Blog

{{ARTICLEIMAGE}}
“ევროპული საქართველოს” წევრმა ზურაბ ჭიაბერაშვილმა ეკონომიკის მინისტრს გიორგი ქობულიას მიმართა და შეახსენა, რომ მან მოსახლეობისთვის ძალიან მარტივ შეკითხვას უნდა გასცეს პასუხი.

“ყველაზე დიდი პროტესტი გამიჩნდა მაშინ, როდესაც თქვით, რომ 2014, 2017 და 2018 წლებში ჩვენ გვაქვს მაღალი ეკონომიკური ზრდა. “ქართული ოცნების” პირობებში არის საშუალოდ 4%-იანი ეკონომიკური ზრდა. თქვენ პასუხი უნდა გასცეთ მოსახლეობას ძალიან მარტივ კითხვაზე:ევროკავშირის ყველაზე ღარიბ ქვეყანას როდის დავეწევით? ამ საშუალო ეკონომიკური 4%-იანი ზრდით ათწლეულები ვერ დავეწევით ევროკავშირის ყველაზე ღარიბ ქვეყანას. ამ ეკონომიკური ზრდით არ გვყოფნის სახსრები ყველაზე აუცილებელი საკითხების გადასაჭრელად. გვერდი აუარეთ და არ ახსენეთ, რომ რაც კი ამ წლების განმავლობაში დაფინანსდა, სამთავრობო ვალი გაიზარდა. მპს-თან მიმართებაში სამთავრობო ვალი 34%-დან ავიდა 43-44%-ზე. ეს არც კი გიხსენებიათ”, განაცხადა ჭიაბერაშვილმა.

{{ARTICLEIMAGE}}
ეკონომიკის მინისტრის გიორგი ქობულიას შეფასებით, საქართველოში ლარი სტაბილურია და არ არსებობს კურსის ვარდნის რეალისტური საფუძველი. გიორგი ქობულიამ დარგობრივი ეკონომიკისა და ეკონომიკური პოლიტიკის საპარლამენტო კომიტეტის სხდომაზე განაცხადა, რომ “ლარის კურსი, როგორც მინიმუმ, იქნება სტაბილური” და “ეს არის მათემატიკაზე დამყარებული დასკვნები”.

გიორგი ქობულია თვლის, რომ ლარის კურსს შიში და პანიკა აზარალებს.

“ლარის კურსი რომ დაეცეს, დოლარი უნდა იყოს ნაკლები ეკონომიკაში – ანუ დოლარი უნდა გავიდეს სადღაც – ან იმპორტში უნდა გავიდეს. მოგიყვანეთ დაანგარიშება 2017 და 2018 წლებს შორის. ნაკლები კი არა, 65 მილიონი დოლარით მეტი დოლარი იყო ეკონომიკაში. რისგან უნდა გაიაფდეს ლარი? ლარი შეიძლება გაიაფდეს მხოლოდ იმისგან ამ სიტუაციაში, თუ იქნება დიდი ფსიქოლოგიური ზეწოლა და პანიკური ხასიათის მოვლენები, თორემ ფუნდამენტალურად მეტია დოლარი და როგორ შეიძლება ლარი დავარდეს?! ამას ფიზიკის კანონები ეწინააღმდეგება და ეკონომიკის”, განაცხადა გიორგი ქობულიამ.

{{ARTICLEIMAGE}}
გრიპის ვირუსით დღეს გარდაცვლილი ქალი 38 კვირის ორსული იყო. დღეს მას საკეისრო კვეთა ჩაუტარდა, თუმცა ქალის გადარჩენა ვერ მოხერხდა.

“შემოსვლისთანავე აღენიშნებოდა რთული მდგომარეობა, სუნთქვის უკმარისობა. პაციენტი იყო 38 კვირის ორსული. ის მოთავსებული იყო რეანიმაციულ განყოფილებაში. დაეწყო სათანადო მკურნალობა. ეჭვი გვქონდა გრიპზე, რის საფუძველსაც იძლეოდა მისი ანამნეზური მონაცემები. ოჯახის წევრების თქმით, იყო 2-3 დღის შემთხვევა. 24 საათის განმავლობაში განხორციელდა საკეისრო კვეთა. მდგომარეობა მკურნალობის განმავლობაში რჩებოდა უაღრესად მძიმე”, განაცხადა ექიმმა. მისივე ინფორმაციით, ბავშვი თავს კარგად გრძნობს. 

საქართველოში გრიპის ვირუსით გარდაცვალების უკვე ორი შემთხვევაა დაფიქსირებული.

{{ARTICLEIMAGE}}
ხორავას ქუჩაზე მომხდარი მკვლელობის საქმის ერთ-ერთი მთავარი ფიგურანტი მიხეილ კალანდია სასამართლოში დაიკითხა. მისი დაკითხვა რამდენიმე წუთს გაგრძელდა და პროცესიდან გამოსულმა ადვოკატმა მხოლოდ ის თქვა, რომ კალანდია მოწმის სტატუსით დაკითხეს, შინაარსზე მას არ უსაუბრია. 

აღსანიშნავია, რომ გუშინ მიხეილ კალანდია საგამოძიებო უწყებაში იყო დაბარებული. პროკურატურაში ის ადვოკატთან ერთად მივიდა.

ადვოკატ ანა კოტეტიშვილის თქმით, მიხეილ კალანდია პროკურატურაში სწორედ მის მომდევნო სასამართლო პროცესზე დაკითხვასთან დაკავშირებით გამოცხადდა.

“ერთ-ერთ გამოყოფილ სისხლის სამართლის საქმესთან დაკავშირებით მოხდა დღეს ჩვენი დაბარება. სასამართლოში მისი სამომავლო დაკითხვის წესებისა და პროცედურების გავლასთან დაკავშირებით. თუმცა კონკრეტულად რომელი, ვერ დავაკონკრეტებ გაუთქმელობის ხელწერილის ვალდებულებიდან გამომდინარე. მხოლოდ დაკითხვის პროცედურებზე იყო საუბარი”, განაცხადა ადვოკატმა.

როგორც ცნობილია, მიხეილ კალანდია პროკურატურის ყოფილი მაღალჩინოსნის, პატიმრობაში მყოფი მირზა სუბელიანის ნათესავია. სწორედ მის დასჯას მოითხოვს ხორავას ქუჩაზე მოკლული არასრულწლოვნის მამა ზაზა სარალიძე.

“მოვითხოვ არამხოლოდ კალანდიას დაჭერას, არამედ ყველა გამყალბებელი პროკურორების და გამომძიებლების პასუხისგებაში მიცემას, თქვა სარალიძემ ჟურნალისტებთან რამდენიმე დღის წინ.

ხომ არ იგეგმება ხორავას ქუჩაზე მოზარდების მკვლელობის საქმეში ერთ-ერთი ფიგურანტი პირის, მიხეილ კალანდიას დაკავება, ჟურნალისტების ამ კითხვას, შინაგან საქმეთა მინისტრის მოადგილემ ნათია მეზვრიშვილმა უპასუხა, რომ ამ საქმის ფარგლებში გამორიცხული არაფერია.

“წინასწარ საქმესთან დაკავშირებით ვერაფერს გეტყვით. ზაზა სარალიძემ, როგორც დაზარალებულმა მხარემ მიიღო ის ინფორმაცია, რაც კანონმდებლობით შეგვეძლო, რომ მიგვეწოდებინა. სამინისტრო როგორც კი კონკრეტულ ნაბიჯებს გადადგამს, ამაზე საზოგადოება გაიგებს. ამ საქმის ფარგლებში გამორიცხული არაფერია”, განაცხადა ნათია მეზვრიშვილმა.

მიხეილ კალანდიამ სასამართლოში პირველი დაკითხვისას პოლიციის მხრიდან ზეწოლაზე ისაუბრა და განცხადა, რომ მისი დაკითხვის მსვლელობისას მამამისს ფიზიკურადაც გაუსწორდნენ. ამის შემდეგ მიხეილ კალანდიამ ეს ინფორმაცია კვლავ სასამართლოზე დაკითხვისას უარყო და აღნიშნა, რომ მეგობრების გადარჩენის მიზნით სასამართლოს ცრუ ინფორმაცია მიაწოდა. ერთმანეთისგან განსხვავებული ინფორმაციების გაჟღერების შემდეგ პროკურატურამ მოწმეზე სავარაუდო ზემოქმედების ფაქტზე გამოძიება დაიწყო. ხორავას ქუჩაზე მოზარდების მკვლელობის საქმეზე დანაშაულის შეუტყობინებლობისთვის მიხეილ კალანდიაც არის პასუხისგებაში მიცემული.

ხორავას ქუჩაზე მომხდარი მკვლელობიდან ერთი წელი გავიდა.

{{ARTICLEIMAGE}}
ეკონომიკის მინისტრი მის მიერ რამდენიმე დღის წინ გაკეთებულ განცხადებას განმარტავს. მინისტრი ამბობს, რომ მოსახლეობას ძალიან უჭირს და ქვეყანაში ყოველი მეხუთე ადამიანი ღარიბია. გიორგი ქობულიას განცხადებით, მან რამდენიმე დღის წინათაც თქვა, რომ ხალხი ძალიან გაჭირვებულია.

“კონკრეტულად მე ვთქვი, რომ ხალხს უჭირს, ძალიან უჭირს და თუ გადაახვევთ ჩემს ჩანაწერს, ძალიან კარგად წაიკითხავთ და კარგად მოისმენთ, რომ ასეთი რამ არ მითქვია. მე ვთქვი, რომ ხალხს ძალიან, ძალიან უჭირს. საქმე იმაშია, რომ ხალხს იმდენად უჭირს დღესდღეობით, იმიტომ, რომ ყოველი მე-5 ღარიბია, როგორ შეიძლება, ჩვენ ვთქვათ, რომ ხალხს არ უჭირს. ეს ხომ აბსოლუტურად არ არის მართალი და ეს ხომ ტყუილია. მე ვთქვი, რომ ეს გასაჭირი ისეთი მძიმეა, რომ მიუხედავად იმისა, რომ შეიძლება ის არ უარესდება, ეს გასაჭირი მაინც იმდენად მძიმეა, რომ ჩვენი პირველი პრიორიტეტია. შეიძლება იმას ისევე უჭირს, როგორც გუშინ უჭირდა, მაგრამ საქმე იმაშია, რომ მაინც ეს გასაჭირი ძალიან მძიმეა,”- განაცხადა გიორგი ქობულიამ, რომლის კომენტარს “რუსთავი 2” ავრცელებს. 

ეკონომიკის მინისტრი დღეს პარლამენტში კომიტეტის სხდომაზე წლიურ ანგარიშს წარადგენს. მინისტრმა რამდენიმე დღის წინ “ტვპირველის” ეთერში თქვა, რომ შეიძლება ხალხს აქვს განცდა, რომ უჭირთ, მაგრამ ეს ასე არ არის.

{{ARTICLEIMAGE}}
ქუთაისის მერის გადაწყვეტილებით, აუტისტური სპექტრის მქონე ბავშვების ერთ-ერთ დღის ცენტრს, ბენეფიციართა თერაპიის სრული კურსი საახალწლო განათების ხარჯის დაზოგვის შედეგად დაუფინანსდება.

ამის შესახებ მერის “ფეისბუქგვერდზე” გამოქვეყნებულ ინფორმაციაში წერია. ამავე ინფორმაციის მიხედვით, “დაფინანსების საერთო ბიუჯეტი 30 000 ლარია. ქალაქის საახალწლო განათებისთვის 110 000 ლარი იყო გამოყოფილი, აქედან მერიამ ახალი განათებების შეძენაზე უარი თქვა, რამაც გააჩინა შესაძლებლობა, აღნიშნული 30 ათასი ლარი დაზოგილიყო”.

{{ARTICLEIMAGE}}
კიმ კარდაშიანს პუბლიკის ყურადღების დაპყრობა კარგად გამოსდის. ამჯერად სოციალურ ქსელებში აქტიურად განიხილავენ მის “შიშველ“ კაბას, რომელში გადაღებული ფოტო კარდაშიანმა ინსტაგრამზე გამოქვეყნა. კაბა იმდენად გამჭვირვალეა, რომ სხეულს პრაქტიკულად არ ფარავს. როგორც გაირკვა, ამ კაბის ავტორია ახალგაზრდა რუსი დიზაინერი YASYA MINOCHKINA. კაბის ფასი 5000 ევროა. ფოტომ მიკრობლოგში უკვე 4 მილიონ ლაიქზე მეტი დაიმსახურა.

როგორც ზოგადად ცხოვრებაში, ისე პროფესიონალურ ცხოვრებაში ორი ტიპის ადამინი არსებობს: ისინი, ვინც მიზნისკენ ჯიუტად მიდიან და ისინი, ვინც შანსებს ყოველთვის ხელიდან უშვებენ. ტაქტიკა შეიძლება შეიცვალოს, მაგრამ პრინციპები უცვლელი რჩება. იმისათვის, რომ წარმატებული კარიერა ააწყოთ, გახსოვდეთ, რომ წარმატების მთავარი გასაღები თქვენი დამოკიდებულებაა საკუთარი თავის, სხვა ადამიანების და ზოგადად სამყაროს მიმართ.

{{ARTICLEIMAGE}}

1. გჯეროდეთ საკუთარი თავის

გინდათ“შიგანაგი ხმა“ უწოდეთ, გნებავთ ინტუიცია ან მეექვსე გრძნობა, მაგრამ მნიშვნელოვანი გადაწყვეტილებების მიღებისას, რომლებმაც თქვენი ცხოვრება და კარიერა უნდა განსაზღვრონ, გახსოვდეთ, რომ ბედის ყველა ზიგზაგი ლოგიკას არ ექვემდებარება. როცა არგუმენტები არ გყოფნით, მხოლოდ ინსტინქტს შეგიძლიათ დაეყრდნოთ. ამისათვის კი საჭიროა საკუთარ თავს კარგად მოუსმინოთ და გაუგოთ.

2. იყავით გახსნილი სიახლეებისათვის

შესაძლებელი რომ იყოს, ყოველი ჩვენგანი საკუთარ კომფორტის ზონაში დარჩენას ამჯობინებდა. სასიამოვნო და მარტივია – ყოველთვის საკუთარ ჩვევებს მისდიო. თუმცა გლობალური და სწრაფი ცვლილებების ეპოქაში მნიშვნელოვანია ახალი იდეებისთვის და აზროვნების წესისთვის გახსნილი იყოთ. თქვენს წარმოდგენებს სხვებს ნუ მოახვევთ თავზე. მოისმინეთ გარშემომყოფთა აზრიც: შესაძლოა თქვენი მუშაობის მეთოდი სულაც არ არის საუკეთესო.

3. აუწყვე ფეხი ახალ ტექნოლოგიებს

ყოველთვის ეცადეთ ახალი ტექნოლოგების შესახებ მათი გამოჩენისთანავე ბევრი რამ შეიტყოთ. კარგი იქნება დროის მოთხოვნებს ფეხი დროულად აუწყოთ. ეს არ ნიშნავს, რომ ყოველ ახალ გაჯეტს გამოეკიდოთ, თუმცა მინიმალურ დონეზე მაინც იყავით ჩართული. არ არის გამორიცხული, სწორედ ახალი ტექნოლოგიების დახმარებით აღმოაჩინოთ სრულიად ახალი შესაძლებლობა და შანსი თქვენი კარიერისთვის.

4. მუდმივად ისწავლე

თუნდაც ჯიბეში ძალიან პრესტიჟული დიპლომი გედოთ, ცოდნის მიღება განაგრძეთ. ეს წარმატებისკენ მიმავალი ყველაზე სწორი სტრატეგიაა. თქვენი ცოვრებისეული გამოცდილება თქვენთვის საუკეთესო ცოდნაა. კარიერის დასაწყისში მხოლოდ ზოგადი წარმოდგენა გაქვთ, რა მოგელით მომავალში. მაგრამ ვერაფერი შეედრება პრაქტიკულ გაკვეთილებს. მუდმივად იარეთ კურსებზე, ტრენინგებზე, სემინარებზე. გაიარეთ ონლაინ კურსები და მიღებული ცოდნა დაუყოვნებლივ გამოიყენეთ.

5. ითანამშრომლე და დაეხმარე სხვებს

კარიერაში წარმატებას ყოველთვის მოჰყვება დიდი პასუხისმგებლობა. ნუ მიუდგებით დიდ თუ მცირე მიღწევებს როგორც რაღაც თავისთავადს. გაიაზრეთ, რომ რაც უფრო მაღალ პოზციაზე ხართ, მით უფრო მეტად შეგიძლიათ ამ პოზიციის გამოყენება სხვების დასახმარებლად. იმას არ ვგულისხმობთ, რომ ყველაფერი სხვებს შესწიროთ. უბრალოდ ხელი გაუწოდეთ და შანსი მიეცით ადამიანებს, ვისთვისაც ეს ბევრს ნიშნავს.

6. ცხოვრება არანაკლებ მნიშვნელოვანია, ვიდრე სწიგნები

ნუ გაუკეთებთ იგნორირებას თუნდაც ყველაზე “არაპრესტიჟულ“ გამოცდილებას. “უნივერსიტეტის დასრულებისთანავე 60 000 დოლარიან სამსახურს ვერ იშოვნით და ვერც კომპანიის ვიცე პრეზიდენტი გახდებით სამსახურეობრივი მანქანით სადარბაზოსთან და სმარტფონის ბოლო მოდელით ხელში. ფასთფუდში შემწვარი კარტოფილის გაყიდვა სულაც არ არის სამარცხვინო. პირიქით. თქვენი მშობლების ეპოქაში ამას შანსს ეძახდნენ“ – ამბობს ბილ გეითსი.

7. იზრუნეთ საკუთარ თავზე

კარიერის აწყობა იგივეა, რაც მარათონულ დისტანციაზე სირბილი. თუ გინდათ წარმატებას მიაღწიოთ და არა პროფესიულ “გადაწვას“, ეცადეთ “სწორად ისუნთქოთ“ და ფიზიკური ფორმა შეინარჩუნოთ. სიგარეტი და ლიტრობით ყავა, ღამით, დასვენების და სადღესასწაულო დღეებში ზღვარგადასული მუშაობა – ეს ყველაფერი შეიძლება სამსახურში რაღაც ეტაპზე გამოგადგეთ, მაგრამ პერსპექტივაში მოგისპობთ შანსს გამარჯვებით სრულფასოვნად დატკბეთ. მაშინ რაღა აზრი აქვს ასეთ წარმატებას?

8. იყავით ზრდილობიანი დად პატივისცემით მოექეცით სხვებს

არავის უყვარს იმის შეგრძნება, რომ მას უბრალოდ იყენებენ. ამიტომაც მოექეცით კოლეგებს ისე, როგორც გინდათ რომ თქვენ მოგექცნენ. არ ეცადოთ ყველა ურთიერთობიდან სარგებლის ნახვას. ვერასოდეს გამოიცნობთ წინასწარ როგორ შემობრუნდება სიტუაცია მომავალში. კორექტულობა, პატიოსნება და პატივისცემა სხვების მიმართ – ეს საკმაოდ ფასეული კაპიტალია.

9. გააანალიზეთ შეცდომები

თვითანალიზი ჩვევად უნდა აქციოთ. ხშირად ვუშვებთ შეცდომებს და წინააღმდეგობებს ვაწყდებით, რომლებიც წინსვლაში ხელს გვიშლიან. თუ ამ ყველაფერს არ გავაანალიზებთ და დასკვნებს არ გამოიტანთ მუდმივად ერთ ადგილს დავტკეპნით. ნურც სხვების შეცდომების ანალიზს დაივიწყებთ. ეს ძალების დაზოგვაში ძალიან დაგეხმარებათ.

10. იპოვნეთ თქვენი სიბერე

თქვენი მიზანი დიდ დროსა და ენერგიას მოითხოვს. ამიტომაც სწორად შეარჩიეთ მიზანი, რომელშიც მზად ხართ ეს ორი მთავარი რესურსი ბოლომდე ჩადოთ. მხოლოდ სწორად შერჩეული მიზნისთვის დახარჯული დრო და ენერგია მოგიტანთ შთაგონებას და სიამოვნებას. თუ დროთა განმავლობაში მიხვდით, რომ ინტერესი დაკარგეთ, შესაძლოა დადგა დრო პრიორიტეტები შეცვალოთ. საკუთარი ოცნების განსაზღვრა ყოველთვის ადვილი არ არის. მაგრამ ვერაფერს მიაღწევთ, თუ აზრს და მიზანს ვერ ხედავთ იმაში, რასაც აკეთებთ. წარმოიდგინეთ როგორი გინდათ იყოს თქვენი ცხოვრება სიბერეში – ეს ძალიან დაგეხმარებათ მიზნის სწორად განსაზღვრასა და კარიერის აწყობაში.

(more…)