Blog

თავდაცვის ყოფილი მინისტრი შინაგან საქმეთა მინისტრს ღია წერილით მიმართავს, რომელსაც ფეისბუქ გვერდზე აქვეყნებს:

“ვიფიქრე ღია წერილით მივმართომეთქი, მაგრამ ვის გინდა, რომ მიმართო?

პრემიერს?, თვითონაც არ სჯერა, რომ პრემიერია.

ბიძინას?, მაინც არ წაიკითხავს, იმიტომ, რომ მას ყველაფერს მისი ეკა უკითხავს და იმასაც როდის მიხვდება კაცმა არ იცის.

კობახიძეს?, შეაყარე კედელს ცერცვი. არც ექნება გაგონილი ესეთი გამოთქმა.

ღარიბაშვილს?, გამეცინა.

მგონი ისევ გახარიას ჯობია მივმართო. თავი ისე მოაქვს ვითომ ყველაზე ადექვატურია. თან წერილების წერაც სცოდნია და ე.ი. კითხვაც ეცოდინება.

ბატონო მინისტრო,

ვეჭვობ, “ერთხანს” კიდევ მოუწევს თქვენს გუნდს ხელისუფლებაში ყოფნა. ამასობაში კი ქვეყანა უკან უკან მიდის და ჭაობში იძირება. საუკეთესო გამოსავალი თქვენი სახლში წასვლა იქნებოდა, მაგრამ ამას დრო დასჭირდება. დროს კი ქვეყანა ფუჭად კარგავს. ამასობაში კი საჭიროა სასიცოცხლო რეფორმების გატარება იმისთვის, რომ თქვენს მიერ დაჭაობებული წყალი აიმღვრეს და ქვეყანას ძველი “მიმზიდველობა” დაუბრუნდეს.

ბევრი “უგონო” დღემდე ფიქრობს, რომ სახელმწიფოს ხერხემალი შინაგან საქმეთა სამინისტროა, მაგრამ ამ “უგონოების” ნაფიქრს თქვენც და თქვენი არაერთი წინამორბედი შეცდომაში ჰყავს შეყვანილი. სახელმწიფოს ხერხემალი განათლების სამინისტრო და საშუალო სკოლაა, ხოლო შსს მასზე ჩამოკიდებული ქონით გამოტენილი დუნდულები, რომელიც სასიკვდილოდ ამძიმებს მას და სახელმწიფოს ჯანმრთელობას აზიანებს. ამ ყველაფერს ნიშნისმოგება არ მალაპარაკებს. ეს ყველაფერი თუ რას ნიშნავს, მაგ კაბინეტში ყველაზე ადექვატურად პირველმა მე დავინახე, იმიტომ, რომ კომუნისტებიდან დაწყებული, კვირაია-თარგამაძე-ნარჩემაშვილით დამთავრებული ყველას დატოვებული ნაგვის წმენდა მე მომიწია. თქვენ კი გასუფთავებული კაბინეტიდან “იმდენს ვეღარ დაინახავთ”.

რას გთავაზობთ?

სახელმწიფოს გასუქებული დუნდულების შეფერთხვას, რათა ხერხემალს ზედმეტი წონა მოვაშოროთ. ამით კი სახელმწიფო გამოვაჯანმრთელოთ.

გამოყავით სამინისტროდან ცენტრალური ფუნქციების მატარებელი რგოლი: კრიმინალური, სამხარეო და სასაზღვრო პოლიცია, კრიმინალისტიკის ლაბორატორია, სანებართვო სამსახური (იარაღის, მართვის მოწმობების, ავტომობილების რეგისტრაცია) საინფორმაციო სამსახური და მონაცემთა ბაზა და მის ბაზაზე შექმენით ახალი (შსს) ორგანო.

დარჩენილი ფუნქციები: რაიონული და საპატრულო პოლიცია (ადმინისტრაციული ჯარიმებიანად მიმართეთ ადგილობრივ ბიუჯეტში), აგრეთვე, სამაშველო სამსახური გახადეთ მუნიციპალური და დაუქვემდებარეთ მერებს და გამგებლებს (საერთოდ მერები და გამგებლებიც ისეთი გყავთ ორ ბატს, რომ ვერ ჩააბარებ, მაგრამ სულ ასე ხომ არ იქნება);

სისხლის სამართლის საპროცესი კოდექსის დონეზე მოახდინეთ დანაშაულის იურისდიქციის დიფერენციაცია. გარკვეული დანაშაულის გამოძიება (მაგ. მკვლელობა, ყაჩაღობა, კიბერდანაშაული და ა.შ.) გახადეთ ექსკლუზიურად ცენტრალური, კრიმინალური პოლიციის ქვემდებარე, ხოლო ნაკლებად მძიმე დანაშაულის გამოძიება თუ ადგილობრივი მნიშნელობის წვრილმანი საკითხების გადაწყვეტა ექსკლუზიურად მერებისადმი დაქვემდებარებული მუნიციპალური პოლიციის ქვემდებარე.

ვინ უნდა დანიშნოს მუნიციპალური პოლიციის უფროსი?

ამ ყველაფრის ყველაზე საინტერესო ნაწილი აქაა.

საკანონმდებლო აქტით დაადგინეთ მუნიციპალური პოლიციის უფროსის თანამდებობისათვის აუცილებელი კრიტერიუმები (განათლება, ასაკი, სტაჟი და ა.შ.) ხოლო მათი არჩევა მოხდეს ხალხის მიერ პირდაპირი წესით, კონკრეტულ საარჩევნო ოლქში.

პირველი, ამით პოლიციის უფროსის ნამუშევარს შევაფასებინებთ უშუალოდ ხალხს და არა თქვენ ან თქვენს რომელიმე “დოქსოფულო” მოადგილეს;

მეორე, პოლიციის უფროსებს ვაქცევთ ნამდვილ საჯარო, საზოგადოებასთან ანგარიშვალდებულ პირებად, რომლებმაც საარჩევნო კამპანიისათვის დამახასიათებელი ყველა წესის დაცვით უნდა მოიპოვონ მათი თანამდებობა (ამ დროს ისწავლიან, რომ ოქროს ჯაჭვები და სამაჯურები უნდა მოიხსნან, კევი არ უნდა აღლაჭუნონ და ა.შ.) და არა თქვენი ახლობლობით ან ვაზელინის დიდი დოზით.

ყველაზე მთავარი. გენერალურ პროკურორს აქამდე დიპლომი ვერ მოვატანინეთ და შესაბამისად ამასაც ვერ გაიგებს, ამიტომ ამაზეც თქვენ გეტყვით. ყველა რეზონანსული საქმის გამოსაძიებლად, რომელიც წინა 9 წელს ეხება, თქვენი 7 წლის მანძილზე მოხდა თუ აწი მოხდება და მაინც ვერ იძიებთ და არც საზოგადოების ნდობა არსებობს ასეთი გამოძიების და პროკურატურისადმი (ხორავას, მაჩალიკაშვილის თუ სააკაშვილის კოსტუმების საქმე), შემოიღეთ დამოუკიდებელი სპეცპროკურორის ინსტიტუტი, რომელსაც არა მოქმედ პროკურორთა შემადგენლობიდან, არამედ საზოგადოებისათვის სანდო იურისტთა წრიდან დროებით, მხოლოდ კონკრეტული საქმის გამოძიების მიზნით დანიშნავს გენერალური პროკურორი და ამ უკანასკნელს აეკრძალება გამოძიების პროცესში ჩარევა. სპეცპროკურორი კი ბულტერიერივით დაგლიჯავს ყველას და ყველაფერს, რომელიც მას სამართლის ძიების და მართლმსაჯულების განხორციელების გზაზე წინ გადაეღობება.

ამით თავიდან აიცილებთ პასუხისმგებლობას, გადაირჩენთ თქვენს ისედაც შელახულ ან აწი შესალახ რეპუტაციას, რასაც თქვენივე არაპროფესიონალი პროკურორები ისედაც არაფრად აგდებენ.

თან, ამით განტვირთავთ იმ მონსტრს, რომელსაც ხელმძღვანელობთ; უფრო ქმედითს გახდით დანაშაულთან ბრძოლას; აამაღლებთ მოქალაქის შეგნებას პოლიციის უფროსის შერჩევის პროცესით; პოლიციის უფროსებად მივიღებთ უფრო “დახვეწილ”, პასუხისმგებლობის მქონე მოქალაქეებს და დაზოგავთ მილიონობით ხარჯს, რომელიც განათლებას წაადგებოდა.

მეორე, ამ მასშტაბის რეფორმის განხორციელება კვლავ “მიმზიდველს” გახდის ქვეყანას და დავიბრუნებთ რეფორმების ფლაგმანის სტატუსს.

გულახდილად კი გეტყვით, რომ რაც შემოგთავაზეთ იმის 10%-საც კი ვერ გაიგებთ და ჩაწვდებით ვერც თქვენ და ვერც ქართული ოცნების ელიტის 99%, განსაკუთრებით კი ბიძინა.

პ.ს. რეფორმის საავტორო უფლებები დაპატენტებული მაქვს.

პ.პ.ს. ხომ ხედავთ თქვენგან განსხვავებით შაბათ დილასაც ვმუშაობ, ოღონდ ქვეყანას რამე ეშველოს.“– წერს ოქრუაშვილი

2012 წლის ივნისში საქართველოში ვიზიტის დროს ჰილარი კლინტონს ბიძინა ივანიშვილთან შეხვედრას უმზადებდნენ. ამერიკულმა ორგანიზაცია Judicial Watch-მა ყოფილი სახელმწიფო მდივნის ჰილარი კლინტონის ახალი გასაიდუმლოებული იმეილები მოიპოვა, რომლებიც 756 გვერდს მოიცავს. ეს არის უკანასკნელი ნაწილი იმეილებისა, რომლებიც FBI-მ რამდნეიმე წლის წინ გამოააშკარავა. სწორედ ამ იმეილებს შორისააა საუბარი ჰილარი კლინტონისა და ბიძინა ივანიშვილის შეხვედრაზეც. Judicial Watch-ი ივანიშვილს პუტინისტ ქართველ მილიარდელად მოიხსენიებს, რომელიც დაკავშირებული იყო რუსეთის მიერ გაყალბებულ საპრეზიდენტო არჩევნებთან საქართველოში. გასაჯაროებული იმეილები შეიცავს მიმოწერას კლინტონის თანაშემწე კრეიგ სმითსა და შერილ მილს შორის, რომელიც 2012 წლის მაისში გაიმართა. კლინტონის გუნდის წევრთა მიმოწერიდან ჩანს, რომ სახელმწიფო მდივანსა და ბიძინა ივანიშვილს შორის შეხვედრა შედიოდა კლინტონის შეხვედრების გეგმაში საქართველოში ვიტის დროს, თუმცა შედგა თუ არა ეს შეხვედრა დადასტურებული არ არის.

ლივერპულში, ენფილდის სტადიონზე საფეხბურთო კლუბების “ლივერპულისა” და “მილანის” ვეტერან ფებურთელებს შორის დღეს ამხანაგური მატჩი გაიმართება. ლეგენდების მატჩში თბილისის მერი და „მილანის“ ყოფილი მცველი კახა კალაძეც ითამაშებს. თამაში ჩვენი დროის 17:30 საათზე დაიწყება.

გუნდების შემადგენლობა ასეთი იქნება:

ლივერპული: ირჟი დუდეკი, სენდერ ვესტერველდი, ლუის გარსია, სტივ მაკმანამანი, ვლადიმირ შმიცერი, ჯიბრილ სისე, რობი ფაულერი, დანიელ აგერი, ჯეიმი კარაგერი, სამი ჰიიპია, გლენ ჯონსონი, ალან კენედი, ბიორნ ტორ კიარმი, ჯეისონ მაკატიერი, ჯიმი ტრაორე, პატრიკ ბერგერი, სალიფ დიაო, ჯონ ოლდრიჯი, დირკ კუიტი, მაიკლ ოუენი, იან რაში.

მილანი: კახა კალაძე, პაოლო მალდინი, ნესტა, ანდრეა პირლო, მანუელ რუი კოშტა, ნელსონ დიდა, კრისტიან აბიატი, ვალერიო ფიორი, მარკო სტორარი, მასიმო ამბროზინი, დანიელე ბონერა, მარკო ბორიელო, კაფუ, ანჯელო კარბონე, ალესანდრო კოსტაკურტა, ჯუზეპე ფავალი, ჯენარო გატუზო, ალბერტო ჯილარდინო, რიკარდო კაკა, მარეკ იანკულოვსკი, ფილიპო ინძაგი, მასიმო ოდო, ჯუზეპე პანკარო, სერჟინიო, დარიო შიმიჩი, იაპ სტამი.

“ძალიან სასიამოვნოა, რომ მაქვს შესაძლებლობა, წლების შემდეგ, კიდევ ერთხელ განვიცადო ის გრძნობა, როდესაც საპასუხისმგებლო, მნიშვნელოვანი თამაშისთვის ემზადები. მიხარია, რომ ვხვდები ჩემს თანაგუნდელებს, მეგობრებს, რომლებთან ერთადაც 10 წელი გავატარე. ჩემს კარიერას “მილანში” წარმატებულს დავარქმევდი. რისი მოგებაც შესაძლებელი იყო კლუბის დონეზე, ერთად ყველაფერი მოვიგეთ, თუმცა იყო ჩემპიონთა ლიგის ერთი რთული ფინალი, როდესაც 3:0 ვიგებდით. მეორე ტაიმში სამი ბურთი გაგვიტანეს, გაგვითანაბრეს და შემდეგ მცირედით დავმარცხდით. ეს შეხვედრა ზუსტად “ლივერპულთან” იყო და თითოეულმა ჩვენგანმა ძალიან მძიმედ გადავიტანეთ. დღეს იმართება საქველმოქმედო მატჩი იგივე შემადგენლობით, როგორც 2007 წლის მატჩში. ძალიან კარგი განწყობაა, ყველა ბილეთი გაყიდულია და ვფიქრობ, გულშემატკივარი ისიამოვნებს”, – განაცხადა კახა კალაძემ 

თბილისში ჰესების მშენებლობის წინააღმდეგ – მაშტაბური აქცია გაიმართება. საპროტესტო გამოსვლებს ლეიბორისტული პარტია აანონსებს. პარტია მოსახლეობას, რომლებიც ჰესების მშენებლობას აპროტესტებს სოლიდარობას უცხადებს. ლაშა ჩხარტიშვილის თქმით, ბიძინა ივანიშვილმა საკუთარი მოსახლეობის წინააღმდეგ ენერგოომი დაიწყო. პარტიაში ამბობენ,რომ ლენტეხის, ქვემო და ზემო სვანეთის და რაჭის მოსახლეობის მიმართ სოლიდარულები არიან და დიდი ჰიდროელექტროსადგურების აკრძალვას იტხოვენ.

“ჩვენ მოვიგებთ ომს”, “აფხაზეთი და სამაჩაბლო საქართველოა” – ამ ტრანსფარანტებით ქუთაისის აკაკი წერეთლის უნივერსიტეტის სტუდენტები და ლექტორ-მასწავლებლები ატოცში ჩავიდნენ და რუსული ოკუპაცია გააპროტესტეს. აქციის გამართვის იდეა სტუდენტებს ეკუთვნის. მათი თქმით, მშვიდობიანი აქციის მიზანია, მივიდნენ იქ, სადაც რუსი ოკუპანტები ამ დრომდე მიწების მიტაცებას ცდილობენ. მათ სხვა სტუდენტებსაც აქციაში ჩართვისკენ მოუწოდეს.

მამაკაცი რომელიც ონის მუნიციპალიტეტში 2 თვის წინ დაიკარგა, შოვთან ახლოს ტყეში გარდაცვლილი იპოვეს.

23 წლის შოთა სამხარაძეს 14 იანვრიდან ეძებდნენ. ადგილობრივების თქმით მამაკაცი ბოლოს სასტუმროების მიმდებარე ტერიტორიაზე გამართულ თოვლის ფესტივალზე ნახეს, ფესტივალის შემდეგ კი ის აღარავის უნახავს.

შინაგან საქმეთა სამინისტროს ცნობით, ცხედარი სამართალდამცავებმა კურორტ შოვთან ახლოს ნახეს. გამოძიება სსკ-ის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.

გაეროს ადამიანის უფლებათა საბჭომ საქართველოს ოკუპირებულ ტერიტორიებთან დაკავშირებით რეზოლუცია მიიღო. საბჭო კიდევ ერთხელ ადასტურებს საქართველოს სუვერენიტეტის და ტერიტორიული მთლიანობის მხარდაჭერას მის საერთაშორისოდ აღიარებულ საზღვრებში და აღიარებს საქართველოს მთავრობის ძალისხმევას ქვეყანაში დემოკრატიის, კანონის უზენაესობისა და ადამიანის უფლებათა განმტკიცების კუთხით. ადამიანის უფლებათა საბჭო შეშფოთებას გამოთქვამს საქართველოს ოკუპირებულ ტერიტორიებზე არსებული მძიმე ვითარების გამო და ხაზს უსვამს ამ რეგიონებში მონიტორინგის მექანიზმების შესვლის აუცილებლობას. საბჭო ასევე ავალებს გაეროს ადამიანის უფლებათა უმაღლეს კომისარს, წარადგინოს ანგარიშები რეზოლუციაში ასახულ საკითხებთან დაკავშირებით. ჟენევაში გამართულ სხდომაზე რეზოლუცია საგარეო საქმეთა მინისტრის მოადგილემ ლაშა დარსალიამ წარადგინა, რომელმაც დელეგატებს აფხაზეთისა და ცხინვალის რეგიონებში არსებულ მძიმე ვითარებაზე მიაწოდა ინფორმაცია, რომლის უკანასკნელი ტრაგიკული მაგალითი ოკუპირებული აფხაზეთის ტერიტორიაზე საქართველოს მოქალაქის ირაკლი კვარაცხელიას გაურკვეველ ვითარებაში გარდაცვალების ფაქტია.

“რეზოლუცია ეხება ჰუმანიტარული და ადამიანის უფლებათა კუთხით არსებულ საზარელ ვითარებას საქართველოს ოკუპირებულ ტერიტორიებზე, რომლებიც საქართველოს ხელისუფლების კონტროლს გარეთ რჩება.მწუხარებით უნდა აღვნიშნო საქართველოს მოქალაქეების უკანონო დაკავებისა და სიცოცხლის ხელყოფის შემაშფოთებელი ტენდენციები, რაც მიუთითებს ეთნიკური ნიშნით ძალადობისწახალისებაზე ორივე რეგიონში. ამის ბოლო მაგალითია საქართველოს მოქალაქის, ირაკლი კვარაცხელიას სიკვდილი, რომელიც უკანონოდ დააკავეს მიმდინარე წლის 10 მარტს და გადაიყვანეს ოკუპირებულ აფხაზეთში უკანონოდ განთავსებულ სამხედრო ბაზაზე, სადაც ის გარდაიცვალა. ეს ტრაგიკული ინციდენტი ცხადყოფს ოკუპირებულ ტერიტორიებზე გაეროს ადამიანის უფლებათა უმაღლესი კომისრის ოფისის, ასევე სხვა საერთაშორისო და რეგიონალური ადამიანის უფლებათა მექანიზმების გადაუდებელი შესვლის აუცილებლობას“. – ლაშა დარსალია, საგარეო საქმეთა მინისტრის მოადგილე

„ავსტრალია საქართველოს ტერიტორიული მთლიანობისა და სუვერენიტეტის ძლიერი და მუდმივი მხარდამჭერია. ჩვენ შეშფოთებულები ვრჩებით იმ ფაქტით, რომ ადამიანის უფლებათა უმაღლესი კომისრის ოფისს კვლავ არ აქვს შესაძლებლობა შევიდეს საქართველოს ამ რეგიონებში. ეს რეზოლუცია ადასტურებს ადამიანის უფლებათა მექანიზმების საქართველოს ოკუპირებულ ტერიტორიებზე შეუფერხებელი შესვლის საჭიროებას. გალის რეგიონში მომხდარმა ბოლო ტრაგიკულმა ინციდენტმა დაგვანახა, თუ რა მნიშვნელოვანი როლი შეიძლება ჰქონდეს საერთაშორისო მონიტორინგის მექანიზმების მიერ უზრუნველყოფილ გამჭვირვალობას. ადამიანის უფლებათა კუთხით შემდგომ საერთაშორისო ჩართულობას და ანგარიშვალდებულებას შეუძლია ხელი შეუწყოს სიტუაციის შემდგომი გაუარესების თავიდან აცილებას“. – სალი მენსფილდი, ავსტრალიის ელჩი გაეროს ჟენევის ოფისში

„ძალზედ შემაშფოთებელი მოხსენებები საქართველოს ოკუპირებულ ტერიტორიებზე ჩადენილი დარღვევების შესახებ, ხაზს უსვამს ადამიანის უფლებათა სიტუაციის გამოსწორებისთვის დამოუკიდებელი მონიტორინგისა და ანგარიშგების საჭიროებას ისეთი ავტორიტეტული ორგანიზაციების მხრიდან, როგორიცაა გაეროს ადამიანის უფლებათა უმაღლესი კომისრის ოფისი. ამის საჭიროებაზე მეტყველებს ასევე ირაკლი კვარაცხელიას გაურკვეველ ვითარებაში სიკვდილი”.- ჯულიან ბრეისვეითი, დიდი ბრიტანეთის წარმომადგენელი გაეროს ჟენევის ოფისში

ჩინეთში ქიმიური ქარხნის აფეთქების შედეგად დაღუპულთა რიცხვი 64-მდე გაიზარდა. დაშავებულია რამდენიმე ასეული ადამიანი. მათგან 94 პაციენტის მდგომარეობა მძიმეა. აფეთქებამ საცხოვრებელი სახლებიც დააზიანა. ადგილობრივი ხელისუფლების თქმიღთ, ეს საცხოვრებელი სახლები აღდგენას არ ექვემდებარება. ძიანსუს პროვინციაში მდებარე ქიმიურ ქარხანაში აფეთქება 20 მარტს მოხდა. ტრაგედიის დროს შენობაში თანამშრომლები იმყოფებოდნენ. აფეთქება იმდენად მძლავრი იყო, რომ სეისმოლოგებმა რეგიონში აფეთქებით გამოწვეული 2,2 მაგნიტუდის მიწისძვრა დააფიქსირეს.