Category: სლაიდერი

Politico-ს ინფორმაციით, გერმანიის კანცლერი ოლაფ შოლცი აჭიანურებს უკრიანისთვის ტანკების მიწოდებას, მიუხედავად სხვა მაღალი რანგის ოფიციალური პირების ზეწოლისა. ამის შესახებ მედია ანონიმურ წყაროებზე დაყრდნობით იუწყება. 

გამოცემის ცნობით, გეგმა, რომელიც წამოაყენეს ვიცე-კანცლერმა და ეკონომიკის მინისტრმა რობერტ ჰაბეკმა და საგარეო საქმეთა მინისტრმა ანნალენა ბურბოკმა, დაახლოებით 100 ტანკს ითვალისწინებს.

Politico იუწყება, რომ თავდაპირველად, ამ საკითხზე გადაწყვეტილება ამ კვირაში იყო მოსალოდნელი, მაგრამ ახლა შოლცი ამტკიცებს, რომ გერმანიამ ჯერ უნდა მიაღწიოს საერთო პოზიციას დასავლელ მოკავშირეებთან ამ საკითხთან დაკავშირებით, სანამ ასეთ მძიმე სამხედრო აღჭურვილობას მიაწვდის უკრაინას.

შოლცმა თქვა, რომ მისთვის მნიშვნელოვანია ამ საკითხზე ევროკავშირისა და ნატოს პარტნიორებს შორის კოორდინაცია, რათა არავინ იჩქაროს, მათ შორის გერმანიამაც.

ცნობისთვის, NATO-ს საგარეო საქმეთა მინისტრებმა 6 და 7 აპრილს განიხილეს უკრაინის სამხედრო მხარდაჭერა, მაგრამ ტანკების მიწოდებასთან დაკავშირებით დეტალები არ წარმოუდგენიათ.

უკრაინისა და მისი პარტნიორების სადაზვერვო ინფორმაციით, რუსეთი გეგმავს დონბასზე დიდი შეტევის განხორციელებას უახლოეს კვირებში.

NATO-ს გენერალური მდივანი იენს სტოლტენბერგი აცხადებს, რომ ვლადიმერ პუტინმა არ მიატოვა უკრაინის კონტროლის გეგმა და ძირითადი ძალები აღმოსავლეთში გადაიყვანა დონბასის დასაპყრობად, სადაც ელოდებიან “დიდ ბრძოლას, რუსეთის დიდ შეტევას“.

უკრაინის პრეზიდენტი ვოლოდიმირ ზელენსკი ამბობს, რომ რუსეთს შეუძლია გამოიყენოს ბირთვული იარაღი არა მაშინ, როდესაც ის კუთხეშია მიმწყვდეული, არამედ იმ შემთხვევაში, თუ დაუსჯელობასა და უპირატესობას იგრძნობს. ამის შესახებ მან, Pravda-ს ცნობით, ინდურ მედიასთან ინტერვიუში ისაუბრა.

“რუსეთის ფედერაციის მიერ გარკვეული ადამიანების მოწამვლა მუდმივად იმ მომენტში ხდებოდა, როდესაც გრძნობდნენ მეორე მხარის სისუსტეს, საკუთარ თავში ეჭვს. რუსეთი დასავლური სახელმწიფების ბიუროკრატიითა და ზოგჯერ სისუსტის შემთხვევაში იყენებდა ამა თუ იმ იარაღს.

მაშასადამე, ნებისმიერი იარაღის გამოყენება, და ბირთვული არ არის გამონაკლისი, არ მოხდება იმიტომ, რომ ვიღაც დადგება უკრაინის მხარდასაჭერად, ან იმიტომ რომ შეგვიყვანს ნატოში, ან მოგვცემს თვითმფრინავებსა და ტანკებს.

რუსეთს ბირთვული იარაღის გამოყენება შეუძლია მხოლოდ მაშინ, როცა თავს უპირატესად გრძნობს. სწორედ უპირატესობაა [მიზეზი] და არა ის, რასაც მსოფლიო დიპლომატია ამბობს: “თუ ისინი კუთხეში მოემწყვდევიან“,– განაცხადა ზელენსკიმ.

მისივე განმარტებით, არსებობს კიდევ ერთი მიზეზი, რატომაც რუსეთი ატომურ იარაღს არ გამოიყენებს – ეს ძალაუფლებისა და სიცოცხლის დაკარგვის შიშია.

„მეორე, თქვენ უნდა გესმოდეთ, რომ ამ ხალხს და ამ ხელმძღვანელობას და მთელ რუსეთის ფედერაციას სურს სიცოცხლე. მათ უყვართ სიცოცხლე, მართავენ სახელმწიფოს და არ სურთ ძალაუფლების დათმობა. მათ არ სურთ საკუთარი სიცოცხლის, ძალაუფლებისა და  მოსახლეობის ნდობის დაკარგვა. ატომური იარაღის გამოყენება გამოიწვევს ზუსტად იმას, რომ ისინი ყველაფერს დაკარგავენ. ამიტომ მე ამის არ მჯერა“, – აღნიშნა ზელენსკიმ.

ევროკომისიის პრეზიდენტი, ურსულა ფონ დერ ლაიენი და ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, ჟოზეფ ბორელი კიევში მატარებლით გაემგზავრნენ. ისინი პრეზიდენტი ვოლიდიმირ ზელენსკისთან გამართავენ შეხვედრას.

ბორელი და დერ ლაიენი პოლონეთის ფშემისლის სადგურიდან, რომელიც საზღვრიდან 13 კილომეტრში მდებარეობს, 8 აპრილს, ღამით გაემგზავრნენ.

На шляху до Києва!

Going to Kyiv. #StandWithUkraine @vonderleyen @eduardheger pic.twitter.com/Lw8UaQUZgB

— Josep Borrell Fontelles (@JosepBorrellF) April 8, 2022

არსებული ინფორმაციით, მათი დელეგაციის შემადგენლობაში არიან სლოვაკეთის პრემიერ მინისტრი ედუარდ ჰეგერი და რამდენიმე ევროპარლამენტარი.

ცნობისთვის, ურსულა ფონ დერ ლაიენი პირველი მაღალი რანგის ევროპელი პოლიტიკოსია, რომელიც უკრაინას ბუჩაში ხოცვა-ჟლეტის შემდეგ ეწვევა.

რეგიონული სამხედრო ადმინისტრაციის ხელმძღვანელის, დიმიტრი ჟივიცკის განცხადებით, სუმის რეგიონი მთლიანად გათავისუფლდა რუსი დამპყრობლებისგან.

„რეგიონის ტერიტორია თავისუფალია ორკებისგან, ამიტომ თუ გესმით აფეთქებები (და ძალიან ბევრი იყო ბოლო დღეებში), მუშაობენ მაშველები და ამფეთქებელი ტექნიკოსები. ისინი ანეიტრალებენ რუსი სამხედროების მიერ ჩვენს მიწზე დატოვებულ საბრძოლო მასალას. მიწა”, – განაცხადა ოფიციალურმა პირმა.

მისივე განმარტებით, რეგიონის ტერიტორია არ არის უსაფრთხო დანაღმული და შეუსწავლელი ტერიტორიების სიმრავლის გამო.

“არ გადახვიდეთ გზის პირას და არ გამოიყენოთ ტყის გზები. ნუ მიუახლოვდებით განადგურებულ აღჭურვილობას ან ორკების ბანაკებს!”,– მიმართა მან რეგიონის მოსახლეობას.

დიდი ბრიტანეთის თავდაცვის სამინისტროს ინფორმაციით, ჩრდილოეთიდან რუსული ჯარების გადანაწილებას მინიმუმ ერთი კვირა დასჭირდება.

დაზვერვის ცნობით, ჩრდილოეთ უკრაინიდან რუსული ჯარები უკვე მთლიანად გაიყვანეს ბელარუსსა და რუსეთში. ამ ძალების ნაწილი კი განლაგდება უკრაინის აღმოსავლეთით დონბასში საბრძოლველად.

მათივე განცხადებით, ამ ძალებიდან ბევრს დასჭირდება მნიშვნელოვანი გაძლიერება, სანამ ისინი მზად იქნებიან განლაგდნენ უფრო აღმოსავლეთში.

ბრიტანეთის დაზვერვა იუწყება, რომ რუსეთის მიერ აღმოსავლეთით და სამხრეთით მდებარე ქალაქების დაბომბვა გრძელდება.

NATO-ს გენერალური მდივანი იენს სტოლტენბერგი აცხადებს, რომ ვლადიმერ პუტინმა არ მიატოვა უკრაინის კონტროლის გეგმა და ძირითადი ძალები აღმოსავლეთში გადაიყვანა დონბასის დასაპყრობად, სადაც ელოდებიან “დიდ ბრძოლას, რუსეთის დიდ შეტევას“.

თეთრი სახლის პრესმდივანმა, ჯენ პსაკიმ საღამოს ბრიფინგზე თქვა, რომ აშშ მზად არის მომავალშიც მიაწოდოს უკრაინას შეიარაღება.

“იარაღის მიწოდება თითქმის ყოველდღე ხდება. მხოლოდ ორი დღის წინ, 100 მილიონი დოლარის იარაღის მიწოდების შესახებ განვაცხადეთ – ეს არის ჯაველინები, კრიტიკულად მნიშვნელოვანი იარაღი, რომელსაც უკრაინელები ეფექტურად იყენებენ, რათა იბრძოლონ და  მოიგერიონ რუსეთი და დაიცვან თავისი ქვეყანა. ყოველ რუსულ ტანკზე უკრაინაში აშშ–მ უკვე მიაწოდა ან მომავალშიც მიაწვდის ათ ტანკსაწინააღმდეგო სისტემას. თუ გავითვალისწინებთ აშშ–ს მოკავშირეთა წვლილს, გამოვა, რომ დასავლური ტანკსაწინააღმდეგო სისტემების თანაფარდობა რუსულ ტანკებთან უკრაინაში არის 90 ერთზე.“–თქვა მან.

პსაკის თქმით, უკრაინელი ლიდერები ეუბნებიან ამერიკას, რა სისტემები ჭირდებათ. ისინი ძირითადად სიებს წარადგენენ. ამის შემდეგ ამერიკელები სიას სწავლობენ, რათა გაარკვიონ, რისი მიწოდება შეუძლიათ. პსაკი ამბობს, რომ მოთხოვნის უბსოლუტურ უმრავლესობას ისინი აკმაყოფილებენ.

https://www.youtube.com/watch?v=13PME5xB1ik

ქართული ოცნების თავმჯდომარე ამტკიცებს, რომ რუსული ტანკები თბილისიდან 30 კილომეტრში წინა ხელისუფლებამ ჩააყენა.

მისი თქმით, ნაციონალური მოძრაობის წევრები იტყუებიან, რომ ტანკები თბილისიდან 40 კილომეტრში დგანან, სინამდვილეში კი ისინი 30 კილომეტრში არიან.

“უკრაინის მაგალთზე ჩვენ ვნახეთ, რომ ომის საფრთხე არის ძალიან რეალური და საქართველო ამ კუთხით არის ყველაზე მეტი რისკის ქვეშ ერთი მარტივი მიზეზის გამო – წინა ხელისუფლებამ თბილისის შემოსასვლელიდან 30 კილომეტრში ჩაგვიყენა რუსული ტანკები. მათი ხელისუფლების შედეგი იყო ის, რომ დღეს რუსული ტანკები დგას თბილისის შემოსასვლელიდან 30 კილომეტრში.

ამაშიც იტყუებიან, სხვათა შორის, 40 კილომეტრს ამბობენ ხოლმე. მარტივად შეგიძლიათ გადაამოწმოთ – ტრასაზე სჭირდება 30 კილომეტრი იმას, რომ გამოიაროს რუსულმა ტანკმა თბილისამდე. მათ გააკეთეს ეს, მათ ჩააყენეს 30 კილომეტრში თბილისიდან რუსული ტანკები”,– განაცხადა კობახიძემ TV იმედის ეთერში.

“ჩვენ გვქონდა მყისიერი რეაქცია იმ განცხადებაზე, რომელიც გაკეთდა უკრაინის ხელისუფლების წარმომადგენლების მხრიდან და რეაქცია იყო ძალიან მარტივი. ჩვენ მოვითხოვეთ მათი მხრიდან მტკიცებულებების წარმოდგენა, წყაროს წარმოდგენა, თუმცა არც ერთი და არც მეორე არ გაუკეთებიათ. ამას აქვს მარტივი მიზეზი. საერთოდ ჰაერიდან იყო მოტანილი ის განცხადება, რომელიც მოვისმინეთ და არაფერი არ მომხდარა ისეთი, რაზეც შეიძლებოდა აგებული ყოფილიყო ეს განცხადება. იყო აბსოლუტურად პოლიტიკურად მოტივირებული განცხადება, რომელიც შეიძლება იყო გათვლილი, რომ არის გარკვეული კოორდინაცია, ამაზე ჩვენ ხშირად გვისაუბრია, აქაურ რადიკალურ ოპოზიციასთან.

გათვლილი იყო მარტივ რამეზე, რომ რაღაც შეიძლება პატარა მინიაფეთქება მოჰყოლოდა საზოგადოებაში ამ განცხადებას, თუმცა საზოგადოება ხედავს ყველაფერს და საზოგადოება აფასებს იმას, თუ რა ხდება სინამდვილეში”

განაცხადა ოცნების თავმჯდომარემ, ირაკლი კობახიძემ უკრაინის დაზვერვის განცხადებაზე, რომ საქართველოს ხელისუფლება ხელს უწყობს საქართველოს გავლით რუსეთისთვის კონტრაბანდის მიწოდებას.

“უკრაინისთვის ყველაფერს არ აკეთებს არცერთი სახელმწიფო მსოფლიოში, მათ შორის, ვგულისხმობ ეკონომიკურ ურთიერთობებსაც. დღემდე არცერთი სახელმწიფო არ არის მსოფლიოში, რომელსაც ჰქონდა სავაჭრო ურთიერთობები რუსეთთან და სრულად გაწყვიტა, ასეთი 1 სახელმწიფოც არ არის. ინფორმაცია გავრცელდა, მაგალითად, რამდენი ნავთობი შეიძინა აშშ-მ ბოლო დღეების განმავლობაში რუსეთისგან. გაზის ექსპორტი ხორციელდება რუსეთიდან ევროპაში, ევროკავშირის წევრი ქვეყნების უმეტესობა იღებს რუსულ გაზს და ესეც არ შეწყვეტილა. იგივე ფინანსური სანქციებიც სრულად არ ამოქმედებულა და მხოლოდ ნაწილობრივ მოქმედებს. რაც შეეხება სამხედრო მხარდაჭერას, აქაც თქვენ იცით, თუ რამდენად შეზღუდულია მხარდაჭერის მოცულობა. ანუ, ყველაფერს უკრაინის დასახმარებლად არცერთი სახელმწიფო არ აკეთებს – ყველა აკეთებს იმდენს, რამდენის შესაძლებლობაც აქვს ობიექტური მოცემულობიდან გამომდინარე. ჩვენ სწორედ ეს უნდა გავიაზროთ. რა თქმა უნდა, იგივე ნატოს, ევროკავშირის წევრ ქვეყნებს სხვანაირი დახმარება შეუძლიათ, ჩვენ სხვანაირი დახმარება შეგვიძლია. თუნდაც იმის გამო, რომ ისინი არიან ნატოს წევრი და ჩვენ არ ვართ. ჩვენ რასაც ვაკეთებთ, ეს არის მაქსიმუმი”

თქვა ქართული ოცნების თავმჯდომარემ, ირაკლი კობახიძემ ტვ იმედის ეთერში.

“ვერ დავუშვებთ, რომ ჩვენი ქვეყანა დამოკიდებული იყოს რუსულ გაზსა და ნავთობზე. ვერ დავუშვათ, რომ მსოფლიო იყოს დამოკიდებული რუსულ გაზსა და ნავთობზე. სწორედ ამიტომ, ჩვენ ვასწორებთ წარსულის შეცდომებს და ვდგამთ უზარმაზარ ნაბიჯს წინ, რათა ვუზრუნველყოთ რვა წლის განმავლობაში, წელიწადში ერთი რეაქტორის აშენება. ეს საშუალებას მოგვცემს, გვქონდეს სუფთა, მწვანე და სანდო ენერგია”

განაცხადა დიდი ბრიტანეთის პრემიერმინისტრმა ბორის ჯონსონმა.