Blog

ოპოზიცია ერთიანდება და საარჩევნო სისტემის ცვლილების მოთხოვნით ხელმოწერების შეგროვებას იწყებს. 25 ოპოზიციური პარტია საქრთველოს კონსტიტუციაში ცვლილებას და 2020 წლისთვის არჩევნების სრულად პროპორციული სისტემით ჩატარებას ითხოვს. მათი თქმით, არსებული მაჟორიტარული სისტემა უსამართლოა და აუცილებელია, არჩევნები პროპორციული სისტემით უკვე 2020 წლიდან ჩატარდეს. ოპოზიცია ამ მოთხოვნით განცხადებას და კანონპროექტს პარლამენტში რამდენიმე დღეში შეიტანს, რის შემდეგაც ხელმოწერების შეგროვება დაიწყება. იმისთვის, რომ პარლამენტმა ოპოზიციის ინიციატივა განიხილოს, 200 000 ხელმოწერა უნდა მოგროვდეს, თუმცა ოპოზიციური პარტიები მილიონი ხელმოწერის შეგროვებას გეგმავენ. “25 პარტია შეიკრიბა ერთი იდეით, რომ ჩვენი საარჩევნო სისტემა გავხადოთ რაც შეიძლება უფრო დემოკრატიული, რის გარეშეც არც დემოკრატიის, არც ჩვენი სახელმწიფოებრიობის ბედი კარგს არაფერს გვიქადის. როდესაც საქართველოს მოქალაქეს ვესაუბრებით, მას პირდაპირ უნდა ვუმეოროთ ამ კამპანიის განმავლობაში, რომ მისი ჯანდაცვის, შვილების განათლების, სოციალური და ეკონომიკური მდგომარეობის საკითხები პირდაპირ არის დაკავშირებული იმასთან, რომ ჩვენი საარჩევნო გარემო გახდეს უფრო დემოკრატიული და გადავიდეთ 100%-იან პროპორციულ სისტემაზე. ჩვენ მას უნდა ვუთხრათ, რომ პროპორციული სისტემა დიდწილად გამორიცხავს საქართველოში ერთპარტიული ან ერთპიროვნული მმართველობის გამეორებას. ის იმის გარანტიას მოგვცემს, რომ ჩვენ საგარეო პოლიტიკურ მიზნებს უფრო დაჩქარებული ტემპებით მივაღწიოთ”,განაცხადა გრიგოლ ვაშაძემ.

სამოქალაქო მოძრაობის ლიდერი ყაზტრანსგაზის გენერალური დირექტორის თანამდებობიდან გადაყენებას მოითხოვს. ელისაშვილი ამბობს, რომ მამუკა კობახიძე, რომელიც პარალელურად თბილისის სატრანსპორტო კომპანიის გენერალური დირექტორის თანამდებობას იკავებდა, ამ თანამდებობიდან საიდუმლოდ მოხსნეს. მამუკა კობახიძის გათავისუფლება მერიის სატრანსპორტო კომპანიიდან მერიის და სატრანსპორტო კომპანიის ვებგვერდებზე არ დასტურდება, თუმცა მის ადგილზე უკვე დაინიშნა გიორგი შარკოვი.

სამოქალაქო მოძრაობამ გუშინ ყაზტრანსგაზის შენობასთან აქცია გამართა და კომპანიის გენერალური დირექტორის გადადგომა მოითხოვა, რომელიც ალეკო ელისაშვილის განცხადებით კალაძის კადრია. დიდ დიღომში მომხდარი აფეთქების შემდეგ ელისაშვილი პასუხისმგებლობას ყაზტრანსგაზს აკისრებდა და აცხადებდა, რომ ეს კომპანია კალაძის მიერ იმართება და ამას ადასტურებს ის, რომ ერთი და იგივე ადამიანი ყაზტრანსგაზის გენერალური დირექტორის თანამდებობას და თბილისის სატრანსპორტო კომპანიის დირექტორის თანამდებობას ერთდროულად იკავებს.

ახლა კი ირკვევა, რომ მამუკა კობახიძე თბილისის სატრანსპორტო კომპანიის ხელმძღვანელი აღარ არის.

„მერიაში მიიღეს გადაწყვეტილება, რომელსაც აგერ უკვე ორი დღეა ასაიდუმლოებენ. არც მერიის ოფიციალურ ვებგვერდზე, არც მერიის სატრანსპორტო კომპანიიაში ამ ამბავს ვერ ამოიკითხავთ. ვიცით, რომ მამუკა კობახიძე მოხსნეს მერიის სატრანსპორტო კომპანიის გენერალური დირექტორობის პოსტიდან და იქ დანიშნეს კახა კალაძის ერთგული კადრი, ვინმე გიორგი შარკოვი. როგორც ჩანს, კალაძე ხვდება, რომ ეს კაცი ჩამოსაცილებელი იყო ამ თანამდებობიდან.

მამუკა კობახიძე ყაზტრანსგაზ თბილისიდან იყო პირველ რიგში მოსახსნელი, ვინაიდან მისი უუნარობის და ცუდი მენეჯმენტის გამო ხალხი დაიღუპა და ამიტომ არის ის გასათავისუფლებელი. კახა კალაძეს უნდა ეყოს გამბედაობა და მიიღოს ერთმნიშვნელოვანი გადაწყვეტილება და გაათავისუფლოს ეს ბოროტმოქმედი და მავნებელი ადამიანი თანამდებობიდან“, – ამბობს ელისაშვილი.

მერიაში ამ თემაზე მოგვიანებით გააკეთეს განცხადება და დაადასტურეს, რომ მამუკა კობახიძე თანამდებობიდან მართლაც წავიდა საკუთარი განცხადების საფუძველზე, რადგან მას ყაზტრანსგაზში მუშაობის გაგრძელება სურს  და მის ადგილზე დროებით გიორგი შარკოვი დაინიშნა.

დაპირისპირების დასასრულებლად ძიუდოისტები, მწვრთნლები და ძიუდოს ფედერაციის წარმომადგენლები საქართველოს საპატრიარქოში მივიდნენ. მათთან ერთად იყო პარლამენტის სპორტის კომიტეტის თავმჯდომარის პირველი მოადგილე შოთა ხაბარელიც.

ხაბარელმა განაცხადა, რომ დაპირისპირება დასრულდა. ძიუდოისტები შერიგდნენ და პატიარქმა დალოცა. “დარწმუნებული ვარ, რომ ეს დაპირისპირება აღარ იქნება, რადგან ეს იყო ყველას ნება, რომ პატრიარქს დაელოცა და შეერიგებინა. მთელი წელი მიმდინარეობდა სპორტსმენებს შორის დაპირისპირება, რაც ყველაზე ცუდი იყო”, – განაცხადა ხაბარელმა შეხვედრის დასრულების შემდეგ.

ძიუდოისტებს შორის დაპირისპირება 2018 წლის აპრილიდან დაიწყო. თავდაპირველად, ძიუდოისტებსა და ფედერაციის პრეზიდენტს შორის დაპირისპირება თელ-ავივში გამართულ ევროპის ჩემპიონატს მოჰყვა. ისრაელში საქართველოს ნაკრებმა ასპარეზობა უმედლოდ დაასრულა. წარუმატებლობის შემდეგ 30 აპრილს ნაკრების მთელი სამწვრთნელო შტაბი გადადგა.

ძიუდოს ეროვნული ნაკრების წევრებმა ფედერაციის პრეზიდენტის დავით ქევხიშვილის გადადგომა მოითხოვეს და პროტესტი დაიწყეს. მოგვიანებით ქევხიშვილი გადადგა, მისი ადგილი კი გიორგი ათაბეგაშვილმა დაიკავა. თუმცა, ნაკრების წევრებმა მასაც უნდობლობა გამოუცხადეს, რადგან მათი თქმით, ათაბეგაშვილი ქევხიშვილის კადრი და მისი პოლიტიკის გამტარებელი იქნებოდა.

სრულიად საქართველოს კათოლიკოს-პატრიარქის ტახტის მოსაყდრემ, მიტროპოლიტმა შიომ მსოფლიო საპატრიარქოს დელეგაციასთან შეხვედრას ძალიან კონსტრუქციული უწოდა და მადლობა გადაუხადა საქართველოს ეკლესიის მიმართ კორექტული მიდგომისთვის.

“ძალიან მნიშვნელოვანი შეხვედრა იყო იმიტომ, რომ ჩვენ განვიხილეთ ბევრი დეტალი. რაც მთავარია, გამოიკვეთა მათი კორექტული პოზიცია ჩვენი ეკლესიის მიმართ, რომ ისინი არ ჩამოსულან იმისთვის, რომ დაგვარწმუნონ მივიღოთ ესა, თუ ის გადაწყვეტილება”, უთხრა ჟურნალისტებს მიტროპოლიტმა შიომ.

პატრიარქის ტახტის მოსაყდრემ აღნიშნა, რომ მსოფლიო საპატრიარქო სრული გაგებით ეკიდება საქართველოს ეკლესიის ამ ეტაპზე აუჩქარებელ პოზიციას უკრაინის ეკლესიის ავტოკეფალიის მიმართ. მეუფე შიოს თქმით, სინოდის სხდომაზე, რომელიც გასული წლის ბოლოს გაიმართა, გადაწყდა, რომ უკრაინის ეკლესიის ავტოკეფალიის საკითხი განიხილება შემდეგ სხდომაზე, რადგან არსებობს ბევრი დეტალი და შეკითხვა, რასაც მუშაობა სჭირდება. მიტროპოლიტმა ვერ დაასახელა სინოდის შემდეგი სხდომის თარიღი.

შეკითხვას, რამდენად ახდენს პროცესზე გავლენას უკრაინის ეკლესიის ავტოკეფალიისადმი რუსეთის ეკლესიის უარყოფითი დამოკიდებულება, მეუფე შიომ უპასუხა: “სამწუხაროდ, ჩვენთან არის ისეთი განწყობები, რომ ჩვენი ამჟამინდელი პოზიცია ასოცირდება რუსულ გავლენასთან. სინამდვილეში, დღეს თქვენ მოისმინეთ მსოფლიო საპატრიარქოს პოზიცია, რომ ისინიც ეთანხმებიან ჩვენ პოზიციას.” კათოლიკოს-პატრიარქის ტახტის მოსაყდრე ამბობს, რომ რუსეთის ეკლესიის პოზიცია საქართველოს ეკლესიისთვის შემაფერხებელი ფაქტორი ნამდვილად არ არის. “ჯერჯერობით როგორც ჩანს, ყველა ეკლესია თავს იკავებს პოზიციის დაფიქსირებისგან”, განაცხადა მიტროპოლიტმა შიომ.

მედიის შეკითხვას, როგორ შეაფასებს იერუსალიმის საპატრიარქოს მიერ უკრაინის ეკლესიის ავტოკეფალიის მხარდაჭერას, მეუფე შიომ უპასუხა, რომ ეს ბუნებრივი პროცესია და ისტორიაში ყოველთვის ასე იყო, რომ ვიღაც მხარს უჭერს, ვიღაც წინააღმდეგია და ვიღაც თავს იკავებს, ამიტომ დრო სჭირდება.

“მსოფლიო საპატრიარქო ენდობა მისი უწმინდესობის სიბრძნეს, თუ რა ნაბიჯები უნდა გადადგას ჩვენმა ეკლესიამ შემდგომში”, განაცხადა პატრიარქის ტახტის მოსაყდრემ, მიტროპოლიტმა შიომ მსოფლიო საპატრიარქოს დელეგაციასთან შეხვედრის შემდეგ.

კანადის პარლამენტის თავდაცვის კომიტეტმა საქართველოსთან დაკავშირებით რეზოლუცია მიიღო სადაც, მათ შორის კანადის ე.წ. “მაგნიტსკის აქტის” საქართველოს წინააღმდეგ აგრესიული ქმედებების განმხორციელებელ პირებზე გავრცელებაზეა საუბარი.

კანადის პარლამენტის თავდაცვის კომიტეტმა საქართველოს, უკრაინისა და მოლდოვას წინაშე არსებულ უსაფრთხოების გამოწვევებთან დაკავშირებით რეზოლუცია დაამტკიცა. კომიტეტის რეზოლუციაში, რომელიც უკრაინაში, მოლდოვასა და საქართველოში რუსეთის აგრესიას ეხება, აღნიშნულია, რომ რუსეთის მიერ საქართველოს წინააღმდეგ წარმოებული ომი, 2008 წელს აფხაზეთისა და ცხინვალის რეგიონის უკანონო ოკუპაცია, 2014 წელს ყირიმის უკანონო ანექსია, მონაწილეობა აღმოსავლეთ უკრაინაში 2014 წლიდან მიმდინარე კონფლიქტში და NATO-ს აღმოსავლეთ საზღვრებთან მისი სამხედრო მოქმედებები შეშფოთებას იწვევს, არა მხოლოდ აღმოსავლეთ და ცენტრალურ ევროპაში, არამედ მთელ მსოფლიოში. განსაკუთრებით აღსანიშნავია ანგარიშის სარეზოლუციო ნაწილი, რომლითაც თავდაცვის კომიტეტი კანადის აღმასრულებელ ხელისუფლებას შესაბამისი რეკომენდაციებით მიმართავს. კერძოდ:

• ხელი შეუწყოს და წაახალისოს საპარლამენტო დიალოგი საქართველოსთან, უკრაინასთან და მოლდოვასთან;

• გაავრცელოს კანადის პარლამენტის მიერ მიღებული “უცხოეთის კორუმპირებული მთავრობების მსხვერპლთა მიმართ სამართლიანობის აღდგენის” კანონით დაწესებული სანქციები საქართველოს, უკრაინისა და მოლდოვას წინააღმდეგ აგრესიის განხორციელებაში ბრალდებულ პირთა მიმართ (რაც თავის მხრივ ეხმიანება ტატუნაშვილი-ოთხოზორიას სიას)

• დაიწყოს საქართველოსთან და მოლდოვასთან თავდაცვის სფეროში შეთანხების გაფორმებაზე მუშაობა;

• რუსეთის მიერ ვითარების ესკალაციის საპასუხოდ, ლობირება გაუწიოს შავი ზღვის რეგიონში NATO-ს ჩართულობის გაზრდას;

• მხარი დაუჭიროს საქართველოს, უკრაინისა და მოლდოვას მისწრაფებებს, გახდნენ NATO-ს წევრები;

• მხარი დაუჭიროს საქართველოს, უკრაინასა და მოლდოვას ჰიბრიდულ თავდასხმებთან გამკლავებაში, განსაკუთრებით, სამთავრობო სტრუქტურებსა და კრიტიკულ ინფრასტრუქტურაზე კიბერ-თავდასხმებთან და მედიის მეშვეობით უცხოური პროპაგანდისა და დეზინფორმაციის გავრცელებასთან ბრძოლაში.

კომიტეტის ანგარიში საქართველოსადმი კანადის პარლამენტის ერთმნიშვნელოვანი მხარდაჭერის გამოხატულებაა. განსაკუთრებით მნიშვნელოვანია, რომ NATO-ში საქართველოს ინტეგრაციის მხარდაჭერის, ორმხრივი თანამშრომლობის გაღრმავებისა და შავ ზღვაზე კანადის გააქტიურებისკენ მოწოდებასთან ერთად, რეზოლუციაში საუბარია კანადის “მაგნიტსკის აქტის” იმ პირებზე გავრცელებაზე, რომლებსაც საქართველოს წინააღმდეგ განხორციელებულ აგრესიულ ქმედებებში ედებათ ბრალი.

ქართული მხარე, საქართველოს საელჩო ოტავაში აგრძელებს მუშაობას როგორც კანადის მთავრობასთან, ასევე პარლამენტთან, თავდაცვის კომიტეტის ანგარიშში ასახული საკითხების პრაქტიკული რეალიზაციის მიზნით.
დოკუმენტის დამტკიცებას წინ უძღვოდა 2018 წლის 4 დეკემბერს ხსენებულ სამ ქვეყანაში არსებულ გამოწვევებთან დაკავშირებით სპეციალური მოსმენა, რომელზეც ერთ-ერთი მთავარ მომხსენებლად, კანადაში საქართველოს ელჩი, კონსტანტინე ქავთარაძე იყო მიწვეული. სხდომას, პარლამენტარების გარდა, კვლევითი ცენტრების ექსპერტები და მედიის წარმომადგენლები ესწრებოდნენ. კანადის პარლამენტში საქართველოსთან დაკავშირებით ამგვარი მოსმენა პირველად გაიმართა.

მოსმენაზე კანადურმა მხარემ, თავდაცვის კომიტეტის თავმჯდომარემ სტეფან ფიურმა, კანადელმა პარლამენტარებმა როგორც მმართველი, ასევე, ოპოზიციური პარტიებიდან, თავიანთ გამოსვლებში დაადასტურეს საქართველოს სუვერენიტეტისა და ტერიტორიული მთლიანობის მხარდაჭერა და გამოთქვეს საქართველო-კანადის ორმხრივი ურთიერთობების განვითარების პროცესში უფრო აქტიურად ჩართვის მზადყოფნა. ისაუბრეს რუსეთის აგრესიულ პოლიტიკაზე მეზობლების მიმართ, საქართველოს ტერიტორიების ოკუპაციასა და ყირიმის ანექსიაზე.