Category: მსოფლიო

საფრანგეთის პრეზიდენტი გამოდის წინადადებით, ისლამური სახელმწიფოს წინააღმდეგ შექმნილი საერთაშორისო  კოალიცია გაფართოვდეს და ის ჰამასის წინააღმდეგ ბრძოლისთვის  იქნას გამოყენებული.

საფრანგეთის პრეზიდენტი დღეს ისრაელში ჩავიდა და შეხვედრები გამართა ისრაელის პრეზიდენტთან და პრემიერ–მინისტრთან.

პრემიერ ნეთანიაჰუსთან ერთად გამართულ პრესკონფერენციაზე  მაკრონმა ხაზგასმით აღნიშნა, რომ საფრანგეთი და ისრაელი  ტერორიზმს საერთო მტრად თვლიან.

„საფრანგეთი მზადაა, რომ  ISIS-ის წინააღმდეგ საერთაშორისო კოალიციამ, რომელშიც ჩვენ ვმონაწილეობთ ერაყსა და სირიაში ოპერაციების განსახორციელებლად, ასევე იბრძოლოს ჰამასთან.“განუცხადა მან ჟურნალისტებს.

მაკრონმა ასევე ისაუბრა  რეგიონული კონფლიქტის რისკების შესახებ და ხაზგასმით აღნიშნა, რომ ჰამასის წინააღმდეგ ბრძოლა „უნდა იყოს უმოწყალო, მაგრამ არა წესების გარეშე“.

თუმცა, საფრანგეთის პრეზიდენტმა არაფერი უთქვამს იმის შესახებ, თუ როგორ შეიძლება  კოალიციის გამოყენება, რომელშიც ათობით ქვეყანა შედის და რომელსაც აშშ მეთაურობს, ჰამასის წინააღმდეგ ბრძოლისთვის.

ისლამური სახელმწიფოს წინააღმდეგ კოალიციის ვებგვერდზე, რომელიც 2014 წლის სექტემბერში შეიქმნა, წერია, რომ კოალიცია  მხარს უჭერს რეგიონის სახელმწიფოებს „ისლამური სახელმწიფოს სამხედრო მარცხის  მიღწევაში ერაყსა და სირიაში,“ ასევე, უწევს მათ კონსულტაციას, და დახმარებას, მათ შორის სადაზვერვო მონაცემების მიწოდებით.

„რუსული მხარის პოზიცია ძალიან თანმიმდევრულია, ეს არაერთხელ გამოთქვა პრეზიდენტმა პუტინმა. ჩვენ ვგმობთ ტერორიზმის ყველა გამოვლინებას და ვუსამძიმრებთ დაღუპულთა ნათესავებსა და მეგობრებს. მიგვაჩნია, რომ აუცილებელია ცეცხლის შეწყვეტის უმოკლეს ვადაში უზრუნველყოფა და პრობლემის გადაწყვეტის მიღწევა, რომლის საფუძველი უნდა იყოს პალესტინელებისთვის დამოუკიდებელი სახელმწიფოს შექმნა.”

აცხადებს პუტინის პრესსპიკერი დიმიტრი პესკოვი ახლო აღმოსავლეთში არსებულ ვითარებასთან და საომარ მოქმედებებთან დაკავშირებით.

„ეს ადამიანები მხოლოდ იმიტომ მოკლეს, რომ ისინი ებრაელები იყვნენ და მათ მშვიდობიანად ცხოვრება სურდათ“, – განუცხადა მაკრონმა ისააკ ჰერცოგს.

შეხვედრაზე მაკრონმა ისრაელის მიმართ მხარდაჭერა გამოხატა და პრეზიდენტ ჰერცოგის აზრი გაიზიარა, იმასთან დაკავშირებით, რომ მძევლების გათავისუფლება დაუყოვნებლივ უნდა მოხდეს.

„მინდა, დარწმუნებულები იყოთ, რომ ტერორიზმის წინააღმდეგ ომში მარტო არ ხართ“,

ამის შესახებ საფრანგეთის პრეზიდენტმა ემანუელ მაკრონმა ისრაელის პრეზიდენტთან შეხვედრისას განაცხადა.

ისრაელის თავდაცვის ძალებმა დილის ანგარიშში განაცხადეს, რომ ბოლო 24 საათში 400-ზე მეტ „ტერორისტულ სამიზნეს“ დაარტყეს, რის შედეგადაც დაიღუპა ჰამასის რამდენიმე მეთაური და ბევრი „ბოევიკი, რომელიც თავდასხმებს ამზადებდა“.

ისრაელის არმიამ დაარტყა “ათობით” ჰამასის მებრძოლს, რომლებიც ემზადებოდნენ რაკეტების გასაშვებად და “ტერორისტული თავდასხმების განხორციელებისთვის ისრაელის ზურგში“– ნათქვამია განცხადებაში.

ისრაელის საჰაერო ძალების მებრძოლებმა შეტევა მიიტანეს ათობით „ტერორისტული ინფრასტრუქტურის“ ობიექტსა და ჰამასის პლაცდარმებზე ღაზას სექტორის რამდენიმე დასახლების მახლობლად. ერთ-ერთი დარტყმა, ისრაელის ცნობით, განხორციელდა ჰამასის გვირაბის შახტზე, რომელიც ბოევიკებს სანაპირო ზოლზე წვდომას აძლევდა.

გარდა ამისა, საჰაერო ძალებმა დაარტყეს მეჩეთებში განლაგებულ სამეთაურო ცენტრებსა და სამხედრო ობიექტებს. ისრაელის არმია ასახელებს სამ მოკლულ მეთაურს.

მთავარი მოკლედ:

• ორი მოხუცი ისრაელელი ქალი, რომელიც ჰამასმა წუხელ გაათავისუფლა, თელ-ავივის საავადმყოფოში გადაიყვანეს. მათი ქმრები კვლავ მძევლად რჩებიან.
• შეერთებულ შტატებს ჯერ კიდევ არ უნახავს ღაზას სექტორის ოპერაციის გეგმა მიღწევადი მიზნებით, განუცხადეს ბაიდენის ადმინისტრაციის წყაროებმა New York Times-ს.
• შეერთებულ შტატებს ეშინია თავდასხმების მის სამხედრო ბაზებზე და სხვა ობიექტებზე ახლო აღმოსავლეთში, განსაკუთრებით ერაყსა და სირიაში, სადაც პროირანული შეიარაღებული ჯგუფები მოქმედებენ. მათ რეგიონში დამატებითი ჯარები, განსაკუთრებით საჰაერო თავდაცვის ძალები გადაჰყავთ და არააუცილებელი პერსონალის ევაკუაციას ახორციელებენ.

საფრანგეთის პრეზიდენტი ემანუელ მაკრონი დღეს თელ-ავივში ჩავიდა რათა გამოხატოს სოლიდარობა ისრაელის მიმართ 7 ოქტომბერს პალესტინის დაჯგუფება ჰამასის მიერ განხორციელებული თავდასხმის შემდეგ.

ვიზიტის დროს საფრანგეთის ლიდერი, სავარაუდოდ, გამოვა მოწოდებით„დაიცვან მშვიდობიანი მოსახლეობა“ ღაზას სექტორში, იმ დროს, როდესაც ისრაელი ახორციელებს საჰაერო დარტყმებს პალესტინის ანკლავზე და ემზადება სახმელეთო შეტევისთვის, წერს AFP პრეზიდენტის ოფისზე დაყრდნობით.

დაგეგმილია საფრანგეთის პრეზიდენტის შეხვედრა პრემიერ-მინისტრ ბენიამინ ნეთანიაჰუსა და პრეზიდენტ ისააკ ჰერცოგთან. გარდა ამისა, AFP-ის ცნობით, თელ-ავივში მაკრონი უნდა შეხვედროდა ჰამასის თავდასხმის შედეგად დაღუპული ან ღაზას სექტორში მძევლად მყოფი საფრანგეთისა და ფრანკო-ისრაელის მოქალაქეების ოჯახებს.

Reuters-ის მიერ გამოქვეყნებული ფოტოების მიხედვით, ეს შეხვედრა თელ-ავივის ბენ გურიონის აეროპორტში შედგა.

საფრანგეთის სულ მცირე შვიდი მოქალაქე ამ დრომდე დაკარგულად ითვლება. ვარაუდობენ, რომ ისინი ყველა ჰამასის მძევები არიან, მაგრამ დადასტურებული მხოლოდ ერთი ფრანგი ქალის მძევლობაა.

მანამდე სოლიდარობის ვიზიტებით ისრაელში ჩავიდნენ აშშ-ის პრეზიდენტი ჯო ბაიდენი, დიდი ბრიტანეთის პრემიერ მინისტრი რიში სუნაკი და გერმანიის კანცლერი ოლაფ შოლცი .

ჰამასის წარმომადგენლის თქმით, დაჯგუფება მზად არის გაათავისუფლოს ისრაელში დატყვევებული მძევლების ნაწილი იმ პირობით, რომ ისრაელი შეაჩერებს სამხედრო ოპერაციას ისლამისტების წინააღმდეგ.

“ჩვენ მზად ვართ გავათავისუფლოთ მშვიდობიანი მოქალაქეები, მაგრამ გვსურს ისრაელის ჯარებმა შეაჩერონ აგრესია”, – განაცხადა ჰამასის პოლიტბიუროს წევრმა მოჰამედ ნაზალმა კატარის ტელეარხ Al Jazeera-სთვის მიცემულ ინტერვიუში.

მან ტყვეები სამ კატეგორიად დაყო: მშვიდობიანი მოქალაქეები, სამხედროები და ჩასახლებულები და თქვა, რომ ჰამასი მხოლოდ მშვიდობიანი მოსახლეობის განთავისუფლების განხილვისთვის არის მზად.

გუშინ საღამოს ჰამასმა  პირველი ორი მძევალი გაათავისუფლა.  ესენი არიან აშშ-ს მოქალაქეები ჯუდიტ ტაი რაანანი და მისი 17 წლის ქალიშვილი  ნატალი რაანანი.-

ქალები  ნათესავებს სტუმრობდნენ კიბუც ნაჰალ ოზში, სამხრეთ ისრაელში, როცა მას ჰამასი დაესხა თავს. ისრაელის თავდაცვის ძალების სპიკერმა დანიელ ჰაგარიმ განაცხადა, რომ ისინი ამჟამად  ისრაელის თავდაცვის ძალების მეურვეობის ქვეშ იმყოფებიან. მოლაპარაკებები  მძევლებთან დაკავშირებით  კატარის შუამავლობით მიმდინარეობდა.

შაბათს ისრაელის სამხედროებმა განაახლეს მძევლების რაოდენობის შესახებ ინფორმაცია.  ისრაელის თავდაცვის ძალების შეფასებით, ისლამისტებს მძევლად  ჰყავთ 210 ადამიანი და არა 201, როგორც წინა დღეებში იყო ცნობილი.

ბაიდენმა მადლობა გადაუხადა ისრაელისა და კატარის ხელისუფლებებს ქალების გათავისუფლებაში დახმარებისთვის:

”აშშ მუშაობს 24  საათის განმავლობაში ამერიკელი მძევლების გასათავისუფლებლად და აგრძელებს ძალისხმევას ჰამასის მიერ ჯერ კიდევ პატიმრობაში მყოფთა გასათავისუფლებლად. როგორც მათ ოჯახებს ოჯახებს ვუთხარი, როდესაც მათ გასულ კვირას ვესაუბრე, ჩვენ არ გავჩერდებით, სანამ მათ ახლობლებს სახლში არ დავაბრუნებთ. როგორც პრეზიდენტს, მე არ მაქვს იმაზე მაღალი პრიორიტეტი, ვიდრე ამერიკელების უსაფრთხოება, რომლებიც მძევლად არიან აყვანილი მსოფლიოს ნებისმიერ კუთხეში.”