Blog

ყაზახეთის დედაქალაქს ოფიციალურად ნურსულთანი ეწოდა. ყაზახეთის პრეზიდენტმა შესაბამის განკარგულებას ხელი უკვე მოაწერა. დოკუმენტში აღნიშნულია, რომ განკარგულება ძალაში გამოქვეყნებისთანავე შევა. შეგახსენებთ, რომ 20 მარტს ყაზახეთის ახალი პრეზიდენტი ინიციატივით გამოვიდა, ქვეყნის დედაქალაქ ასტანას სახელი გადაერქვას და ნაზარბაევის პატივსაცემად ნურსულთანი დაერქვას. ინიციატივას მხარი ქვეყნის პარლამენტმაც დაუჭირა .

ვარკეთილში ტექნიკის მაღაზია სმაილი დღეს დილით გაქურდეს. ჩამსხვრეულია მინები და წაღებულია, დაახლოებით, 1500 ლარის პროდუქცია, ძირითადად, ჰავერბორდები.

სმაილის მაღაზიათა ქსელის კოორდინატორი, ვახტანგ მუჯირიშვილი, აცხადებს, რომ ბოლო 6 თვის განმავლობაში ეს ძარცვის უკვე მეხუთე შემთხვევაა.

ტექნიკის მაღაზიაში დამონტაჟებულია უსაფრთხოების სისტემა, თუმცა, დაცვა რეაგირებას ვერ ასწრებს.

წინა შემთხვევაში 17 ათასი ლარის ღირებულების მობილურების წასაღებად მძარცველებს მხოლოდ 30 წამი დასჭირდათ, დღეს დილით კი ძარცვა მხოლოდ 21 წამში დასრულდა.

„დაგვხვდა ჩატეხილი ვიტრინა, თავისთავად დაცვის სამსახურმა უცბად მოახდინა რეაგირება, მოვიდნენ ერთ წუთში, მაგრამ ერთი წუთი ამ ვიტრინის გატეხვას და იქიდან ნივთების წაღებას არ სჭირდება. მერე კრიმინალისტები მოვიდნენ, პოლიცია მოვიდა, ჯერჯერობით მიდის ძიება. ეს ფილიალი 5-ჯერ არის გატეხილი. აქამდე არასრულწლოვნები იყვნენ და ტელეფონები გაქონდათ, დაახლოებით, 21 წამში,“ – ამბობს ვახტანგ მუჯირიშვილი.

შსს-ში აცხადებენ, რომ დამნაშავეების დასადგენად საგამოძიებო მოქმედებები მიმდინარეობს.

ბოლო დროს ძალიან პოპულარულია ე.წ. ცილოვანი დიეტები – განსაკუთრებით დუკანის და ატკინსის დიეტა. კვების ამგვარ რაციონში, როგორც წესი ჭარბობს ცილით მდიდარი პროდუქტები და იზღუდება ნახშირწყლების მიღება.

ცილოვანი დიეტით ადამიანები წონაში შედარებით იოლად იკლებენ და ის ეფექტურია როგორც ახალგაზრდებში, ისე ხანდაზმულებში. ამერიკელი მეცნიერების მიერ უეიქ ფორესტის უნივერსიტეტში ახლახან დასრულებული ექსპერიმენტი ადასტურებს, რომ ამ ცილოვანი დიეტით ადამიანები წონაში ისე იკლებენ, რომ ძვლოვან და კუნთოვან მასას ინარჩუნებენ, რაც განსაკუთრებით მნიშვნელოვანია ხანდაზმულთა ჯანმრთელობისთვის და მათი მობილურობის შენარჩუნებისთვის.

კვლევის საკონტროლო ჯგუფის მონაწილეებმა წონაში 6 თვის მანძილზე, დაახლოებით 8.1 კგ დაიკლეს. აღმოჩნდა, რომ დაკლებული წონის 87% შუატანის ცხიმზე მოდიოდა. ცილის მიღების დღიური ნორმა ექსპერიმენტის მონაწილეებს ექიმებმა ასე განუსაზღვრეს: სხეულის წონის ყოველ კილოგრამზე – 8 გრამი ცილა.

თუმცა, მეცნიერები თანხმდებიან იმაზე, რომ კვების დროს უმეტესად აუცილებელია ბალანსის და მრავალფეროვნების დაცვა. როცა ერთი ტიპის საკვებს მეორეს შემცირების ხარჯზე გაზრდი, იზრდება ჯანმრთელობის რისკებიც. ე.წ. ცილოვანი დიეტების მიმდევრებს ხშირად აღენიშნებათ კალციუმის და ვიტამინ D-ს ნაკლებობა, მაღალი ქოლესტერინი, მცენარეული ბოჭკოს მიღების სიმცირით გამოწვეული საჭმლის მომნელებელი სისტემის პრობლემები. რისკებს შორის სახელდება ნაწლავის კიბოებიც. რისკების გათვალისწინებით, ჯანდაცვის მსოფლიო ორგანიზაცია დიდი ხანია რაციონში წითელი ხორცის შემცირების რეკომენდაციით გამოდის.

ცოტა ხნის წინ გამოქვეყნდა ავსტრალიელ მეცნიერთა კვლევა, რომელიც ამბობს, რომ ცილის დიდი რაოდენობით მიღებაზე დაფუძნებული დიეტები ჯანმრთელობაზე უარყოფით გავლენას ახდენს და სიცოცხლის ხანგრძლივობასაც ამცირებს.  ნაშრომის ავტორები ამტკიცებენ, რომ ორგანიზმს ნახშირწყლებიც სჭირდება და ამ უკანასკნელის დრამატულად შემცირება ჯანმრთელობას ვნებს.

ავსტრალიელი მეცნიერები ამბობენ, რომ ცილების ჭარბად მიღების შემთხვევაში, უჯრედში ცილების სინთეზის პროცესი ჩქარდება. სწრაფ სინთეზთან ერთად, იზრდება ჯანმრთელობის რისკებიც. ეს დაახლოებით ისევე ხდება, როგორც მანქანის ტარების დროს, რაც უფრო მაღალი სიჩქარით მივდივართ, მით მეტია შეცდომის დაშვების რისკი და ამ შეცდომით გამოწვეული შედეგის მასშტაბი – განმარტავენ მკვლევარები.

“ნახშირწყლებზე ბევრი ცუდი იწერება, განსაკუთრებით როცა საქმე დიეტას ეხება. მაგრამ, საბოლოო ჯამში, მთავარი საიდუმლო ბალანსშია და იმის ცოდნაში, თუ რა განსხვავებაა “კარგ” და “ცუდ” ნახშირწყლებს შორის” – ამბობს კვლევის წამყვანი ავტორი, პროფესორი ქრისტოფერ პროდი.

ის გახდომის მსურველებს ურჩევს ნახშირწყლები ხილით, ბოსტნეულით და გადაუმუშავებელი ბურღულეულით მიიღონ. გასახდომად და გაჯანსაღებისთვის კი ხმელთაშუა ზღვის დიეტაზე დაფუძნებული რაციონი არჩიონ, რომელსაც წონაში კლების დადასტურებული ეფექტი აქვს და არც ადამიანის ჯანმრთელობას აზიანებს.

გახდომის ყველაზე ჯანმრთელ გზად ისევ მაქსიმალურად დაბალანსებული,  დღიური კალორიების 10-20 პროცენტამდე შემცირებაზე დაფუძნებული და მრავალფეროვანი კვება რჩება. მაქსიმალური ეფექტურობისთვის და დაკლებული წონის შესანარჩუნებლად, კვების ახალი რეჟიმი თვეების მანძილზე უნდა გაგრძელდეს.

ლენტეხელები მდინარე ხედულაჰესის მშენებლობას აპროტესტებენ. ისინი თვლიან, რომ მდინარე ხედულაზე ჰესის აშენება მათ სერიოზულ პრობლემებს შეუქმნის. დღეს პრემიერ-მინისტრის მრჩეველს, სოზარ სუბარსა და მაჟორიტარ დეპუტატს, ვიქტორ დოლიძეს ლენტეხში საპროტესტო შეძახილებით დახვდნენ.

ადგილობრივებმა იმ შენობის შესასვლელი ჩაკეტეს, სადაც ხელისუფლების წარმომადგენლებს „ხელედულა ჰესის“ შესახებ მსჯელობა ჰქონდათ დაგეგმილი. სიტყვიერი შელაპარაკებისა და ფიზიკური შეხლა-შემოხლის გამო, შეხვედრა ჩაიშალა. ლენტეხელებმა მთავრობა საჯაროდ კიდევ ერთხელ გააფრთხილეს, რომ ხეობაში ჰესს არ ააშენებინებენ.

ადგილობრივების მიერ შენობის ბლოკირების გამო, პრემიერ-მინისტრის მრჩეველმა შეხვედრის ადგილი შეცვალა და მსურველები სამსჯელოდ სხვა შენობაში დაპატიჟა. საპროტესტო აქციის მონაწილეებმა იქაც გადაინაცვლეს და შეხვედრა საბოლოოდ ჩაშალეს.

ადგილობრივები ამბობენ, რომ ხატზე დაიფიცეს, რომ მდინარე ხელედულაზე ჰესს არავის ააშენებინებენ და სიტყვას არ გატეხენ.

მდინარე ხელედულაზე 50 მეგავატიანი „ხელედულა 3-ის“ მშენებლობა იგეგმება. მთავრობის წარმომადგენლების განცხადებით, ამ პროექტის მოწინააღმდეგე ხეობის მოსახლეობის მხოლოდ მცირე ნაწილია. დღევანდელი პროტესტის მიუხედავად, ახალი ჰესის მნიშვნელობაზე სასაუბროდ ლენტეხში ჩასვლას კვლავაც გეგმავენ.

ჰესის მოწინააღმდეგე ადგილობრივებს საკუთარი უფლებების დაცვა სასამართლოს გზით აქვთ გადაწყვეტილი. საქმე, რომელშიც ლენტეხელებს „ახალგაზრდა იურისტთა ასოციაცია“ ეხმარება, უკვე თბილისის საქალაქო სასამართლოშია.

გარემოსდაცვითი ზედამხედველობის დაცვის კახეთის რეგიონული სამსახურის უფროსს, ბესო შუბითიძეს ცეცხლსასროლი იარაღიდან ესროლეს.

საუბარია საფანტიან თოფზე, რომელიც შუბითიძეს ბრაკონიერმა ესროლა.

გავრცელებული ინფორმაციით, ინციდენტი სოფელ კარდენახის ტყის მონაკვეთში იმ დროს მოხდა, როცა ის  სამსახურებრივ მოვალეობას ასრულებდა.

მას სხეულზე ნაკაწრები აღენიშნება და ამ დროისათვის სახლში იმყოფება.

შინაგან საქმეთა სამინისტროში აცხადებენ, რომ პოლიციამ უკვე დაადგინა დანაშაულის ჩამდენი პირი. მომხდარზე მიმდინარეობს გამოძიება სისხლის სამართლის კოდექსის 353-ე პრიმა მუხლის II ნაწილით.