Blog

არასრულწლოვანზე მოძალადე პოლიციელების დასჯის მოთხოვნით ივანიშვილის სახლთან აქცია გაიმართა

პოლიციელების მიერ სასტიკად ნაცემმა 16 წლის მოზარდის უფლებადამცველებმა და ოჯახის წევრებმა ბიძინა ივანიშვილის სახლთან აქცია გამართეს. ისინი ყველა იმ პოლიციელის პასუხისგებაში მიცემას ითხოვენ, რომლებმაც არასრულწლოვანს ფიზიკური და ფსიქოლოგიური ზიანი მიაყენეს.

უფლებადამცველები, რომლებმაც ბოლნისის პოლიციის თანამშრომლები ფიზიკურ და სექსუალურ ძალადობაში ამხილეს ყველა დამნაშავის დასჯას და შსს მინისტრისა და მთავარი პროკურორის გადადგომას ითხოვენ.

არასრულწლოვანი ამბობს, რომ მას სურს ყველა დამნაშავე დაისაჯოს, რადგან ანგარიშსწორების შიშით ქუჩაში ვერ გადის.

„ოთხი ამოვიცანი და ეს კონსტანტინე არის ქუჩიშვილი დასჯილი მხოლოდ და მე მინდა, რომ სულყველა დაისაჯოს, ერთი კვირის განმავლობაში რომ დაისაჯონ. მე გარეთ ვერ გავდივარ, მეშინია, რომ ანალოგიური არ დამემართოს, არ დამიჭირონ და კიდევ არ მცემონ. მინდა, რომ ყველა დაისაჯოს სასწრაფოდ,“- ამბობს დაზარალებული.

დაზარალებულის ადვოკატი ამბობს, რომ არასრულწლოვანზე ძალადობაში რამდენიმე პოლიციელი მონაწილეობდა დაკავებული კი მხოლოდ ერთია. ფრიდონ სიხუაშვილის განცხადებით, ისინი მინიმუმ 10 სამართალდამცველის დაკავებას ითხოვენ.

„დადგენილებაში ნათქვამია, რომ პოლიციელების მხრიდან მოხდა ამ ბავშვის წამება, არაადამიანური მოპყრობა, სექსუალური ძალადობა და ყოველივე ამის შემდეგ დააკავეს მხოლოდ ერთი პოლიციელი. რაც უნდა წაეყენებინათ 144 პრიმა მუხლი, რომელიც ითვალისწინებდა 15 წლამდე თავისუფლების აღკვეთას და ასევე უვადოდ თავისუფლების აღკვეთას, ნაცვლად ამისა, წაუყენეს სულ სხვა ბრალი. აქედან გამომდინარე ჩვენ ვამბობთ, რომ მინიმუმ ათი პოლიციელი როგორც მწამებლები ასევე გამომძიებლები ოთხი მუხლით მინიმუმ, რაც აქვთ დანაშაული ჩადენილი, ეს არის მტკიცებულებების განადგურება, ასევე არის დამნაშავეების ხელის დაფარება, აი, ეს ყველა პოლიციელი უნდა მიეცეს პასუხისგებაში,“- აცხადებს ფრიდონ სიხუაშვილი.

აქციაზე იმყოფება ადვოკატი ზაზა ხატიაშვილი. მისი თქმით, ბიძინა ივანიშვილი ხელისუფლებაში სწორედ სამართალდამცველების მხრიდან ძალადობის პროტესტით მოვიდა, თუმცა ახლა მოძალადე პოლიციელებს ხელს ის და მისი მთავრობა აფარებს.

„ამ ქვეყანას, ჩემი შეფასებით, მართავს ივანიშვილი. ჩემი შეფასებით ის არის შსს მინისტრის და მთავარი პროკურორის და ყველა იმ უბედურების ავტორი, რაც ამ ქვეყანაში ხდება. მთელი ბოლნისი ჩამოვა აქ და აქედან არავინ არ წავა. მე მინდა ივანიშვილმა იცოდეს იქ „პადვალში“ რომ ზის ახლა და გვიყურებს, არ შერჩება მას. ამით მოვიდა ის ხელისუფლებაში, ადამიანზე სქესობრივი ძალადობა რომ აღკვეთილიყო და ეს სქესობრივი ძალადობა რომ ხდება ეს არის მთლიანად „ ქართული ოცნების“ და ივანიშვილის დამსახურება , იმიტომ, რომ ამ მოძალადე პოლიციელებს თავზე ხელს აფარებენ,“- აცხადებს ზაზა ხატიაშვილი.

პარალელურად საქმეში ერთვება ცენტრი “ემპათია”. ორგანიზაცია მოზარდზე განხორციელებულ წამებაზე საუბრობს. დღესვე ცენტრი “ემპათია” ადვოკატების დახმარებით, აპირებს მიმართოს პროკურატურას, რათა საქმის მასალები გამოითხოვონ.

May 31, 2019
ნანა კოსტავამ ფრაქციის თავმჯდომარეობა დატოვა, თუმცა ქუთაისის საკრებულოს წევრად რჩება

ქუთაისის საკრებულო ავრცელებს ინფორმაციას, რომ ქუთაისის საკრებულოს ფრაქცია „ქართული ოცნება- კონსერვატორების“ წევრებისა და პოლიტიკური გუნდის გადაწყვეტილებით, ნანა კოსტავამ ფრაქციის თავმჯდომარის პოსტი დატოვა. განცხადებაში ნათქვამია, რომ “ფრაქცია „ქართული ოცნება-კონსერვატორების“ თავმჯდომარის გადადგომასთან დაკავშირებით გადაწყვეტილება ფრაქციის წევრებმა დღეს გამართულ სხდომაზე მიიღეს.

ფრაქციას დღეიდან დეპუტატი ნიკოლოზ ჩეჩელაშვილი უხელმძღვანელებს.თუმცა, ნანა კოსტავა ქუთაისის საკრებულოს წევრად და მმართველი პარტიის ფრაქციის წევრად რჩება.

ნანა კოსტავას მიმართ საზოგადოების პროტესტი მოჰყვა მის მიერ ფეისბუქზე გამოქვეყნებულ პოსტს “კაი დღეში ხარ ახალა, იცინე“, რომელიც სოციალური მედიის მენეჯერს, სალომე ბარკერს ეხებოდა. სალომე ბარკერს რამდენიმე დღის წინ და გარდაეცვალა. 16 წლის გოგონა ლაგოდეხში სასკოლო ექსკურსიის დროს მდინარეში ჩავარდა. მას მაშველები მთელი ღამის განმავლობაში ეძებდნენ. დილით კი გარდაცვლილი იპოვეს. საზოგადოება ამ ამბავმა შეძრა, შესაბამისად, დიდი აღშფოთება მოჰყვა ქართული ოცნების წევრის დამოკიდებულებას გარდაცვლილის დის მიმართ.

ქუთაისის საკრებულოსთან იმავე დღეს საპროტესტო აქცია გაიმართა, რომლის მონაწილეები ნანა კოსტავას მიერ დაკავებული თანამდებობის დატოვებას ითხოვდნენ. ადგილობრივმა მედიამ კი საკრებულოს წევრს ბოიკოტი გამოუცხადა.

May 31, 2019
ბათუმში ზღვამ მამაკაცის ცხედარი გამორიყა

ბათუმში, არდაგანის ტბის მოპირდაპირე მხარეს დღეს დილით ზღვამ 50 წლამდე მამაკაცის ცხედარი გამორიყა. შემთხვევის ადგილზე სამართალდამცავები იმყოფებოდნენ. ცხედარი ექსპერტიზისთვის ლევან სამხარაულის ექსპერტიზის ეროვნული ბიუროში გადაასვენეს. შინაგან საქმეთა სამინისტროს ინფორმაციით, ფაქტზე გამოძიება 115 მუხლით მიმდინარეობს, რაც თვითმკვლელობამდე მიყვანას გულისხმობს.

May 31, 2019
სიკვდილი ევერესტზე. რატომ დაიღუპა წელს ყველაზე მეტი ალპინისტი მსოფლიოს უმაღლეს მწვერვალზე

მხოლოდ ბოლო კვირას ევერესტზე ასვლის მცდელობისას 11 ადამიანი დაიღუპა. ეს თითქმის ორჯერ მეტია, ვიდრე ბოლო ათწლეულში საშუალო წლიური მაჩვენებელი.21–ე საუკუნეში ევერესტზე ასვლისას წელიწადში საშუალოდ 6 ადამიანი იღუპებოდა.

წელს ნეპალის მთავრობამ ევერესტის დალაშქვრის რეკორდული რაოდენობის ლიცენზია გასცა. ეს ნიშნავს, რომ მწვერვალის დასაპყრობად ექსპედიციაში ალპინისტებისა და მათი თანხმლები პირების ჩათვლით დაახლოებით 600 ადამიანი გაემართა.

ფოტომ, რომელზეც ჩანს ალპინისტების რიგი ისეთ სიმაღლეზე, რომელიც სიცოცხლისთვის კრიტიკულად საშიშია მთელი მსოფლიო მოიარა.

სიკვდილიანობის ასეთ მატებას ცუდი ამინდით, ალპინისტების გამოუცდელობით, მწვერვალისკენ მიმავალ ბილიკზე მეტისმეტად დიდი რიგებით და ტურების ორგანიზატორებს შორის გაზრდილი კონკურენციით ხსნიან. სულ უფრო მეტი ტუროპერატორი სთავაზობს ალპინისტებს ტურებს იაფად, ნაკლებად კვალიფიციური მომსახურებით და სულ უფრო მეტ ადამიანს უჩნდება შესაძლებლობა ევერესტი დალაშქროს და შესაბამისად რისკი, არასწორად დაგეგმილი ექსპედიციით სიცოცხლე დაასრულოს.

თუმცა სიკვდილიანობის მთავარი მიზეზი ერთია: ჩვენი ორგანიზმი უბრალოდ არ არის მიჩვეული ასეთ პირობებში არსებობას. მწვერვალთან მიახლოებასთან ერთად სუნთქვა სულ უფრო ჭირს, ზღვის დონიდან 8000 კილომეტრის სიმაღლეზე კი “მკვდარი ზონა“ იწყება. ჰაერში ჟანგბადის კონცენტრაცია იმდენად ეცემა, რომ ჩვენი სხეული პირდაპირი გაგებით ნელნელა, უჯრედ–უჯრედ კვდომას იწყებს.

ჟანგბადის კატასტროფული უკმარისობა არა მხოლოდ მკვეთრად ზრდის ინსულტის და გულის შეტევის რისკს, არამედ შეგრძნებებს პრაქტიკულად აქრობს, რეაქციებს ანელებს, სიუტაციის ადეკვატურად შეფასებასა და სწორი გადაწყვეტილებების მიღებაში ადამიანს ხელს უშლის.

რა ხდება კონკრეტულად?

ჩვენი ორგანიზმისთვის ყველაზე კომფორტული პირობები ზღვის სანაპიროზე და მთაშია, რომელიც ზღვის დონიდან არც ისე მაღლა მდებარეობს.

სიმაღლის მატებასთან ერთად წნევა მცირდება და შედეგად სუნთქვისას ფილტვებში სულ უფრო ნაკლები ჟანგბადი ხვდება. დაახლოებით 3600 მეტრის სიმაღლეზე (ეს უფრო მეტია, ვიდრე ალპიური სამთოსათხილამურო კურორტების სიმაღლე), ყოველი ჩასუნთქვა ორგანზმს მისთვის ჩვეული მოცულობის მხოლოდ 60%–ს აძლევს. იწყება ჟანგბადის შიმშილი.

თქვენ ვერ შეამჩნევთ, რომ სუნთქვა გიჭირთ, თუმცა მთის დაავადების პირველ ნიშნებს იგრძნობთ: სისუსტე, გულისრევა, თავბრუსხვევა, გაღიზიანება.

“მკვდარ ზონაში“ ჰაერში ჟანგბადი იმდენად ცოტაა, რომ სპეციალური მოწყობილობის გარეშე სუნთქვა პრაქტიკულად შეუძლებელია. 8000 მეტრის სიმაღლეზე ოთხი ალპინისტისთვის აღებული ანალიზების შედეგებმა აჩვენა, რომ მათ სისხლში ჟანგბადის შემადგენლობა ნორმაზე ოთხჯერ დაბალი იყო.

“ასეთი ციფრები როგორც წესი იმ პაციენტებში გვხვდება, რომლებიც სიკვდილის პირას არიან“ – ამბობს ექიმი ჯერემი უინძორი, რომელიც 2007 წელს თვითონ ავიდა ევერესტზე.

ორგანოების ჟანგბადით მომარაგების ჩვეული დონის შესანარჩუნებლად გული უფრო სწრაფად იწყებს ცემას, პულსი შეიძლება წუთში 140–მდე გაიზარდოს. ამის ხარჯზე მკვეთრად იზრდება ინფრქტის და ინსულტის რისკი.

რისკის შემცირებას ხელს უწყობს აკლიმატიზაცია. სანამ ევერესტის დასაპყრობად წავლენ, ალპინისტები ნელ–ნელა აჩვევენ ორგანიზმს მთის დაავადებას და მკვდარი ზონის ექსტრემალურ პირობებს.

პრინსტონის უნივერსიტეტის ოფიციალური რეკომენდაციების მიხედვით ზღვის დონიდან 3000 მეტრზე ზევით ასვლისას დღეში 300 კილომეტრზე მეტ სიმაღლეზე არ უნდა ახვიდეთ. შემდეგ ერთი დღეღამე უნდა შეისვენოთ და ისე განაგრძოთ გზა შემდეგი 300 მეტრის გავლამდე.

თუმცა ექსპედიციები ევერესტზე მხოლოდ ძალიან გამოცდილ ალპინისტებზეა გათვლილი და საბაზო ბანაკიდან იწყება, რომელიც უკვე 5000 მეტრის სიმაღლეზე მდებარეობს. ეს ნებისმიერ ალპიურ პიკზე მაღლაა, მონბლანის ჩათვლით.

ჟანგბადის შიმშილის დასაკომპენსირებლად ორგანიზმი ჰემოგლობინის გაძლიერებულ გამოყოფას იწყებს. ამის გამო გულის დატვირთვა კიდევ უფრო იზრდება, ზოგ ალპინისტს კი ფილტვებში სითხე უგროვდება.

ზოგადი სისუსტისა და მომეტებული დაღლილობის გარდა ფილტვებში წყლის გამო ადამიანს ღამით სული ეხუთება, ხველის შეტევები კი იმდენად ძლიერია, რომ ნეკნები იბზარება. მოძრაობაზე ლაპარაკიც ზედმეტია – ადამიანს ჰაერი მაშინაც კი არ ყოფნის როცა გაუნძრევლად წევს.

“მკვდარ ზონაში“ ჟანგბადის კატასტროფული უკმარისობის გამო ტვინის შეშუპებაც იწყება. აზროვნება ძალიან ძნელდება, ზოგი დროებით მხედველობასაც კარგავს, ზოგს კი ე.წ. მაღალმთიანი ფსიქოზი უვითარდება. რეალობასთან კავშირს კარგავენ და ავიწყდებათ სად იმყოფებიან. ეწყებათ სმენითი და ვიზუალური ჰალუცინაციები.

თუმცა მათაც კი, ვინც მკვდარ ზონაში საღ აზრზე რჩება, ორგანიზმის ფუნქციონირების სერიოზული პრობლემა აქვთ – უძილობა, შემდეგ ძნელად გაღვიძება, კუნთების ატროფია, წონაში მკვეთრი კლება. დაღლილობა და დასუსტებული მხედველობა მთიდან ჩამოვარდნის რისკს ზრდის. აზროვნების გაძნელება კი არასწორი გადაწყვეტილებების მიღებას იწვევს, მაგალითად შეიძლება ალპინისტს გზა აერიოს ან დამზღვევი ტროსის მიმაგრება დაავიწყდეს, ანდა ჟანგბადი დროულად არ მოიმარაგოს.

სწორედ ამიტომ ევერესტის დამპყრობები ცდილობენ მკვდარი ზონა რაც შეიძლება სწრაფად გაიარონ. როგორც წესი, ბოლო შეტევა სიმაღლის დასაპყრობად ერთ დღეზეა გათვლილი. ამიტომაც უშუალოდ მწვერვალის პიკთან საათობით ბევრი ალპინისტისთვის საბედისწერო ხდება და ისინი სიცოცხლეს ამთავრებენ. წელს გაცემული ლიცენზიების სიმრავლისა და ალპინისტების სიჭარბის გამო სწორედ საათობით რიგში დგომამ მწვერვალის პიკთან გამოიწვია სიკვდილიანობის ასეთი ზრდა.

May 31, 2019
მარჯანიშვილის ქუჩაზე კაფეში უცხოელ ტურისტებს ფიზიკურად გაუსწორდნენ

დამტვრეული ინვენტარი და ჩამსხვრეული მინები. შემთხვევა თბილისში, მარჯანიშვილზე მდებარე ერთ-ერთ კაფესთან მოხდა. საქართველოს მოქალაქეები უცხოელ ტურისტებს იმიტომ გაუსწორდნენ, რომ ისინი ქართველ ქალთან ერთად ისხდნენ, რომელიც მათი გიდი იყო.

თვითმხილველების ინფორმაციით, თავდამსხმელები სავარაუდოდ არაფხიზელ მდგომარეობაში იყვნენ. მათი თქმით, დამნაშავეებმა უცხოელებს ფიზიკური და სიტყვიერი შეურაცხყოფა მიაყენეს. შემთხვევის შედეგად არავინ დაშავებულა.

ადგილზე ექსპერტ კრიმინალისტები და სასწრაფო სამედიცინო სამსახურის ეკიპაჟები მუშაობდნენ. პოლიციამ კაფის თანამშრომლები ადგილზე გამოკითხა.

შსს-ს ინფორმაციით, ინციდენტთან დაკავშირებით ორი პირი დააკავეს. ერთ-ერთ მათგანს ბრალად წვრილმანი ხულიგნობა და პოლიციელის დაუმორჩილებლობა ედება , მეორეს კი პოლიციელისთვის წინააღმდეგობის გაწევასა და სხვისი ნივთის დაზიანებას ან განადგურებას ედავებიან.

May 31, 2019
“არა! KHIDI არ იქნება Echowaves 2019-ზე” – ხიდის დამფუძნებელი თამუნა აქსანდერი

ყველასათვის კარგად ცნობილი ღამის კლუბი “Khidi”-ს დამფუძნებელი თამუნა აქსანდერი საკუთარ ფეისბუქზე წერს რომ წელს “Khidi” არ იქნება “Echowaves 2019” -ზე. დამფუძნებელი ამის მიზეზად მენეჯმენტის გაუმართაობას ასახალებს.

“არა! KHIDI არ იქნება Echowaves 2019-ზე!
მინდა მოკლედ მოგიყვეთ KHIDI-ს წინა წლის გამოცდილებაზე Echowaves 2018-თან.

შარშანდელი 26 აგვისტოს შემდეგ, უშედეგოდ ვცდილობდი, რომ ეს ფესტივალი და თავისი მახინჯი Gem Fest-ის ბექგრაუნდი ანაკლიას მოშორებოდა. ამ ერთი წლის განმავლობაში არაერთხელ მომიწია საპირისპირო მხრიდან ტერორის გადატანა მეილებსა თუ წერილებში. თუმცა, მჯეროდა რომ ფეისბუქზე ამ თემის წამოწევით ისედაც დაქსაქსულ სცენას კიდევ უფრო დიდი ზიანი მიადგებოდა. ვიყავით ჩუმად, იმიტომ რომ არაერთხელ მივიღეთ სიტყვიერი გარანტია, რომ ეს ფესტივალი ამ ფორმით აღარ ჩატარდებოდა.

3 წლიანი KHIDI-ს რეპუტაცია ისე მოვიდა დღემდე, რომ არავისზე გადაბრუნებული სიტყვა და მითუმეტეს ტყუილი არ გვითქვამს და ხალხმა ეს კარგად იცის! მიუხედავად ამისა, ამ პოსტს სავარაუდოდ ისტერიული თავდასხმა მოჰყვება ფინანსურად მოტივირებული ჯგუფისგან.

დღეისთვის უკვე ნათელი ხდება, რომ ჩემი და რამდენიმე ადამიანის მცდელობა უშედეგო აღმოჩნდა და გრძელდება ის მავნე პრაქტიკა, რაც წინა ფესტივალზე დაინერგა. ეს კი ხდება ანაკლიაში, დღეისთვის ეკონომიკურად ყველაზე ტურბულენტურ ზონაში საქართველოს მასშტაბით. დღეს, როდესაც თბილისი და ზოგადად საქართველო მსოფლიო ელექტრონული მუსიკის რუკაზე ოქროს ასოებითაა დაწერილი, მსგავსი ყოველწლიური უმსგავსობა ისევ და ისევ იმ სცენას აზარალებს, მათ ვინც სიმწრით მიაღწიეს იმას რაც გვაქვს!

ეს სტატუსი არ ეხება რამის დაბრუნებას, არ ეხება რამის წართმევას!
ეს სტატუსი ეხება შარშანდელ ჩემს პირად გაუგებარ და დამამცირებელ გამოცდილებას რაც ექოვეივსის მენეჯმენტთან მქონდა. მართლა მეგონა რომ GEM FEST-ის მერე რამე შეიცვლებოდა, მეგონა რომ გაცილებით უფრო უკეთესი მენეჯმენტი ეყოლებოდა. ფესტივალის პირველი დღიდანვე ნათელი გახდა, რომ KHIDI არავითარ შემთხვევაში (!) აღარ ჩაერთვებოდა მომდევნო Echowaves-ზე.

კი! გვჯეროდა, რომ EXIT-ის, როგორც საერთაშორისო წარმატებული ბრენდის შემოსვლა ქართულ ბაზარზე დადებითად აისახებოდა ზოგადად ქართულ საფესტივალო კულტურაზე.

საბოლოოდ, EXIT-ის გამოცდილების ნაცვლად, მივიღეთ Gem Fest-ის უკეთესად შეფუთული გადათამაშება. ასევე გვჯეროდა და დღესაც გვჯერა, რომ ქართულ სცენას აუცილებლად სჭირდება დეცენტრალიზაცია. ფაქტია, რომ არა ჩვენ და ჩვენი ერთგული მსმენელი, Echowaves 2018 ვერ შედგებოდა და გუშინდელ მათ ლაინაფის დაანონსებაზე ხალხის რეაქცია ამის ნათელი მაგალითია!

ერთი წლის წინ ამ მართლა მავნე მენეჯმენტის დამოკიდებულება რიგითი მსმენელის, ქართველი არტისტების, მათივე სტაფის, თუ ზოგადად ქართული სცენის მიმართ არის ისეთივე შავი ლაქა, რაც გიორგი სიგუამ დაგვიტოვა. რეალობაში კი, წავიდა გიორგი სიგუა, თუმცა სხვა ყველა დარჩა!

ამ მატყუარა კანტორასთან ურთიერთობას არავის ვურჩევ. გაიზიარებთ იგივე ცუდ გამოცდილებას, რაც მე და სხვა ადამიანებმა მივიღეთ 2018 წელს.ერთწლიანი სიჩუმე ჩვენი უდიდესი შეცდომა იყო!წელს ხიდი თავისი სთეიჯით არ იქნება და არ იქნება ანაკლიაში მანამ სანამ ეს გაუგებარი მენეჯმენტი იქნება სათავეში!” -წერს თამუნა აქსანდერ

შეგახსენებთ რომ “Khidi” დიდი პოპულარობით სარგებლობს არა მარტო საქართველოში, არამედ ევროპაშიც. კლუბი 2016 წლიდან ფუნქციონირებს. ხოლო სახელი გამომდინარეიბს ადგილმდებარეობიდამ რადგან კლუბი ვახუშტი ბაგრატიონის ხიდთან არის განთავსებული.

May 30, 2019
“სააკაშვილისთვის საქართველოში მოქალაქეობა არავის ჩამოურთმევია და არც არაფერია დასაბრუნებელი“ – უსუფაშვილი

შენების მოძრაობის ლიდერმა პალიტრის ეთერში მიხეილ სააკაშვილის უკრაინაში დაბრუნებაზე, საქართველოსთან მის მიმართებაზე და იმ პოლიტიკური ძალების ამოცანებზე ისაუბრა, რომლებსაც ივანიშვილის წასვლა უნდათ, თუმცა სააკაშვილის დაბრუნება და პრორუსული ძალების აღზევება – არა.

უსუფაშვილი თვლის, რომ საქართველოს სააკაშვილისთვის არაფერი აქვს დასაბრუნებელი მოქალაქეობის საკითხში.

“ მიხეილ სააკაშვილმა უარი თქვა საქართველოს მოქალაქეობაზე, თავისი თავისუფალი ნებით.

მან გააკეთა არჩევანი უკრაინის მოქალაქეობის სასარგებლოდ და ამით უარი თქვა საქართველოს მოქალაქეობაზე.მისთვის საქართველოში არავის არაფერი არ ჩამოურთმევია მოქალაქეობასთან დაკავშირებით და ამიტომ არც დასაბრუნებელია რამე.

უკრაინამ მისცა მას მოქალაქეობა, წინა პრეზიდენტმა პოლიტიკური მოტივებით და მერე პოლიტიკური მოტივებით ჩამოართვა. ამიტომ უკრაინაში დაკარგული თუ მას უკრაინაში დაუბრუნეს ეს ნორმალური მოვლენაა და კი ბატონო, მშვიდობაში მოახმაროს მას უკრაინის მოქალაქეობა და სააკაშვილი უკრაინელ ხალხს თუ იქ რამეს გააკეთებს.

რაც შეეხება საქართველოსთან მის მიმართებას, მე არ მგონია რომ რამე შეიცვალა. მისი მომხრეები ისევე იყვნენ მისი მომხრეები როცა ის კიევში იყო, ოდესაში იყო თუ ბრუსელში იყო, როგორც ახლა იქნებიან, თუმცა რა თქმა უნდა ეს ფაქტი გაუხარდებოდათ.

აქ უფრო მნიშვნელოვანია ის ადამიანები რომლებმაც თავის დროზე დაასკვნეს და ძალიან მყარად დაასკვნეს, რომ სააკაშვილის ხელისუფლებაში მობრუნება არის დაუშვებელი ამ ქვეყნის პროგრესისთვის და ახლა ამ ხალხს ივანიშვილი მიერეკება უკან, ჯგუფ ჯგუფად უბიძგებენ, რომ ისევ იქნებ იქით გაიხედონ. ამ თამაშშია სწორედ პრობლემა და მე ამ საკითხზე მექნება ძალიან სერიოზული საუბარი კოლეგებთან პოლიტიკურ წრეებში და არა მხოლოდ პოლიტიკურ წრეებში, იმიტომ რომ როგორც ახლა საქმე მიდის, ის ხალხი ვინც ვთვლით, რომ ბიძინა შესაცვლელია მაგრამ არა მიშათი და არა რუსეთის დახმარებით, ჩვენ დღეს როგორც ვმოქმედებთ არის არასწორი და არაეფექტური.

მე მექნება ძალიან კონკრეტული კონსულტაციები, უკვე მაქვს, რა არის საჭირო. ჩვენ გვჭირდება ძალიან კონკრეტული გეგმა და ფორმულა როგორ დავაღწიოთ დღევანდელ მდგომარეობას თავი, რომ უარესში არ ამოვყოთ თავი. და ეს უარესი იქნება სააკაშვილის დაბრუნება და პრორუსული ძალების აღზევება. ამის ფორმულა არსებობს და ამაზე გვექნება ჩვენ მსჯელობა და ამაზე უნდა დავფიქრდეთ, რომ აღარ განმეორდეს ეს ყველაფერი, თორემ ორ კვირაში ერთხელ არ დაილევა მორიგი მაგალითები იმისა, რომ სახელმწიფო ვერ სახელმწიფოობს, ადამიანები რომლებსაც საჭე უპყრიათ ხელში ქვეყნის, სინამდვილეში არ უპყრიათ და ქვეყანას მიაქანებენ იქით–აქეთ და უნდა მოვახერხოთ, რომ არ შეანარცხონ რამეს. “– აცხადებს უსუფაშვილი.

May 30, 2019
კუდის ყოფილი თანამშრომელი, გიორგი სამუშია უკრაინაში დააკავეს

კუდ-ის ყოფილი თანამშრომელი გიორგი სამუშია უკრაინაში დააკავეს. გენერალურ პროკურატურაში ამ თემაზე კომენტარს ხვალ გააკეთებენ. ჯერჯერობით კი მისი დაკავების გარემოებები უცნობია. გამოძიების ინფორმაციით მეგის ქარდავას დავალებით გიორგი სამუშიამ სხვა პირებთან ერთად, აიძულა მოქალაქე, ეღიარებინა ზუგდიდში ტერორისტული აქტის მოწყობა.

გამოძიების ინფორმაციით, ჩაუდენელი დანაშაულის აღიარებაზე უარის თქმის შემდეგ დაკავებული ავტომანქანით ზუგდიდიდან თბილისში გადაიყვანეს და სამხედრო პოლიციის დეპარტამენტში აწამეს. ამავე საქმეზე ასევე ბრალდებულები არიან დათა ახალაია, გიგი კალანდაძე და რომან შამათავა. გიორგი სამუშია 2015 წელს დააკავეს. ამავე წლის 13 დეკემბერს თბილისისი საქალაქო სასამართლოს სისიხლის სამართლის კოლეგიის მოსამართლე ვახტანგ მრელაშვილმა გიორგი სამუშიას აღკვეთ ღონისძიებად პატიმრობა შეუფარდა. ხოლო, 2016 წლის 25 ივლისს თბილისი საქალაქო სასამართლოს მოსამართლე ხათუნა ხარჩილავამ გიორგი სამუშია გირაოს სანაცვლოდ გაათავისუფლა და პასპორტი ჩამოართვა.

ამის მიუხედავად გიორგი სამუშიამ საქართველოს დატოვება მოახერხა. მასზე ინტერპოლის წითელი ცირკულარით ძებნა გამოცხადდა. ბოლოს გიორგი სამუშია ქართული მედიის წინაშე ბელგიის ქალაქ ლიეჟში გამოჩნდა, სადაც იგი საქართველოს ყოფილი პრეზიდენტის მიხეილ სააკაშვილის ქართველ ემიგრანტებთან შეხვედრას ესწრებოდა.

May 30, 2019
რუსთავში შვილმა დედა სცემა

რუსთავში, მე-12 მიკრორაიონში, 30 წლამდე მამაკაცი, 60 წლამდე დედას ფიზიკურად გაუსწორდა. “ინფო რუსთავის” ინფორმაციით, შვილმა, დედას თავის არეში დაზიანებები მიაყენა. ადგილზე მობილიზებული იყო სასწრაფო სამედიცინო დახმარებისა და საპატრულო პოლიციის ეკიპაჟები. არსებული ინფორმაციით, მამაკაცი წინასწარი დაკავების იზოლატორშია გადაყვანილი.

შსს-ში “ინფო რუსთავს” განუცხადეს, რომ ფაქტზე გამოძიება, სსკ-ის 126-ე მუხლით მიმდინარეობს, რაც ძალადობას გულისხმობს.

May 30, 2019
თინა კანდელაკმა საკუთარი დიეტა გაამხილა და სოციალურ ქსელში კრიტიკა დაიმსახურა

თინა კანდელაკი ფორმას სპორტის და სპეციალურად შემუშავებული დიეტის საშუალებით ინარჩუნებს. რუსეთში მოღვაწე წარმოშობით ქართველმა წამყვანმა და ტელეპროდიუსერმა საკუთარი დიეტის საიდუმლო სოციალურ ქსელში გაამხილა და მისი ბლოგის მკითხველებისთვის ფოტოც დადო. თინას ხელში უჭირავს თეფში სალათით.

“გადადით ჯანსაღ კვებაზე. მიირთვით არარაფინირებული პროდუქტები, ახალი ხილი და ბოსტნეული, უარი თქვით შაქარზე და გლუტეინზე, და იქნებით ბედნიერები“ – დაწერა კანდელაკმა.

ის კარგა ხანია პირადი ტრენერის რჩევების ითვალისწინებს. იმის სადემონსტრაციოდ, რომ ჯანსაღი პროდუქტებითაც შეიძლება საინტერესო მენიუს მომზადება, თინა მკითხველს მოუყვა რას მიირთმევს თვითონ, რითაც ბევრი გააოცა და გააღიზიანა.

ტელეწამყვანმა დაწერა, რომ მის რაციონში შედის, მაგალითად, წითელი და თეთრი თევზის კატლეტი, რამდენიმე ძვირადღირებული ზღვის პროდუქტი და სატაცური, ორაგულის სტეიკი ყვავილოვანი კომბოსტოთი. “გარანტიას გაძლევთ, ბედნიერად იგრძნობთ თავს!“ – დაპირდა თინა მკითხველს, რომელთა ნაწილი ჩამონათვალმა გააღიზიანა და ტელეწამყვანს დაუკომენტარა, რომ ასეთ მენიუზე ყველას არ მიუწვდება ხელი. “მეტისმეტია თინა. თქვენს ბლოგს ხომ ჩვეულებრივი ადამიანები კითხულობენ, რომლებისთვისაც ეს ინგრედიენტები ხელმისაწვდომი არ არის“ – წერენ კანდელაკის ხელმომწერები.

თუმცა ზოგი ამბობს, რომ თინას არაფერი დაუშავებია: მან უბრალოდ თქვა რას ჭამს თვითონ. მისი რჩევა კი, ახალი ხილის და ბოსტნეულის ჭამისა და შაქარზე და რაფინირებულ პროდუქტზე უარის თქმის შესახებ ყველასთვის ხელმისაწვდომია თუნდაც განსხვავებული რაციონით.

May 30, 2019