{{ARTICLEIMAGE}}
ახლო მომავალში თბილისში უახლესი მოდელის, 18-მეტრიანი ავტობუსების შემოსვლა იგეგმება. ინფორმაციას მერიის პრესსამსახურის წარმომადგენელი სოციალურ ქსელში ავრცელებს.
მისივე ინფორმაციით, კომპანია “სისტრას” კვლევამ აჩვენა, რომ თბილისს 18-მეტრიანი ავტობუსებიც სჭირდება. ამ მიზნით თბილისის მერი მიუნხენში იმყოფება, სადაც კომპანია “მანის” მიერ წარმოებული უახლოესი მოდელის 18-მეტრიანი ავტობუსები დაათვალიერა.
პარლამენტის ვიცე-სპიკერი გია ვოლსკი პოლიტიკიდან წასვლას ფიქრობს. ამის შესახებ პოლიტიკოსმა ტელეკომპანია “ობიექტივის” ეთერში განაცხადა. ვოლსკი ამბობს, რომ უმჯობესია, ასპარეზი ახალგაზრდებმა დაიკავონ, თვითონ კი ურჩევნია, შვილიშვილებთან ითამაშოს: “მე ალბათ აღარ ვიქნები პოლიტიკაში, დავიღალე, ბევრი დავაკელი ჩემს ოჯახს, ჩემი ცხოვრებით არ მიცხოვრია. ვფიქრობ, რომ ბევრი უნდა მოვიდეს – ჩუგოშვილი მომეწონა, ამერიკაში ერთად ვიყავით, როგორი ობიექტურია, რა ინგლისური აქვს, შემშურდა”,თქვა გია ვოლსკიმ.
პოლიტიკური აქტივობის შეწყვეტას ის 2020 წლიდან ვარაუდობს, ყოველ შემთხვევაში ამბობს, რომ ამის სურვილი აქვს.
საქართველოს პარლამენტის თავმჯდომარემ ირაკლი კობახიძემ თურქეთში ოფიციალური ვიზიტი დაიწყო. ირაკლი კობახიძემ ოფიციალური შეხვედრების დაწყებამდე თურქეთის რესპუბლიკის დამაარსებლის ათათურქის მავზოლიუმი მოინახულა, საფლავი კობახიძემ გვირგვინით შეამკო და ხსოვნის წიგნში ჩანაწერიც გააკეთა.
{{ARTICLEIMAGE}}
თავდაცვის მინისტრის მოადგილე უწყების მიმართ გამოთქმულ პრეტენზიებს პასუხობს. გიორგი ბუთხუზი ამბობს, რომ ჯარი უზრუნველყოფილია მაღალი ხარისხის ფეხსაცმელით და ეს აუდიტის დასკვნაშიც არის ასახული.
გლდანის ციხის სკანდალური კადრების ავტორი, ვლადიმერ ბედუკაძე მის ცემას “ნაციონალურ მოძრაობას” უკავშირებს. ბედუკაძე ამბობს, რომ მისი ცემა სწორედ ამ პარტიამ დაუკვეთა.
“ვალში ვარ გრიგოლ ვაშაძესთან, რომ დაპირება ვერ შეასრულა, შუბლი ვერ გამიხვრიტა, თუმცა ახლა ჩემი ჯერია – ასე გადაეცით”,განაცხადა ბედუკაძემ “ტვპირველის” ეთერში.
“ეს არის მათი დაკვეთა, ეს ადამიანი მითვალთვალებდა – ზუსტად ასეთი მოტივი უნდოდათ – რომ პატიმრის თემა ყოფილიყო… 300 ათასი პატიმარი იყო და 290 ათასთან მქონდა შეხება და “მარტივი ლოგიკაა, რომ პატიმარმა მცემა”. ახლა ჩემი რიგია – ძალადობის მომხრე არ ვარ, მაგრამ… ვნახოთ”.
გლდანის ციხის სკანდალური კადრების ვლადიმერ ბედუკაძე მისი ცემის დეტალებს იხსენებს.
ბედუკაძე იხსენებს, რომ მასთან მივიდა უცნობი მოქალაქე და ასევე მისთვის უცნობი ადამიანის მკვლელობაში დაადანაშაულა: მე მას ვუთხარი, რომ ხატთან დავიფიცებდი, ან მამაოსთან მივიდეთ-მეთქი. არაფერი აინტერესებდა, დაიწყო “ქართული ოცნების” გინება, ჩემი გინება და დამარტყა”, ამბობს ბედუკაძე და აღნიშნავს, რომ “ნაციონალურ მოძრაობას” სურს ციხის კადრების ლაქა ჩამოირეცხოს”.
“ქაშვეთის ეკლესიის მრევლი ვარ, ეს ადამიანი პირველად ვნახე. წირვიდან რომ გამოვედი, ზიარებამდე, იქ დამხვდა და მკითხა, არ გეცნობიო? ამბობდა – კარანტინში, რომელიღაც ხელმოტეხილი მოკალიო – მე ვუპასუხე, რომ მსგავსი რამ არ ყოფილა და ეკლესიის წინ ასეთ ბრალდებას “აჟღერებ მეთქი”… ეკლესიაში შესვლა შევთავაზე”, იხსენებს ბედუკაძე.
მილიონი ხმა საარჩევნო სისტემის შესაცვლელად – 21 ოპოზიციური პარტია სრულად პროპორციულ საარჩევნო სისტემაზე გადასასვლელად ხმების შეგროვებას იწყებს. საინიციატივო ჯგუფის წევრებმა ამ მოთხოვნით პარლამენტს უკვე მიმართეს და ხვალ საპროცედური საკითხთა კომიტეტისგან ხელმოწერების ფურცლის ნიმუშებს ელოდებიან, რის შემდეგაც ხელმოწერების შეგროვებას დაიწყებენ. ოპოზიცია ითხოვს, რომ არჩევნები პროპორციული სისტემით არა 2024, არამედ 2020 წელს ჩატარდეს. ისინი დარწმუნებულები არიან, რომ ყველა ოპოზიციური პარტიის ზეწოლის შედეგად მმართველი გუნდი ამ დათმობაზე წავა. ოპოზიციის მოთხოვნას გამოეხმაურა პარლამენტის თავმჯდომარე. ირაკლი კობახიძე აცხადებს, რომ 2020 წლიდან პროპორციული სისტემის ამოქმედება ოპოზიციას თავის დროზე შესთავაზეს, თუმცა უარი მიიღეს, ახლა კი თემა უკვე დახურულია.