Tag: დონალდტრამპი

აშშ–ს განზრახული აქვს უახლოეს მომავალში არა მხოლოდ მთლიანად დაფაროს საკუთარი ქვეყნის შიგნით არსებული მოთხოვნა ფილტვების სავენტილაციო სასუნთქ აპარატებზე, არამედ ეს აპარატები  სხვა ქვეყნებსაც მიაწოდოს. ამის შესახებ აშშ–ს პრეზიდენტმა განაცხადა.

“არ ვიცი, გაიგეთ თუ არა ეს ამბავი, მაგრამ Ford-მა ცოტა ხნის წინ განაცხადა, რომ General Electric–ის ქვეგანყოფილებასთან ერთად 50 000 სასუნთქი აპარატის გამოშვებას აპირებს სამ თვეზე ნაკლებ დროში. რომ აღარაფერი ვთქვათ სხვა მწარმოებლებზე, რომლებსაც განზრახული აქვთ საკუთარი საწარმოო სიმძლავრეები აამოქმედონ. ასეთი კომპანია ათზე მეტია. ეს საკმარისზე მეტია ჩვენი საკუთარი საჭიროებების დასაკმაყოფილებლად. ასე რომ, აპარატებს იტალიაში, საფრანგეთში და ესპანეთში გავგზავნით, სადაც ამ მომენტში ასეთი აღჭურვილობის კოლოსალური პრობლემაა. სხვა ქვეყნებსაც დავეხმარებით.“–განაცხადა ტრამპმა.

ამდროისთვის ამერიკაში კორონავირუსით 164,359 ადამიანია დაინფიცირებული. დაავადების ყველაზე მეტი შემთხვევები ნიუ იორკშია დარეგისტრირებული, სადაც საქალაქო პოლიციის 900–ზე მეტი თანამშრომელიც დაინფიცირდა. აშშ–ში გარდაცვლილია 3,173 ადამიანი. დაახლოებით ამდენივე რეანიმაციაში იმყოფება. ქვეყნის მთელ ტერიტორიაზე საკარანტინო ზომები 30 აპრილამდე იმოქმედებს.

პრეზიდენტი ტრამპი ამბობს, რომ აშშ არ აპირებს დააფინანსოს პრინცი ჰარის და მეგან მარკლის უსაფრთხოების დაცვის ფული. ეს განცხადება მან მას შემდეგ გააკეთა, რაც ცნობილი გახდა, რომ წყვილი კანადიდან აშშ–ში გადავიდა.

ტრამპმა ტვიტერზე დაწერა, რომ ის დიდი ბრიტანეთის დედოფლის დიდი მეგობარი და თაყვანისმცემელია, თუმცა დასძინა “მათ უნდა გადაიხადონ!“

წყვილი ამბობს, რომ არ აპირებს აშშ–ს სახელმწიფოს მოთხოვოს თანხები საკუთარი უსაფრთხოების დასაფინანსებლად.

გავრცელებული ინფორმაციით ჰარი და მეგანი კორონავირუსის ეპიდემიის გაძლიერების ფონზე კანადიდან მეგანის მშობლიურ შტატში, კალიფორნიაში გადავიდნენ საცხოვრებლად.

ამერიკული მედიის ინფორმაციით წყვილი გასულ კვირას ლოს–ანჯელესის ერთ–ერთ რაიონში გადავიდა საცხოვრებლად, სადაც მეგანი გაიზარდა, ახლა კი მისი დედა, დორია რაგლანდი ცხოვრობს.

წყვილი სამეფო ოჯახის უფროსი წევრების სტატუსიდან ოფიციალურად 31 მარტს გავა და უკვე აღარ შეასრულებს არანაირ მოვალეობას დედოფლის სახელით.

წყვილის  მიერ წარმომადგენლის საშუალებით გავრცელებულ განცხადებაში ნათქვამია:

“ჰერცოგი და მისი მეუღლე არ აპირებენ აშშ–ს მთავრობას თხოვონ უსაფრთხოების რესურსები. მიღებულია უსაფრთხოების ზომები, რომლებიც კერძო წყაროებიდან ფინანსდება.“

წყვილმა შვილთან, არჩისთან ერთად წლევანდელი წლის უდიდესი ნაწილი კანადის დასავლეთ სანაპიროზე გაატარა, ექვსკვირიანი საშობაო არდადეგები კი ვანკუვერის კუნძულზე.

თებერვალში კანადის მთავრობამ განაცხადა, რომ ის შეწყვეტს ოჯახის უსაფრთხოების უზრუნველყოფაში დახმარებას, “მათი სტატუსის ცვლილების შესაბამისად“.  ტრამპმაც როგორც ჩანს კანადელ კოლეგას მიბაძა.

წყვილის მიერ ბრიტანეთის სამეფო ოჯახის წევრის სტატუსზე უარის თქმისა და კანადაში გადასვლის შემდეგ კანადელები უკმაყოფილებას გამოთქვამდნენ იმის გამო, რომ მათ უსაფრთხოებაში კანადელი გადასახადის გადამხდელების ფული იხარჯებოდა.

აშშ კორონავირუსით დაინფიცირებულთა რაოდენობით მსოფლიოში მესამე ადგილზეა, ჯანდაცვის ექსპერტები გვაფრთხილებენ, რომ აშშ შეიძლება პანდემიის ეპიცენტრად იქცეს.

თუმცა აშშ–ს პრეზიდენტს კორონავირუსის გამო ამერიკის კერძო სექტორის მუშაობისთვის შემოღებული შეზღუდვების გაუქმება უნდა 12 აპრილისთვის.

ტრამპმა განაცხადა:

“აუცილებელია ქვეყანამ მუშაობა დაიწყოს. დიახ, გრიპის გამო კვდებიან ადამიანები, მაგრამ თუ ეკონომიკა მაშტაბურ რეცესიაში და დეპრესიაში შევა, უფრო მეტ ადამიანს დავკარგავთ“.

ტრამპის ეკონომიკურმა მრჩეველმა, ლარი კუდლოუმ განაცხადა, რომ პრეზიდენტს განზრახული აქვს უკვე უახლოეს ორ კვირაში გადადგას ნაბიჯები შეზღუდვების გასაუქმებლად.

“საზოგადოებრივი ჯანმრთელობის შესანარჩუნებლად ჯანმრთელი ეკონომიკაა საჭირო. ორივე სფეროს თავისი პრიორიტეტები აქვს და ეს კარგად მესმის, თუმცა ერთი მეორეს არ გამორიცხავს, ისინი ურთიერთკავშირშია“– ამბობს ის.

ნიუ იორკში ვირუსი უფრო სწრაფად ვრცელდება, ვიდრე ქვეყნის დანარჩენ ნაწილებში. აქ ჩატარებული ტესტების 28% დადებით შედეგს იძლევა.
ნიუ იორკის შტატის გუბერნატორი, ენდრიუ კუომო ქვეყნის სხვა რეგიონებს აფრთხილებს:

„შემოგვხედეთ დღეს ჩვენ და დაინახავთ, რა მდგომარეობაში აღმოჩნდებით თქვენც სამი, ოთხი, ხუთი, ექვსი კვირის შემდეგ. ჩვენ თქვენი მომავალი ვართ.“

კუომო ამბობს, რომ შტატის რეანიმაციულ განყოფილებებში ორ კვირაში შეიძლება 40 000 პაციენტი აღმოჩნდეს. სამედიცინო ცენტრებს სასწრაფოდ ესაჭიროებათ დამატებით 30 ათასი ფილტვების ხელოვნური ვენტილაციის აპარატი.