შინაგან საქმეთა სამინისტრომ ორი პირი დააკავა, რომლებმაც უწყების ცნობით, 8 თებერვალს თბილისში გრიგოლ ფერაძის ქუჩაზე მოქალაქეს მანქანის ოთხივე საბურავი მოპარეს და ადგილიდან მიიმალნენ.
უწყების ცნობით, “გამოკითხვისას დაკავებულებმა ქურდობის კიდევ ერთი ფაქტი აღიარეს – 13 თებერვალს, ვაზისუბნის დასახლებაში მდებარე ერთ-ერთი მოქალაქის მიწის ნაკვეთიდან სხვადასხვა ნივთების მოპარვა. სამართალდამცველებმა ნაქურდალი სრულად, ნივთმტკიცებად ამოიღეს. დანაშაული 4-დან 7 წლამდე პატიმრობას ითვალისწინებს”.
ბათუმში ძარცვის ბრალდებით 2 ადამიანი დააკავეს. გამოძიებამ დაადგინა, რომ მიმდინარე წლის 13 თებერვალს მათ ჩოლოყაშვილის ქუჩაზე მდებარე ერთ-ერთ საცხოვრებელ ბინაში მცხოვრებ მოქალაქეს თავი გაზის კომპანიის თანამშრომლებად წარუდგინეს და ბინაში მოტყუებით შეაღწიეს. ბინის მფლობელს – 87 წლის ქალბატონს ფიზიკური შეურაცხყოფა მიაყენეს, ხელები შეუკრეს და სხვადასხვა ნივთები, მათ შორის ოქროს სამკაულები მოიპარეს, რის შემდეგაც შემთხვევის ადგილიდან მიიმალნენ. სამართალდამცველებმა ორივე პირი მომხდარიდან რამდენიმე საათში, ბათუმში დააკავეს.
ასევე ბათუმში ჩატარებული ოპერატიულ-სამძებრო და საგამოძიებო ღონისძიებების შედეგად, ქურდობის ფაქტზე – 2004 და 2003 წელს დაბადებული 2 არასრულწლოვანი ამხილეს. შსს-ს ცნობით, მიმდინარე წლის 12 თებერვალს არასრულწოვნებმა ბათუმში მდებარე ტექნიკის მაღაზიიდან მობილური ტელეფონები მოიპარეს და შემთხვევის ადგილიდან მიიმალნენ. ნაქურდალი ნივთების ნაწილი ნივთმტკიცებად არის ამოღებული, დანაშაული კი 3-დან 5 წლამდე ვადით თავისუფლების აღკვეთას ითვალისწინებს.
ზაალ ლატარია, რომელიც გუშინ პოლიციამ პოლიტიკოსის პირადი ცხოვრების ამსახველი ფარული ჩანაწერების საქმესთან დაკავშირებით ბათუმში მოწმის საკით გამოკითხა, დაკავებულია. გამოძიება მას კადრების შენახვასა და მობილური ინტერნეტაპლიკაციის მეშვეობით გავრცელებას ედავება. პოლიციამ ბრალდებულის საცხოვრებელ სახლში მოსამართლის განჩინების საფუძველზე ჩხრეკაც ჩაატარა. დაკავებამდე ზაალ ლატარიამ განაცხადა, რომ მის მიმართ დევნა მიმდინარეობს. ის უკრაინაში იბრძოდა და მისი შვილიც ადასტურებს, რომ “2016 წლის შემდეგ, რაც საქართველოში ჩამოვიდა, მას “მიშას კაცს” ეძახდნენ – ნარკოტიკი ჩაუდეს, რაზეც გამართლდა, შემდეგ კი არაერთხელ გააფრთხილეს, რომ ქვეყანა დაეტოვებინა”.
“ნაციონალური მოძრაობის ერთ-ერთინ ლიდერი გიორგი ბარამიძე კი ამბობს, რომ დაკავებული ზაალ ლატარია მათი ხმარდამჭერი და აქტივისტია და ვარაუდობს, რომ სწორედ ამიტომ მას სუს-მა გაუგზავნა ფარული ჩანაწერი და ახლა კადრების ნახვის გამო აკავებენ, რომ ამ მეთოდით “ნაციონალური მოძრაობის” მომხრეები დააშინონ.
პირადი ცხოვრების ამსახველი ჩანაწერების გავრცელების საქმეზე მიმდინარე გამოძიების ფარგლებში, სულ 18 პირია დაკავებული. შსს აცხადებს, რომ ყველა იმ პირის მიმართ, ვინც გამიზნულად ან სხვაგვარად ახდენს პირადი ცხოვრების ამსახველი მასალების გავრცელებას, კანონმდებლობით გათვალისწინებული ზომები გატარდება.
საგარეო საქმეთა მინისტრი, დავით ზალკალიანი აშშ-ის სახელმწიფო მდივანთან შეხვედრას აფასებს. მინისტრის განცხადებით, აშშ-სთან სტრატეგიული პარტნიორობა დინამიურად ვითარდება.
“ძალიან შინაარსიანი საუბარი მქონდა ამერიკის სახელმწიფო მდივანთან მაიკ პომპეოსთან. უაღრესად პოზიტიურად შეფასდა საქართველო-ამერიკა შორის სტრატეგიული პარტნიორობა, რომელიც ვითარდება ძალიან მაღალი დინამიკით. ამის მაჩვენებელია ჩვენ ქვეყნებს შორის განვითარებული თანამშრომლობა თავდაცვისა და უსაფრთხოების სფეროებში ასევე ეკონომიკური თანამშრომლობის განვითარების კუთხით. აღინიშნა, რომ აუცილებელია ეს გზა მომავალში კიდევ უფრო განმტკიცდეს გამყარდეს და კონკრეტული ხელშესახებ შედეგში აისახოს”- გვანცა და საქართველოს საგარეო საქმეთა მინისტრმა დავით ზალკალიანმა პოლონეთში აშშ-ს სახელმწიფო მდივანთან გამართული შეხვედრის შეფასებისას.
მინისტრის განმარტებით, შეხვედრისას საუბარი ასევე შეეხო საქართველოს ოკუპირებულ ტერიტორიებზე შექმნილ მძიმე ჰუმანიტარულ ვითარებას და აღინიშნა რუსეთის ფედერაციის უკანონო ქმედებები, რომელსაც უკანასკნელ პერიოდში აქვს ადგილი.
“საუბრის დროს ამერიკის სახელმწიფო მდივანს დეტალურად ვაცნობე ის სიტუაცია, რომელიც შექმნილია ოკუპირებულ ტერიტორიებზე და ის უკანონო ქმედებები, რასაც განსაკუთრებით ბოლო დღეების განმავლობაში რუსეთის ფედერაცია მიმართავს ოკუპირებულ ტერიტორიაზე ჩვენი მოსახლეობის მიმართ. აღინიშნა, რომ საერთაშორისო თანამეგობრობა და ამერიკის შეერთებული შტატები როგორც ადრე ისე მომავალშიც კვლავ ურყევ მხარდაჭერას გამოხატავს საქართველოს მიმართ”, განაცხადა საგარეო უწყების ხელმძღვანელმა.
დავით ზალკალიანის განცხადებით, მეზობლების მიმართ რუსეთის აგრესიული ქმედებს ვარშავაში მიმდინარე მინისტერიალზეც გაესვა ხაზი.
“კონფერენციის მსვლელობისას სახელმწიფო მდივანმა გააკეთა განცხადება, სადაც მკაცრად დაგმო რუსეთის უკანონო ქმედებები, როგორც უკრაინაში ისე საქართველოში და ჩვენი საუბრის დროს აღინიშნა, რომ ამერიკის შეერთებული შტატები კვლავ განაგრძობს რუსეთის ფედერაციასთან დღის წესრიგში ჩვენი საკითხის აქტუალურად წინ წამოწევას”. – განმარტა დავით ზალკალიანმა
გარდა ამისა, როგორც საქართველოს საგარეო უწყების ხელძღვანელმა განმარტა, ორმხრივი ასპექტების გარდა, საუბარი ასევე შეეხო მრავალმხრივ და გლობალურ საკითხებს, სადაც ვაშინგტონი და თბილისი ნაყოფიერად თანამშრომლობენ.
“უაღრესად პოზიტიური შეფასება მიეცა ასევე ჩვენ თანამშრომლობას გლობალური მნიშვნელობის საკითხებში და განსაკუთრებით პოზიტიურად იყო გამოყოფილი ვენესუელასთან მიმართებაში ჩვენი თანმხვედრი პოზიცია. მაიკ პომპეოს მხრიდან ჩვენ გვაქვს ძალიან მყარი მკაფიო მხარდაჭერა ყველა მიმართულებით იმ რეფორმების განხორციელების კუთხით რომელსაც საქართველო მთავრობა ახორციელებს და ეს თანამშრომლობა მომავალში კიდევ უფრო შეუქცევადი და მყარი გახდება”.
{{ARTICLEIMAGE}}
სადგურის მოედანთან ხანძარი იყო. დაიწვა დაახლოებით 150 კვადრატული მეტრი ფართობი, სადაც მეორადი ტანსაცმლის საწყობი იყო განთავსებული. ბაზრობის ტერიტორია დაახლოებით 1800 კვადრატულ მეტრ ფართობს მოიცავს. ხანძარს 17 სახანძრო-სამაშველო მანქანა აქრობდა. ცეცხლის გამომწვევი მიზეზი ჯერჯერობით უცნობია. ამას ექსპერტ-კრიმინალისტები დაადგენენ.
წინასწარი ინფორმაციით კი, ცეცხლი გაუჩნდა ელექტრო-სადენებს. ხანძრის გავრცელების საფრთხე აღარ არის. დაზარალებულები ადგილზე თბილისის მერის მისვლას მოითხოვენ.
“წინათაც დამეწვა ორასიათასის, მაგრამ 200 ლარიც არ მოგვცეს, სახლი ბანკში ჩავდე და ახლა ისიც უნდა წამართვან?!”,ამბობს ერთ-ერთი დაზარალებული.
მათივე ცნობით, გასულ წელსაც იგივე ფაქტი მოხდა და როგორც ჩანს, უსაფრთხოების ნორმები სათანადოდ არ არის დაცული.
“ჰკითხეთ, კახა კალაძეს, როდის დაგვეხმარა?”,ამბობს ადგილზე დასაქმებული.
თავის მხრივ, დიდუბის გამგებელი ამბობს, რომ ხანძრის გამომწვევი მიზეზი ექსპერტ-კრიმინალისტებმა უნდა დაადგინონ, დაზარალებულებს კი ზარალი აუნაზღაურდებათ.
“ხანძრები მთელი ქალაქის და მსოფლიოს მასშტაბით ჩნდება, კითხვის ნიშნები რატომ არის, ვერ ვხვდები. უბრალოდ უნდა დადგინდეს, საიდან არის ხანძარი”, ამბობს ირმა ზავრადავშილი.
სახანძრო 4 წუთში მოვიდა, რეაგირება მოხდა უსწრაფესად, დაკვამლიანება რომ არ იყოს, ახლა ამაზე მუშაობენ. ამ ბაზრის ხელმძღვანელობას ამ ხალხლთან გვერდით დგომის დიდი გამოცდილება აქვს და ეჭვიც არ მეპარება, როგორც ადრე მოხდა, ახლაც იგივეს გააკეთებენ”, ამბობს დიდუბის გამგებელი.
ჯეკ შეფერდის საქმის ახალი დეტალები – ბრიტანეთის მოქალაქეს, სავარაუდოდ, კიდევ ერთ ბრალს წაუყენებენ. გამოცემა “ტელეგრაფი” წერს, რომ ინტერპოლით ძებნილი საქართველოში ყოფნის დროს ფულს სხვა ადამიანის გვარითა და სახელით შოულობდა. კომპანია, რომელიც ვებდიზაინსა და ვებგვერდების პროგრამირებაზე მუშაობდა, მსოფლიო ბრენდებს ემსახურებოდა, დამკვეთებს კი ეგონათ, რომ ამ კომპანიის უკან ჯეკ გრანტი იდგა.
კომპანია “სესილი დიგითალი”, რომლითაც ჯეკ შეფერდი მსოფლიო გიგანტებს, “ეფლს”, “თაიმს” და “ფერარის” ემსახურებოდა, მან ბრიტანეთში ცოლის სახელზე დააფუძნა. ამ ეტაპზე კომპანიის ვებგვერდებზე შესვლა შეუძლებელია, რადგან გათიშულია.
ჯეკ შეფერდის ადვოკატები ამტკიცებენ, რომ ბრიტანული მედიით გავრცელებული ბრალდებები აბსურდულია. უფლებადამცველ მარიამ კუბლაშვილის თქმით, შეფერდი 24 მარტს საქართველოში საკუთარი პასპორტით შემოვიდა. ადვოკატი ადასტურებს, რომ შეფერდი საქართველოში საკუთარი პროფესიით მუშაობდა, მას ჰყავდა გუნდი და იღებდა დაკვეთებს. თუმცა, როგორ ეცნობოდა შეფერდი კლიენტებს, ეს ინფორმაცია ადვოკატს არ აქვს.
ყალბი დოკუმენტებით სარგებლობისთვის ბრალის წაყენების მოთხოვნით სკოტლანდიარდს საქართველოს ძალოვანი უწყებებისთვის ჯერ არ მოუმართავს. ბრიტანელი ბრალდებული სამშობლოში ექსტრადირებაზე ამ დრომდე უარს ამბობს. ლონდონში ექსტრადირების შემთხვევაში მას შარლოტა ბრაუნის არაგანზრახ მკვლელობისთვის 6-წლიანი პატიმრობა ემუქრება. ასევე, ჩხუბისა და დაზიანების მიყენების ბრალდებით გამოძიება კიდევ ერთ საქმეზე ინგლისში მიმდინარეობს.
საგარეო საქმეთა მინისტრმა, დავით ზალკალიანმა, რომელიც პოლონეთში სამუშაო ვიზიტით იმყოფება, ხანმოკლე შეხვედრა გამართა ამერიკის სახელმწიფო მდივანთან მაიკ პომპეოსთან – საგარეო უწყების ინფორმაციით, მაიკ პომპეომ დავით ზალკალიანთან ხანმოკლე საუბრის დროს კიდევ ერთხელ გამოხატა აშშ-ს მტკიცე მხარდაჭერა საქართველოს მიმართ და მაღალი შეფასება მისცა ამერიკა-საქართველოს შორის სტრატეგიულ პარტნიორობაში მიღწეულ პროგრესს. მინისტრმა ამერიკის სახელმწიფო მდივანს მიაწოდა ინფორმაცია საქართველოს ოკუპირებულ რეგიონებში არსებული რთული ვითარებისა და იმ უკანონო ქმედებების შესახებ, რასაც ადგილი აქვს რუსეთის ფედერაციის მხრიდან. აშშ-ს სახელმწიფო მდივანმა კიდევ ერთხელ დაადასტურა ამერიკის ურყევი მხარდაჭერა საქართველოს სუვერენიტეტისა და ტერიტორიული მთლიანობისადმი და აღნიშნა, რომ აშშ ამ საკითხს განსაკუთრებულ ყურადღებას უთმობს, როგორც ორმხრივ, ასევე საერთაშორისო ფორმატებში. მაიკ პომპეომ გამოხატა მზაობა და მხარდაჭერა ქვეყნებს შორის თავდაცვის, უსაფრთხოების და სავაჭრო-ეკონომიკური ურთიერთობების განვითარების მიმართ. მაღალი შეფასება მიეცა ქვეყნებს შორის თავდაცვისა და უსაფრთხოების სფეროში არსებულ თანამშრომლობას. განსაკუთრებით აღინიშნა საქართველოს აქტიური ჩართულობა და მონაწილეობა გლობალურ საკითხებში, ამ მხრივ აშშ-ს სახელმწიფო მდივანმა მადლობა გადაუხადა ქართველ კოლეგას ვენესუელასთან დაკავშირებით გამოხატული პოზიციის გამო.
“საგარეო საქმეთა მინისტრმა და სახელმწიფო მდივანმა დადებითი შეფასება მისცეს ქვეყნებს შორის ყველა დონეზე ინტენსიურ კომუნიკაციას, ამ კონტექსტში საუბარი შეეხო დაგეგმილ და განხორციელებულ მაღალი დონის ვიზიტებსა და შეხვედრებს.დავით ზალკალიანი სამუშაო ვიზიტით პოლონეთში იმყოფება, სადაც საერთაშორისო კონფერენციის მშვიდობა და უსაფრთხოება ახლო აღმოსავლეთში, გახსნით ღონისძიებაზე მხარეებმა ხაზი გაუსვეს ორი ქვეყნის სტრატეგიულ პარტნიორობას, აშშ-ს მხრიდან კიდევ ერთხელ აღინიშნა საქართველოს, როგორც რეგიონში აშშ-ს მტკიცე პარტნიორისა და მოკავშირის როლი. დავით ზალკალიანმა მადლობა გადაუხადა აშშ-ს სახელმწიფო მდივანს საქართველოს მხარდაჭერისთვის, რაც ასევე გამოიხატა პოლონეთის რესპუბლიკაში სახელმწიფო მდივნის ვიზიტის დროს საქართველოსთან დაკავშირებით გაკეთებულ საჯარო განცხადებაში, სადაც მან კიდევ ერთხელ დაგმო რუსეთის აგრესია სუვერენული სახელმწიფოების წინააღმდეგ”,წერია საქართველოს საგარეო უწყების ინფორმაციაში.
“ვისაუბრეთ საქმის აბსოლუტურად ყველა დეტალზე, საქმის ახალ გარემოებებზეც, ახალ პირებზეც, ვისი ბრალეულობაც გამოიკვეთა ამ საქმეში. ვისაუბრეთ განათლების მინისტრის როლზე ამ საქმეში და მისი გამოკითხვა მოვითხოვეთ. სრულიად საკმარისია ის მტკიცებულებები, რაც წარვადგინეთ და რასაც კიდევ წარვადგენთ, ბრალი წარედგინოს დამნაშავე პირებს, საუბარია მაღალი თანამდებობის პირებზეც”, განაცხადა ბაჩანა შენგელიამ პროკურატურაში გამოკითხვის შემდეგ. გარდაცვლილი დირექტორის შვილი ამბობს, რომ ეს იყო ეს იყო პოლიტიკური დევნა და პოლიტიკური ანგარიშსწორება.
შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს პოლიციის სამმართველოს თანამშრომლებმა, წინასწარი შეთანხმებით ჯგუფის მიერ ჩადენილ ქურდობის ფაქტზე ამხილეს 4 არასრულწლოვანი: 2004 წელს დაბადებული გ.ვ., 2005 წელს დაბადებული ს.დ., 2002 წელს დაბადებული ა.ჩ. და 2004 წელს დაბადებული მ.ბ. – ამ ინფორმაციას შსს ავრცელებს.
ამავე წყაროს ცნობით, გამოძიებით დადგინდა, რომ მხილებულმა არასრულწლოვნებმა თბილისში, პარკ “მზიურში” სოციალური კაფე “ახალი მზიური” გაქურდეს, საიდანაც ლეპტოპი, მობილური ტელეფონი, აიპადი და 178 ლარის მოიპარეს, რის შემდეგაც შემთხვევის ადგილიდან მიიმალნენ.
დადგინდა, რომ არასრულწლოვნებმა, ასევე, გაქურდეს მაღაზია “აიტექნიკი”, საიდანაც სხვადასხვა სახის ტექნიკა მოიპარეს.
სამართალდამცველებმა ნაქურდალი ნივთების ნაწილი ნივთმტკიცებად ამოიღეს.
გამოძიება წინასწარი შეთანხმებით ჯგუფის მიერ ჩადენილ ქურდობის ფაქტზე მიმდინარეობს, საქართველოს სისხლის სამართლის კოდექსის 177-ე მუხლის მე-2 ნაწილის “ა” და “ბ” ქვეპუქტებით, მე-3 ნაწილის “ა” ქვეპუნქტით და მე-4 ნაწილის “ბ” ქვეპუნქტით.
ისევ პასუხგაუცემელი კითხვები და დაპირებები შვილმოკლულ მამას. პროკურატურაში მთავარ პროკურორს, ხორავას ქუჩის საქმის პროკურორებსა და ზაზა სარალიძეს შორის რამდენიმესაათიანი შეხვედრა დასრულდა. ზაზა სარალიძე ამბობს, რომ საგამოძიებო უწყება კვლავ ცდილობს 2017 წლის პირველ დეკემბერს მოზარდების ჩხუბის ერთ-ერთი მთავარი ფიგურანტი მიხეილ კალანდია საქმიდან გაიყვანოს. ზაზა სარალიძის თქმით, შეხვედრაზე არაერთი კითხვა დასვა, თუმცა პასუხები კვლავ ვერ მიიღო. თუმცა უთხრეს, რომ მისი შვილის მკვლელობის საქმის გამომძიებლების მიმართ სამსახურებრივ გადაცდომებზე მოკვლევა უკვე დაწყებულია.
ზაზა სარალიძემ შალვა თადუმაძისგან კიდევ ერთი შეთავაზება მიიღო. ორშაბათიდან საქმის მასალებთან წვდომის უფლებას კიდევ ერთხელ მიირებს სარალიძის უფლებადამცველი, რის შემდეგაც შვილმოკლული მამა საგამოძიებო უწყებაში ისევ მივა.
ზაზა სარალიძეს მხარდაჭერა კიდევ ერთხელ გამოუცხადა ევროპული საქართველოს ლიდერმა. პროკურატურაში დღეს გიგი უგულავაც მივიდა. ის ამბობს, რომ აუცილებელია ხელისუფლებამ მკვლელების მფარველობა შეწყვიტოს.
ვინ მოკლა 2017 წლის პირველ დეკემბერს ხორავას ქუჩაზე დავით სარალიძე და რა ეტაპზეა გახმაურებული საქმის ხელახალი გამოძიება ისევ უცნობია. შეგახსენებთ, საქალაქო სასამართლომ ამ საქმეზე დაკავებულ პირს პატიმრობა დავით სარალიძის მკვლელობის მცდელობისთვის მიუსაჯა, ერთი პირი კი გაამართლა.