Category: მსოფლიო

თურქეთის პრეზიდენტმა რეჯეფ თაიფ ერდოღანმა და რუსეთის პრეზიდენტმა ვლადიმერ პუტინმა ტელეფონით ისაუბრეს და პუტინის თურქეთში ვიზიტზე, იტყობინება ერდოღანის პრესსამსახური Twitter-ზე. „პრეზიდენტმა ერდოღანმა განაცხადა, რომ რუსეთ-უკრაინის ომის დროს არ უნდა გადაიდგას ნაბიჯები, რამაც შეიძლება გამოიწვიოს დაძაბულობა, ხაზი გაუსვა შავი ზღვის ინიციატივის მნიშვნელობას, რომელსაც ის „მშვიდობის ხიდად“ ხედავს“, – ნათქვამია განცხადებაში.

ერდოღანმა საუბრისას ასევე განაცხადა, რომ მარცვლეულის ფასები, რომელიც 23 პროცენტით დაეცა, სანამ მარცვლეულის გარიგება არსებობდა, ბოლო ორი კვირის განმავლობაში 15 პროცენტით გაიზარდა. კრემლში ვიზიტის შესახებ ინფორმაციას ჯერ არ ადასტურებენ.

მათ მხოლოდ განაცხადეს, რომ პუტინი და ერდოღანი შეთანხმდნენ გააგრძელონ კონტაქტები, მათ შორის შეხვედრისთვის მზადება. 17 ივლისს რუსეთი ოფიციალურად გამოვიდა მარცვლეულის შეთანხმებიდან, რომელიც უკრაინული საკვების უსაფრთხოდ გატანის საშუალებას იძლეოდა შავი ზღვის პორტებიდან და გააუქმა გემების უსაფრთხოების გარანტიები.

ამის შემდეგ რუსმა სამხედროებმა უკრაინის პორტებისა და ლიფტების დაბომბვა დაიწყეს. Wall Street Journal დიპლომატებსა და ანალიტიკოსებზე დაყრდნობით წერდა, რომ რუსეთმა უარი თქვა მარცვლეულის შეთანხმების განახლებაზე მას შემდეგ, რაც ერდოღანმა რუსეთის ხელისუფლება “გააბრაზა” აზოვსტალის დამცველების უკრაინაში დაბრუნებით და შვედეთის ნატოში შესვლის მხარდაჭერით.

რუსულ გემს შავ ზღვაში საზღვაო დრონი თავს დაესხა – ამის შესახებ ინფორმაციას, რუსული პროპაგანდისტული გამოცემა TASS-ი ავრცელებს. როგორც გამოცემა იუწყება, რუსეთის თავდაცვის სამინისტრო აცხადებს, რომ შავი ზღვის სამხრეთ-დასავლეთ ნაწილში უკრაინამ შავ ზღვაში რუსულ ხომალდზე საზღვაო დრონით თავდასხმა სცადა

მანამდე, 1-ელ აგვისტოს, რუსეთის თავდაცვის სამინისტრომ გაავრცელა ინფორმაცია, რომ შავ ზღვაში რუსულმა ხომალდებმა გაანადგურეს სამი უკრაინული საზღვაო დრონი, რომლებითაც მათზე თავდასხმას ცდილობდნენ.

• “დღეს ღამით უკრაინის შეიარაღებულ ძალებს სამი საზღვაო უპილოტო კატერით “სერგეი კოტოვისა” და “ვასილი ბიკოვის” საპატრულო გემებზე თავდასხმის მცდელობა ჰქონდათ”. – ნათქვამია უწყების განცხადებაში.

რუსული დრონების  ახალმა თავდასხმამ “სერიოზული” ზიანი მიაყენა უკრაინის პორტ იზმაილს დუნაის სანაპიროზე, იტყობინება Reuters წყაროზე დაყრდნობით.

მანამდე მედიაში გავრცელდა ინფორმაცია, რომ იზმაილში დაზიანდა საზღვაო სადგურისა და დუნაის გადამზიდავი კომპანიის შენობები.

უკრაინის შეიარაღებული ძალების ოპერატიული სარდლობის „სამხრეთის“ განცხადებით, მრავალსართულიანი ადმინისტრაციული შენობები მნიშვნელოვნად არის დაზიანებული.

უკრაინის შავი ზღვის პორტების ფაქტობრივი ბლოკადის გამო, დუნაი უკრაინული მარცვლეულის ექსპორტის მთავარ ალტერნატივად ითვლებოდა.

ერთი დღით ადრე Forbes-მა გაავრცელა ინფორმაცია, რომ მარცვლეულის შეთანხმებიდან რუსეთის გამოსვლის შემდეგ პირველად, სამი უცხოური გემი ჩავიდა უკრაინის ერთ-ერთ პორტში დუნაის სანაპიროზე. გაზეთის ცნობით, ბერძნულმა და ისრაელის გემებმა იზმაილის პორტის მიმართულებით ბოსფორის გავლით გაიარეს, თურქულ-ქართულმა გემმა კი – ჩრდილოეთ თურქეთიდან.

უკრაინის გენერალური შტაბის ანგარიშში ნათქვანია რომ რუსეთის საოკუპაციო ძალებსა და უკრაინის დამცველებს შორის, გასული დღის განმავლობაში, ფრონტზე 40-ზე მეტი საბრძოლო შეტაკება მოხდა, დამცველებმა მოწინააღმდეგის ცოცხალი ძალის თავმოყრის 10 რაიონს დაარტყეს რუსულმა ძალებმა, გასული დღე-ღამის განმავლობაში, 9 სარაკეტო და 57 საჰაერო დარტყმა განახორციელეს და უკრაინის ჯარების პოზიციებს და დასახლებებს მრავალჯერადი სარაკეტო სისტემებიდან ცეცხლი 61-ჯერ გაუხსნეს.

“რუსეთის ტერაქტების შედეგად, სამწუხაროდ, არიან დაღუპული და დაშავებული მშვიდობიანი მოქალაქეები, მათ შორის ბავშვები. განადგურდა საცხოვრებელი სახლები. უკრაინის მასშტაბით სარაკეტო და საჰაერო თავდასხმების ალბათობა კვლავ ძალიან მაღალია“, – აცხადებენ გენშტაბში.

უკრაინის თავდაცვის მინისტრის მოადგილემ, ანა მალიარმა განაცხადა, რომ უკრაინელებმა,  გასული კვირის განმავლობაში, კონტრშეტევის შედეგად,ბახმუტის მიმართულებით კიდევ 2 კილომეტრი გაათავისუფლეს. ამ მიმართულებით შეტევის დროს, უკრაინის დამცველებმა, სერთო ჯამში, 37 კვ. კმ. ტერიტორიის დეოკუპაცია განახორციელეს.

“გასული კვირის განმავლობაში თავდაცვის ძალებმა ამ მიმართულებით 2 კვ. კმ. გაათავისუფლეს. უკრაინელი სამხედროები წარმატებულ შეტევითი ოპერაციებს აწარმოებენ ქალაქ ბახმუტის სამხრეთით რაიონებში”, – განაცხადა ანა მალიარმა.

დიდი ბრიტანეთის ტერიტორიაზე წვრთნას გადის უკრაინის სპეცდანიშნულების რაზმის ბრიგადა, რომელიც ყირიმის განთავისუფლებაში მიიღებს მონაწილეობას, წერს ბრიტანული გაზეთი Sunday Express.

სტატიაში ნათქვამია, რომ დაახლოებით 2000 სპეცრაზმელი დევონის საგრაფოს ქალაქ ოჰემპტონში მდებარე პოლიგონზე ვარჯიშობს .

გამოცემის ცნობით, უკრაინელი სამხედროები ყირიმში ოპერაციისთვის ემზადებიან, რომლის საწყის ეტაპზევე ჩაერთვებიან და „ბრძოლის ველის ფორმირებაში“მიიღებენ მონაწილეობას.

ეს ტერმინი დასავლურ სამხედრო მეცნიერებაში გამოიყენება და იგულისხმება მოსამზადებელი ღონისძიებების ერთობლიობა, მათ შორის ლოკალური საბრძოლო მოქმედებები, რომლის დროსაც ბრძოლაში ჩართული ძირითადი ძალები უზრუნველყოფილნი არიან  მტერზე უპირატესობით.

გამოცემა წერს, რომ ოპერაცია ყირიმში გააერთიანებს დარტყმებს ხმელეთიდან და ზღვიდან, ასევე ჰაერიდან – უფრო გრძელი რადიუსის რაკეტების გამოყენებით, რომლებიც, სავარაუდოდ, დიდი ბრიტანეთიდან, აშშ-დან და გერმანიიდან იქნება მიწოდებული. თუმცა, ჯერჯერობით ჯო ბაიდენის ადმინისტრაცია არ დათანხმდა უკრაინისთვის ასეთი რაკეტების მიწოდებას.

გაზეთი Sunday Express ბრიტანული ტაბლოიდია. ის აქამდე  უკრაინის ომის შესახებ გახმაურებული გამოძიებებით არ გამოირჩეოდა.