორმაციით, რუსული სარაკეტო კრეისერი “მოსკვა” კვლავ იწვის. ამის შესახებ აშშ-ის თავდაცვის მაღალჩინოსანმა განაცხადა.

”ჩვენი შეფასებით, ხომალდის ბორტზე კვლავ ებრძვიან ხანძარს. მაგრამ ჩვენ არ ვიცით ზარალის ოდენობა, არ ვიცით მისი ეკიპაჟის მსხვერპლის შესახებ და ამ ეტაპზე ვერ ვიტყვით კონკრეტულად, რამ გამოიწვია ეს ზიანი“,– თქვა ოფიციალურმა წარმომადგენელმა.

მისივე ცნობით, ხომალდი ჯერ კიდევ ცურავს, აშშ კი ვარაუდობს, რომ ის მიემართება სევასტოპოლში გასარემონტებლად.

რუსული მხარე ამტკიცებს, რომ მოახერხეს ხომალდზე ხანძრის ლოკალიზება.

პენტაგონის ცნობით, რუსულ კრეისერ “მოსკვაზე” “აფეთქება მოხდა”, მაგრამ აშშ ამ ეტაპზე ვერ ადგენს, რამ გამოიწვია ეს. მათივე განმარტებით, აფეთქებამ გემს დიდი ზიანი მიაყენა.

გუშინ უკრაინელმა ოფიციალურმა პირებმა განაცხადეს, რომ რუსეთის კრეისერს ორი რაკეტა მოარტყეს.

“პირველ რიგში გეგმა იყო ჩვენი ქვეყნის პრეზიდენტის ლიკვიდაცია. ეს რუსებისთვის ნომერ პირველი საკითხი იყო, და ამ მიმართულებით იყო რამდენიმე მცდელობა. უფრო მეტიც, შემიძლია ვთქვა, რომ 22 თებერვალს, დაახლოებით 19:20 საათზე ჩვენ მივიღეთ ინფორმაცია, რომ უახლოეს მომავალში ეს შესაძლოა მოხდეს. შემდეგ იყო კიდევ 4 მცდელობა. ბოლო იყო 7 მარტს. მივიღეთ ინფორმაცია ჩვენი პარტნიორების დაზვერვისგან, რომ მსგავსი ოპერაცია იგეგმებოდა.

არ გეგონოთ, რომ მოუმზადებლები იყვნენ, იყო ქსელი, ბევრი მომენტი დამუშავდა, მაგრამ მინდა მადლობა გადავუხადო პრეზიდენტის დაცვას და სახელმწიფო უსაფრთხოების დაცვას, ყველა სამხედროს, რომელიც იცავს სამთავრობო კვარტალს”

თქვა უკრაინის ეროვნული უსაფრთხოებისა და თავდაცვის საბჭოს თავმჯდომარემ, ალექსეი დანილოვმა BBC-თან ინტერვიუში.