Category: მსოფლიო

დონეცკის ე.წ. სახალხო რესპუბლიკის რექტიული საარტილერიო დივიზიის მეთური ქალი, ოლგა კაჩურა, მეტსახელად კორსა გორლოვკის მერის, ივან პრიხოდკოს ინფორმაციით ტრაგიკულად დაიღუპა. დეტალები უცნობია, თუმცა პრიხოდკოს ინფორმაციით ის სამსახურებრივი მოვალეობების შესრულებისას დაიღუპა.

ინფორმაციას კორსას სიკვდილის შესახებ რუსული მედია ავრცელებს.

ქალი  გვარდიის პოლკოვნიკი და გორლოვკის საპატიო მოქალაქე იყო.

მას ლეგენდარლ მეთაურს უწოდებდნენ და რუსული პროპაგანდისტული მედია უკრაინის წინააღმდეგ რუსეთის ომში მის დამსახურებებს ვრცელ სიუჟეტებს უძღვნიდა.

კორსა რუსულ მედიაში გასული სიუჟეტების მიხედვით არტილერისტებს წვრთნიდა და უკრაინის აღმოსავლეთის ფრონტზე  საარტილერიო ბრძოლის ერთ–ერთი ხელმძღვანელი იყო.

რუსულ სოციალურ ქსელებში მის სიკვდილს უდიდეს დანაკარგს უწოდებენ და წერენ, რომ ის უკრაინელებმა საგანგებოდ მოკლეს.

კორსა 2012 წლამდე უკრაინის არმიაში მსახურობდა, 2014 წლიდან კი უკრაინის აღმოსავლეთის ოკუპაციის შემდეგ დონეცკის ე.წ. სახალხო რესპუბლიკის მხარეს გაადვიდა და ბოლო 8 წელი რესპუბლიკის შეიარაღებული ძალების რეაქტიული არტილერიის ქვედანაყოფს ხელმძღვანელობდა.

რუსეთის თავდაცვის სამინისტრო როგორც ჩანს,  ცდილობს გააქარწყლოს შიში, რომელსაც უკრაინული მხარის მიერ ამერიკული ზალპური ცეცხლის რეაქტიული სისტემების HIMARS–ების ეფექტური გამოყენება იწვევს რუს სამხედროებში. სამინისტრო ავრცელებს განცხადებას ამ სისტემების განადგურების შესახებ, რაც სიმართლეს არ შეესაბამება.

ამის შესახებ საკუთარ ანგარიშში ამერიკის ომის შესწავლის ინსტიტუტი  (ISW) წერს.

რუსეთის თავდაცვის მინისტრმა, სერგეი შოიგუმ რუსეთის შეიარღებული ძალების ხელმძღვანელობასთან გამართული თათბირისას სამშაბათს განაცხადა, რომ რუსულმა ძალებმა 6 HIMARS გაანადგურეს, ასევე სხვა ტექნიკა, რომელიც უკრაინას დასავლეთმა მიაწოდა.

რუსეთის თავდაცვის უწყებამ ასევე გამოაქვეყნა ვიდეო, რომლითაც ამტკიცებს, რომ 1 აგვისტოს ხარკოვის ოლქში განადგურდა შენობა, სადაც HIMARS–ის 2 სისტემა ინახებოდა.

უკრაინის შეიარაღებული ძალების ოპერატიული მეთაურობა “სამხრეთის“ ხელმძღვანელმა, ანდრეი კოვალჩუკმა განაცხადა, რომ რუსებს არანაირი HIMARS–ები არ გაუნადგურებიათ. ანონიმმა ფინელმა ჩინოვნიკმა კი მედიასთან საუბრისას რუსეთის განცხადებებს სასურველის რეალობად გასაღება უწოდა.

უკრაინის დაზვერვის მთავარი სამმართველო აცხადებს, რომ რუსეთის თავდაცვის სამინისტრო რუსი ჯარისკაცების მსხვერპლს მალავს და დაჭრილი რუსი სამხედროები სამოქალაქო ავტომობილებით გადაჰყავს. ის მედიას უმალავს, რამდენი რუსი სამხედრო განადგურდა HIMARS–ების გამოყენების შედეგად.

რუსეთს უნდა უკრაინაში ომის დიპლომატიური გზით გადაწყვეტა მოძებნოს. სტამბულში მიღწეული შეთანხმება ხორბლის მიწოდების შესახებ კი შეიძლება გაგრძელდეს – განაცხადა გერმანიის ყოფილმა კანცლერმა, გერჰარდ შროდერმა, რომელიც რუსეთის პრეზიდენტთან, ვლადიმერ პუტინთან მეგობრობს.

“კარგი ამბავი ის არის, რომ კრემლს უნდა გადაწყვეტა მოძებნოს მოლაპარაკებების გზით“–თქვა შროდერმა გერმანული ტელეკომპანიებისთვის მიცემულ ინტერვიუში.

მან თქვა, რომ გასულ კვირას მოსკოვში პუტინს შეხვდა.

“პირველი წარმატება– ეს არის შეთანხმება ხორბალთან დაკავშირებით, შესაძლოა ის თანდათანობით კიდევ უფრო გაფართოვდეს ცეცხლის შეწყვეტის საკითხამდე“– დასძინა მან.

შროდერი, რომელიც გერმანიის კანცლერის პოსტს 1998–2005 წლებში იკავებდა, უკრაინაში ომს აკრიტიკებდა, თუმცა უარი თქვა პუტინის დაგმობაზე, რომელსაც კვლავ თავის მეგობარს უწოდებს, რის გამოც თავის ქვეყანაში კრიტიკის ქარცეცხლში აღმოჩნდა.

ინტერვიუში მან თქვა, რომ ახლა პუტინისგან დისტანცირება სიტუაციას ვერ დაეხმარება.

მაისში მისი მისამართით მწვავე კრიტიკის შემდეგ შროდერი “როსნეფტის“ დირექტორთა საბჭოს შემადგენლობიდან გამოვიდა და უარი თქვა “გაზპრომის“ დირექტორთა საბჭოში თანამდებობის დაკავებაზე.

უკრაინის შეიარაღებული ძალების გენერალური შტაბი რუსი ოკუპანტების სამხედრო დანაკარგის შესახებ განახლებულ ინფორმაციას ავრცელებს.

გენშტაბის ცნობით, ოკუპანტების სამხედრო დანაკარგი ასეთია:

• ჯარისკაცი – დაახლოებით 41 350;
• ტანკი – 1 774;
• ჯავშანტექნიკა – 4 022;
• საარტილერიო სისტემა – 939;
• სარაკეტო სისტემა – 259;
• საზენიტო საბრძოლო სისტემა – 118;
• თვითმფრინავები – 223;
• ვერტმფრენი – 191;
• ოპერატიულ-ტაქტიკური უპილოტო საფრენი აპარატი – 740;
• საკრუიზო რაკეტები – 180;
• საავტომობილო ტექნიკა და საწვავის ავზები – 2 922;
• გემი/ნავი/კატარღა – 15;
• სპეციალური აღჭურვილობა – 83.

უკრაინის პრეზიდენტი, ვოლოდიმირ ზელენსკი  ელექტრონულ პეტიციას, სახელად ”ერთნაირსქესიანთა ქორწინების ლეგალიზაციას” გამოეხმაურა.  ზელენსკიმ პრემიერმინისტრს მიმართა, რათა ერთნაირსქესიანთა ქორწინებაზე პეტიცია განიხილოს.

პეტიციას, რომელიც 2022 წლის 6 ივნისს წარადგინეს, 25 000-ზე მეტი ხელმომწერი ჰყავს.

“მადლობა ყველას, ვინც პეტიციას შეუერთდა, სამოქალაქო აქტიურობისთვის”, – აღნიშნულია უკრაინის პრეზიდენტის განცხადებაში.

ზელენსკი აღნიშნავს, რომ თანამედროვე სამყაროში დემოკრატიული საზოგადოების დონე მოქალაქეებისთვის თანაბარი უფლებების უზრუნველყოფით ისაზღვრება.

“უკრაინის ოჯახის კოდექსით განსაზღვრულია, რომ ოჯახი საზოგადოების პირველი და ძირითადი ერთეულია. ოჯახი შედგება ინდივიდებისგან, რომლებიც ერთად თანაცხოვრობენ, დაკავშირებულნი არიან საერთო ცხოვრებით, აქვთ საერთო ვალდებულებები და უფლებები. უკრაინის კონსტიტუციის თანახმად, ქორწინება ქალისა და კაცის თავისუფალ თანხმობას ეფუძნება. საომარი ან საგანგებო მდგომარეობის პირობებში უკრაინის კონსტიტუცია ვერ შეიცვლება”, – ამბობს უკრაინის პრეზიდენტი

ამერიკის წარმომადგენელთა პალატის სპიკერი ნენსი პელოსი ტაივანში ვიზიტის საპასუხოდ, პეკინმა მიიღო გადაწყვეტილება შეიარაღებული ძალები მზადყოფნაში მოიყვანოს.

ჩინეთის თავდაცვის სამინისტროს მიერ გავრცელებული ცნობით, ჩინეთი გეგმავს „მიზანმიმართული სამხედრო ოპერაციების“ დაწყებას. თუმცა უწყება არ განმარტავს რას მოიცავს ეს ოპერაციები. პეკინი ასევე აცხადებს, რომ ჩაატარებს აღმოსავლეთ სარდლობის საგანგებო წვრთნებს, თუმცა არ საუბრობს იმაზე, არის თუ არა “სამხედრო ოპერაციები” ამ წვრთნების ნაწილი.

სამშაბათ საღამოდან, წვრთნები, რომელიც საჰაერო და საზღვაო მანევრებს მოიცავს, ტაივანის ჩრდილოეთით, სამხრეთ-დასავლეთით და სამხრეთ-აღმოსავლეთით გაიმართება. აქამდე, სახელმწიფო ახალი ამბების სააგენტოს თქმით, მანეევრები ტაივანი გარშემო 4-დან 7 აგვისტომდე უნდა გამართულიყო.

ოფიციალური განცხადებით ტაივანის სრუტედან გრძელი რადიუსის რაკეტების საცდელი გაშვებაც მოხდება. მანამდე პეკინმა, სანამ სპიკერის თვითმფრინავი ტაიპეიში დაეშვებოდა, ჩინეთ-ტაივანის სტრუტის თავზე ავიამოიერიშეები გაგზავნა, რომლებმაც მანევრები შეასრულეს.

წარმომადგენელთა პალატის სპიკერის ვიზიტი პარალელურად, რეგიონში 4 ამერიკული სამხედრო გემია განთავსებული. მათ შორის ავიამზიდი USS Ronald Reagan და ამფიბიური თავდასხმის გემი, USS Tripoli.

„მიუხედავად იმისა, რომ მათ შეუძლიათ რეაგირება მოახდინონ ნებისმიერ შემთხვევაში, ეს რუტინული განლაგებაა,“- ამბობს ამერიკის საზღვაო ძალების წარმომადგენელი, რომელმაც სააგენტო „როიტერს“ ინფორმაცია ანონიმურობის დაცვით მიაწოდა.

ჩინეთი ტაივანს, რომელიც თვითმმართველი დემოკრატიაა, საკუთარ ტერიტორიად მიიჩნევს. პეკინის გაფრთხილებასთან დაკავშირებით, ვაშინგტონი აცხადებს, რომ არ დაუშვებს ჩინეთის მხრიდან ამერიკის დაშინებას.

წყარო: ამერიკის ხმა

უკრაინულმა არტილერიამ რუსების საცეცხლე პოტენციალი შეამცირა –  ამის შესახებ უკრაინის პრეზიდენტმა ვოლოდიმირ ზელენსკიმ 1 აგვისტოს შედეგების შემაჯამებელ ვიდეომიმართვაში განაცხადა.

“ბოლო დღის განმავლობაში ბრძოლის ველზე ვითარება მნიშვნელოვნად არ შეცვლილა. სასტიკი ბრძოლები გრძელდება დონბასში, ხარკოვის რეგიონში, გრძელდება ბრძოლა ჩვენი სახელმწიფოს სამხრეთისთვის. [..] უკრაინულმა არტილერიამ და დაზვერვამ უკვე ბევრი გააკეთეს ოკუპანტების საცეცხლე პოტენციალის შესამცირებლად და ეს იგრძნობა. დღეს მინდა მადლობა გადავუხადო ყველა ჩვენს ჯარისკაცს, რომლებიც ანადგურებენ რუსულ ლოგისტიკას, ანადგურებენ ოკუპანტების საბრძოლო მასალას და არ ტოვებენ ოკუპანტებისთვის არც ერთ უსაფრთხო ადგილს ჩვენს მიწაზე”, – აღნიშნა ზელენსკიმ.

ამერიკის შეერთებული შტატების სახელმწიფო მდივნის ენტონი ბლინკენის განცხადებით,აშშ განიხილავდა ბირთვული იარაღის გამოყენების შესაძლებლობას, მხოლოდ საგანგებო ვითარებაში.

„ამერიკის შეერთებული შტატები განიხილავდა ბირთვული იარაღის გამოყენების შესაძლებლობას, მხოლოდ განსაკუთრებულ ვითარებაში, აშშ-ის სასიცოცხლო ინტერესების, მოკავშირეებისა და პარტნიორების დასაცავად“,- განაცხადა ბლინკენმა.

ბლინკენი აცხადებს, რომ  აშშ სტრატეგიული ბირთვული ძალების ძირითადი ამოცანაა ბირთვული თავდასხმაზე უარი ათქმევინოს და ამ მხრივ შეაკავოს სხვა სახელმწიფოები, ვისაც მსგავსი იარაღი აქვს.

აშშ–მ ალ ქაიდას 71  წლის ლიდერი, აიმან ალ–ზავაჰირი მოკლა. საქმეში ჩახედული წყაროების ცნობით ის ავღანეთში, დრონის თავდასხმის შედეგად გაანადგურეს.

ამერიკის მთავრობა ჯერჯერობით ამ ფაქტს არ ადასტურებს. პრეზიდენტი ბაიდენი ამ თემაზე ადგილობრივი დროით საღამოს 7:30 ზე ისაუბრებს.

ორშაბათს თეთრმა სახლმა განაცხადა წარმატებული კონტრტერორისტული ოპერაციის შესახებ ავღანეთში.

“შაბათ–კვირას აშშ–მ ჩაატარა მნიშვნელოვანი ანტიტერორისტული ოპერაცია ავღანეთში, რომლის სამიზნე ალ ქაიდა იყო. ოპერაცია წარმატებული აღმოჩნდა და მას სამოქალაქო პირების მსხვერპლი არ მოჰყოლია“– განაცხადა თეთრი სახლის ადმინისტრაციის წარმომადგენელმა.

ნიუ იორკის შტატის გუბერნატორმა ქეთი ჰოქულმა ნიუ-იორკის შტატის ჯანდაცვაში საგანგებო ვითარება გამოაცხადა, რაც მაიმუნის ყვავილის გავრცელებით შექმნილ სიტუაციას უკავშირდება. ჰოქულმა აღნიშნული ნაბიჯი „მაიმუნის ყვავილის აფეთქების წინააღმდეგ მიღებული ზომების გაძლიერების“ აუცილებლობით ახსნა.

„აღმასრულებელი განკარგულება გაცილებით სწრაფი რეაგირების საშუალებას მოგვცემს, ჯანდაცვის სპეციალისტებს კი საშუალება მიეცემათ დამატებითი ზომები მიიღონ მეტი ნიუ-იორკელის ასაცრელად“ ნათქვამია პარასკევს, გვიან ღამით სოციალურ ქსელ „ტვიტერზე“ გავრცელებულ განცხადებაში.

შტატის გუბერნატორის თქმით, ადგილობრივი ჯანდაცვა 24-საათიან რეჟმში მუშაობს, რათა მოხდეს ტესტირების და ვაქცინაციის გაფართოება, ასევე ნიუ-იორკელთა ინფორმირება არსებული რისკების თაობაზე. გუბერნატორ ჰოქულის განმარტებით, ნიუ-იორკის შტატზე ამერიკაში მაიმუნის ყვავილით ინფიცირებულთა მეოთხედზე მეტი მოდის.

განცხადების გაკეთების მომენტში, ნიუ-იორკის შტატში ინფიცირების 1 383 შემთხვევა აღირიცხა. ამ ეტაპზე პანიკის საფუძველი არ არსებობს, ამბობს შტატის ჯანდაცვის ოფიციალური ვებგვერდი. თუმცა, „აუცილებელია, რომ ყველა იყოს ინფორმირებული მაიმუნის ყვავილის თაობაზე. ეს ნიშნავს სიმპტომების ცოდნას, ინფორმაციის გაცნობას მისი გავრცელების გზებზე და იმაზე, თუ რა უნდა ვიღონოთ, თუკი ინფიცირებულთან კონტაქტი გვქონდა“.

I am declaring a State Disaster Emergency to strengthen our ongoing efforts to confront the monkeypox outbreak.

This Executive Order enables us to respond more swiftly, and allows health care professionals to take additional steps that will help get more New Yorkers vaccinated.

— Governor Kathy Hochul (@GovKathyHochul) July 30, 2022

ინფიცირების მასშტაბი ამერიკაში

კვირას, აშშ-ის დაავადებათა კონტროლის და პრევენციის ცენტრის (CDC) მონაცემებით, ქვეყანაში მაიმუნის ყვავილით ინფიცირების 5 189 შემთხვევა აღირიცხა. ყველაზე მეტი, 1 345 ინფიცირებული ნიუ-იორკშია. შემდეგ მოდის კალიფორნიის შტატი – 799 შემთხვევით და მესამე ადგილზეა ილინოისი – 419 ინფიცირებულით.

მაიმუნის ყვავილის პირველი შემთხვევა ამერიკაში 17 მაისს აღირიცხა. დღეისთვის დაავადება მონტანის, ვერმონტის და ვაიომინგის გარდა, ყველა შტატში ფიქსირდება. მზარდი ინფიცირების გამო, საგანგებო ვითარება სან-ფრანცისკოს ჯანდაცვამაც გამოაცხადა.

რა უნდა ვიცოდეთ მაიმუნის ყვავილზე

მაიმუნის ყვავილი ვირუსული ინფექციით გამოწვეული დაავადებაა. ეს საკმაოდ იშვიათი ინფექციაა, რომელიც ჩვეულებრივ სერიოზულ გართულებებს არ იწვევს, თუმცა მას ჰოსპიტალიზაცია და სიკვდილობაც ახასიათებს.

დაავადება ადამიანებში ძირითადად ახლო, ფიზიკური კონტაქტით ვრცელდება. მაიმუნის ყვავილის ბოლო აფეთქებით თუ ვიმსჯელებთ, ის მოსახლეობის ზოგ ჯგუფს გაცილებით მეტ რისკს უქმნის, განსაკუთრებით ჰომოსექსუალ კაცებს. ინფექციის წინა აფეთქებების მიხედვით, რისკის ჯგუფებში იყვნენ სუსტი იმუნიტეტის მქონე ადამიანები, ორსული ქალები, მოხუცები და 8 წლამდე ბავშვები.

კოვიდ-19-ისგან მაიმუნის ყვავილს განასხვავებს ის, რომ ინფექცია კორონავირუსთან შედარებით ნაკლები გავრცელებით გამოირჩევა. ის ძირითადად უშუალო კონტაქტით და შეხებით გადადის. ამას გარდა, უკვე არსებობს მაიმუნის ყვავილის გამომწვევი ვირუსის წინააღმდეგ მოქმედი, ადრე დამტკიცებული უსაფრთხო ვაქცინები და ეფექტიანი სამკურნალო საშუალებები.

მაიმუნის ყვავილს ახასიათებს ცხელება, თავისტკივილი და შეშუპება, ასევე შესაძლოა ტკივილი ზურგის და კუნთების არეში. ტემპერატურის მატების შემდეგ, ინფიცირებულს ეწყება ბუშტუკოვანი გამონაყარი სახეზე, ტანზე და კიდურებზე. გამონაყარი ხშირად მტკივნეული და ქავილის გამომწვევია. დაავადება საშუალოდ 12-დან 21 დღემდე გრძელდება.

გლობალურ საფრთხედ გამოცხადება

მაიმუნის ყვავილი უმეტესად აფრიკული ქვეყნებისთვის დამახასიათებელი ინფექციაა. თუმცა, გაზაფხულზე მისმა არაენდემურ ქვეყნებში, ევროპის, ამერიკის, თუ ავსტრალიის კონტინენტებზე ცირკულირებამ, სპეციალისტების განსაკუთრებული ყურადღება მიიპყრო. 27 მაისისთვის დადასტურებულად ინფიცირებულთა რიცხვმა 200-ს გადააჭარბა.

ინფიცირების ზრდის გამო, გასულ კვირას, 23 ივლისს, ჯანდაცვის მსოფლიო ორგანიზაციამ მაიმუნის ყვავილი გლობალურ საფრთხედ გამოაცხადა. ამ მომენტში მთელ მსოფლიოში ინფიცირების 16 000-ზე მეტი შემთხვევა აღირიცხა. ვირუსი 75 ქვეყანაში გავრცელდა და აფრიკის კონტინენტზე სიკვდილობის 5 შემთხვევა დაფიქსირდა.

გლობალურ საფრთხედ გამოცხადება მსოფლიოს ჯანდაცვას ინფექციასთან ბრძოლაში კოორდინირებული საერთაშორისო რეაგირების და დამატებითი სახსრების მობილიზებაში ეხმარება. ამას გარდა, ეს ბიძგს აძლევს ქვეყნებს შორის სამკურნალო საშუალებების და ვაქცინების მეტ გაზიარებას.

წყარო: ამერიკის ხმა