Blog

ექსპრესგახდომა . 4 რჩევა მათთვის, ვისაც რამდენიმე დღეში რამდენიმე კილოგრამის დაკლება უნდა

რამდენიმე დღეში წვეულებაზე ხართ დაპატიჟებული და უცებ აღმოაჩინეთ, რომ თქვენი საუკეთესო კაბა ისე ლამაზად აღარ გადგათ ტანზე როგორც ადრე? როცა სპონტანურ საზღვაო დასვენებამდე, მნიშვნელოვან შეხვედრამდე ან პაემნამდე რამდენიმე დღე რჩება, რადიკალური ზომებია საჭირო. გთავაზობთ ხუთ ყველაზე ეფექტურ მეთოდს, როგორ დავიკლოთ რამდენიმე დღეში რამდენიმე ზედმეტი კილოგრამი.

სწორი შიმშილი

მოკლევადიანი შიმშილის ყველაზე ცნობილი მიმდევრები ჰოლივუდელი ვარსკვლავები – ჰაიდი კლუმი და კეტი ჰოლმსი არიან. საკვებზე სრულიად უარის თქმა წონის სწრაფად დასაკლებად რთული და ჯანმრთელობისთვის საშიშიც კია. ექსპრეს–შიმშილის დროს დაკარგული კილოგრამები მალევე დაბრუნდება, თუ შემდეგ დეტას არ დაიცავთ და ჩვეულებრივ რეჟიმში გააგრძელებთ კვებას. დიეტასაც და შიმშილობასაც ბევრი უკუჩვენება აქვს, მაგრამ ერთდღიანი შიმშილობა და დაბალკალორიული დიეტა მთელი დარჩენილი კვირის განმავლობაში სასწაულმოქმედია. თუ ერთი დღის მანძილზე კვებას სრულად შეზღუდავთ, 1 დან 3 კილოგრამამდე წონის დაკლებაა შესაძლებელი.

შიმშილობა ესთეტიური და გამაჯანსაღებელი მიზნით ორშაბათ დღეს არის რეკომენდირებული.დღის მანძილზე მინიმუმ 3 ლიტრი წყალი უნდა დალიოთ და 4–5 ჭიქა მწვანე ჩაი. ამ დღეს ნებისმიერი საკვები, ყავა, შავი ჩაი, ხილი და ბოსტნეული უნდა გამორიცხოთ.

მოდელების ექსპრეს დიეტა

ყოველ სუპერმოდელს წონის შენარჩუნების თავისი უნიკალური საიდუმლო აქვს. მაგალითად, ჟიზელ ბიუნდჰენი გადაღებების და ჩვენებების წინ პიერ დუკანის დიეტაზე გადადის და უცხიმო ცილოვანი საკვებით იკვებება. ირინა შეიკი უპირატესობას ხილის სმუზებს ანიჭებს. კლაუდია შიფერს კი დაბალანსებული ვეგეტარიანული დიეტა რამდენიმე დღეში 3 კილოს დაკლებაში ეხმარება. კარლ ლაგერფილდის მუზამ აღიარა, რომ გადაღებებამდე 5 დღით ადრე ხილით და ბოსტნეულით კვებაზე გადადის.

მოდელების უნივერსალური ექსპრესდიეტა პროდუქტების მკაცრად რეგლამენტირებული სიისგან შედგება. კვება განსაზღვრული გრაფიკით და რაციონიდან მინიმალური გადახვევით უნდა მოხდეს. არ იფიქროთ, რომ ერთი კვების გამოტოვება უფრო მეტად გაგახდუნებთ. დიეტა მხოლოდ სამ დღეს გრძელდება. თუ მას ზუსტად დაიცავთ, შეგიძლიათ 5 კილომდე დაიკლოთ. ექსპრეს დიეტის შემდეგ პერიოდში აუცილებელია დაბალკალორიული, უცხიმო ცილოვანი საკვების და ნაკლები ნახშირწყლების მიღება, რათა დიეტიდან თანდათანობით ჩვეულებრივ კვების რეჟიმზე გადახვიდეთ და წონა შეინარჩუნოთ.

კვების რაციონი:

8:00 თოხლო კვერცხი, ერთი ჭიქა მწვანე ჩაი.

13:0 170 გრამი უცხიმო ხაჭო და ერთი ჭიქა მწვანე ჩაი.

16:00 ისევ 170 გრამი უცხიმო ხაჭო და ერთი ჭიქა მწვანე ჩაი.

18:00 ერთი მწვანე ვაშლი.

დეტოქს დიეტა

ეფექტური დეტოქს დიეტის ნათელი მაგალითი მსოფლიოს ყველაზე ლამაზი ქალების დახვეწილი სხეულია – ნაომი ქემფბელი, გვინეტ პელტროუ, სელმა ჰაიეკი, ანჯელინა ჯოლი. დეტოქს დიეტის მთავარი მიზანი არა მხოლოდ ზედმეტი წონის დაკლება, არამედ ორგანიზმის ტოქსინებისა და შლაკებისგან გაწმენდაა.

დეტოქს დიეტა ხელს უწყობს სახის კანის მდგომარეობის და ფერის გაუმჯობესებასაც, ნივთიერებათა ცვლას არეგულირებს და იმუნიტეტს ზრდის. 5 დღიანი დეტოქს დიეტის საშუალებით შესაძლოა 5–7 კილო დაიკლოთ.

დეტოქს დიეტა დამატებით მომზადებას საჭიროებს: დაწყებამდე მინიმუმ ორი კვირით ადრე რაციონიდან მაღალკალორიული საკვები უნდა გამორიცხოთ. დეტოქს დიეტა შემდეგი პროდუქტების მიღებას გულისხმობს: ბროკოლი, ჭარხალი, ყურძენი, ტკბილი წითელი წიწაკა, ვაშლი, ციტრუსები, შავი ქლიავი, ბანანი, სტაფილო, ზღვის კომბოსტო, შვრია, მწვანილი, სატაცური, არტიშოკი, ბროწეული. ეს ყველაფერი შეგიძლიათ ნედლი სახით მიირთვათ, მოხარშოთ ან ზეთის მინიმალურ რაოდენობაში შეწვათ.

ყოველ დილით აუცილებელია თბილი ლიმონიანი წყლის დალევა. ბოლო კვება საღამოს 8 საათის შემდეგ არ შეიძლება.

სასარგებლო და უსარგებლო პროდუქტები

გახდომის საიდუმლო მარტივია :

1. დაივიწყეთ კვებასთან დაკავშირებული ზოგიერთი მავნე ჩვევა, შეამცირეთ პორციები და გააკონტროლეთ საკვების მიღების დრო.

2. კარტოფილის, ძეხვეულის, ტკბილის, ფქვილეულის აკრძალვა .

3. კალცით მდიდარი რძის, კეფირის,არაჟნის, ხილის იოგურთების მიღება, მარილიანი და შებოლილი საკვები შეიძლება დაბალკალორიული საკვებით შეცვალოთ, საკვები დანამატების გარეშე. სხვათაშორის, ოხრახუში, სტაფილო და ზოგიერთი ბოსტნეულიც შეიცავს კალციუმს და ფიგურისთვის სრულიად უსაფრთხოა.

4. დიეტისა და სწორი კვების დროს ყველაზე უსაფრთხო პროდუქტი, თუ პირადად თქვენ მის მიმართ ალერგია არ გაქვთ პომიდორია, ასევე კომბოსტო, ტყის კენკრეული, ნიგოზი, მწვანილი და ყველა ხილია გარდა ბანანისა.

February 3, 2019
ან უნდა დავასრულო კარიერა, ან ვიფიქრო სხვა ქვეყნის სახელით ასპარეზობაზე – ზურაბ დათუნაშვილის მიმართვა

მოჭიდავე ზურაბ დათუნაშვილი საკუთარ Facebook გვერდზე ვრცელ სტატუსს აქვეყნებს და საკუთარ გულშემატკივრებს სთხოვს რჩევას, როგორ მოიქცეს იმ შემთხვევაში, თუ გეგა გეგეშიძე ფედერაციის პრეზიდენტის პოსტს შეინარჩუნებს. გთავაზობთ მიმართვის ტექსტს სრულად:

“გამარჯობა. პირველ რიგში მინდა, ყველა ადამიანს, ვინც ამ დღეებში ჩემ მიმართ მხარდაჭერა გამოხატა კიდევ ერთხელ მადლობა გადავუხადო. ყველანაირად ვეცადე, რომ აბსოლუტურად ყველასთვის პირადად დამებრუნებინა პასუხი და მიუხედავად უამრავი წერილისა, მგონი, შევძელი. თუკი ვინმე შემთხვევით გამომრჩა, ბოდიში და მადლობა კიდევ ერთხელ რომ გულთან მიიტანეთ ჩემი პრობლემა და გამონახეთ დრო, რათა გაგემხნევებინეთ. ჩემი განსაკუთრებული გაოცება გამოიწვია იმ ადამიანების ჩართულობამ, რომლებიც სპორტთან არც კი არიან დაკავშირებულნი, თუმცა აქტიურად ჩაერთნენ ჩემი პრობლემის განხილვაში და დააფიქსირეს სწორი მოქალაქეობრივი პოზიცია – მადლობა, მეგობრებო.

მე რამდენიმე დღეა განვაახლე ინდივიდუალური ვარჯიში, თუმცა ჯერჯერობით არ ვიცი კონკრეტულად რისთვის ვემზადები, რადგან მოგეხსენებათ, საქალაქო სასამართლოს მიერ გამოტანილი აღკვეთი ღონისძიების მიხედვით ფედერაციის პრეზიდენტი დარჩა თანამდებობაზე, მე კი აქამდეც არაერთხელ აღვნიშნე, რომ ჩემი ამ ხელმძღვანელობასთან მუშაობის გაგრძელება არის შეუძლებელი. ამ მოცემულობიდან გამომდინარე ვდგები ჩემთვის უმძიმესი ორი არჩევანის წინაშე – ან დავასრულო კარიერა, ან ვიფიქრო სხვა ქვეყნის სახელით ასპარეზობაზე. ჩემთვის ჭიდაობა არის არა მხოლოდ საქმიანობა, არამედ ცხოვრების განუყოფელი ნაწილი, 21 წელზე მეტია ამ სპორტით ვარ დაკავებული და მის გარეშე არსებობა უბრალოდ არ შემიძლია. ასევე წარმოუდგენელია, ვიასპარეზო რომელიმე სხვა ქვეყნის სახელით – გულზე მქონდეს და ხელში დავიჭირო სხვა ქვეყნის დროშა, კვარცხლბეკზე დგომისას ვეღარ გავიგონო ჩემი სამშობლოს ჰიმნი და თუკი ღმერთის წყალობით მოვიპოვებ მედალს ეკუთვნოდეს რომელიმე სხვა ერს და არა ქართველ გულშემატკივარს.

თუმცა, როგორც უკვე აღვნიშნე, სამწუხაროდ, დღესდღეობით სწორედ ამ ორი უმძიმესი არჩევანის წინაშე აღმოვჩნდი. მინდა, ზემდგომ უწყებებს საქართველოს მთავრობას, უშუალოდ კი სპორტის სამინისტროს, ოლიმპიურ კომიტეტსა და პარლამენტის სპორტის კომიტეტს კიდევ ერთხელ ვთხოვო დაინტერესდნენ ჩემი პრობლემით და უფლებამოსილების ფარგლებში მიიღონ შესაბამისი გადაწყვეტილება. მთელმა ქვეყანამ ნახა, რომ ფედერაციის პრეზიდენტმა საჯაროდ დაარღვია წესდება და ჩაიდინა თანამდებობისთვის შეუფერებელი საქციელი, ასევე, ბოლო პერიოდში არაერთხელ ითქვა სხვა ტიპის დარღვევებზეც, თუმცა გეგა გეგეშიძე ამ დრომდე აგრძელებს პრეზიდენტის პოსტზე მუშაობას.

მესმის, რომ ჩემი მდგომარეობა, შესაძლოა, აღიქმება ისე როგორც ერთი სპორტსმენის პრობლემა, რომელიც მარტო აღმოჩნდა ხელმძღვანელი პირების უსამართლო მმართველობისა და ღიად გამოხატული ძალადობის პირისპირ, თუმცა მინდა აღვნიშნო, რომ არც ისე მარტო ვარ, როგორც ეს ერთი შეხედვით ჩანს და პრობლემები, რომლებიც მე გავაჟღერე არაერთ სპორტსმენს ეხება. ბევრი ნიჭიერი და პერსპექტიული ახალგაზრდა უკვე წავიდა ქვეყნიდან, ბევრიც იძულებული გახდა ჭიდაობისთვის თავი დაენებებინა და ეს პროცესი კიდევ უფრო გაღრმავდება, რაც მიგვიყვანს სავალალო შედეგებამდე. როგორც იცით, ნაკრების ერთმა ნაწილმა ღიად დაუჭირა მხარი ფედერაციის პრეზიდენტს, ამიტომ ამ ეტაპზე არ მინდა იმ სპორტსმენების დასახელება, ვინც განსხვავებულად ფიქრობს, რადგან ეს შესაძლოა აღქმული იყოს, როგორც ჭიდაობის სამყაროს ორად გახლეჩვა, რაც რეალურად ასე არაა და სინამდვილეში პრობლემები, რომელზეც ვსაუბრობ საერთოა ყველასთვის და მოჭიდავეებს ერთმანეთში არანაირი დაპირისპირება არ გვაქვს.

შესაბამისად, მინდა ყველას, ვისაც ხელეწიფება ჭიდაობის ფედერაციაში არსებული მდგომარეობის მოგვარება, მიიღოს შესაბამისი ზომები და ფედერაციას ჩამოაცილოს გეგა გეგეშიძე და მისი გარემოცვა, ხოლო თუ მიიჩნევა, რომ მას აქვს უფლებამოსილება გააგრძელოს თანამდებობაზე ყოფნა, მაშინ მირჩიეთ – დავასრულო კარიერა, თუ წავიდე ქვეყნიდან?

ასევე მინდა ვთხოვო საზოგადოებას მაქსიმალურად დაინტერესდნენ მიმდინარე პროცესით, რადგან ჭიდაობის ფედერაცია არის საჯარო უწყება, ფინანსდება სახელმწიფო ბიუჯეტიდან და თითოეულ ადამიანის წინაშე არის ანგარიშვალდებული.” – წერს ზურაბ დათუნაშვილი Facebook-ზე.

February 3, 2019
ბრიტანეთის დედოფალს მძიმე “ბრეგზითის“ შემთხვევაში ევაკუაციას უპირებენ

გაზეთ The Sunday Times – ის ინფორმაციით თუ ბრეგზითი ხელშეკრულების, ანუ მკაფიოდ დადგენილი წესების გარეშე გარეშე დაიწყო და ამას ლონდონში არეულობები მოჰყვა დედოფალ ელისაბედ მეორეს ევაკუაცია მოხდება.

გამოცემის ინფორმაციით ასეთი გეგმა ჯერ კიდევ 1962 წელს ცივი ომის დროს შეიმუშავეს. ბოლო რამდენიმე კვირის განმავლობაში კი თანამედროვე რეალობასთან მისი ადაპტრირება მოხდა. ვარაუდობენ, რომ დედოფალს და სამეფო ოჯახის სხვა წევრებს ლონდონის გარეთ, საიდუმლო სახლებში გადაიყვანენ.

27 იანვარს ცნობილი გახდა, რომ დიდი ბრიტანეთის მთავრობა არ გამორიცხავს საომარი მდგომარეობის შემოღებას ქაოსის აღსაკვეთად “უხეში ბრეგზითის“ შემთხვევაში. ბრიტანელმა მინისტრებმა არეულობის შემთხვევაში 2004 წლის საგანგებო სიტუაციების შესახებ აქტის გამოყენების შესაძლებლობა განიხილეს. ამ აქტის მიხედვით ქვეყანაში შესაძლებელია კომენდანტის საათის შემოღება, მოქალაქეთა გადაადგილების თავისუფლების შეზღუდვა, ქონების კონფისკაცია და არეულობის სამხედროების დახმარებით ჩარხშობა

დიდი ბრიტანეთის ევროკავშირიდან გამოსვლის შესახებ მოლაპარაკებები ლონდონსა და ბრიუსელს შორის 2017 წელს დაიწყო. ამას წინ უძღვოდა რეფერენდუმი ევროკავშირიდან გამოსვლის შესახებ, რომელსაც გაერთიანებული სამეფოს მოსახლეობის 51.9 % მა დაუჭირა მხარი.

February 3, 2019
პოლიციამ იეჰოვას მოწმეზე ძალადობის ბრალდებით ერთი პირი დააკავა

შინაგან საქმეთა სამინისტროს საპატრულო პოლიციის დეპარტამენტის თანამშრომლებმა რელიგიურ მოღვაწეობასთან დაკავშირებით იეჰოვას მოწმეზე ძალადობით განხორციელებული დევნის ბრალდებით 1992 წელს დაბადებული გ. ი. თბილისში დააკავეს.

გამოძიებამ დაადგინა, რომ გ.ი.-მ თბილისში, პატარიძის ქუჩაზე, იეჰოვას მოწმეს, 1954 წელს დაბადებულ ო. ა.-ს რელიგიურ მოღვაწეობასთან დაკავშირებით სიტყვიერი და ფიზიკური შეურაცხყოფა მიაყენა.

გამოძიება რელიგიურ მოღვაწეობასთან დაკავშირებით ძალადობით ჩადენილი დევნის ფაქტზე მიმდინარეობს, სისხლის სამართლის კოდექსის 156-ე მუხლის მე-2 ნაწილის “ა” ქვეპუნქტით.

February 3, 2019
158 შეკვრა მეტადონის და მეტამფეტამინის შემოტანისთვის აეროპორტში 25 წლის ქალი დააკავეს

შინაგან საქმეთა სამინისტრომ ნარკოტიკების უკანონო შეძენა-შენახვისა და საქართველოში უკანონოდ შემოტანის ბრალდებით თბილისის აეროპორტში 1 პირი დააკავა

ისანი-სამგორის რაიონული სამმართველოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, 1994 წელს დაბადებული ე.წ. ნარკოტიკული საშუალების უკანონო შეძენა-შენახვისა და საქართველოში უკანონოდ შემოტანის ბრალდებით, თბილისის საერთაშორისო აეროპორტში დაკავებული ქალისგან 158 შეკვრად დაფასოებული “მეტადონის” და “მეტამფეტამინის” შემცველი ნარკოტიკი ნივთმტკიცებად ამოიღეს.

ჩადენილი დანაშაული 6-დან 9 წლამდე ვადით თავისუფლების აღკვეთას ითვალისწინებს. გამოძიებით დადგინდა, რომ ბრალდებულმა ნარკოტიკული საშუალება უკრაინაში შეიძინა და საქართველოში უკანონოდ შემოიტანა.

გამოძიება ნარკოტიკული საშუალების უკანონო შეძენა-შენახვისა და საქართველოში უკანონოდ შემოტანის ფაქტებზე, საქართველოს სსკ-ის 260-ე მუხლის 1-ლი ნაწილით და 262-ე მუხლის 1-ლი ნაწილით მიმდინარეობს.

February 3, 2019
დატბორვის შემდეგ ბარნოვის ქუჩაზე სპეცტექნიკა მუშაობს

თბილისში, ბარნოვის ქუჩის 80 ნომერთან წყლის მაგისტრალური მილის დაზიანების გამო დაზარალებულებისთვის მიყენებული ზარალის ზუსტი ოდენობა ჯერჯერობით უცნობია.

ჯორჯიან ვოთერ ენდ პაუერის (GWP)–ს წარმომადგენლები და სპეცტექნიკა ადგილზე ამ დრომდე მუშაობენ რომ დაზიანება აღმოფხვრან და წყლის მიწოდება აღდგეს. ბარნოვის ქუჩაზე 900 მმ-იანი მაგისტრალური მილი, რომელიც მთაწმინდის რაიონს წყლით ამარაგებს ავარიულად გამთენიისას დაზიანდა. ბარნოვის ქუჩახე N72-დან N80-მდე საავტომობილო მოძრაობა დროებით შეზღუდულია. კომპანია განცხადებით, სპეციალისტები ადგილზე შეუჩერებლად იმუშავებენ და წყლის მიწოდება ხვალ გამთენიისას აღდგება. რაც შეეხება ზარალს, GWP-ში აცხადებენ, რომ მიმდინარეობს ზუსტი ოდენობის დათვლა და ისინი მას სრულად აანაზღაურებენ.

წყლის მაგისტრალური მილის დაზიანების გამო, შენობის პირველი სართულები, საცხოვრებელი სახლები, მაღაზიები, სალონები და მანქანები დღეს გამთენიისას დაიტბორა. დაზიანებულია საცხოვრებელი სახლების ავეჯი და ინვენტარი.დაზარალებულები ამბობენ, რომ თავდაპირველად მათ ძლიერი ხმა გაიგონეს, რის შემდეგაც მათ სახლებში წყლის ნიაღვარი შევარდა.

წყალმომარაგება შეეზღუდათ ვაკის რაიონში, ბარნოვის, ჯანაშვილის, ნაფარეულის, თაყაიშვილის, მცხეთის, ქობულეთის, შატბერაშვილს და მიმდებარე ქუჩებს. კომპანიის ინფორმაციით, წყალმომარაგება, სამუშაოების დასრულებისთანავე ხვალ, 4 თებერვალის დილის, 09:00 საათიდან აღდგება.

February 3, 2019
სუპერმოდელმა დი კაპრიოსთან დაშორების რეალური მიზეზი დაასახელა

დაშორებიდან თოთხმეტი წლის შემდეგ მოდის ინდუსტრიის ყველაზე მაღალანაზღაურებადი ბრაზილიელი მოდელი ლეონარდო დი კაპრიოსთან რომანის დასრულების რეალურ მიზეზზე ალაპარაკდა.

მათი თაყვანისმცემლები დღემდე გულისწყვეტით იხსენებენ ამ შესანიშნავ წყვილს – ყველაზე წარმატებული სუპერმოდელი და ყველაზე წარმატებული მსახიობი ერთმანეთს ექვსი წლის განმავლობაში 1999– 2005 წლებში ხვდებოდნენ. მაგრამ რა მოხდა მათ შორის და რატომ დაშორდნენ ერთმანეთს , როცა საჯაროდ ერთმანეთზე თავდავიწყებით შეყვარებულებს გავდნენ. რა მოხდა სინამდვილეში, დღემდე უცნობი რჩებოდა.

ჟიზელ ბიუნდჰენმა გულახდილი ინტერვიუ Porter Magazine–ს მისცა. ის ამბობს, რომ დაშორება მისი ფსიქოლოგიური პრობლემების – პანიკურ შეტევებთან დამღლელი ბრძოლის და სუიციდალური აზრების გამო მოხდა. “ვერ ვგრძნოდი, რომ შემეძლო ჩემი პრობლემები ვინმესთვის გამეზიარებინა. ვცდილობდი ეს განგაში დამოუკიდებლად ჩამეხშო, მაგრამ რაც უფრო მეტად ვცდილობდი, მით უფრო ნაკლებად გამომდიოდა.“

როგორც ჟიზელი ამბობს, რაღაც მომენტში თვითმკვლელობამდეც კი მივიდა და სერიოზულად ფიქრობდა აივნიდან გადახტომაზე . ეს სიტუაცია იმის კატალიზატორი გახდა, რომ მიხვდა, დრო იყო დახმარება ვინმესთვის ეთხოვა. საკუთარი არაჯანსაღი ჩვევებისა და ფსიქიკურ ჯანმრთელობასთან დაკავშირებული პრობლემების გამო ის ნათლად ხვდებოდა, რომ ლეონარდო დი კაპრიო მისთვის არ იყო დაბადებული, მიუხედავად იმისა, რომ მაშინ ძალიან უყვარდა.

„აღარ ვცდილობდი ტკივილის ჩახშობას მოწევით, დალევით ან მუშაობით, პირიქით, სულ უფრო მეტად ვაცნობიერებდი ყველაფერს, რასაც ადრე თვალს ვარიდებდი– წერდა ის თავის ბიოგრაფიულ წიგნში “გაკვეთილები: ჩემი გზა ცხოვრების გააზრებისკენ.“ ვიყავი თუ არა მარტო ჩემს სურვილთან ერთად, სერიოზული სულიერი ძიებები დამეწყო, სანამ ისევ იმ ადამიანთან ვრჩებოდი? ბოლოს და ბოლოს მივხვდი, რომ ასე იყო.“

სწორედ იმ კრიტიკული სიტუაციის შემდეგ გადაწყვიტა სუპერმოდელმა რაციონიდან შაქრის ალკოჰოლის და კოფეინის ამოღება, იოგათი დაინტერესდა, საკუთარი ფსიქიკური ჯანმრთელობის გამო მეტი დროის გატარება დაიწყო სუფთა ჰაერზე. დი კაპრიოსთან დაშორებიდან ორი წლის შემდეგ მან სპორტსმენ ტომ ბრედისთან დაიწყო ურთიერთობა, შემდეგ კი ცოლად გაჰყვა. წყვილს ორი შვილი ყავს.

February 3, 2019
მელანია ტრამპი გამოჩნდა. მედიის ყურადღება კვლავ მისმა ჩაცმულობამ მიიპყრო

შაბათს დილით დონალდ ტრამპი ოჯახთან ერთად გაყინული ვაშინგტონიდან ფლორიდაში, მზიან პალმ–ბიჩში გაფრინდა, სადაც პრეზიდენტს საკუთარი მამული აქვს.მშობლებთან ერთად ფლორიდაში გაემგზავრა ტრამპის უმცროსი ვაჟი, 12 წლის ბარონი. მელანია ტრამპი ქმართან ერთად 2019 წელს საჯაროდ პირველად გამოჩნდა. მანამდე ის მხოლოდ იშვიათად აქვეყნებდა თეთრი სახლის კედლებში გადაღებულ ფოტოებს ინსტაგრამზე. მელანია ტრამპმა ამჯერად “ადაპტირებულ კლასიკას“ მიანიჭა უპირატესობა. მას ბრენდ Roksanda–ს თავისუფალი სტილის ორბორტიანი ღია ყავისფერი პალტო ეცვა, იმავე ფერის მაღალყელიან ჩექმასთან ერთად Gianvito Rossi –ს ბრენდისგან. ხელში კი Hermès–ის წითელი ჩანთა ეჭირა.

მოკლე მანძილი მანქანამდე და შემდეგ მანქანიდან თვითმფრინავამდე საკმარისი აღმოჩნდა, რომ მედიას მელანიას ჩაცმულობა ზუსტად შეეფასებინა და მისი ღირებულებაც დაეთვალა. პალტოს ფასი– 3,875$ ჩექმის ფასი კი 1,625 დოლარია. მოკლედ, სადაც მელანია ჩნდება იქ მთავარი თემა მისი გარეგნობა, ჩაცმულობა და გარდერობის ღირებულების კალკულაციაა.

February 2, 2019
ეკა ბესელია პირადი კადრების შემთხვევითი გამავრცელებლების გარდა პროცესის დირიჟორის დადგენას მოითხოვს

ქართული ოცნების უმრავლესობის შვიდსაათიანი შეხვედრიდან გამოსული ეკა ბესელია ამბობს, რომ შეხვედრისას ამ თემაზე მსჯელობა არ ყოფილა:

“პირადზე მსჯელობა არ ყოფილა და არც არის აქ სამსჯელო არაფერი ერთის გარდა.ვიცით ვინ არის ავტორი – ეს განხორციელდა სააკაშვილის პერიოდში. ახლა საუბარია იმაზე ვინ დაგეგმა და ვინ არის დირიჟორი ამ უკანონო კამპანიის და ამ მორალური ტეროის რომელიც ვერ აღწევს თავის მიზანს და ვერც მიაღწევს.

გამოძიებამ უნდა დაადგინოს არა მხოლოდ ის ადამიანები, რომლებიც დაკავებულები არიან იმ ბრალდებით, რომ ჩაერთნენ გაზიარების ერთიან ქსელში და შეიძლება იქ შემთხვევითაც ვიღაცეები მოხვდნენ. ჩემი ამოცანა არ არის ოჯახები გაუბედურდეს, ახალგაზრდა გოგოები არიან დაპატიმრებული. მე ნამდვილად არ მინდა ეს სიმძიმე ვატარო რომ ოჯახების ტრაგედია მოყვეს კიდევ ამ მორალურ ტერორს.

პრინციპულად მიმაჩნია, რომ კანონიერი, სამართლიანი და ჰუმანურიც უნდა იყოს გამოძიება იმ ადამიანების მიმართ, ვისი ბრალეულობაც ნაკლებია, მაგრამ პრინციპულად მნიშვნელოვანია, რომ გამოძიებამ დაადგინოს დირიჟორი ამ გავრცელების, ვინ რა მიზნით გაავრცელა. დანაშაული მიზნის და მოტივის გარეშე არ არსებობს. და გამოძიების პრესტიჟის საკითხია, რომ გაარკვიეს ეს“ – ამბობს ეკა ბესელია.

February 2, 2019
იურიდიული კომიტეტის თავმჯდომარე ანრი ოხანაშვილი იქნება

ქართული ოცნების დღევანდელ სხდომაზე გადაწყდა, რომ იურიდიულ კომიტეტს ანრი ოხანაშვილი უხელმძღვანელებს. ეს გადაწყვეტილება მიუღებელია ეკა ბესელიასთვის, რომელიც ამ პოსტზე ლევან გოგიჩაიშვილის კანდიდატურას უჭერდა მხარს. კომიტეტის თავმჯდომარის პოსტიდან გადადგომისას ეკა ბესელიამ მის მოადგილედ გედევან ფოფხაძის კანდიდატურა დაასახელა, რომელსაც მისი გადადგომის შემდეგ მისი უფლებამოვალეობები უნდა შეესრულებინა, თუმცა მოგვიანებით ქართული ოცნების ლიდერის და უმრავლესობის გადაწყვეტილებით გედევან ფოფხაძე კომიტეტიდან გაიწვიეს. ამის შემდეგ ბესელია კომიტეტის თავმჯდომარეობის მისთვის მისაღებ კანდიდატად ლევან გოგიჩაიშვილს ასახელებდა..

ანრი ოხანაშვილი ე.წ. “კობაზიძის ჯგუფის“ წარმომადგენელია და მას უმრავლესობის ნაწილი, ე.წ. ამბოხებულები მხარს არ უჭერენ, თუმცა დღეს ქართული ოცნების უმრავლესობამ დახურულ სხდომაზე საბოლოო გადაწყვეტილება მიიღო, რომელსაც საგაზაფხულო სესიაზე ერთ–ერთ პირველ საკითხაზ უყრიან კენჭს.

February 2, 2019