უეფას ყოფილი პრეზიდენტი მიშელ პლატინი დააკავეს.
უეფას ყოფილ პრეზიდენტს ბრალი კორუფციაში მონაწილეობისთვის ედება. საქმე ეხება 2022 წელს ყატარში ჩასატარებელ მსოფლიოს საფეხბურთო ჩემპიონატს.
პროკურატურამ ამ საქმის გამოძიება 2016 წელს დაიწყო.პლატინიმ აღიარა რომ 2010 წლის 2 დეკემბერს, ხმა ყატარს მისცა. პროკურატურის მტკიცებით, პლატინიმ ამ ხმის სანაცვლოდ დიდი ოდენობით თანხა მიიღო.
მიშელ პლატინი უეფას პრეზიდენტი 2007-2015 წლებში იყო.
დავით სერგეენკო ჯანდაცვის მინისტრის პოსტს ტოვებს. ამის შესახებ ინფორმაცია ჟურნალისტებს თავად სერგეენკომ დაუდასტურა. თანამდებობის დატოვებასთან დაკავშირებით და მისი შემცვლელის დანიშვნაზე მთავრობის ადმინისტრაციაში განცხადება სავარაუდოდ, 2 საათზე გაკეთდება.
სერგეენკომ ჟურნალისტებს განუცხადა, რომ ის გუნდში რჩება.
დავით სერგეენკომ ჯანდაცვის მინისტრი პოსტი ქართული ოცნების ხელისუფლებაში მოსვლის შემდეგ, 2012 წლის 25 ოქტომბერს ჩაიბარა.
უკანონო ფორმირებების შექმნასთან დაკავშირებით ლევან ვასაძის თანამოაზრეების გამოკითხვა თბილისის პოლიციის მთავარ სამმართველოში გვიანობამდე მიმდინარეობდა.
ვასაძის მხარდამჭერები ამბობენ, რომ ისინი “თბილისი პრაიდის” ჩატარებას არ დაუშვებენ.
„შეკითხვები ეხებოდა თითქოს აქ ვიღაც უკანონო შეიარაღებული ბანდფორმირებების ჩამოყალიბებას აპირებს. ხელისუფლებას თუ იმდენად უგუნური გადაწყვეტილება აქვს მიღებული, რომ ლევან ვასაძე ასეთი უგუნური ბრალდებით დააკავოს, პირდაპირ მინდა ვუთხრა, რომ ეს კაცი არ შეუშინდება არც ციხეს, არც სხვა დევნას. ამ ქვეყანაში გეი-პრაიდებს ჩვენ არ ჩავატარებინებთ, გინდა დაგვიჭირონ, გინდა დაგვხვრიტონ,“-აცხადებს საზოგადოებრივ-პოლიტიკური მოძრაობა ”ქართული იდეის” დამფუძნებელი ლევან ჩაჩუა.
დაკითხვები დღესაც გაგრძელდება, საგამოძიებო უწყებაში 30-მდე პირია დაბარებული.
ჩინეთის სამხრეთში მდებარე სიჩუანის პროვინციაში 5,8 ბალიანი მიწისძვრა მოხდა. შედეგად 12 ადამიანი დაიღუპა და 134 დაშავდა.
ადგილობრივი მედიის ცნობით, მიწისძვრის შედეგად დაინგრა ერთ-ერთი სასტუმრო, ასევე დაზიანდა გზები და საცხოვრებელი სახლები.
ხელისუფლებამ მიწისძვრით დაზარალებულ ზონებში 5 ათასი კარავი, 10 ათასი გასაშლელი საწოლი და 20 ათასი პლედი გაგზავნა.
ერთ-ერთი ყველაზე ძლიერი მიწისძვრა სიჩუანის პროვინციაში 2008 წელს მოხდა. მას 87 ათასი ადამიანის სიცოცხლე ემსხვერპლა.
ქუთაისში აფეთქება მოხდა, რის შედეგადაც დაშავებულია 7 ადამიანი. შემთხვევა გამთენიისას ავტომშენებლის ქუჩაზე მოხდა.
აფეთქებას წინ უძღოდა საცხოვრებელი კორპუსის მეორე სართულზე მდებარე ბინაში ხანძრის გაჩენა.
თვითმხილველების თქმით, ცეცხლის გაჩენამდე სახლიდან ხმაური გამოდიოდა, მოგვიანებით კი აფეთქების ხმა გაისმა. წინასწარი ინფორმაციით, მიზეზი სახლში არსებული საწვავი იყო.
ადგილზე მობილიზებული იყო სახანძრო-სამაშველო სამსახურის 10 ჯგუფი.
სტამბოლში სისხლიანი შეტაკება მოხდა საქართველოსა და რუსეთის მოქალაქეებს შორის. შედედად, გარდაცვლილია ერთი ქართველი, რუსეთის ერთი მოქალაქე კი ცეცხლსასროლი იარაღით მიყენებული ჭრილობით საავადმყოფოში გადაიყვანეს.
თურქული მედიის ცნობით, კონფლიქტი მხარეებს შორის გადამზიდავი კომპანიის ოფისში, შელაპარაკების ნიადაგზე მოხდა. დაპირისპირებულმა მხარეებმა ერთმანეთის წინააღმდეგ ცივი და ცეცხლსასროლი იარაღები გამოიყენეს. კონფლიქტში მაყუჩიანი იარაღიც ფიგურირებს. ადგილობრივი მედიის ინფორმაციით, გარდაცვლილი 56 წლის თენგიზ ფხაკაძეა.
“როდესაც ქუჩაში გამოვედი, დავინახე რომ მაყუჩიანი პისტოლეტით შეიარაღებული მამაკაცი ვიღაცას მისდევდა. მან მეორე მამაკაცს თავში ესროლა. ეს დევნა აქ ქუჩის გასწვრივ მიმდინარეობდა. როგორც მე დავინახე, მიმალვას 2 მამაკაცი ცდილობდა, ერთ-ერთს ტყვია მოხვდა და ქუჩაშივე დაეცა. მეორე კი გაიქცა,”-აცხადებს ერთ-ერთი თვითმხილველი.
თურქი სამართალდამცველები საქართველოს 2 მოქალაქეს ეძებენ. ინციდენტში მონაწილე სხვა პირები პოლიციამ უკვე დააკავა.