Blog

შსს-მ ამერიკელ კოლეგებთან თანამშრომლობით, იარაღის ნაწილებით უკანონო ვაჭრობის ტრანსნაციონალური სქემა გამოავლინა.მომხდარ ფაქტზე  დაკავებულია თურქეთის რესპუბლიკის მოქალაქე, – ამის შესახებ შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორის მოადგილე მამუკა ჭელიძემ სპეციალურ ბრიფინგზე განაცხადა.

შემთხვევა 15 მარტს საქართველოს საზღვარზე მოხდა. 

„შინაგან საქმეთა სამინისტროს, მთავარი პროკურატურის, სახელმწიფო უსაფრთხოების სამსახურის, საჰაერო ტვირთების კონტროლის უწყებათშორისი დანაყოფისა და ამერიკის შეერთებული შტატების შიდა უსაფრთხოების სამსახურის თანამშრომლობის შედეგად, ცეცხლსასროლი იარაღის ნაწილებით უკანონო ვაჭრობის ტრანსნაციონალური სქემა გამოვლინდა.

შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა მიმდინარე წლის 15 მარტს აღნიშნული სქემის ერთ-ერთი მონაწილე, თურქეთის რესპუბლიკის მოქალაქე – ი.ი. საქართველოს საბაჟო საზღვარზე დიდი ოდენობით მოძრავი ნივთის საბაჟო კონტროლისგან მალულად შემოტანის ბრალდებით დააკავეს. მის მიერ ჩადენილი დანაშაული 8-დან 11 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა, თანამზრახველებთან ერთად, წინასწარ შემუშავებული დანაშაულებრივი სქემის მიხედვით, საქართველოს საბაჟო საზღვარზე, საბაჟო კონტროლისგან მალულად, ცეცხლსასროლი იარაღის ნაწილების შემოტანა გადაწყვიტა.

განზრახვის განსახორციელებლად ი.ი.-მ და მისმა თანამზრახველებმა ამერიკის შეერთებული შტატებიდან გადამზიდავი კომპანია შპს ,,საქართველოს ფოსტის“ მეშვეობით, ნაცნობის სახელზე საქართველოში გამოაგზავნეს საფოსტო ამანათი, რომელშიც, დეკლარირებული საქონლის ნაცვლად, დამალული იყო ცეცხლსასროლი იარაღის შემადგენელი ნაწილები.

სამართალდამცველებმა, ჩატარებული ოპერატიულ-სამძებრო და საგამოძიებო ღონისძიებების შედეგად, 1976 წელს დაბადებული ი.ი. თბილისში, ავტომანქანით გადაადგილებისას დააკავეს.

პოლიციამ დაკავებულის ავტომანქანის ჩხრეკისას ნივთმტკიცებად ამოიღო სხვადასხვა ტიპის ცეცხლსასროლი იარაღის შემადგენელი ნაწილების 16 კომპლექტი, მათ შორის 7 კომპლექტი არის „გლოკი 19“-ის მოდელის პისტოლეტის, 9 კომპლექტი კი – „გლოკი 17 გან-4“-ის მოდელის პისტოლეტის ნაწილები.

თბილისში, სოხუმის ქუჩაზე მდებარე ერთ-ერთი ბინიდან, სადაც დაკავებული დროებით ცხოვრობდა, ასევე, ნივთმტკიცებად ამოღებულია „გლოკის“ 4 ბუდე, იარაღის ლულის საწმენდი 40 ჯაგრისი, ცეცხლსასროლი იარაღის 8 ტარი და 9 მჭიდი.

აგრეთვე დადგინდა, რომ დანაშაულებრივი სქემის მიხედვით, ბრალდებულს თანამზრახველებთან ერთად საქართველოში საბაჟო კონტროლისგან მალულად შემოტანილი იარაღის ნაწილების თურქეთში უკანონოდ გადატანა სურდა.

შინაგან საქმეთა სამინისტრო, უცხოელ კოლეგებთან ინტენსიური თანამშრომლობით აგრძელებს ოპერატიულ-საგამოძიებო ღონისძიებებს, აღნიშნულ დანაშაულთან შემხებლობაში მყოფი სხვა პირების დადგენა-დაკავების მიზნით.

გამოძიება წინასწარი შეთანხმებით ჯგუფის მიერ საქართველოს საბაჟო საზღვარზე დიდი ოდენობით მოძრავი ნივთის საბაჟო კონტროლისგან მალულად შემოტანის ფაქტზე, საქართველოს სისხლის სამართლის 214-ე მუხლის მე-5 ნაწილის „დ“ ქვეპუნქტით მიმდინარეობს“, -განაცხადა ჭელიძემ.

შინაგან საქმეთა სამინისტრომ განზრახ მკვლელობის მცდელობის ბრალდებით ერთი პირი დააკავა, ამის შესახებ განცხადება შინაგან საქმეთა სამინისტრომ გაავრცელა.

“შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო და საგამოძიებო მოქმედებების შედეგად, 1999 წელს დაბადებული გ.შ. განზრახ მკვლელობის მცდელობის ბრალდებით დააკავეს. დანაშაული 7-დან 15 წლამდე თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა მიმდინარე წლის 26 მარტს თბილისში, დიდ დიღომში, იოანე პეტრიწის ქუჩაზე, ურთიერთშელაპარაკებისას, სხეულზე ცივი იარაღით სხვადასხვა სახის დაზიანება მიაყენა 2000 წელს დაბადებული გ.კ.-ს და შემთხვევის ადგილიდან მიიმალა.

პოლიციამ ბრალდებული მომხდარიდან რამდენიმე საათში, თბილისში დააკავა. სამართალდამცველებმა დანაშაულის ჩადენის იარაღი – დანა ნივთმტკიცებად ამოიღეს.
გამოძიება განზრახ მკვლელობის მცდელობის ფაქტზე მიმდინარეობს, საქართველოს სისხლის სამართლის კოდექსის 19-108-ე მუხლით.”- ნათქვამია განცხადებაში.

რევოლუციონერ ლიდერს ხუან გუაიდოს სახელმწიფო თანამდებობების დაკავების უფლება 15 წლით აეკრძალა. გადაწყვეტილება ვენესუელას ხელისუფლებამ ფინანსური დარღვევების მოტივით მიიღო.

გენერალური საკონტროლო სამმართველოს ხელმძღვანელის, ელვისა ამოროსო განცხადებით, გუაიდოს  ამის  ფინანსურ დეკლარაციაში დარღვევები აღმოუჩინეს.

„ვენესუელას საგადასახადო კოდექსის 105-ე მუხლის თანახმად, გენერალურმა საკონტროლო სამმართველომ გადაწყვეტილება მიიღო, ხუან გუაიდოს 15 წლის განმავლობაში ჩამოერთვას ნებისმიერი სახელმწიფო თანამდებობის დაკავების უფლება“, – განაცხადა ამოროსომ.

1 თვის წინ ვენესუელას გენერალურმა საკონტროლო სამმართველომ ხუან გუაიდოს ფინანსური დეკლარაციის შემოწმება დაიწყო.მოქმედი მთავრობის წევრები აცხადებდნენ, რომ ფინანსურ დეკლარაციაში რიგი მონაცემები გაყალბებული იყო. მათივე მტკიცებით, ხუან გუაიდომ ფული საერთაშორისო სტრუქტურებისგან  უკანონო გზებით  მიიღო. 

შეგახსენებთ, რომ 35 წლის ხუან გუაიდომ თავი დროებით პრეზიდენტად გამოაცხადა, მან მხარდაჭერა როგორც ქვეყნის შიგნით, ასევე საერთაშორისო ასპარეზზე მიიღო. გუაიდო პრეზიდენტად ამერიკის შეერთებული შტატების მთავრობამ აღიარა და მას სრული მხარდაჭერა გამოუცხადა.

ქურდობის მორიგი მსხვერპლი მსახიობი და ტელეწამყვანი თამუნა მუსერიძეა.მუსერიძის აგარაკი კოჯორში იმ დროს გაქურდეს, როცა ოჯახი ადგილზე არ იმყოფებოდა.

“წაღებულია ჭიშკარი, სახლის შესასვლელი კარი, ჟალუზები, ფანჯრები, მაგიდები, სკამები. რაც მოახერხეს, ალბათ ჯართში რაც უნდა ჩაებარებინათ ის წაიღეს. საქმე აღძრულია, დაკითხვაზე უკვე იყვნენ ოჯახის წევრები. ეჭვი არ გვაქვს არავისზე, იმიტომ, რომ წარმოდგენა არ გვაქვს ვის უნდა წაეღო ეს ნივთები,”-განაცხადა  მსახიობმა თამუნა მუსერიძემ.

საქმეზე გამოძიება ქურდობს მუხლით მიმდინარეობს.

“ადამიანის უფლებების კომიტეტის თავჯდომარე მეტ პასუხისმგებლობას უნდა გრძნობდეს”-სოც მუშაკები სოფო კილაძეს მიმართავენ.

სოციალური მუშაკები  პარლამენტის ადამიანის უფლებათა დაცვის კომიტეტის თავმჯდომარეს, სოფიო კილაძეს სოც მუშაკების საკითხზე საუბრისას მეტი პასუხისმგებლობის გამოჩენისკენ მოუწოდებენ.

„ქალბატონო სოფიო, ძალიან დასაფასებელია თქვენი დაინტერესება სოციალური მუშაობის პროფესიასთან დაკავშირებით. როგორც თქვენ აღნიშნავთ, „ეს არის თავისი შინაარსით და არსით უმნიშვნელოვანესი პროფესია, იმიტომ რომ ყველაზე დაჩაგრული ადამიანების თვითრეალიზაციას და გაძლიერებას ემსახურება და ემსახურება ამით ჩვენი საზოგადოების გაძლიერებას.

თქვენ რომ ნამდვილად გჯეროდეთ თქვენი სიტყვების, მაშინ იმასაც მიხვდებოდით, თუ რა განსხვავებაა დღევანდელ დაკონტრაქტებულ „სოციალურ მუშაკებს“ და „2 კვირის წინანდელ“ პროფესიონალებს შორის. ის სოციალური მუშაკები, რომლებსაც შესააძლოა აკადემიური განათლება არ აქვთ სოციალურ მუშაობაში, რაზეც თქვენ აკეთებთ აქცენტირებას, არიან ის სოციალური მუშაკები, რომლებმაც დაიწყეს ამ საქმის კეთება, როცა არ არსებობდა სოციალური მუშაობის განათლება საქართველოში, მათ აქვთ დიდი გამოცდილება, მზაობა ისწავლონ და განვითარდნენ, შემართება და ენთუზიაზმი, პროფესიული ღირებულებები და ასე „ხელაღებით“ მათი მოხსენება, წესით ძალინ უხერხულობას უნდა იწვევდეს თქვენში. თქვენი ასეთი გამონათქვამები რბილად რომ ვთქვათ სოციალური სამუშაოს პროფესიის დაკნინებაა და იმ მახინჯ პრაქტიკას ამართლებს, რასაც ჰქვია ადამიანების აბუჩად აგდება.

სოციალური მუშაკები იმიტომ იფიცებიან, რომ არ ეძლევათ თავიანთი პროფესიული საქმიანობის განხორციელების საშუალება და ვერ ახერხებენ თქვენი „დაუღალავი შრომის“ შედეგად და „ევროპული ღირებულებების კვალდაკვალ“ მიღებული კანონის აღსრულებას. სოციალური მუშაკები მოითხოვენ იმას, რომ შეიქმნას ბენეფიციარების საჭიროებებზე მორგებული ფსიქო-სოციალური მომსახურებები და შეძლონ პროფესიული ზრდა. სწორი პრიორიტეტები რომ ჰქონოდა სახელმწიფოს, დღეს ეს გაფიცვა საჭირო არ იქნებოდა და შესაბამის რესურსებს მოიძიებდით. დარწმუნეული ვართ, თქვენ ამას შეძლებდით!

ასევე, შეგახსენებთ, რომ ადამიანის უფლებების კომიტეტის თავჯდომარე მეტ პასუხისმგებლობას უნდა გრძნობდეს დაუცველი ბენეფიციარების საჭიროებების დამცველი სოციალური მუშაკების დასაცავად!” – ნათქვამია საქართველოს სოციალურ მუშაკთა ასოციაციის განცხადებაში.

შეგახსენებთ, რომ ჯანდაცვის მინისტრსა და  სოც მუშაკებს შორის დღეს სამუშაო შეხვედრა შედგა.მინისტრის პოზიტიური მოლოდინების მიუხედავად, სოციალური მუშაკები გაფიცვას განაგრძობენ. მათ სოციალურ ქსელში უკვე დააანონსეს გაფიცვის მე-5 დღე. ისინი  კვლავ მოითხოვენ სამუშაო პირობების გაუმჯობესებასა და მხოლოდ იმ შემთხვევაში შეწყვეტენ გაფიცვას, თუ ყველა სოციალური მუშაკის მოთხოვნები დაკმაყოფილდება.

მარნეულში ადგილობრივი საკრებულოს „ნაციონალური მოძრაობის“ წევრის, რაგიმ ასკეროვის ოჯახის წევრები ამბობენ, რომ ის უდანაშაულოა და ქრთამის აღების ბრალდებით დაკავება პროვოკაციაა.

„სახლში ვიყავი, პოლიციელები შემოვარდნენ და მითხრეს, შენი შვილი დავაკავეთ, სახლი უნდა გავჩრიკოთო. კი ბატონო, მეთქი. ბრალდება რომ გავიგე, გაოგნებული დავრჩი. ჩემი შვილი ქრთამს არასდროს აიღებდა, ეს ბრალდება აბსურდულია. დარწმუნებული ვარ, რომ პროვოკაციაა და ამას ასე არ დავტოვებ. არ დავუშვებ, უდანაშაულო შვილი ციხეში იჯდეს,“ – ამბობს დაკავებულის მამა.

რაგიმ ასკეროვი მარნეულში დღეს  დააკავეს და მისი სახლი გაჩხრიკეს. შინაგან საქმეთა სამინისტროს ინფორმაციით, ასკეროვი ქრთამის აღების ფაქტზე დააკავეს. უწყება ავრცელებს ვიდეომტკიცებულებასაც. გამოძიების მიხედვით, ასკეროვი მოქალაქეს 3 ათასი ლარის სანაცვლოდ ერთ-ერთ სახელმწიფო სტრუქტურაში დასაქმებას ჰპირდებოდა.

ბრალდებას არ ეთანხმება ადვოკატი, რომელიც აცხადებს, რომ ჩხრეკისას სახლიდან წაიღეს ისეთი ნივთებიც, რომელსაც გამოძიებასთან კავშირი არ აქვს. სწორედ ამის გამო, ასკეროვის ინტერესების დამცველი ამბობს, რომ ჩხრეკა დარღვევებით ჩატარდა.