Category: სლაიდერი

კრემლის სპიკერი, დმიტრი პესკოვი აცხადებს, რომ მოსკოვი საქართველოს $253 მილიონის კომპენსაციას არ გადაუხდის.

• “ჩვენ არ აღვასრულებთ ამ გადაწყვეტილებას”, – განაცხადა მან. ჟურნალისტის კითხვაზე სასამართლოს გადაწყვეტილების აღსრულება საქართველოსთან ურთიერთობის დათბობას თუ შეუწყობდა ხელს, პესკოვი პასუხობს, რომ “ეს ცალკე საკითხია”.

გუშინ, სტრასბურგის სასამართლომ საქართველო რუსეთის წინააღმდეგ (IV) ე.წ. განგრძობადი ოკუპაციის საქმეზე კომპენსაციის შესახებ გადაწყვეტილება გამოაცხადა სადაც ნრუსეთის ფედერაციას საქართველოს დაზარალებული მოქალაქეების სასარგებლოდ 253 018 000 ევროს გადახდის ვალდებულება დააკისრა.

მიღებულ გადაწყვეტილებაში წერია,რომ  რუსეთი პასუხისმგებელია სიცოცხლის უფლების, წამების აკრძალვის, თავისუფლების უფლების, საკუთრების უფლებების, ოჯახური ცხოვრების, გადაადგილების თავისუფლებისა და ქართულ ენაზე განათლების მიღებასთან დაკავშირებით დარღვევებზე, რაც ათეულობით ათას ეთნიკურად ქართველს შეეხო

ტელეკომპანია “იმედის” და ჰოლდინგში შემავალი არხების – “მაესტროსა” და “ჯიდიესის” მაუწყებლობის შეწყვეტასთან დაკავშირებით გამოძიებით დგინდება, რომ ადგილი ჰქონდა ტექნიკურ ხარვეზს ტელეკომპანიის შიდა ერთ-ერთ ელექტრომოწყობილობაზე, რის გამოც მაუწყებლობა 45 წუთის განმავლობაში გაითიშა.
გამოძიების მასალების მიხედვით დანაშაულებრივი ფაქტი არ დასტურდება.
შესაბამისად, ანალოგიური საბოლოო საექსპერტო დასკვნის მიღების შემთხვევაში, სისხლის სამართლის საქმეზე გამოძიება შეწყდება.

ამის შესახებ ინფორმაციას,  სახელმწიფო უსაფრთხოების სამსახური ავრცელებს.

სუსმა გამოძიება ტელეკომპანია “იმედის” მიმართვის საფუძველზე გამოძიება 13 ოქტომბერს დაიწყო.

„ტელეიმედის“ ჰოლდინგში შემავალი ტელევიზიების მაუწყებლობა დაახლოებით 45 წუთის განმავლობაში შეწყვეტილი იყო. „იმედმა“ განაცხადა, რომ „ტელეკომპანია არ გამორიცხავს, რომ ადგილი ჰქონდეს არხის წინააღმდეგ მიმართულ დანაშაულებრივ აქტს“.

ფინური გამოცემა Helsingin sanomat წერს, რომ ფინეთის საგარეო საქმეთა მინისტრმა და ეუთოს მოქმედმა თავმჯდომარემ, ელინა ვალტონენმა კობახიძესთან შეხვედრა თავად გააუქმა.

“ვალტონენმა HS-ს ტელეფონით უთხრა, რომ პრემიერ-მინისტრ კობახიძესთან შეხვედრა არა საქართველოს ინიციატივით, არამედ ფინეთის ინიციატივით გაუქმდა გრაფიკის ცვლილების გამო და ამის შესახებ ქართველებს გუშინ ღამით აცნობეს”. – წერს გამოცემა.

„მე იქ მივედი საქართველოში კვირების და თვეების განმავლობაში მიმდინარე საპროტესტო აქციების სანახავად. მინდოდა გამომეხატა ჩემი მხარდაჭერა გამოხატვის თავისუფლების მიმართ”- ციტირებს გამოცემა ფინეთის საგარეო საქმეთა მინისტრს. 

ჟურნალისტმა ეუთოს მოქმედ თავმჯდომარეს ჰკითხა, რას ფიქრობს საქართველოს მთავრობის რეაქციაზე?

„ეს საქართველოს მთავრობის გადასაწყვეტია, თუ როგორ რეაგირებენ ისინი. სამწუხაროდ, აზერბაიჯანში ჩასასვლელად მომიწია პრემიერ-მინისტრთან შეხვედრის გაუქმება.“ – ამბობს ელინა ვალტონენი. 

მანამდე,  საქართველოს მთავრობის ფეისბუქ გვერდზე გავრცელდა განცხადება, რომ ირაკლი კობახიძემ ფინეთის საგარეო საქმეთა მინისტრთან დაგეგმილი შეხვედრა “გუშინ, კანონსაწინააღმდეგო მიტინგში მონაწილეობისა და ცრუ განცხადებების გაკეთების გამო გააუქმა”.

ცნობისთვის, გუშინ 14 ოქტომბერს, ეუთოს თავმჯდომარე, ფინეთის საგარეო საქმეთა მინისტრი ელინა ვალტონენი  რუსთაველის გამზირზე, აქციაზე მივიდა და  აქციის მონაწილეებს შეხვდა. ამის შესახებ, მან სოციალურ ქსელ X-ზეც დაწერა და განაცხადა, რომ ის მხარს უჭერს მოქალაქეებს.

• „მე ახლა თბილისში, პარლამენტის წინ ვარ, სადაც მშვიდობიანი დემონსტრანტები ნელ-ნელა იკრიბებიან. ბევრი ადამიანი მოდის ევროკავშირის, NATO-ს, როგორც ჩანს, ფინეთის და რაც მთავარია, საქართველოს დროშებით. მიზეზი არის ის, რომ ეს ხალხი შეშფოთებულია იმ გეზით, რომელიც ქვეყანამ აიღო; იმით, რომ ართმევენ საბაზისო უფლებებს, დაწყებული შეკრებისა და გამოხატვის თავისუფლებიდან. ეს ადამიანები იმსახურებენ ყველა ამ უფლების ქონას და ჩვენ ვართ აქ, რომ მათ მხარი დავუჭიროთ”. -განაცხადა  ფინეთის საგარეო საქმეთა მინისტრმა, ელინა ვალტონენმა, ვიდეო-მიმართვაში, რომელიც რუსთაველზე ჩაწერა და შემდეგ X-ზე გამოაქვეყნა. 

ელინა ვალტონენი საქართველოში ოფიციალური ვიზიტის ფარგებში ჩამოვიდა. ის შეხვდა სამოქალაქო საზოგადოების წარმომდგენლებს, ასევე “ქართული ოცნების” წევრებს, მათ შორის, საგარეო საქმეთა მინისტრ მაკა ბოჭორიშვილს.

“ქართული ოცნების” პარლამენტმა, პოლიტიკური საქმიანობის ამკრძალავ ცვლილებებს  I მოსმენით მხარი დაუჭირა.

ივანიშვილის წარმომადგენელმა, არჩილ გორდულაძემ განაცხადა, რომ საკანონმდებლო ცვლილებებით, თუ კონკრეტული პარტია იკრძალება, მის წევრებს და მასთან დაკავშირებულ პირებს არ ექნებათ შესაძლებლობა ისარგებლონ პასიური საარჩევნო უფლებით, ანუ მათ აღარ შეეძლებათ იყვნენ არჩეულები, მაგალითად – საქართველოს პარლამენტსა და მუნიციპალიტეტებში. ამავდროულად, მათ შეეზღუდებათ კონსტიტუციაში დასახელებული ორგანოების ხელმძღვანელი თანამდებობების დაკავების უფლება, ვეღარ შეძლებენ გახდნენ სხვა პარტიის წევრები. ასევე, ვერ გახდებიან სხვა პარტიების შემომწირველები.

მისივე თქმით, პარტიას, რომელიც ასეთ პირს თავის რიგებში გააწევრებს და შესაბამისად, საკონსტიტუციო სასამართლოს გადაწყვეტილებას არ შეასრულებს, „სისხლის სამართლის კოდექსით“ გათვალისწინებული პასუხისმგებლობა დაეკისრება – ჯარიმა, ხოლო თუ კონკრეტული პარტიის მნიშვნელოვნად მეტი ადამიანი ახალ პარტიაში გაწევრიანების შემდეგ გადაწყვეტილების მიმღები იქნება, ამ შემთხვევაში, ამ კონკრეტული პარტიის აკრძალვა არის შესაძლებელი, როგორც ე.წ. მემკვიდრე პარტიის.

„ივანიშვილი და მისი სატელიტები 4 ოქტომბერზე იმიტომ არიან გაბრაზებულები, რომ სწორედ სახალხო კრებამ შეძლო „არჩევნების“ ბოიკოტირების მიღწევა.

რა თქმა უნდა, „ვარდების რევოლუციის“ მაგალითის კოპირება არასწორი გათვლა იყო, როგორც არაა სწორი, როცა გენერლები წინა ომის სცენარით იბრძვიან. თან „ვარდების რევოლუცია“ რამდენიმე წელი სკრუპულოზურად მზადდებოდა.

როგორც „ვარდების რევოლუციის“ ორგანიზატორი, ვაცხადებ, რომ არ გამოვა ზუსტად კოპირება. ბევრი რამე მოხდება სპონტანურად, თუმცა ამ სპონტანურობასაც მომზადება სჭირდება.

სახალხო კრებაზე მოვიდა ბევრი ისეთი ადამიანი, რომელიც „ჯენზის“ აქციებზე არ დადიოდა და ეს ხალხი გამბედაობისთვის დიდ მადლიერებას იმსახურებს. თუმცა ნაკლებად იყო წარმოდგენილი „ჯენზი“, რომელიც ყველაზე ბრძოლისუნარიანია. ე.ი. არასაკმარისად ვიმუშავეთ სოციალურ ქსელებში, ბოლომდე სწორედ ვერ ჩამოვაყალიბეთ მიზანი. ახლა ეს ყველაფერი სასწრაფოდ შესავსებია. ვინაიდან ბევრი დრო არ გვაქვს. გამარჯვება დარჩება ქართველ ხალხს!“

ამის შესახებ საქართველოს მესამე პრეზიდენტი, მიხეილ სააკაშვილი სოციალურ ქსელში წერს.

„მოწმეს სხვა სტანდარტი სჭირდება, პოლიტიკოსი სრულიად სხვანაირად განსჯის და მსჯელობს. როგორც პოლიტიკოსი მე ვაგრძელებ ყველას მხილებას, ვინც 4 ოქტომბრის ავანტიურაში მონაწილეობდა. ყველა ინფორმაცია, რასაც ვავრცელებ, არის ზუსტი, ოღონდ ამას ვერ ექნება სამართლებრივი ღირებულება მოწმის სტატუსით. ვერ გეტყვით რა კითხვები იყო, გაუთქმელობაზე ხელი მომაწერინეს. მოწმედ რომ არ გამოვადექი, ეს ზუსტად ვიცი, კარგი სანახაობა იყო“,

ამის შესახებ „ფედერალისტების“ ლიდერმა თამარ ჩერგოლეიშვილმა სასამართლოში გამოკითხვის შემდეგ ჟურნალისტებს განუცხადა.

რამდენიმე დღის წინ, ჩერგოლეიშვილმა „ფორმულას“ ეთერში განაცხადა, რომ „4 ოქტომბერთან დაკავშირებით ბაჩო ახალაიას სახლში შეხვედრები ტარდებოდა და ამაზე „ნაცმოძრაობაში“ დაპირისპირებაც იყო, მეტიც, ამ თემაზე სააკაშვილთანაც იყო კომუნიკაცია“. ამ განცხადების შემდეგ, თამარ ჩერგოლეიშვილი პოლიციაში გამოკითხვაზე დაიბარეს.

”რასაც ის ამით ქართველ ხალხს აჩვენებს, არის, რომ მხარს უჭერს ძალადობრივი გადატრიალების ორგანიზატორებს და რომ წესებზე დაფუძნებული საერთაშორისო წესრიგი ცარიელი ფრაზაა”  – ამის შესახებ საქართველოს პარლამენტის თავმჯდომარე, შალვა პაპუაშვილი სოციალურ პლატფორმა X-ზე წერს.

“რომ იცოდეთ, ქუჩა, სადაც ეუთოს თავმჯდომარე, რომელიც, ასევე, ფინეთის საგარეო საქმეთა მინისტრია, დგას, არის დედაქალაქის მთავარი გამზირი. თქვენ ხედავთ რამდენიმე ათეული რადიკალის შეკრებას, რომლებიც რამდენიმე დღის წინ პრეზიდენტის სასახლეში შეიჭრნენ და 25 პოლიციელს დაზიანება მიაყენეს, მათ შორის ორს – მძიმე და კანონის დარღვევით გზა გადაკეტეს.საქართველოს კანონმდებლობა, ეუთოს სხვა ნებისმიერი წევრი ქვეყნის მსგავსად, ნებისმიერ ადგილას შეკრების უფლების გარანტიას იძლევა, ხოლო გზის გადაკეტვა მხოლოდ მაშინ არის დაშვებული, როდესაც სამანქანო გზის მიმდებარე ტერიტორია ადამიანების დიდ რაოდენობას ვეღარ იტევს. ფინელმა მინისტრმა შესაძლოა ამის შესახებ არ იცოდეს, მაგრამ ის ვერ დაასახელებს ვერც ერთ შემთხვევას, როდესაც ეს უფლება ბოლო 13 წლის მანძილზე საქართველოს სახელმწიფოს მიერ დაირღვა.ასევე, მინისტრის უკან, ხედავთ პარლამენტის შენობის წინ მდებარე მოედანს, სადაც მშვიდობიანი შეკრების მიზნით, გზის გადაკეტვის გარეშე, ადამიანების იმაზე ათჯერ დიდი რაოდენობა შეიძლება შეიკრიბოს, ვიდრე ეს რამდენიმე ათეული ადამიანი და მათ შორის თავად ფინეთის მინისტრი, რომლებიც გზას კეტავენ.ფინელი მინისტრი და ეუთოს თავმჯდომარე სწორედ ამ ადგილას არღვევს საქართველოს კანონმდებლობას. აღნიშნული, ასევე, ვენის კონვენციის 41-ე მუხლის დარღვევას წარმოადგენს, რაც, ირონიულია, იმიტომ რომ იმავე ქალაქში მიიღეს, სადაც ეუთოს შტაბ-ბინაა განთავსებული.ამით ის ქართველ ხალხს აჩვენებს, რომ მხარს უჭერს ძალადობრივი გადატრიალების ორგანიზატორებს და რომ წესებზე დაფუძნებული საერთაშორისო წესრიგი ცარიელი ფრაზაა.” – წერს პაპუაშვილი