Category: მსოფლიო

ამერიკულ პრესაში გამოქვეყნებულ პუბლიკაციებზე დაყრდნობით თუ ვიმსჯელებთ, ერთ-ერთი მთავარი დაბრკოლება უკრაინისთვის დასავლური წარმოების ტანკების – განსაკუთრებით აბრამსის მიწოდებისთვის ხანგრძლივი ბრძოლის დროს, იყო ამერიკული სამხედრო ისტებლიშმენტის წინააღმდეგობა. რაც შეეხება საბრძოლო თვითმფრინავების მიწოდებას, რომელსაც კიევი თავისი ლობისტური ძალისხმევის შემდეგ სამიზნედ ასახელებს, პენტაგონის დამოკიდებულება არც ისე ცალსახად ნეგატიურია. ამ იდეას ჰყავს გავლენიანი მხარდამჭერები დეპარტამენტში, წერს Politico, სამი ანონიმური წყაროს მონათხრობზე დაყრდნობით. „არა მგონია, რომ ჩვენ ამის წინააღმდეგი ვიყოთ“, – ციტირებს გამოცემას აშშ-ს თავდაცვის დეპარტამენტის ოფიციალურ წარმომადგენელს.

უპირველეს ყოვლისა, ჩვენ შეგვიძლია ვისაუბროთ მეოთხე თაობის ავიაგამანადგურებლების, F-16-ისა და მისი ანალოგების მიწოდებაზე, როგორიცაა Tornado ან შვედური Gripen, რადგან ბევრი დასავლური ქვეყანა გეგმავს მათ ჩანაცვლებას ახალი F-22-ებით და F-35-ებით მომავალ წლებში. ერთ-ერთი მიზეზი ის არის, რომ დასავლურ სამხედრო დოქტრინაში თვითმფრინავებს ასევე ენიჭებათ მნიშვნელოვანი ადგილი საჰაერო თავდაცვაში – მათ შეუძლიათ გაანადგურონ რაკეტები და თვითმფრინავები ფრენისას , რის გამოც დასავლეთის ქვეყნებს აქვთ შედარებით ცოტა სახმელეთო საზენიტო სარაკეტო სისტემა და საბრძოლო მასალა მათთვის. პენტაგონი წუხს, რომ დასავლური სისტემების მიწოდების შემთხვევაშიც კი, უკრაინის საჰაერო თავდაცვის შესაძლებლობები საბოლოოდ შეიძლება ამოიწუროს. F-16-ს ან მათ  ანალოგებს ამ პრობლემის გადაჭრა შეუძლიათ.

არც პენტაგონს და არც ევროპელ მოკავშირეებს არ სჯერათ, რომ რუსეთში ეს შეიძლება აღიქმებოდეს როგორც ესკალაცია. „მოდით, ვაღიაროთ, რომ F-16-ების გამო ბირთვული ომი არ იქნება“, – ციტირებს Politico თავის ერთ-ერთ წყაროს.

თეთრმა სახლმა უარი თქვა პასუხის გაცემაზე Politico-ს კითხვაზე საბრძოლო თვითმფრინავების პირდაპირ უკრაინაში გადაცემის შესაძლებლობის შესახებ, მაგრამ მიუთითა ეროვნული უსაფრთხოების მრჩევლის მოადგილის ჯონ ფაინერის განცხადებებზე გასულ ხუთშაბათს. მისი თქმით, უკრაინისთვის მოიერიშე თვითმფრინავების მიწოდება განიხილება:  „ჩვენ არ გამოვრიცხავთ რაიმე კონკრეტულ სისტემას“–თქვა მან.

პრეზიდენტის აპარატის უფროსის მრჩეველმა მიხაილო პოდოლიაკმა განაცხადა, რომ უკრაინა უკვე აწარმოებს მოლაპარაკებებს დასავლელ პარტნიორებთან თვითმფრინავების და ოპერატიულ-ტაქტიკური რაკეტების მიწოდებაზე.

მისი თქმით, უკრაინას სჭირდება რაკეტები, რათა გაანადგუროს საბრძოლო მასალის საწყობები ყირიმში, თვითმფრინავები კი, პირველ რიგში, ფრონტის ხაზზე სახმელეთო ძალების ჰაერიდან დასაცავად.

„არა მგონია, რომ ომის ფარგლებში ვინმემ ეს ვერ გაიგოს. ამიტომ, ჯერ ერთი, უკვე მიმდინარეობს მოლაპარაკებები, მეორეც, მოლაპარაკებები დაჩქარებული ტემპით მიმდინარეობს და მესამე, ეს ყველა პარტნიორს კარგად ესმის“–განაცხადა მან FreeDom-თან ინტერვიუში.

ამავდროულად, პოდოლიაკმა აღიარა, რომ ჯერ კიდევ არსებობს ნიუანსები “პარტნიორ ქვეყნებში შიდა ფსიქოლოგიურ სტატუსთან დაკავშირებით”: უკრაინის ზოგიერთ მოკავშირეს ჯერ კიდევ არ შეუძლია უარი თქვას შიდა კონსერვატიზმზე, უკრაინის ომის ფონზე მსოფლიო არქიტექტურაში ცვლილებების შიშის გამო–თქვა მან, თუმცა დაუკონკრეტებია რაზეა საუბარი. მაგრამ გამოთქვა რწმენა, რომ თვითმფრინავებისა და შორი დისტანციის რაკეტების შესახებ მოლაპარაკებები მალე წარმატებით დაგვირგვინდება.

როგორც მანამდე ესპანური გაზეთი El Pais იტყობინებოდა, უკრაინის საჰაერო ძალების წარმომადგენლის იური იგნატის სიტყვებზე დაყრდნობით, უკრაინას სურს მიიღოს  გამანადგურებლების პირველი პარტია – 24 ერთეული თვითმფრინავი.

ამავდროულად, კიევი იმედოვნებს ამერიკულ F-16-ების მიღებას, მაგრამ ასევე განიხილავენ ვარიანტებს შვედური გამანადგურებელი Gripen-თან ან ფრანგულ Rafale-თან დაკავშირებითაც.

მოგვიანებით, უკრაინულ მედიასთან ინტერვიუში იგნატმა განმარტა, რომ უკრაინა თვითმფრინავებთან დაკავშირებით  ამჟამად მხოლოდ  მოლაპარაკების ეტაპზეა. თვითმფრინავების მოდელები და მათი რაოდენობა ჯერ კიდევ დგინდება.

”ყველაფერი უნდა გაკეთდეს ეტაპობრივად, მათ შორის, მფრინავების და ტექნიკური პერსონალის მომზადების გათვალისწინებით,” – ციტირებს Interfax-Ukraine-ს საჰაერო ძალების სარდლობის წარმომადგენელს– ”აქედან გამომდინარე, თავიდან შეიძლება ვისაუბროთ იმაზე, რომ შეიძლება იყოს ორი ესკადრილია. და ერთი ესკადრილია 12 თვითმფრინავია“.

ზოგადად, მისი თქმით, უკრაინას სჭირდება ბევრად უფრო თანამედროვე მრავალფუნქციური თვითმფრინავი, რომელიც დაიცავს ქვეყნის ცას.

“უსასრულოა შტერების რიცხვი ევროპის სახელმწიფო სტრუქტურებში. რომელიღაც იტალიის, რომელიღაც თავდაცვის მინისტრმა უკრაინისთვის ჯავშანტექნიკისა და სხვა შეიარაღების მიწოდებას მესამე მსოფლიო ომისგან აცილების მცდელობა უწოდა. იშვიათია შერეკილია […]პირველ რიგში, უკრაინის დაცვა, რომელიც არავის ჭირდება ვერ გადაარჩენს ჩამპალ ბებერ კონტინენტს შურისგებისგან. მეორე – თუ მესამე მსოფლიო ომი დაიწყება, იქ ვიომებთ არა ტანკებით და არც გამანაგდურებლებით. ამ შემთხვევაში ყველაფერი ფუჭი იქნება.”

აცხადებს რუსეთის ფედერაციის უშიშროების საბჭოს თავმჯდომარის მოადგილე, დიმიტრი მედვედევი.

გერმანიის კანცლერმა ოლაფ შოლცმა გაავრცელა ვიდეო მესიჯი, რომელშიც ისაუბრა ბერლინის პოლიტიკურ კურსზე რუსეთის მიმართ და უკრაინის ომზე . შოლცმა ხაზგასმით აღნიშნა, რომ ითვალისწინებს არა მხოლოდ უკრაინის მხარდაჭერის აუცილებლობას, არამედ მისი ქვეყნის უსაფრთხოების საკითხებსაც.

ხელისუფლების პრიორიტეტად, შოლცის თქმით, გერმანიის უსაფრთხოება რჩება. „ჩვენი მიზანი ნათელია – რუსეთმა ძალის გამოყენებით საზღვრების გაფართოება არ უნდა შეძლოს“, – განაცხადა მან და დასძინა, რომ გერმანელებს სურთ “მშვიდობა ევროპაში და რათა ომი მათაც არ მიუახლოვდეს”.

კანცლერის თქმით, გერმანიის საგარეო პოლიტიკა ეფუძნება სამ პრინციპს – უკრაინის ჰუმანიტარულ, ფინანსურ და სამხედრო-ტექნიკურ მხარდაჭერას; კონფლიქტის ესკალაციის თავიდან აცილებას, რუსეთისა და ნატოს ომში მისი გადაზრდის აღკვეთას; ყველა მოქმედების მჭიდრო კოორდინაციას მოკავშირეებთან და პარტნიორებთან შეერთებული შტატების ხელმძღვანელობით.

შოლცის თქმით, უკრაინაზე რუსეთის თავდასხმის დაწყებიდან გერმანიის მთავრობა ღებულობს ინფორმირებულ გადაწყვეტილებებს, რომლებიც ყოველთვის შეთანხმებულია საერთაშორისო დონეზე. მან გაიხსენა, რომ უკრაინაში “საშინელი, სასტიკი და უაზრო ომი” რუსეთის პრეზიდენტმა გამოიწვია.

იმავდროულად, Wall Street Journal-ის თანახმად, თავის წყაროებზე დაყრდნობით, ოლაფ შოლცმა, რომელიც გააკრიტიკეს დასავლური ტანკების უკრაინაში გადაცემის საკითხში ყოყმანის გამო, ფაქტობრივად მნიშვნელოვანი როლი ითამაშა დასავლეთის მხრიდან ამ მიწოდების არაოფიციალური ტაბუს მოხსნაში.

WSJ-ის ცნობით, სწორედ შოლცმა დაარწმუნა აშშ-ის პრეზიდენტი ჯო ბაიდენი ამერიკული ტანკების მიწოდების აუცილებლობაში, რომელიც ეჭვობდა, რომ ეს უნდა გაეკეთებინა.

Wir unterstützen die #Ukraine bei der Verteidigung gegen Russlands Aggression auch mit Waffen. Viele haben Sorge, der furchtbare Krieg könnte näherrücken. Ich verspreche: Jede Entscheidung treffen wir mit Blick auf die Sicherheit Deutschlands und Europas. #KanzlerKompakt pic.twitter.com/qnjZbbE1kN

— Bundeskanzler Olaf Scholz (@Bundeskanzler) January 28, 2023

რუსმა ოკუპანტებმა კონსტანტინოვკა დაბომბეს – არის მსხვერპლი. ამის შესახებ ინფორმაციას, დონეცკის რეგიონული სამხედრო ადმინისტრაციის ხელმძღვანელი პაველ კირილენკო ავრცელებს. მისი ინფორმაციით, დაბომბვის შედეგად 3 ადამიანი დაიღუპა.

“კონსტანტინოვკაზე რუსი ოკუპანტების მიერ დღეს დილით განხორციელებული სარაკეტო თავდასხმის შედეგად 3 მშვიდობიანი მოქალაქე დაიღუპა, 2 კი დაშავდა. რუსებმა საცხოვრებელ კორპუსს ცეცხლი გაუხსნეს, დაზიანდა 4 მაღალსართულიანი კორპუსი, სასტუმრო, ავტოფარეხები და მანქანები.ადგილზე მაშველები და სამართალდამცავები მუშაობენ. ბოროტება აუცილებლად დაისჯება”, – თქვა დონეცკის რეგიონული სამხედრო ადმინისტრაციის ხელმძღვანელმა.

ბოლო ერთ დღეში უკრაინელებმა მტრის თავდასხმები 12 დასახლებულ პუნქტში მოიგერიეს. ამის შესახებ ინფორმაციას უკრაინის შეიარაღებული ძალების გენერალური შტაბი ავრცელებს.

“ბოლო 24 საათის განმავლობაში, უკრაინის თავდაცვის ძალებმა რუსი ოკუპანტების თავდასხმები მოიგერიეს ლუჰანსკის ოლქის ბელოგოროვკას და დონეცკის ოლქის რაზდოლოვკას, კრასნა ჰორას, ბახმუტის, ივანოვსკოეს, კლიშივკას, დრუჟბას, ვოდიანეს, მარინკას, პობედას, ვუჰლედარისა და პრეჩისტოვკას დასახლებულ პუნქტებში”, – ნათქვამია განცხადებაში.

გასული დღის განმავლობაში, რუსმა ოკუპანტებმა 10 სარაკეტო და 26 საჰაერო დარტყმა განახორციელეს. ამასთან, გენშტაბი აღნიშნავს, რომ უკრაინის მასშტაბით მტრის საჰაერო და სარაკეტო დარტყმების საფრთხე რჩება.

ისრაელი უკრაინას რუსეთის წინააღმდეგ ომში უფრო ფართო მასშტაბით უჭერს მხარს, ვიდრე ეს საზოგადოებისთვის არის ცნობილი, განაცხადა ისრაელის ახალმა ელჩმა გერმანიაში რონ პროსორმა პორტალ Waz-თან ინტერვიუში.

ისრაელი ეხმარება უკრაინას, „მაგრამ კულისებში უფრო მეტად, ვიდრე საჯაროდ“–ამბობს ის.

ელჩმა გაიხსენა, რომ ისრაელი, სხვა საკითხებთან ერთად, ხელს უშლის ირანული დრონების მიწოდებას, რომლებსაც რუსეთი უკრაინის ინფრასტრუქტურაზე თავდასხმისთვის იყენებს .

“ისრაელის არმია რეგულარულად თრგუნავს ირანიდან იარაღის მიწოდებას სირიასა და ლიბანში. მათ შორისაა ირანული დრონებბი და რაკეტები, რომლებსაც რუსეთი იყენებს უკრაინაში”, – ხაზგასმით აღნიშნა მან.

მისი თქმით, ისრაელს სირიაში რუსეთის ყოფნისა და რუსეთის ტერიტორიაზე დიდი ებრაული თემის გამო „ჩრდილში დარჩენას“ ურჩევნია.

ადრე ისრაელის მედიაში გამოითქმებოდა მოსაზრებები, რომ თუნდაც ისრაელს უკრაინისთვის მხოლოდ თავდაცვითი შეიარაღების სისტემები მიეწოდებინა, ეს მას ბუმერანგივით დაუბრუნდებოდა უკან.

„რუსებმა, იმავე ლოგიკით, შესაძლოა დაიწყონ თანამედროვე საჰაერო თავდაცვის სისტემების მიწოდება, როგორიცაა S-300 და S-400, ირანსა და სირიაში. მოსკოვი შეძლებს თქვას, რომ ეს სისტემები მხოლოდ ახლო აღმოსავლეთის ქვეყნებს იცავს ისრაელის საჰაერო თავდასხმებისგან“, – წერდა ისრაელის გაზეთი Haaretz.

ავსტრალიაში უკრაინის ელჩმა, ვასილ მიროშნიჩენკომ ცნობილი სერბი ჩოგბურთელისგან ნოვაკ ჯოკოვიჩისგან, უკრაინაში მიმდინარე ომთან დაკავშირებით პოზიციის დაფიქსირება მოითხოვა.

აღნიშნული მოთხოვნა ელჩმა მას შემდეგ გააჟღერა, რაც ავსტრალიის ღია პირველობაზე გადაღებული ფოტოები გავრცელდა , სადაც სერბი ჩოგბურთელის მამა პოზირებს გულშემატკივრებთან, რომლებსაც ომის მხარდამჭერი ატრიბუტიკა ჰქონდათ, მათ შორის რუსეთის დროშა, რომელზეც ვლადიმერ პუტინის სახე ეხატა.

“სპეკულაციებისთვის წერტილის დასასმელად, ძალიან მტკიცე განც ხადებას გაკეთებაა საჭირო, რათა გავიგოთ მისი პოზიცია ამ ომის შესახებ, თუ რომელ მხარეს დგას. […]  რათქმაუნდა, მამის ცოდვებზე შვილი არ არის პასუხსიმგებელი, თუმცა შესაძლებელია, ნოვაკსაც მამამისის მსგავსი მოსაზრებები გააჩნია. მსოფლიომ უნდა გაიგოს, ვის მხარეს არის იგი ამ ომში.” – აცხადებს ელჩი.

ომის მხარდამჭერი ფოტოების გამოყენებისთვის, ავსტრალიის ჩემპიონატიდან ოთხი გულშემატკივარი გააგდეს. ამ ინციდენტის შემდეგ, ნოვაკ ჯოკოვიჩსა და სრდიან ჯოკოვიჩს, განცხადება არ გაუკეთებიათ.