Category: სლაიდერი

შინაგან საქმეთა სამინისტრო საპროტესტო აქციის მონაწილეებსა მოუწოდებს, რომ “არ მოახდინონ გზის სავალი ნაწილის ხელოვნურად ბლოკირება და პროტესტი გამოხატონ შეკრებებისა და მანიფესტაციის შესახებ საქართველოს კანონით დადგენილი მოთხოვნების დაცვით”.

ივანიშვილის ხელისუფლების ყოფილი მაღალჩინოსნების, ყოფილი პრემიერმინისტრის, ირაკლი ღარიბაშვილის, სუს-ის ყოფილი ხელმძღვანელის, გრიგოლ ლილუაშვილისა და ყოფილი გენერალური პროკურორის, ოთარ ფარცხალაძის სახლების და პირადი ჩხრეკა ჩატარდა. ამის შესახებ,  გენერალურმა პროკურორმა ბრიფინგზე განაცხადა.

”განსაკუთრებით მაღალი საზოგადოებრივი ინტერესიდან და სისხლის სამართლის საქმეების მნიშვნელობიდან გამომდინარე, მსურს საზოგადოებას მივაწოდო შემდეგი ინფორმაცია.საქართველოს გენერალური პროკურატურის საგამოძიებო ნაწილში სახელმწიფო უსაფრთხოების სამსახურის ანტიკორუფციულ და სახელმწიფო უსაფრთხოების დეპარტამენტებში სხვადასხვა სისხლის სამართლის საქმეებზე მიმდინარე გამოძიების ფარგლებში დღეს დილის ათი საათიდან მთელი ქვეყნის მასშტაბით ერთდროულად 22 ლოკაციაზე მასშტაბური ღონისძიება ჩატარდა.ერთობლივი ღონისძიების ფარგლებში განხორციელდა საქართველოს ყოფილი პრემიერმინისტრის ირაკლი ღარიბაშვილის, სუს-ის ყოფილი უფროსის გრიგოლ ლილუაშვილის, ყოფილი გენერალური პროკურორის ოთარ ფარცხალაძის და მათთან დაკავშირებული, სულ 8 პირის საცხოვრებელი ბინების/სახლების და პირადი ჩხრეკები.

ამოღებულია სხვადასხვა ელექტრონული მოწყობილობა, დოკუმენტაცია და დიდი ოდენობით ფულადი თანხა. ხსენებულ საქმეებზე აქტიურად ტარდება საგამოძიებო, საპროცესო და ოპერატიულ-სამძებრო ღონისძიებები.გამოძიების მიმდინარეობის და შედეგების თაობაზე, საზოგადოებას პერიოდულად, დამატებით მივაწვდით ინფორმაციას” – განაცხადა ივანიშვილის მთავარმა პროკურორმა.

4 ოქტომბრის მოვლენებთან დაკავშირებით კიდევ 16 ადამიანი დააკავეს – ამის შესახებ, შინაგან საქმეთა მინისტრმა გელა გელაძემ ბრიფინგზე თქვა.

“ჩვენ დავაკავეთ კიდევ 16 პირი. მიმდნარე გამოძიების ფარგლებში ჩვენ მიერ ამ დროისთვის ჯამში დაკავებულია სულ 62 პირი. უცხოეთში მყოფი ორი პირის მიმართ კი დაწყებულია სისხლის სამართლებრივი დევნა”- თქვა გელაძემ.

გელაძის ცნობით, ნაწილს ბრალად ედება საქართველოს კოსნტიტუციური წყობილების ძალადობის შეცვლისკენ ან სახელმწიფოს ხელისუფოლების დამხობისკენ მოწოდება, სახელმწიფო ან სტრატეგიული მნიშვნელობის ობიექტის ხელში ჩაგდების ან ბლოკების მცდელობა, ჯგუფური ძალადობის ორგანიზება ან მასში მონაწილეობა, ნაწილს კი სამართალდაცველებზე ძალადობა.

4 ოქტომბრის  საქმეზე სულ ჯამში 62 ადამიანია დაკავებული.

”ოჯახის თვალწინ, სპეცრაზმმა სახლიდან გაკოჭილი წაიყვანა” – განაცხადა ამის შესახებ, დღეს 17 ოქტომბრის დილას დაკავებული მიხეილ თოლორაიას ადვოკატმა, ბორის ყურუამ

“მიხეილ თოლორაია მოვინახულე. მას სპეცრაზმი სახლში შეუვარდა და განსაკუთრებული საპოლიციო ღონისძიებით დააკავეს, როცა მცირეწლოვანი შვილი ჰყავს და ოჯახის წევრების თვალწინ, იარაღიანმა ადამიანებმა სახლიდან გაკოჭილი წაიყვანეს.  ჯერ მისთვის ბრალი ოფიციალურად არ წარუდგენიათ, თუმცა, სტანდარტულად, როგორც 4 ოქტომბრის საქმეზე დაკავებულებს, ალბათ, მასაც ბრალად სახელმწიფო სტრატეგიული ობიექტის ხელში ჩაგდების მცდელობასა და ჯგუფურ ძალადობაში მონაწილეობას წარუდგენენ”. – თქვა ყურუამ.

17 ოქტომბერს, გამთენიისას აქციების კიდევ 9 მონაწილე დააკავეს. საქმე, სავარაუდოდ, 4 ოქტომბრის აქციას ეხება.

“მარიამს განუმარტეს, რომ დაკავებულია ჯგუფური ძალადობის ორგანიზებისთვის” – აცხადებს ამის შესახებ, 17 ოქტომბერს დაკავებული აქციების მონაწილის, მარიამ მეყანწიშვილის ადვოკატი, ანა ბერია. ადვოკატი აცხადებს, რომ მასალაში დანაშაულის ამსახველი კადრები არ იყო.

“დაიწყეს სახლის ჩხრეკით, ამოიღეს მისი კუთვნილი ქურთუკი, რომელიც თავად, თავის ნებით წარუდგინა სამართალდამცავი ორგანოს წარმომადგენლებს. ეს ქურთუკი, როგორც მან თვითონ განმარტავს, 4 ოქტომბერს ეცვა.  როგორც თვითონ მარიამს განუმარტეს დაკავებისას, ეს არის 226-ე მუხლი, რაც გულისხმობს ჯგუფური ძალადობის ორგანიზებას, ეს არის სრულიად სრულიად სხვა მუხლი, რაც განსხვავდება უკვე დაკავებული პირებისთვის ბრალდების შესახებ დადგენილებებით წაყენებული მუხლებისგან. […]

4 ოქტომბერს საერთოდ არ იმყოფებოდა პრეზიდენტის სასახლის მიმდებარე ტერიტორიაზე, რაიმე კუთხით მონაწილეობა არ მიუღია, იყო საპროტესტო აქციაზე, თუმცა უშუალოდ პრეზიდენტის სასახლის მიმდებარე ტერიტორიაზე არ იმყოფებოდა. […]

აჩვენეს ვიდეოკადრიდან ამოჭრილი, დაზუმებული ქურთუკი, ჰქონდა თუ არა ეს ქურთუკი სახლში. ბუნებრივია მან ამოიცნო ქურთუკი თვითონ რაც ეცვა”. – ამბობს მარიამ მეყანწიშვილის ადვოკატი, ანა ბერია.

„რეალურად საქართველო მაშინ შეიცვალა, როცა ერთიანი ეროვნული გამოცდების შემდეგ, სამი დეპუტატის შვილი ვერ მოხვდა უნივერსიტეტში, ხოლო საუკეთესო შედეგი ონის სოფელში გაზრდილმა მოწაფემ დადო. ეს იყო ნამდვილი ვარდების რევოლუცია.
ამის შემდეგ ჩვენი განათლების სისტემა ბოლონიის პროცესს მიუერთდა. ეს თაობა ებრძვის დღეს საბჭოური ცეხავიკების, “გუჩებში” გამოწკეპილ, კოჭებ გადმოყრილ შთამომავლობას.
ასეთი ცხადი სინათლე და სიბნელე, ცოდნა და უვიცობა არასდროს ყოფილა. შუა ნამდვილად გაკრეფილია და სიბნელე ნამდვილად დამარცხდება“

წერს თბილისის ყოფილი მერი, გიგი უგულავა.

„სპეცრაზმი საჭიროა, როცა ამდენი ხნის განმავლობაში იმალებიან ადამიანები. ჩვენ ყველა გავაფრთხილეთ, რომ იდენტიფიცირების საშუალებაც გვქონდა მეტი და არავის არ შერჩებოდა ხელისუფლების დამხობის მცდელობაში მონაწილეობა. აქედან გამომდინარე, ყველა შეეგუოს იმას, რაც ხდება, რომ სამართალი აღსრულდება თითოეული ადამიანის მიმათ, რომელიც მონაწილეობდა დამხობის მცდელობაში. ყველა უნდა შეეგუოს ამას”.

ასე უპასუხა ირაკლი კობახიძემ შეკითხვას იმის შესახებ, რომ დღეს,17 ოქტომბერს, კიდევ რამდენიმე ადამიანი დააკავეს 4 ოქტომბრის აქციის საქმეზე.

სახელმწიფო უსაფრთხოების სამსახურის (სუს) ანტიკორუფციულმა სააგენტომ თბილისში, ქუთაისსა და ბათუმში ყალბი სამედიცინო მოწმობის დამზადებისა და კომერციულ მოსყიდვაში დახმარების ფაქტებზე, 3 პირი დააკავა.

“გამოძიებით დადგენილია, რომ თბილისში, ქუთაისსა და ბათუმში სხვადასხვა სამედიცინო დაწესებულებების ექიმებმა და მათმა დამხმარე პირებმა, კონკრეტული თანხის მიღების სანაცვლოდ, ჯანმრთელობის მდგომარეობის შესახებ ყალბი სამედიცინო დოკუმენტაცია დაამზადეს, რის საფუძველზეც ადამიანებს შშმ პირის სტატუსი მიენიჭათ.

პირველ შემთხვევაში, თბილისში, ერთ-ერთ სამედიცინო დაწესებულებაში დასაქმებულმა დ.ტ.-მ მოქალაქეს 3 000 ლარის სანაცვლოდ გადასცა შშმ პირის ყალბი მოწმობა, რომლის საფუძველიც იყო ბრონქული ასთმის დიაგნოზი, ყოველგვარი სამედიცინო გამოკვლევისა და კომისიის გავლის გარეშე.

მეორე შემთხვევაში, ბათუმში, ერთ-ერთი სამედიცინო დაწესებულების ექიმებთან დანაშაულებრივ კავშირში მყოფმა თ.დ.-მ 9 500 ლარის სანაცვლოდ მოქალაქეს გადასცა ყალბი ცნობა, რომლის საფუძველზეც მას მიენიჭა პირველი ჯგუფის შშმ პირის სტატუსი, იმ მოტივით, თითქოს მას ჰქონდა ჰეპატიტით გამოწვეული ღვიძლის დაავადება.

მესამე შემთხვევაში, ქუთაისის სხვადასხვა სამედიცინო დაწესებულებების ექიმებთან დანაშაულებრივ კავშირში მყოფმა ც.ო.-მ 3 200 ლარის სანაცვლოდ მოქალაქეს გადასცა ყალბი სამედიცინო ცნობა, ეპილეფსიის დიაგნოზით. ამ შემთხვევაში, ც.0.-მ აღნიშნული მოქალაქე მიიყვანა ნევროლოგთან კონსულტაციაზე, რომელმაც მოამზადა კომპიუტერული ენცეფალოგრაფიის ყალბი ცნობა გამოგონილი დიაგნოზით, რის შემდეგაც ც.ო.-მ მოქალაქე წაიყვანა სხვა სამედიცინო კლინიკაში კონულტაციაზე მეორე ექიმთან, რომელმაც, თავის მხრივ, დაამზადა ყალბი სამედიცინო ცნობა ეპილეფსიის დიაგნოზით.

სამივე შემთხვევაში, ქმედება მიმართული იყო სოციალური მომსახურების სააგენტოში ყალბი ცნობების წარდგენით და შესაბამისად შშმ სტატუსის მინიჭებით, სახელმწიფოს მხრიდან დაწესებული საპენსიო და სხვა შეღავათების მიღებისკენ”. – ნათქვამია უწყების განცხადებაში.