Blog

ანაკლიის პორტის პროექტის ჩაშლის მცდელობაში ოთარ ფარცხალაძის კვალი იკვეთება

ანაკლიის პორტის სკანდალში ყოფილი მთავარი პროკურორის, ოთარ ფარცხალაძის ინტერესები იკვეთება. ირკვევა, რომ სწორედ ყოფილი გენერალური პროკურორის და ბიძინა ივანიშვილის უახლოესი გარემოცვის წევრის ინტერესები უკავშირდება ფოთში პორტის მშენებლობას.

ეკონომიკის სამინისტრომ ფოთში ახალი ღრმაწყლოვანი პორტის მშენებლობის ნებართვა გასცა. დოკუმენტი 2019 წლის 2 მაისით თარიღდება. დოკუმენტი გუშინ საღამოს გასაჯაროვდა, რასაც ანაკლიის უცხოელი ინვესტორების მხრიდან სრული პანიკა მოჰყვა. ანაკლიის განვითარების კონსორციუმმა გაავრცელა განცხადება, რომ თუ ხელისუფლება ამ გადაწყვეტილებას არ გააუქმებდა, ისინი ანაკლიის პროექტს შეაჩერებდნენ, მამუკა ხაზარაძემ კი პირდაპირ დაწერა, რომ პორტის მშენებლობა საფრთხეში იყო.

საინფორმაციო შეტევის შემდეგ, დილა ეკონომიკის მინისტრმა უკან დახევით დაიწყო. ნათია თურნავამ პრაქტიკულად თქვა, რომ მისმა დაქვემდებარებულმა უწყებამ ქვეყანაში ახალი გიგანტური პორტის მშენებლობის ნებართვა ისე გასცა, რომ პროექტის შესახებ, რომელსაც ასეულობით მილიონი დოლარი სჭირდება, მინისტრმა არაფერი იცოდა. ყველაფერი საბოლოოდ, ეკონომიკის სამინისტროს მშენებლობის დეპარტამენტის ხელმძღვანელს დაბრალდა. გრიგოლ კაკაურიძემ კამერის წინ, წინასწარ შეთანხმებული განცხადება გააკეთა და არც ერთ კითხვას არ უპასუხა. მათ შორის არ თქვა, იცოდა თუ რა რომ ახალი პორტის უკან ოთარ ფარცხალაძე დგას.

ოთარ ფარცხალაძის გვარი დიდ სკანდალში დღის ბოლოს გამოჩნდა, მას შემდეგ რაც გაერთიანებული ოპოზიციის წევრმა, მარიკა დათუკიშვილმა გაასაჯაროვა ფაქტები, რომ ფოთის ახალი ღრმაწყლოვანი პორტის მფლობელი და ოთარ ფარცხალაძე ბიზნეს პარტნიორები არიან. დღევანდელი სკანდალის გამო ხელისუფლებას ერთიანი პოზიცია არ ჰქონდა, ეკონომიკის მინისტრი ამბობდა, რომ ანაკლია უალტერნატივოა და მთავრობა ხაზარაძის ბიზნეს ჯგუფს ხელს შეუწყობს პორტის მშენებლობა მალე დაასრულოს. მთავრობა, პოლიტიკურმა ოპონენტებმა დღეს მწვავედ გააკრიტიკეს და არაპროფესიონალიზმსა და ქვეყნისთვის საზიანო გადაწყვეტილებების მიღებაში დაადანაშაულეს.

მთავრობის წარმომადგენლებმა დღეს ანაკლიის პორტის ინვესტორებს მკაცრი ტონით საჯაროდ მიმართეს და აღებული ვალდებულებების დროულად შესრულება მოსთხოვეს. მეორე მხრივ კი, თავად ინვესტორები მიმართავენ ხელისუფლებას ყველაფერი გააკეთოს საიმისოდ, რომ ეკონომიკის სამინისტროში მომხდარის გამო საერთაშორისო საფინანსო პარტნიორების თვალში შელახული რეპუტაცია და ნდობა აღიდგინონ, რათა ანაკლიის პროექტი არ შეფერხდეს.

ფოთის პორტისა და ანაკლიის პორტის პროექტების ირგვლივ განვითარებულ მოვლენებთან დაკავშირებით პოლიტოლოგი გია ხუხაშვილი სისხლის სამართლებრივი დევნის დაწყებას ითხოვს. ხუხაშვილი ამბობს, რომ შესაძლოა, ადგილი ჰქონდეს სისხლის სამართლის დანაშაულს, როდესაც საქმე ეხება სახელმწიფოებრივი მნიშვნელობის პროექტს, ანაკლიის პორტს, რომლის განხორციელებაც კითხვის ნიშნის ქვეშ დადგა. „კონსტიტუციით გამაგრებული პროექტის საბოტირება ნებისმიერი ფორმით, ეს ჩემი აზრით, არის სისხლის სამართლის დანაშაული, შესაბამისად, უნდა აღიძრას სისხლის სამართლის საქმე სახელმწიფოსთვის განსაკუთრებით დიდი ოდენობის ზარალის მიყენების მცდელობის მუხლით და უნდა დაიწყოს გამოძიება. ვინ იყო შემსრულებელი, ვინ იყო დამკვეთი, ვინ მონაწილეობდა ამ ყველაფერში, იმიტომ, რომ მოგეხსენებათ კონსტიტუცია ყველა კანონზე მაღლა დგას საქართველოს კონსტიტუცია და ეს პროექტი ასახულია მის დებულებებში,“ – განაცხადა გია ხუხაშვილმა.

May 30, 2019
რამდენჯერ შეიძლება შეუყვარდეს ადამიანს ცხოვრებაში. ახალი კვლევა

რამდენჯერ შეიძლება გეწვიოთ სიყვარული და მერამდენე ცდაზე შეიძლება შეხვდეთ ნამდვილ სიყვარულს? ახალი კვლევის მიხედვით ყოველ ადამიანს საშუალოდ სამჯერ უყვარდება და სწორედ ბოლო სიყვარულისას აღწევს ურთიერთობებში ბალანსს. თეორია უდაოდ საინტერესოა. ყოველ შემთხვევაში, მისი ცოდნა ნამდვილად ღირს.

ვინ გვიყვარდება პირველ ორ ჯერზე?

კვლევისას, რომელშიც 37 წლის 3000 ბრიტანელი ქალი და მამაკაცი მონაწილეობდა, გააანალიზეს წყვილების სასიყვარულო ჩვევები. ანკეტირების შედეგებით, ყოველ ადამიანს ცხოვრების განმავლობაში მაქსიმუმ ხუთჯერ შეუძლია მეწყვილე იპოვნოს, თუმცა ნამდვილი სიყვარული მხოლოდ სამჯერ შეუძლია გამოსცადოს.

პირველ ჯერზე სიყვარული მოზარდობის ასაკში მოდის, როცა ჩვენი გრძნობების ობიექტს მაქსიმალურად ვაიდეალებთ და გვეჩვენება, რომ ამ ურთიერთობებს ზღაპრული მომავალი ექნება. მაგრამ მკაცრი რეალობა ყველაფერს თავის ადგილს უჩენს, დროთა განმავლობაში წყვილი ცხოვრებისეულ გამოცდებს ვერ უძლებს და ერთმანეთს შორდება.

ფსიქოლოგები ამტკიცებენ, რომ მეორე სიყვარული – ეს არის გაქცევა პირველი ურთიერთობებისგან და ის ყოველთვის ცხოვრებაში ისე ჩნდება, როგორც აუცილებლობა. პირველი სიტყვარულით გატეხილი გული მშვიდ სავანეს ეძებს, რომელშიც ძველს დაივიწყებს და საკუთარ თავს ხელახლა იპოვნის.ყველაზე ხშირად ასეთი ურთიერთობები ერთი პარტნიორისთვის ეგოისტურ მოტივებზეა აწყობილი, რადგან ის ახალ სიყვარულს მხოლოდ დროებით თავშესაფრად თვლის. იმის გამო, რომ მეორე პარტნიორი პირველი ურთიერთობების ერთგვარი ნაყოფია, ასეთი ურთიერთობები კრახისთვის არის განწირული.

მესამე სიყვარული – რას გვაძლევს ის?

ორი რომანტიული ისტორიის შემდეგ, როცა ადამიანი პრაქტიკულად სიყვარულის საკითხში იმედგაცრუებულია, მას ნამდვილი ურთიერთობები და სიყვარული ეწვევახოლმე. სწორედ ეს სიყვარულია ბალანსის ნამდვილი წერტილი, როცა ორივე პარტნიორი გულწრფელობას, სიმშვიდეს, სულიერ სიახლოვეს და სიყვარულისთვის მზადყოფნას პოულობს.

თუ პირველი ორი სიყვარულისას არ ვართ მზად პარტნიორთან და საკუთარ თავთან გულახდილები ვიყოთ, ურთიერთობებს ვაიდეალებთ და ვცდილობთ “კუბოს ფიცრამდე სიყვარული“ ვითამაშოთ, მესამე სიყვარული ნამდვილი ადამიანური, ფასეული ურთიერთობების განსახიერებაა. სხვათა შორის, ყველაზე სერიოზული პიროვნული ცვლილებები სწორედ ასეთ ურთიერთობებში იწყება – ძლიერ და გულწრფელ ურთიერთობებში, რადგან ჩნდება გულწრფელი მონდომება კიდევ უფრო უკეთესები ვიყოთ იმ ადამიანის გვერდით, ვინც გვაბედნიერებს და ვისაც ესმის ჩვენი.

May 30, 2019
ტრანსგენდერობა ჯანდაცვის მსოფლიო ორგანიზაციამ ფსიქიკური აშლილობების სიიდან ამოიღო

ჯანდაცვის მსოფლიო ორგანიზაციამ დაავადებათა საერთაშორისო კლასიფიკაციის ახალი გამოცემა დაამტკიცა, რომელშიც ტრანსგენდერობა განიხილება არა როგორც ფსიქიური აშლილობა, არამედ როგორც “სექსუალურ ჯანმრთელობასთან“ დაკავშირებული საკითხი.

უფლებადამცველი ორგანიზაცია Human Rights Watch ამას მთელ მსოფლიოში ტრანსგენდერების თავისუფლებისთვის ბრძოლაში მნიშვნელოვან ნაბიჯად თვლის.

დაავადებათა საერთაშორისო კლასიფიკაციის ბოლო გამოცემა ტრანსგნდერობას განსაზღვრავს, როგორც ადამიანის შეუთავსებლობას იმ სქესთან, რომელიც მას დაბადებით განესაზღვრა.

წინა გამოცემაში ტრანსგენდერება იდენტობის მოშლად ითვლებოდა და “ფსიქიკური და ქცევითი აშლილობის“ ფარგლებში განიხილებოდა.

“ჩვენ უკეთ გავაცნობიერეთ ეს საკითხი და დავასკვენით, რომ ეს არ არის ფსიქიური ჯანმრთელობის საკითხი. სანამ ტრანსგენდერობა ფსიქიკური აშლილობების განყოფილებაში რჩებოდა, ეს საზოგადოებაში ამ ადამიანების სტიგმატიზებას უწყობა ხელს“ – აცხადებს ჯანდაცვის მსოფლიო ორგანიზაციის ექსპერტი ლეილ სეი.

Human Rights Watch –ის წარმომადგენელი, გრემ რიდი ყველა ქვეყნის მთავრობებს მოუწოდებს უსწრაფესი რეფორმები ჩაატარონ ნაციონალურ ჯანდაცვის სისტემებში და მიიღონ კანონები, რათა ეს “მოძველებული დიაგნოზი“ თავიდან მოიშორონ

ბიბისის კორესპონდენტი, მეგი მონაჰი წერს, რომ ჯანდაცვის მსოფლიო ორგანიზაციის გადაწყვეტილებამ ერთის მხრივ სიხარული, მეორეს მხრივ კი ბევრი კითხვები გამოიწვია მათი მხრიდან, ვინც დიდი ხნის მანძილზე სქესობრივ იდენტობასთან დაკავშირებულ დისკუსიებს ადევნებდა თვალს.

პირველ რიგში, ჩნდება კითხვა, რას ნიშნავს ეს გადაწყვეტილება პრაქტიკული თვალსაზრისით და მოუტანს თუ არა ეს ზომა მეტ თავისუფლებას ტრანსგენდერებს მთელ მსოფლიოში, განსაკუთრებით იმ ქვეყნებში, სადაც აქტივისტები არასწორ დიაგნოზებზე და გენდერული იდენტობის საკითხის განხილვისას სამედიცინო პერსნალის მხრიდან ზეწოლაზე საუბრობენ.

დაეხმარება თუ არა ეს ნაბიჯი მარგინალიზებული ჯგუფების სტიგმატიზაციის დაძლევას, და შეცვლის თუ არა დამოკიდებულებას ტრანსგენდერების მიმართ.

გარდა ამისა, ტრანსგენდერი ადამიანების აღწერისას ჯანდაცვის მსოფლიო ორგანიზაცია კვლავ იყენებს ტერმინს “გენდერული მიუღებლობა“, ანუ სურვილი მიეკუთვნებოდე იმ სქესს, რომელიც შენი დაბადებისას მოცემული სქესისგან განსხვავდება.

ეს ფორმულირებები მნიშვნელოვანია, განსაკუთრებით მაშინ, როცა საქმე გენდერს ეხება. ბიბისი წერს, რომ სწორედ ტერმინების გამო ადანაშაულებს ბევრი უფლებადამცველი აქტივისტი ჯანდაცვის მსოფლიო ორგანიზაციას არაპროგრესულ შეხედულებებში.

დაავადებათა საერთაშორისო კლასიფიკაციის მიმართ სხვა პრეტენზიებიც არსებობს. 50–ზე მეტმა ორგანიზაციამ ხელი მოაწერა ერთობლივ განცხადებას, რომელშიც დაგმო ჯანდაცვის მსოფლიო ორგანიზაციის პოზიცია, რომელიც სქესობრივი განვითარების ვარიაციებს “სქესობრივი განვითარების მოშლილობას“ უწოდებს.

May 30, 2019
“თუ დროში გაიწელება,მომდევნო წლებში გადავალთ,გავაგრძელებთ“ – კალაძე ჭავჭავაძის რეაბილიტაციაზე

კახა კალაძემ ვაკეში, ჭავჭავაძის გამზირზე მიმდინარე სამუშაოები დაათვალიერა და განაცხადა, რომ პირველ ეტაპზე გამოიცვლება კომუნიკაციები და სანიაღვრე სისტემა.რეაბილიტაციის პირველ ეტაპს 3 თვე დასჭირდება.

„კიდევ ერთხელ მინდა, ბოდიში მოვუხადო დედაქალაქის მოსახლეობას შექმნილი დისკომფორტისთვის, მაგრამ ყველა ვთანხმდებით, რომ ასეთი პროექტების განხორციელება შეზღუდვების გარეშე შეუძლებელია. ვადებს რაც შეეხება, პირველი ეტაპის სამუშაოები სამი თვის განმავლობაში უნდა დამთავრდეს. ყველაზე დიდი პრობლემა არის მიწისქვეშ განთავსებული ქსელი. რეალურად არავინ იცის მისი არსებული მდგომარეობა. ერთი ვიცით, რომ არის ძლიერად დაზიანებული. თუ დავინახეთ, რომ დროში იწელება და მთლიანი ქუჩის რეაბილიტაცია სრულად ვერ მოხერხდება, დავამთავრებთ პირველ ნაწილს, რაც არის დაწყებული და შემდგომ მომდევნო წლებში გადავალთ სხვაზე“, – განაცხადა კალაძემ.

May 30, 2019
ქუთაისში მედიასაშუალებებმა “ოცნების” დეპუტატ ნანა კოსტავას ბოიკოტი გამოუცხადეს

ქუთაისში მოქმედი მედიასაშუალებები, ქუთაისის საკრებულოს წევრს, ნანა კოსტავას ბოიკოტს უცხადებენ. ადგილობრივი მედიასაშუალებების წარმომადგენლები განცხადებას ავრცელებენ, საკრებულოს დეპუტატის მიერ სიძულვილის შემცველ განცხადებებს გმობენ და ადგილობრივ თვითმმართველობას რეაგირებისკენ მოუწოდებენ.

,,ჩვენთვის სიძულვილის ენით საუბარი დაუშვებელი და კატეგორიულად მიუღებელია. შესაბამისად, ქუთაისში მოქმედი მედიასაშუალებების წარმომადგენლები ვგმობთ ,,ფრაქცია ქართული ოცნება -კონსერვატორების თავმჯდმარის“ ნანა კოსტავას ბოლო დროს გაკეთებულ ქსენოფობიურ, ჰომოფობიურ და სიძულვილის ენის შემცველ განცხადებებს. მივიღეთ ერთობლივი გადაწყვეტილება და დეპუტატს ბოიკოტს ვუცხადებთ. ნანა კოსტავას აღარ მიეცემა საშუალება გამოიყენოს ქუთაისში არსებული საინფორმაციო პლათფორმა. მოვუწოდებთ საკრებულოს შესაბამისი რეაგირებისკენ“ – ნათქვამია გავრცელებულ განცხადებაში.

ქუთაისის საკრებულოს წევრმა ნანა კოსტავამ სოციალური ქსელის მეშვეობით სიძულვილის შემცველი ტექსტი გაავრცელა, რამაც საზოგადოების პროტესტი გამოიწვია.

“კაი დღეში ხარ ახლა, იცინე!” – ამ წარწერით სოციალურ ქსელში “ქართული ოცნებიდან” ქუთაისის საკრებულოს წევრმა ნანა კოსტავამ სოციალური მედიის მენეჯერის, სალომე ბარკერის ვიდეო გააზიარა. პოსტის გამოქვეყნება ზუსტად იმ დროს მოხდა, როდესაც ცნობილი გახდა, რომ ლაგოდეხში ექსკურსიაზე მყოფი სალომე ბარკერის და მდინარემ წაიღო.

ამ პოსტის გამოქვეყნების შემდეგ, ნანა კოსტავა მისივე ფეისბუქ გვერდზე ბევრმა მომხმარებელმა გააკრიტიკა და მის საქციელს “სამარცხვინო” უწოდა. თავად დეპუტატმა განაცხადა, რომ მან მომხდარის შესახებ არ იცოდა, მაგრამ დამატებით მაინც განმარტა რომ – “იცინის ის, ვინც ბოლოს იცინის და რაღაცნაირად ბოროტი ძალებისგან გადაუხადეს სამაგიერო.”

May 30, 2019
გორში სასწრაფო დახმარების ბრიგადის ექიმს ფიზიკურად გაუსწორდნენ

გორში სასწრაფო დახმარების ბრიგადის ექიმს ფიზიკურად გაუსწორდნენ. პაციენტმა, შუა ხნის ასაკის ქალბატონმა ექიმს ჯერ სიტყვიერი და ფიზიკური შეურაცხყოფა მიაყენა, შემდეგ კი წნევის აპარატი და ფონეინდოსკოპი დაუმტვრია.

დაზარალებული ამ დრომდე, პოლიციის შენობაში იმყოფება გამოკითხვაზე.

სასწრაფო სამედიცინო დახმარების გორის ბიუროში ყვებიან, რომ ეს ოჯახი ზოგადად აგრესიულია და სხვა დროსაც მომხდარა მათ შორის ინციდენტები. მომხდარზე აღძრულია სისხლის სამართლის საქმე, მიმდინარეობს გამოძიება.

„ბრიგადა, ჩვეულებისამებრ გავიდა ამ გამოძახებაზე და როგორც კი შევიდნენ ოთახში, იქ მყოფმა ქალბატონმა, როგორც შემდეგ აღმოჩნდა, ოჯახის დიასახლისმა, შეურაცხყოფა მიაყენა არა მარტო სიტყვიერი, არამედ ფიზიკურიც. დაამტვრია ფონენდოსკოპი და წნევის აპარატი და თვითონ ექიმს მიაყენა ფიზიკური შეურაცხყოფა. მაგ ოჯახში, ხშირად არის ხოლმე გამოძახება და ყოველთვის აგრესიით გამოირჩევიან ხოლმე მედ პერსონალის მიმართ“ – აცხადება სასწრაფო დახმარების მთავარი ექიმი, თემურ თანიაშვილი.

May 30, 2019
ლედი გაგას ყოფილი საქმრო ამაღელვებელ პოსტებს უძღვნის

50 წლის კრისტიან კარინო 33 წლის ლედი გაგასთან დაშორების შემდეგ სოციალურ ქსელებში ძალიან გააქტიურდა. ვარსკვლავების აგენტი ხშირად დებს სხვადასხვა ფოტოებს რომანტიული ციტატებით. მომღერლის თაყვანისმცემლებმა გადაწყვიტეს, რომ კარინო მათ ლედი გაგას უძღვნის.

მაგალითად, ამ დღეებში კრისტიანმა გამოაქვეყნა ტელეფონის ფოტო, რომელზეც წერია “უთხარი, რომ გიყვარს“. მინაწერში კი წერს, რომ ასეთი თამამი ნაბიჯისთვის ადამიანი უშიშარი უნდა იყოს.

გარდა ამისა, ის ქსელში დებს ფოტოებს ციტატებით: “როცა ის ჩემს გვერდით არის, სასწაულები ხდება“, “ძალა იმაშია, რომ მსუბუქი იყო“, “როგორ გამიმართლა, რომ მყავს ის, ვისთან დაშორებაც ასე ძნელია“, “იყავი ნემსი ვიღაცის ცხოვრებაში არა იმისთვის, რომ ტკივილი მიაყენო, არამედ იმისთვის, რომ ბედნიერება შეაკავშირო“, “შენ სიყვარულის სუნი გაქვს“ და ა.შ.

კარინოს ხელმომწერებს მისი რომანტიული აქტიურობა მოსწონთ და მას წარმატებებს უსურვებენ, თუმცა ზოგიერთი ურჩევს სიტუაციას ნუღარ ჩაებღაუჭება და ყოფილი შეყვარებული დაივიწყოს.

ლედი გაგა კრისტიან კარინოს მისი ეჭვიანობის გამო და პოპულარობის დაკარგვის შიშით დაშორდა. მათი ქორწილი ბოლო მომენტში ჩაიშალა. ლედი გაგა ამტკიცებს რომ მისი პირადი ცხოვრების დრამაში არავითარი წვლილი არ მიუძღვის ბრედლი კუპერს, რომელთან ერთად ფილმ “ვარსკვლავის დაბადებაში“ ითამაშა, რის შემდეგაც მათი რომანის შესახებ ჭორები გავრცელდა. უბრალოდ ლედი გაგას შეყვარებულთან დაშორება დროში დაემთხვა იმ მომენტს, როცა ოსკარზე ლედი გაგამ და ბრედლი კუპერმა სცენაზე ერთად იმღერეს.

May 30, 2019
“ჩამოვიდეს ეგ კურდღელი, არც სტაფილოს მოვაკლებ მატროსოვზე, არც კომბოსტოს“-ქანთარია სააკაშვილზე

პარლამენტის პლენარულ სხდომაზე, სადაც კენჭისყრამდე სხვადასხვა კანონში შესატან ცვლილებებზე მსჯელობდნენ, „ქართული ოცნების“ წევრმა ნუკრი ქანთარიამ სიტყვა მოითხოვა და მიხეილ სააკაშვილზე ისაუბრა.

დეპუტატის თქმით, მიხეილ სააკაშვილს სისხლის სამართლის პასუხისმგებლობა უნდა დაეკისროს. მას უკვე აქვს პასპორტი, არის კონკრეტული ქვეყნის მოქალაქე და მისი ჩამოყვანა უნდა მოხდეს.

“მინდა ამ თემით ვისარგებლო და ერთ აღტკინებულ, უსამშობლო, უპასპორტო დამნაშავეზე, ოღონდ ახლა პასპორტი მისცეს, ერთი-ორი სიტყვა ვთქვა. ახლანდელი კომენტარი წავიკითხე. როდესაც კაცი იქიდან ლაპარაკობს, სტაფილოს წვენი ვიღაცას არ გადაცდესო, ჩემი ჩამოსვლის ეშინიათო და რაღაც მსგავს სისულელეებს ამბობს… ეს მართლა, ბაჭიასაც ვეღარ ვიტყვი, რაღა დროს მაგის ბაჭიაობაა, ეს კურდღელი, ეს “კროლიკი“ – პირდაპირ მაგის ენაზე მინდა ვთქვა, ამბობს, ჩამოვალო. ჩამოვიდეს და მე ვაძლევ გარანტიას, რომ მატროსოვზე არც სტაფილოს და არც კომბოსტოს არ მოვაკლებ. ერთი რამ უნდა იცოდეს – ჩამოვა ჩაჯდება, არ ჩამოვა, ჩამოიყვანენ და ჩაჯდება, აუცილებლად ყველა გზა მატროსოვისაკენ მიდის“ – განაცხადა ნუკრი ქანთარიამ

May 30, 2019
“პატარა პიონერები” – ახალციხეში დამრიგებელმა სკოლის მოსწავლეებს პიონერთა ყელსახვევების გაკეთება მოსთხოვა

ახალციხეში, მე-5 საჯარო სკოლის პირველკლასელებს ზეიმზე, ანბანის გაცილებაზე საბჭოთა სიმბოლიკის აღმნიშვნელი წითელი ყელსახვევები ეკეთათ. ინფორმაციას ამის შესახებ ახალციხის ადგილობრივი ტელერადიოკომპანია მე-9 არხი ავრცელებს. როგორც მშობლები აცხადებენ მოსწავლეების ვიზუალური მხარე მოთხოვნილი იყო დამრიგებლის მიერ.

„კლასის დამრიგებლის იდეა იყო. აღარ მიკითხავს რატომ გადაწყვიტეს მაინცდამაინც წითელი ყელსახვევები. შევაკერინეთ, ლარნახევარი დაგვიჯდა ერთი ყელსახვევი. მასწავლებელს უნდოდა და ჩვენც დავეთანხმეთ. სხვა კლასებისგან განსხვავებული რომ იყოსო, მოიფიქრა, ვითომ პატარა პიონერები იყვნენ. ყველამ მოიწონა, დირექტორმაც კი. წითელი ყელსახვევი პრობლემაა? მშობლებმა არაფერი ვიცით. მასწავლებელს ან დირექციას არ უნდა სცოდნოდა თუ არ შეიძლებოდა? რასაც გვეუბნებიან ჩვენ იმას ვაკეთებთ“, – ამბობენ მშობლები.

დამრიგებელი ლუიზა მღებრიშვილი უარყოფს, რომ წითელი ყელსახვევებით პიონერებთან მსგავსების ჩვენება უნდოდათ. 27 მაისს გამართული ღონისძიება, საქართველოს დამოუკიდებლობის აღდგენის დღეს მიუძღვნეს. მის მოსწავლეებს ყელსახვევები სხვა წლებშიც ჰქონიათ, თუმცა მწვანე და იასამნისფერი.

„თეთრი მაისური და წითელი გეტრები ჩავაცვით. ყელსახვევიც ამას შევუხამეთ. რაღაც ხომ უნდა გაეკეთებინათ? ჰალსტუხი არ მოუხდებოდა, ამიტომ გავაკეთეთ ეს. არ მიფიქრია, რომ პიონერის ყელსახვევად აღიქმებოდა, თორემ ხომ არ გავაკეთებდი? მაშინ სხვა ფერს შევარჩევდი“, – ამბობს დამრიგებელი

„წითელი ყელსახვევების ნაცვლად, შეიძლებოდა საქართველოს სიმბოლიკა გამოეყენებინათ. ეს არის ნოსტალგია საბჭოთა კავშირის მიმართ, განსაკუთრებით შუა ასაკის ხალხისთვის“, – ამბობს „დემოკრატიული ჩართულობის ცენტრის“ ახალციხის ოფისის წარმომადგენელი ამალია სარქისიანი.

სამოქალაქო ცნობიერების პრობლემა – ასე აფასებს პოლიტოლოგი მეხუთე სკოლის მასწავლებლის გადაწყვეტილებას. გიორგი გობრონიძეს მიაჩნია, რომ პირველკლასელებზე შემოხვეული წითელი ყელსახვევი სხვა არაფერია, თუ არაკრიტიკული აზროვნების ნაკლებობა.

„არ არის ნორმალური, 21-ე საუკუნეში ბავშვი გამოაწყო პიონერივით და ამას განსხვავება დაარქვა. ეს ვიზუალი ადმინისტრაციას ნორმალურად სავარაუდოდ იმიტომ მიიჩნია, რომ თავად იყვნენ პიონერები და უკეთესი არაფერი უნახავთ. აჩვენეთ უკეთესი და ამას აღარ მოისურვებენ“, – ამბობს საერთაშორისო ურთიერთობების სპეციალისტი. მისი თქმით, განათლების სამინისტრო მასწავლებლებს ვერ სათავაზობს ინოვაციებს, განსაკუთრებით რეგიონებში.

May 30, 2019
“ვერაფერი ვერ გავიგე, ლგბტ დაცვის პონტები ხო არ არის აქა?“ – კვიციანი კანონის მუხლის სახელწოდებამ დააეჭვა

პარლამენტის პლენარულ სხდომაზე სისხლის სამართლის კოდექსში შესატან სხვადასხვა ცვლილებას განიხილავენ. „პატრიოტთა ალიანსის“ წევრმა ემაზრა კვიციანმა პრეტენზია ერთ-ერთი მუხლის დასახელებაზე გამოთქვა.

„სათაური ვერ გავიგე, რაღაცა უცნაურად არის ჩამოყალიბებული, გასაგებია გაუპატიურება, პედოფილია, ფაქტიურად არის ძალადობა ხომ? სათაურში წერია: სქესობრივი თავისუფლებისა და ხელშეუხებლობის წინაღმდეგ მიმართულ დანაშულთან ბრძოლის შესახებ“. ვერაფერი ვერ გავიგე, ლგბტ დაცვის პონტები ხო არ არის აქა?“ – მიმართა ემზარ კვიციანმა შს მინისტრის მოადგილეს ნათია მეზვრიშვილის.

კვიციანის მოსაზრებით, უკეთესი იქნება, კოდექსის ამ მუხლს უბრალოდ ერქვას „სქესობრივი ძალადობა“.

„მაინც და მაინც იურისტი უნდა ვიყო, რომ გავიგო, რას ნიშნავს?უბრალო ადამიანებმაც ხომ უნდა გაიგონ? იყოს „სქესობრივი ძალადობა“ – განაცხადა ემზარ კვიციანმა.

May 30, 2019