მკაცრად ვგმობ ჟურნალისტ მზია ამაღლობელის პოლიტიზებულ 2-წლიან პატიმრობას, რომლის ჯანმრთელობის მდგომარეობაც პატიმრობაში გაუარესდა. მისი საქმე ასახავს საქართველოში მედიასა და სამოქალაქო საზოგადოებაზე მზარდ ზეწოლას. ჩეხეთი სოლიდარობას უცხადებს ყველა უსამართლოდ გასამართლებულ პირს და მოუწოდებს მათი გათავისუფლებისკენ.
წერს ამის შესახებ, ჩეხეთის საგარეო საქმეთა მინისტრი, იან ლიპავსკიი.
„ივანიშვილის მოლაპარაკე თოჯინების განცხადებები ემსახურება ქართული სახელმწიფოს საბოლოო განადგურებას და ქართველი ხალხის საბოლოოდ, სამშობლოს გარეშე დატოვებას.
ჩვენი პასუხი უნდა იყოს მხოლოდ ერთი – შეუპოვარი, თავგანწირული ბრძოლა ამ რუსული მარწუხების ჩასაჭრელად და შესაბამისად, რეჟიმის სასწრაფოდ შესაცვლელად.
ჩვენი ვალდებულებაა, რომ 2008 წლის და აფხაზეთის ომების მსხვერპლი ტყუილი არ აღმოაჩნდეს და ყველას დავუმტკიცოთ, რომ დღესაც ვართ მოწოდების სიმაღლეზე, გვიყვარს საქართველო და მზად ვართ ყველაფერი გადავდოთ მის გადასარჩენად.
გავიმარჯვებთ სახელოვნად!“,
ამის შესახებ საქართველოს მესამე პრეზიდენტი, მიხეილ სააკაშვილი სოციალურ ქსელში წერს.
საქართველოს ჟურნალისტური ეთიკის ქარტია მკაცრად გმობს მზია ამაღლობლისთვის ბათუმის საქალაქო სასამართლოს მიერ გამოტანილ განაჩენს და ითხოვს, რომ მზია ამაღლობელს მოეხსნას ცრუ ბრალდება და ის უპირობოდ და დაუყოვნებლივ გათავისუფლდეს.
“საქართველოს ჟურნალისტური ეთიკის ქარტია მკაცრად გმობს მზია ამაღლობლისთვის ბათუმის საქალაქო სასამართლოს მიერ გამოტანილ განაჩენს და მას დაუსაბუთებლად, პოლიტიკურად მოტივირებულად და უსამართლოდ მიიჩნევს.
„ბათუმელებისა“ და „ნეტგაზეთის“ დამფუძნებელს მოსამართლე ნინო სახელაშვილმა ორწლიანი პატიმრობა მიუსაჯა. მზია ამაღლობელი 2025 წლის 12 იანვარს დააკავეს და 6 აგვისტომდე ის წინასწარ პატიმრობაში იმყოფებოდა ბათუმის პოლიციის უფროსისთვის, ირაკლი დგებუაძისთვის, სილის გაწვნის გამო. პროკურატურა მას სისხლის სამართლის კოდექსის 353 პრიმა მუხლის პირველი ნაწილით პოლიციელზე თავდასხმას ედავებოდა, რისთვისაც 4-დან 7-წლამდე თავისუფლების აღკვეთაა გათვალისწინებული.
მართალია, მოსამართლემ ბრალის გადაკვალიფიცირების შემდგომ შედარებით მსუბუქი მსჯავრი სისხლის სამართლის კოდექსის 353-ე მუხლის პირველი ნაწილის საფუძველზე გამოიტანა, თუმცა ამ ცვლილებამ მზია ამაღლობლის უფლება სამართლიან სასამართლოზე ვერ აღადგინა, ვინაიდან მას არც ამ მუხლით გათვალისწინებული დანაშაული ჩაუდენია.
353-ე მუხლის პირველი ნაწილი ითვალისწინებს ჯარიმას ან შინაპატიმრობას ვადით ორ წლამდე ანდა თავისუფლების აღკვეთას ვადით ორიდან ექვს წლამდე, შემდეგი ქმედებისთვის – პოლიციელის მიმართ წინააღმდეგობა საზოგადოებრივი წესრიგის დაცვისთვის ხელის შეშლის, მისი საქმიანობის შეწყვეტის ან შეცვლის მიზნით, აგრეთვე, აშკარად უკანონო ქმედებისთვის მისი იძულება, ჩადენილი ძალადობით ან ძალადობის მუქარით.
მზია ამაღლობლის სისხლის სამართლის საქმე ეყრდნობა ცრუ მოწმე პოლიციელთა ჩვენებებს, გაყალბებულ მტკიცებულებებს და მოკლებულია ყოველგვარ სამართლებრივ საფუძველსა და ლოგიკას. მზია ამაღლობელთან არ უსაუბრიათ გამომძიებლებს. თვეების განმავლობაში „ქართული ოცნების“ ხელისუფლების უმაღლესი თანამდებობის პირები არღვევდნენ უდანაშაულობის პრეზუმფციას მზია ამაღლობლის მიმართ იმგვარი გამოგონილი ბრალდებებით, რასაც მისთვის სასჯელის დამძიმება შეეძლო. აჭარის ტელევიზიამ უარი თქვა იმ ვიდეომასალის სრულად გასაჯაროებაზე, რომლიდანაც 44-წამიანი ამონარიდი პროკურატურამ სისხლის სამართლებრივი დევნისთვის მტკიცებულებად გამოიყენა.
საქართველოში მოქმედი კანონმდებლობით და არსებული სასამართლო პრაქტიკით, მათ შორის, უზენაესი სასამართლოს პრაქტიკით, სილის გაწვნა, არსებითი ზიანის გარეშე, არ წარმოადგენს თავდასხმას ანუ იმგვარ დანაშაულს, რაც სისხლის სამართლის კოდექსით იდევნება.
მზია ამაღლობელს უკვე ორჯერ დააკისრეს ადმინისტრაციული პასუხისმგებლობა ქმედებებისთვის, რაც მას არ ჩაუდენია. 18 მარტს ის მოსამართლე სალიხ შაინიძემ პოლიციელის კანონიერი მოთხოვნისადმი დაუმორჩილებლობის გამო 2000 ლარით დააჯარიმა, ხოლო 18 ივნისს – მოსამართლე მარიანა ფომაევამ 1000 ლარით, „იერსახის დამახინჯების“ გამო, სტიკერის გაკვრის ეპიზოდზე.
მზია ამაღლობელმა უსამართლობისადმი პროტესტის ნიშნად დაკავების დღიდან, 38 დღე იშიმშილა.
წინასწარი პატიმრობის პერიოდში მზია ამაღლობლის ჯანმრთელობა სწრაფად გაუარესდა და მან შეიძლება მხედველობა დაკარგოს, თუკი დროულად არ მიიღებს კვალიფიციურ სამედიცინო დახმარებას.
მზია ამაღლობელი, რომელიც დაკავებისას დაექვემდებარა არაარადამიანურ და ღირსების შემლახველ მოპყრობას, აქამდე არ უცვნიათ დაზარალებულად. არ არის დასჯილი არცერთი ის პირი, ირაკლი დგებუაძის ჩათვლით, რომლებიც ამ პროცესში მონაწილეობდნენ.
მზია ამაღლობელი უსამართლოდ იდევნება, მისი გაბედული პროფესიული საქმიანობისა და „ქართული ოცნების“ მიმართ კრიტიკული დამოკიდებულებისათვის. „ქართული ოცნება“ კრიტიკულად განწყობილი ჟურნალისტების დაშინებას ცდილობს და რეპრესიული ზომებით ავიწროებს დამოუკიდებელ მედიას, ზღუდავს გამოხატვის თავისუფლებას და ახშობს განსხვავებულ აზრს.
საქართველოს ჟურნალისტური ეთიკის ქარტია ითხოვს, რომ მზია ამაღლობელს მოეხსნას ცრუ ბრალდება და ის უპირობოდ და დაუყოვნებლივ გათავისუფლდეს“, – ვკითხულობთ განცხადებაში.
რატომ გიკვირთ კობახიძის განცხადებები?! რას ელით რომ “გრუ” სხვა “მესიჯს” მიწერს მის წარმომადგენელს?! – პუტინის, ლავროვის, ზახაროვას გაგრძელება რუსებისგან გინდათ სახელმწიფოებრივი განცხადებები მოისმინოთ?! აბსოლუტურ სინქრონში მოქმედებენ ჩვენს მტერთან ერთად.
რუსული ჩექმა, სიმწარე, ადამიანების გატაცება, წამება, ტერიტორიების მიტაცება… და რა, იგივე არ გააკეთა აქ ივანიშვილმა?! რუსთაველიდან არ მოიტაცა ადამიანები?! არ აწამა?! არ გაძარცვა მოსახლეობა და არ მიიტაცა ჩვენი, ხალხის ქონება?!
გვეყოს “წუწუნი”!!!
საქმეს უნდა მივხედოთ და მშვიდობიანად დავამხოთ რუსული რეჟიმი! – დრო აღარ ითმენს!
4 ოქტომბერს ყველა რუსთაველზე!!
ასე ეხმაურება „ნაციონალური მოძრაობის“ პოლიტსაბჭოს თავმჯდომარე, ლევან ხაბეიშვილი 2008 წლის აგვისტოს ომთან დაკავშირებით „ქართული ოცნები““ლიდერების განცხადებებს.
თბილისის საქალაქო სასამართლოში, მოსამართლე ნინო გალუსტაშვილმა აქციების დროს დაკავებულ დავით ლომიძეს და თემურ ზასოხაშვილს 4 წლითა და 6 თვით პატიმრობა მიუსაჯა.
დასკვნით პროცესზე, დავით ლომიძემ და თემურ ზასოხაშვილმა სიტყვით ისარგებლეს:
დავით ლომიძე: “ჩემი სათქმელი არის ის, რომ სასამართლომ ობიექტურად განიზილოს ჩვენი საქმე და გთხოვთ, მიიღოთ გადაწყვეტილება, რაც იქნება სამართლიანი, მე თავს ვთვლი უდანაშაულოდ”.
თემურ ზასოხაშვილი: “მეც ანალოგიურად”.
დავით ლომიძე და თემურ ზასოხაშვილი პირველ დეკემბერს დააკავეს.მათ ბრალდება 353-ე პრიმა მუხლის პირველი ნაწილით წარედგინათ – პოლიციელებზე თავდასხმას და ე.წ. მოლოტოვის კოქტეილის სროლას ედავებიან, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.
რუსეთის საგარეო საქმეთა მინისტრის სერგეი ლავროვის, მოადგილე მიხაილ გალუზინი აცხადებს, რომ რუსეთი მზად არის საქართველოსთან “ჯანსაღი პრაგმატული თანამშრომლობის განვითარებისთვის იმ საკითხებში, რომელიც ორივე ქვეყნისთვის მომგებიანია”.
“ჩვენ მზად ვართ თბილისთან ორმხრივი ნორმალიზაციის გზას გავყვეთ. ასე რომ, ზოგადად, თბილისზეა დამოკიდებული, თუ რა ქმედებებს გააგრძელებს”, – ამბობს მიხაილ გალუზინი გამოცემა იზვესტიასთან.
ცოტა ხნის წინ, აგვისტოს ომთან დაკავშირებით განცხადება გაავრცელა რუსეთის საგარეო საქამეთა სამინისტროს წარმომადგენელმა მარია ზახაროვამაც და კრემლის ჩვეული, პროპაგანდისტული რიტორიკა გაიმეორა. ზახაროვას თქმით, აუცილებელია საქართველომ ოკუპირებული აფხაზეთის და ცხინვალის რეჟიმებთან ძალის გამოუყენებლობის შესახებ ხელშეკრულება დადოს.
რუსეთის საგარეო საქმეთა სამინისტროს წარმომადგენლი, მარია ზახაროვა, აცხადებს, რომ აუცილებელია საქართველომ ცხინვალისა და სოხუმის რეჟიმებთან ძალის არ გამოყენების ხელშეკრულება დადოს.
“პირველად ამოცანებს შორის საქართველოს მხრიდან აფხაზეთისა და სამხრეთ ოსეთის წინააღმდეგ ძალის არ გამოყენების შესახებ იურიდიული შეთანხმების დადება, რომელიც არამხოლოდ 2008 წლის აგვისტოს ტრაგიკული ამბების არ გამეორების გარანტი, არამედ “თბილისი-სოხუმი-ცხინვალის” ნორმალიზებისკენ მოძრაობის ათვლის წერტილი გახდება. სიტუაციის სტაბილურობა კი, სამი სახელმწიფოს სასაზღვრო რაიონებში დელიმიტაციის, შემდგომ კი დემარკაციის პროცესს შეუწყობს ხელს. რუსეთი, როგორც აფხაზეთის, საქართველოს და სამხრეთ ოსეთის უახლოესი მეზობელი, მზად არის ხელი შეუწყოს ამ სამშვიდობო პროცესებს.[…] როდესაც საერთაშორისო საზოგადოებამ უარი თქვა აგრესორის მოთოკვაზე, რუსეთი აღმოჩნდა ერთადერთი ქვეყანა, რომელმაც თანამედროვე და ადეკვატური პასუხი გასცა ამ მზაკვრულ იერიშს”. – განაცხადა ზახაროვამ.
თანასოფლელის მკვლელობისა და ორი პოლიციელის დაჭრისთვის, შიდა ქართლის პოლიციიის და განსაკუთრებულ დავალებათა დეპარტამენტების თანამშრომლებმა, 1981 წელს დაბადებული ზ.ნ. დააკავეს.
დანაშაული 15 წლამდე ვადით თავისუფლების აღკვეთას ითვალისწინებს.
“გამოძიებით დადგინდა, რომ ქარელის მუნიციპალიტეტის სოფელ ბებნისში, 1981 წელს დაბადებულმა ზ.ნ.-მ ცეცხლსასროლი იარაღიდან გასროლით თანასოფლელი – 1975 წელს დაბადებული ზ.ი. მოკლა.
ინფორმაციის მიღებისთანავე, ადგილზე დაუყოვნებლივ გამოცხადდნენ შინაგან საქმეთა სამინისტროს შესაბამისი დანაყოფების თანამშრომლები, რა დროსაც დანაშაულის ჩამდენმა პირმა სამართალდამცველების მიმართულებით რამდენიმე გასროლა განახორციელა და შემთხვევის ადგილიდან მიიმალა.
სროლის შედეგად დაზიანება მიიღო შიდა ქართლის პოლიციის დეპარტამენტის ორმა თანამშრომელმა. ორივე მათგანი შესაბამისი სამედიცინო დახმარების აღმოჩენის მიზნით კლინიკაშია მოთავსებული.
სამართალდამცველებმა ჩატარებული საგამოძიებო მოქმედებების შედეგად, ზ.ნ. ცხელ კვალზე დააკავეს” – ნათქვამია შსს-ს განცხადებაში.
უწყების ცნობით, გამოძიება განზრახ მკვლელობის ფაქტზე, სისხლის სამართლის კოდექსის 108-ე მუხლით მიმდინარეობს.
მოსამართლე ლელა კალიჩენკომ მასწავლებელი და აქტივისტი, ნინო დათაშვილი პატიმრობაში დატოვა.
კალიჩენკომ არ დააკმაყოფილა ნინო დათაშვილისთვის აღკვეთის ღონისძიებად შეფარდებული პატიმრობის შეცვლის შუამდგომლობა. პროკურატურის მტკიცებით, არსებობს “ახალი დანაშაულის ჩადენის და მოწმეებზე ზემოქმედების საფრთხე”.
„2008 წელს საქართველოში რუსეთის შეჭრა უნდა ყოფილიყო მაღვიძარა საერთაშორისო საზოგადოებისთვის, რომ რუსეთი მისი მეზობლების დომინირებას აპირებს და თავისი აგრესიის გაბუნდოვანებას ცდილობს. საქართველოში რუსეთის დაუნდობელი ქმედებები უკრაინაში ქმედებებს მოასწავებდა, ყველაზე ბოლო მისი სრულმასშტაბიანი აგრესიაა. ქართველ ხალხს ესმის „რუსკი მირს“ რა მოაქვს, და სწორედ ამიტომ უწევენ სასტიკ წინააღმდეგობას „ქართული ოცნების” მთავრობის მცდელობებს, ისინი ანტი-დემოკრატიულ, რუსული სტილის მმართველობას დააახლოონ.
ამ მძიმე წლისთავზე შეერთებულმა შტატებმა უნდა გააგრძელოს რუსეთის მიერ აფხაზეთისა და სამხრეთ ოსეთის უკანონო ანექსირების უარყოფის გამოხატვა. ღრმად შეშფოთებული ვარ „ქართული ოცნების” მთავრობის მიერ დემოკრატიული ღირებულებების წაშლითა და ქართველი ხალხის ევრო-ატლანტიკური მისწრაფებების ღალატით. თუ მთავრობას სურს, რომ პატივი მიაგოს რუსეთის აგრესიის მსხვერპლებს, მან უნდა გამოუშვას ჟურნალისტი მზია ამაღლობელის მსგავსი პოლიტპატიმრები და კვლავ ერთგული გახდეს საქართველოს დემოკრატიული მომავლის. ვაგრძელებ ქართველი ხალხის მხარდაჭერას და ჩემს ძალისხმევებს გავაორმაგებ ორპარტიული, ორპალატიანი “MEGOBARI აქტის” მისაღებად,”
ამის შესახებ განცხადებას ამერიკელი სენატორი, ჯინ შაჰინი (დემოკრატიული პარტია) ავრცელებს.