Blog

ოჯახს ექიმისთვის არ მიუმართავს-სოფელ ბრეთში მცირეწლოვანი ბავშვი გარდაიცვალა

ქარელის მუნიციპალიტეტის სოფელ ბრეთში გარდაცვლილი 1 წლის და 10 თვის ბავშვი ექსპერტიზიდან საკუთარ სახლში გადაასვენეს. გახდა თუ არა მცირეწლოვანი ბავშვის გარდაცვალების მიზეზი ოჯახში არსებული არასათანადო პირობები, გამოძიება დაადგენს.

როგორც ცნობილია, ოჯახი სოციალურად დაუცველია და ბავშვის სამკურნალოდ სამედიცინო დაწესებულებისთვისაც კი არ მიუმართავთ.

გარდაცვლილი ბავშვის ბებია ამბობს, რომ წინა დღეს მცირეწლოვანს სიცხე ჰქონდა, წამალი დაალევინეს. მისივე თქმით, სიცხის დაწევის შემდეგ ბავშვი დილით კი უკვე გარდაცვლილი დახვდათ.

“სიცხე მისცა წუხელ, ციტრამონი დავალევინეთ ნახევარი და დაუწია იმ წუთში. მერე დავაძინეთ, დილის 06:00 საათზე შემოვარდა ბიჭი და ბაბო, რაღაც ბავშვი ცივიაო, მომარბენინებდა ხელით და მოდი, აბა, ნახე, რა სჭირს, რა მოუვიდა ბავშვსო და ვნახე და კრიჭა უკვე შეკრული ჰქონდა ბავშვს. აქ დაყავდა ხოლმე ამბოლატორიაში, აცრებზე, გასინჯვაზე, თუ რამე პრობლემა იქნებოდა, მიყავდა ხოლმე. არაფერი არ სჭირდა ამ ბავშვს, ასე უცებ არ ვიცი,” – თქვა ლენა რუტინსკიმ.

პედიატრი, თამარ ოქროპირიძე ადასტურებს, რომ ბავშვები არასათანადო პირობებში იზრდებოდნენ და იმ ფაქტსაც იხსენებს,რომ ცოტა ხნით ადრე მცირეწლოვნის უფროსი ძმა ფილტვების ანთებით ქარელის ცენტრალურ საავადმყოფოში სამკურნალოდ თავად გადაამისამართა.

“ოთხშაბათს უფროსი შვილი მომიყვანა დედამ, იმას ფილტვების ანთება დავუდგინე და გავაგზავნე საავადმყოფოში, იმიტომ, რომ ოჯახს წამლის ყიდვის საშუალება არ აქვს. ბავშვები ძალიან შეუფერებელ პირობებში იზრდებიან. გავაგზავნე, გადავურეკე პედიატრსაც, გავაკონტროლე, ბავშვი დააწვინა, ქარელის ცენტრალურ საავადმყოფოში მკურნალობდა, ფილტვების ანთება დაუდგინდა. მეორეც წაუყვანია სასწრაფოს, ისიც ცერემბრალური დამბლით არის ბავშვი, ორი დღის მერე ისიც დაწვა,” – ამბობს პედიატრი.

ქარელის ცენტრალური საავადმყოფოს ექიმი, ლია გოჩაშვილი ადასტურებს, რომ ამ ოჯახიდან ორი ბავშვი გადის მკურნალობის კურსს.

“ბავშვზე, რომელიც ბინაზე დაიღუპა, არც ოჯახის ექიმს არ უნახია და არც ჩვენთან ექიმთან არ ჰყოლიათ. მე როგორც ვიცი, ბებიის გადმოცემით, არც მკურნალობა არ უტარდებოდა ბინაზე, თუმცა, იმასაც აღენიშნებოდა, ბებიის თქმით, გრიპოზული მოვლენები,” – განაცხადა ლია გოჩაშვილმა.

შინაგან საქმეთა სამინისტრომ გამოძიება გაუფრთხილებლობით სიცოცხლის მოსპობის მუხლით დაიწყო.

March 29, 2019
” მე დავუკრავ ყველგან რუსეთის გარდა” – ქართველი პიანისტი ბექა გოჩიაშვილი

ცნობილი ქართველი პიანისტი ბექა გოჩიაშვილი სტენლი კლარკის ბენდში უკრავს. ბენდმა ცოტახნისწინ ახალი ალბომი გამოუშვა და ტურნე რომელიც მთელს მსოფლიოში გაიმართება უკვე დაგეგმილია. თუმცა ბექა გოჩიაშვილი უარს ამბობს რუსეთში დაკვრაზე.

ქართველი პიანისტი საკუთარ ფეისბუქ გვერდზე დაგეგმილი ღონისძიებების სიას აქვეყნებს და წერს რომ ” მე დავუკრავ ყველგან მოსკოვსა და სანკტ-პეტერბურგის გარდა”

March 29, 2019
20 ფაქტი ცნობილი ადამიანების შესახებ, რომლებიც შესაძლოა არ იცოდით

{{ARTICLEIMAGE}}1. ბილ გეიტსმა კომპიუტერების პროგრამირება 13 წლის ასაკში დაიწყო.

2. აინშტაინს დღე-ღამეში 10 საათი ეძინა

3. ისააკ ნიუტონმა 23 წლის ასაკში აღმოაჩინა გრავიტაციის კანონი

4. ლეონარდო დავინჩი 10 წლის განმავლობაში ხატავდა „მონა ლიზა“-ს პორტრეტს

5. დისნეიმ 1931 წლიდან 1969-წლამდე 35 ოსკარი აიღო

6. ალბერტ აინშტაინმა მანქანის ტარება არ იცოდა

7. სანამ კიანუ რივზი სამსახიობო კარიერას დაიწყებდა კანადაში მაკარონის კერძებს ყიდდა

8. მაკრატელი ეგვიპტელებმა გამოიგონეს

9. მადონა და მაიკლ ჯექსონი 1958 წელს დაიბადნენ

10. ელვის პრესლის მეორე სახელი აარონი იყო

11. ელვის პრესლის ტყუპის ცალი ჰყავდა

12. ჯორჯ ბუშსა და სადამ ჰუსეინს ერთდაიგივე მეწაღე ჰყავდათ

13. ლეონარდო და ვინჩის შეეძლო ერთი ხელით წერა ხოლო მეორე ხელით ხატვა ერთდროულად.

14. მოცარტს სკოლაში არასდროს უვლია

15. იტალიის სახელმწიფო დროშა ნაპოლეონმა შექმნა

16. ალბერ ეინშტეინს ერთხელ ისრაელის პრეზიდენტობა შესთავაზეს, თუმცა მან უარი თქვა და

განაცხადა, რომ პრობლემების თავი არ ჰქონდა.

17. ბარაკ ობამას საყვარელი ანიმაციური სერიალი “SpongeBob SquarePants“-ია

18. ჯონ ლენონი დღის განმავლობაში 20-30 ფინჯან ყავას სვამდა

19. ჯონ ლენონზე გავლენა ელვის პრესლიმ იქონია

20. ჯორჯ ბერნარდ შოუ ერთადერთი ადამიანია რომელიც „ნობელის პრემიის’ ლაურეატია და ამავე დროს მიღებული აქვს ოსკარი ფილმისთვის „ Pygmalion“

March 29, 2019
მთავრობა საპატრიარქოს უძრავ ქონებას კვლავ ჩუქნის

საქართველოს მთავრობა აგრძელებს საპატრიარქოსთვის დიდი ოდენობით უძრავი ქონების გადაცემის პრაქტიკას- ამის შესახებ ადამიანის უფლებების სწავლებისა და მონიტორინგის ცენტრმა განაცხადა.

EMC-მ 2016-2018 წლებში, ყოველწლიური საბიუჯეტო სუბსიდირების მიღმა, სახელმწიფოს მხრიდან საპატრიარქოსთვის ფინანსური და ქონებრივი რესურსის გადაცემის პრაქტიკა შეისწავლა. კვლევის მიხედვით, 2016-2017 წლებთან შედარებით, 2018 წელს, საპატრიარქოსთვის გადაცემული ქონების რაოდენობა იმატებს, რასაც მიმდინარე პოლიტიკურ პროცესებს უკავშირდება.

“ამ წლების პრაქტიკის ანალიზი აჩვენებს, რომ მთავრობა, ლეგიტიმური საჯარო მიზნის გარეშე აგრძელებს საპატრიარქოსთვის ფინანსური და მატერიალური რესურსების გადაცემის პრაქტიკას. საპატრიარქოსთვის ამ უძრავი ქონების გადაცემა, როგორც წესი, არ უკავშირდება საბჭოთა პერიოდში ჩამორთმეული ისტორიული საეკლესიო ქონების დაბრუნების ვალდებულებას.

საქართველოს სსიპ სახელმწიფო ქონების ეროვნული სააგენტოს მიერ მოწოდებული ინფორმაციის მიხედვით დგინდება, რომ 2016-2018 წლებში საპატრიარქოს საკუთრებაში აქტიურად გადაეცემა არამხოლოდ ის მიწის ნაკვეთები, რომელიც მის ისტორიულ საკუთრებას წარმოადგენდა, არამედ, სახელმწიფოს საკუთრებაში რეგისტრირებული სხვა მიწის ნაკვეთებიც. საპატრიარქოს, უძრავი ქონება საკუთრებაში სიმბოლურ ფასად, 1 ლარად, ან სრულიად უსასყიდლოდ გადაეცემა. სახელმწიფო, როგორც წესი, არასოდეს უთითებს, რა მიზნით გადასცემს ქონებას და გადაცემამდე, არც საბაზრო ღირებულებას განსაზღვრავს. შესაბამისად, უცნობია რა ღირებულების უძრავი ქონება გადაეცემა საქართველოს საპატრიარქოს ყოველწლიურად.

მოწოდებული ინფორმაციის მიხედვით დგინდება, რომ:

2016 წელს, საქართველოს საპატრიარქოს, უსასყიდლოდ, საკუთრებაში გადაეცა 19 არასასოფლო-სამეურნეო მიწის ნაკვეთი, საერთო ფართობით 236 705 კვ.მ, რომელზეც განთავსებული იყო 3 768.7 კვ.მ ფართობის შენობა ნაგებობები.

2017 წელს გადაეცა 21 არასასოფლო-სამეურნეო მიწის ნაკვეთი, საერთო ფართობით 87 984 კვ.მ, რომელზეც განთავსებული იყო 3 031.8 კვ.მ ფართობის შენობა ნაგებობები.

2018 წელს გადაეცა, 22 მიწის ნაკვეთი, საერთო ფართობით 420 102 კვ.მ, მათ შორის 300 245 კვ.მ სასოფლო-სამეურნეო და 119 857 არასასოფლო-სამეურნეო მიწის ნაკვეთი, რომელზეც განთავსებული იყო 2 750.35 კვ.მ ფართობის შენობა ნაგებობები.”- ნათქვამია EMC-ის კვლევაში.

კვლევის მიხედვით, 2016-2018 წლებში სახელმწიფომ საპატრიარქოს ჯამში 801 308 კვ. მ ფართობის უძრავი ქონება გადასცა.
2014-2018 წლებში საპატრიარქოსთვის გადაცემული უძრავი ქონება 1 714 822.83 კვ.მ მიწის ფართობს აღწევს.

“საპატრიარქოსთვის უძრავი ქონების გადაცემისა და სუბსიდირების არსებული გამოცდილება არღვევს სეკულარიზმის კონსტიტუციურ პრინციპს და კონკრეტული რელიგიური ორგანიზაციის გაუმართლებელი პრივილეგირების და მხარდაჭერის პრაქტიკას ქმნის. ამგვარი მხარდაჭერის პრაქტიკა თვითნებობის და რელიგიური საკითხების პოლიტიკური ინსტრუმენტალიზების რისკებს აჩენს და მთლიანობაში ნეგატიურ გავლენას ახდენს დემოკრატიულ პროცესებზე და თავად საპატრიარქოს მიმართ საზოგადოებრივ ნდობაზე. ამასთან, კონკრეტული რელიგიური ორგანიზაციის უპირატეს მდგომარეობაში ჩაყენებასხვა რელიგიური თემებისა და ორგანიზაციების იერარქიზებას იწვევს და დისკრიმინაციული შინაარსისაა. “- ნათქვამია ადამიანის უფლებების სწავლებისა და მონიტორინგის ცენტრის განცხადებაში.

March 29, 2019
ივანიშვილის მოულოდნელი ვიზიტი სოფელ ხიბულაში

ბიძინა ივანიშვილი ხობის მუნიციპალიტეტის სოფელ ძველ ხიბულაში იმყოფებოდა.

ბიძინა ივანიშვილმა ის სახლი დაათვალიერა, სადაც საქართველოს პირველი პრეზიდენტი ზვიად გამსახურდია დაუდგენელ ვითარებაში დაიღუპა. სახლ-მუზეუმის ტერიტორიაზე, ივანიშვილი ადგილობრივი მოსახლეობის ნაწილსაც შეხვდა, საუბარი იყო გზის რეაბილიტაციაზე, ასევე ეკლესიის მშენებლობასა და სკვერის მოწყობაზე.

“გაზიფიცირებას დავუჩქაროთ, წყალსაც დავუჩქაროთ, ბიუჯეტს არ ექნება მე გავაკეთებ”- ამბობს ბიძინა ივანიშვილი ხალხთან შეხვედრისას და მოსახლეობას საბავშვო ბაღის აშენებასაც პირდება.

საქართველოს პირველ პრეზიდენტს, ზვიად გამსახურდიას 31 მარტს 80 წელი შეუსრულდებოდა. ამ დღესთან დაკავშირებით, დღეს ივანიშვილმა წერილი გაავრცელა, სადაც გამსახურდიას გაურკვეველ ვითარებაში გარდაცვალების გამოუძიებელ საქმეს სამარცხვინოს უწოდებს და დროულ გამოძიებას ითხოვს.

March 29, 2019
“სექსი დიდ ქალაქში “ გრძელდება

პოპულარული პროექტი “სექსი დიდ ქალაქში“ ბოლოს და ბოლოს ნამდვილად გაგრძელდება პირდაპირი მნიშვნელობით, ანუ სერიალის გმირების ცხოვრების შემდგომ ეტაპზე გვიამბობს. დასავლური მედიის ინფორმაციით სტუდიებმა: Paramount Television და Anonymous Conten უკვე იყიდეს ქენდის ბუშნელის წიგნის – “არის თუ არა კიდევ სექსი დიდ ქალაქში“ ეკრანიზაციის უფლება. შეგახსენებთ, რომ სწორედ მისი წიგნი დაედო საფუძვლად თავიდანვე სერიალის სცენარს.

ახალი წიგნი, რომელიც ამ ზაფხულს გამოვა ნიუ იორკელი 50 წლის ასაკს გადაცილებული ადამიანების რომანტიული ურთიერთობების, მეგორობის, სექსის ნიუანსებს და სირთულეებს დაეთმობა.

საპილოტე გამოშვების სცენარზე თავად წიგნის ავტორი იმუშავებს.

“ოდესღაც ითვლებოდა, რომ ორმოცდაათი წლის ადამიანი პენსიაზე უნდა გასულიყო, პრაქტიკულად არ უნდა ემუშავა, რამე ჰობით გაერთო თავი, დრო მშვიდად გაეტარებინა და ზომიერი ცხოვრებით ეცხოვრა. მოკლედ, პენსიონერებს არაფერი უნდა ეკეთებინათ – უნდა ევლოთ მძიმედ და დალოდებოდნენ წლების კიდევ უფრო მატებას. ისინი ფიზიკურ დატვირთვას ან რამე საქმიან წამოწყებას ერიდებოდნენ. ისინი არ ფიქრობდნენ სპონტანურ ნაბიჯებზე, შემთხვევით სექსზე და ა.შ. თუმცა ახლა 50 წლის ქალები სხვაგვარად ცხოვრობენ და მოხარული ვარ ავსახო მათი ამჟამინდელი მდიდარი, დატვირთული და მრავალფეროვანი ცხოვრება“.– ამბობს მწერალი.

ჯერჯერობით უცნობია, როდის გამოვა პროექტი ეკრანებზე.

March 29, 2019
“არ მაძლევენ სხვა ქვეყნის სახელით ასპარეზობის უფლებას, ქვეყანას ვტოვებ”-ზურაბ დათუნაშვილი

ევროპის 2-გზის ჩემპიონის, ზურაბ დათუნაშვილის თქმით, იძულებულია, სპორტული კარიერა უცხოეთში გააგრძელოს.

მოჭიდავე Facebook-ზე წერს, რომ 23 თებერვალს მან პრეზიდიუმის სხდომაზე გეგა გეგეშიძის პასუხისმგებლობის საკითხი დააყენა. უარის შემდეგ კი მოითხოვა მიეცათ უცხოეთში წასვლის შესაძლებლობა, რათა 27 წლის ასაკში კარიერა არ დაესრულებინა.

მოჭიდავემ ფედერაციიდან თანხმობა ვერ მიიღო, თვითნებურად წასვლის შემთხვევაში კი დათუნაშვილს სანქციის გამოყენებით და სპორტული კარიერის ორი წლით შეწყვეტით დაემუქრნენ.

„ფედერაციისგან მივიღე პასუხი, რომ ეს მარტო მათი კომპეტენცია არაა და სპორტის სამინისტრომ, ოლიმპიურმა კომიტეტმა და პარლამენტმა უნდა მიიღოს გადაწყვეტილება და რომ ამაზე აღნიშნულ უწყებებთან ერთად იმსჯელებდნენ, რისთვისაც გარკვეული დრო ითხოვეს.

არ ვიცი, მოხდა თუ არა რომელიმე უწყებაში ამ საკითხზე მსჯელობა, თუმცა ჭიდაობის ფედერაციისგან მივიღე პასუხი რომ სხვა ქვეყნის სახელით ასპარეზობის უფლება არ მომეცემა. ამის თვითნებურად გაკეთების შემთხვევაში კი დავისჯები ორწლიანი დისკვალიფიკაციით და ამ ხნის განმავლობაში ჭიდაობის უფლება აღარ მომეცემა.

მოჭიდავის სპორტული კარიერისთვის ორი წელი არის საკმაოდ დიდი პერიოდი და ამ ხნის გაცდენის შემდეგ პროფესიონალურ სპორტში დაბრუნება, ფაქტობრივად, შეუძლებელია.

როგორც აქამდე არაერთხელ აღვნიშნე, ჩემთვის ჭიდაობა არა მხოლოდ პროფესია, არამედ ცხოვრების განუყოფელი ნაწილია. თითქმის 22 წელია, ამ სპორტში ვარ და მის გარეშე ცხოვრება ვერც წარმომიდგენია, თუმცა ახლა, 27 წლის ასაკში, დავდექი ამ მოცემულობის წინაშე – იძულებული გამხადეს, კარიერის დასრულებაზე ვიფიქრო“, – წერს დათუნაშვილი საკუთარ ფეისბუქ გვერდზე.

დაპირისპირება ფედერაციაში 11 იანვარს ბერძნულ-რომაულ ჭიდაობაში საქართველოს ჩემპიონატის დროს მოხდა, გავრცელებულ კადრებში ჩანდა რომ დათუნაშვილს ჭიდაობის ფედერაციის პრეზიდენტმა გეგა გეგეშიძემ სახეში მუშტი ჩაარტყა. თავდასხმის მიუხედავად გეგა გეგეშიძემ ჭიდაობის ფედერაციის პრეზიდენტის თანამდებობა არ დატოვა.

March 29, 2019
ქალმა ერთ თვეში ორჯერ იმშობიარა

ბანგლადეშელმა ქალმა ტყუპები ლამის ერთთვიანი ინტერვალით გააჩინა. 20 წლის არიფა სულტანამ ბიჭი თებერვლის ბოლოს გააჩინა, 26 დღის შემდეგ კი კვლავ იგრძნო სამშობიარო ტკივილები და საავადმყოფოში წაიყვანეს. ექიმებმა აღმოაჩინეს, რომ მას ორი საშვილოსნო აქვს და ის ჯერ კიდევ ფეხმძიმედ არის. საკეისრო კვეთის შედეგად მან კიდევ ერთი ბიჭი და ერთი გოგო გააჩინა. ორივე ბავშვი სრულიად ჯანმრთელი აღმოჩნდა.

არიფა სულთანა სოფელში ცოვრობს. პირველი შვილი მან ხულნას ოლქის რაიონულ საავადმყოფოში გააჩინა. 26 დღის შემდეგ კი მეზობელ რაინში , ჯესორის საავადმყოფოში გადაიყვანეს, რადგან მუცელში ტკივილებს უჩიოდა.საავადმყოფოს ექიმის, ილა პოდარის თქმით, რომელმაც მას საკეისრო კვეთა გაუკეთა, ტყუპები 21 მარტს დაიბადნენ.

“როცა პაციენტი მოგვიყვანეს, ულტრაბგერითი სკანირება ჩავატარეთ და აღმოვაჩნიეთ, რომ მას ორი ნაყოფი ყავდა მუცელში. უბრალოდ შოკში ვიყავით. ძალიან გაგვიკვირდა. მსგავსი არასოდეს არაფერი გვინახავს.“– ამბობს ექიმი.მისი თქმით არიფა სულთანა ძალიან ღარიბი ოჯახიდან არის და ფეხმძიმობის დროს ექიმთან არ ყოფილა. შესაბამისად, პირველი მშობიარობის შემდეგ ეჭვიც კი არ ქონია, რომ მუცლით კიდევ ორ ბავშვს ატარებდა.

ორი საშვილოსნო – არცთუ იშვიათი ფენომენი

სინგაპურელი გინეკლოგი, ექიმი კრისტოფერ ენგი ამბობს, რომ ორმაგი საშვილოსნო არცთუ იშვიათი მოვლენაა.

“როგორც ჩანს ოვულაციის დროს ერთდროულად სამი კვერცხუჯრედი განაყოფიერდა, შედეგად სამი ნაყოფი განვითარდა“ – ამბობს ის.

თავად არიფა სულთანა ამბობს, რომ ძალიან უხარია ოჯახში ასეთი მატება. თუმცა ამავე დროს შიშობს, რომ ოჯახის ფინანსური მდგომარეობა კიდევ უფრო დამძიმდება.მისი ქმარი მუშაა და თვეში დაახლოებით 95 დოლარს გამოიმუშავებს. თუმცა ქალის თქმით, ბავშვების დაბადება ღმერთის საჩუქარია და მთავარია მათი ჯანმრთელობა.

March 29, 2019
ერთიანი ეროვნული გამოცდებისთვის რეგისტრაცია 25 300-ზე მეტმა აბიტურიენტმა გაიარა

ერთიანი ეროვნული გამოცდებისთვის რეგისტრაცია 25 300-ზე მეტმა აბიტურიენტმა გაიარა. ამის შესახებ შეფასების და გამოცდების ეროვნული ცენტრის ხელმძღვანელმა სოფო გორგოძემ დღეს გამართულ ბრიფინგზე განაცხადა. გამოცდების ეროვნული ცენტრის ინფორმაციით, სტუდენტთა საგრანტო კონკურსში 1100-ზე მეტმა სტუდენტი დარეგისტრირდა, ხოლო საერთო სამაგისტრო გამოცდებისთვის განაცხადი 4000-მდე აპლიკანტმა შეავსო.

„მინდა ვთხოვო აბიტურიენტებს, რომ 3 აპრილის 18:00 საათამდე ნუ მიიყვანენ რეგისტრაციის პროცესს, რადგან ამ დროიდან მათ აღარ შეეძლებათ დარეგისტრირება. თუ ვერ გაივლიან ამ დრომდე რეგისტრაციას, ისინი შემდეგ ეტაპებზე ვეღარ გადავლენ. შემდეგი ეტაპი არის 7 მაისის 18:00 საათი, 7 მაისისთვის აბიტურიენტებს შეუძლიათ დაამატონ საგნები, რომლის ჩაბარებაც უნდათ. 3 აპრილამდე აბიტურიენტებს 1 საგანი მაინც უნდა ჰქონდეთ არჩეული, რომ გაიარონ რეგისტრაცია და 7 მაისამდე დანარჩენი საგნებიც შეუძლიათ აირჩიონ ან შეცვალონ საგანი. მესამე ეტაპი აგვისტოშია, მაშინ, როცა უკვე გამოქვეყნებულია შედეგები და აპელაციების გამოქვეყნებიდან მომდევნო დღის ჩათვლით მათ შეუძლიათ პროგრამებში ცვლილებების შეტანა”,- განაცხადა გორგოძემ.

ერთიანი ეროვნული გამოცდებისათვის რეგისტრაციის პირველ ეტაპზე აბიტურიენტმა ჩასაბარებელი გამოცდების ჩამონათვალი და სასურველი უნივერსიტეტის პროგრამები უნდა აირჩიოს, მიუთითოს ქალაქი – რომელიც ვადის ამოწურვის შემდეგ ვეღარ შეიცვლება.

3 აპრილის შემდეგ რეგისტრაციის პირველი ეტაპი დასრულდება, რის შემდეგაც აბიტურიენტები გამოცდებისათვის ვეღარ დარეგისტრირდებიან, თუმცა 7 მაისის 18:00 საათამდე მათ ჩასაბარებელი საგნის შეცვლა, წაშლა, დამატება კვლავ შეეძლებათ.

რეგისტრაციის დეტალური ინსტრუქციის ნახვა შესაძლებელია გამოცდების ეროვნული ცენტრის ვებ-გვერდზე განთავსებულ ცნობარშია შესაძლებელი. ცნობარში მოცემულია რეგისტრაციის ინსტრუქცია და საგანმანათლებლო პროგრამების ჩამონათვალი.

March 29, 2019
გლდანის ციხის თანამშრომლის დაპატიმრების საქმე გახმაურდა

“კურიერის“ ინფორმაციით ციხეში პატიმრებისთვის მობილური ტელეფონის შეტანის ფაქტზე დაკავებულია გლდანის ციხის თანამშრომელი. სპეცოპერაცია თბილისში ორი კვირის წინ ჩატარდა, თუმცა ამბავი არ გახმაურებულა.

როგორც სასჯელაღსრულების დაწესებულებაში აცხადებენ, სამსახურებრივი მდგომარეობის გამოყენებით, მსჯავრდებულისათვის აკრძალული საგნის – მობილური ტელეფონის – გადაცემისა და პენიტენციურ დაწესებულებაში მსჯავრდებულის მიერ აკრძალული საგნის შენახვის ფაქტზე გამოძიება, 2019 წლის 22 თებერვლიდან მიმდინარეობს.

#8 პენიტენციური დაწესებულების თანამშრომელი გ.ჩ. კი იუსტიციის სამინისტროს გენერალურმა ინსპექციამ 13 მარტს დააკავა. დაკავებულს აღკვეთის ღონისძიების სახით უკვე შეფარდებული აქვს 2 თვიანი წინასწარი პატიმრობა. უწყების ინფორმაციით, სასამართლო პროცესი 15 მარტს გაიმართა.

გარდა ამისა, “კურიერის” ინფორმაციით, გლდანის ციხის თანამშრომელს აკრძალული ნივთი ე.წ. კრიმინალური ავტორიტეტისთვის შეჰქონდა. უკანონო ნივთის შენახვის საქმეზე ბრალი წარედგინა ე.წ. ციხის მაყურებელს, პატიმარს.

ასევე “კურიერის” ინფორმაციით, გლდანის ციხის ადმინისტრაციის თანამშრომელს მობილური ტელეფონი პატიმართან გარკვეული თანხის სანაცვლოდ შეჰქონდა და საქმის მასალებში სწორედ ეს თანხა-2500 ლარი ფიგურირებს.

იუსტიციის სამინისტრო ადასტურებს, რომ დაკავებულია გლდანის ციხის თანამშრომელი აკრძალული ნივთის დაწესებულებაში შეტანის გამო და საქმეზე გრძელდება გამოძიება.
გამოძიებამ უნდა დაადგინოს, იყვნენ თუ არა თანამშრომლის უკანონო ქმედების შესახებ საქმის კურსში გლდანის ციხის ადმინისტრაციის სხვა თანამშრომლები.

March 29, 2019