იაპონიაში მიწისძვრის შედეგად დაღუპულთა რიცხვი 62-მდე გაიზარდა.იშიკავას ადგილობრივი მთავრობის ცნობით, მიწისძვრის შედეგად 300-ზე მეტი ადამიანი დაშავდა, მათ შორის 20-ის მდგომარეობა მძიმეა.
31 800-ზე მეტი ადამიანი თავშესაფრებში რჩება.
პირველ იანვარს იშიკავას პრეფექტურაში მიწისძვრების სერია მოხდა. ყველაზე ძლიერმა 7,5 მაგნიტუდის სიმძლავრის მიწისძვრამ, ერთ მეტრზე მეტი სიმაღლის ცუნამის ტალღები გამოიწვია.
ტოკიოს ჰანედას აეროპორტში იაპონიის ავიახაზების (Japan Airlines)-ის სამგზავრო თვითმფრინავს ცეცხლი გაუჩნდა. მსოფლიო მედია პირდაპირ ეთერში გადასცემდა ცეცხლმოდებული თვითმფრინავის კადრებს ასაფრენი ბილიკიდან, რომელშიც 379 მგზავრი და ეკიპაჟის წევრები იმყოფებოდნენ.
ავიაკომპანიის ინფორმაციით ალმოდებული თვითმფრინავიდან ყველა მგზავრის და ეკიპაჟის წევრების ევაკუაცია მოხდა.
კადრებში ჩანს უზარმაზარი ცეცხლი, რომელიც თვითმფრინავს მოედო. მეხანძრეები ცეცხლს დიდხანს ებრძოდნენ, თუმცა თვითმფრინავი პრაქტიკულად მთლიანად დაიწვა.
სამგზავრო თვითმფრინავი, რომელსაც ცეცხლი გაუჩნდა, 2021 წელს გამოშვებული Airbus A350–ია. ის რეისს კუნძულ ჰოკაიდოზე მდებარე ნიუ ჩიტოზის აეროპორტიდან ტოკიოს მიმართულებით ასრულებდა.
იაპონური მაუწყებლის კადრებში ჩანან მგზავრები, რომლებიც ალმოდებული თვითმფრინავიდან გასაბერ პანდუსზე ხტებოდნენ გადასარჩენად.
ხანძრის გამომწვევი მიზეზი ოფიციალურად არ არის დადასტურებული, თუმცა სააგენტო Reuters-მა და იაპონურმა მაუწყებელმა განაცხადეს, რომ იაპონიის ავიახაზების რეისი შესაძლოა ჰანედაში დაშვების შემდეგ იაპონიის სანაპირო დაცვის თვითმფრინავს შეეჯახა .
იაპონური მედიის ინფორმაციით, სანაპირო დაცვის თვითმფრინავის ბორტზე მყოფი ერთი ადამიანი გადაარჩინეს, დანარჩენი ხუთი კი დაკარგულად ითვლება.
სანაპირო დაცვა ამბობს, რომ მისი თვითმფრინავი, რომელიც სავარაუდოდ სამგზავრო თვითმფრინავს შეეჯახა, ნიიგატას აეროპორტისკენ უნდა გაფრენილიყო, რათა დახმარება მიეწოდებინა მიწისძვრის შედეგად დაზარალებულთათვის ნოტოს ნახევარკუნძულზე.
Flightradar-ის ვებგვერდის ცნობით, თვითმფრინავი ჰანედას აეროპორტში ადგილობრივი დროით 17:47 საათზე დაეშვა.
ჰანედას აეროპორტმა ინციდენტის შემდეგ ყველა ასაფრენი ბილიკი დახურა.
რუსეთმა კიევსა და ხარკოვზე მასიური შეტევა განახორციელა, არის მსხვერპლი, – ამის შესახებ ინფორმაციას უკრაინული მედია ავრცელებს.
ხარკოვის მერმა, იგორ ტერეხოვმა განაცხადა, რომ ქალაქის საცხოვრებელ უბნებში რუსების მიერ განხორციელებული შეტევის შედეგად ერთი ადამიანი დაიღუპა და 20-ზე მეტი დაშავდა.
კიევის მერის, ვიტალი კლიჩკოს ინფორმაციით დედაქალაქის 5 რაიონში რაკეტების ნამსხვრევების ჩამოვარდნის შედეგად 10 ადამიანი დაშავდა.
უკრაინის საჰაერო ძალების ცნობით, რუსებმა კიევის მიმართულებით ჰიპერბგერითი რაკეტა „კინჟალი“ გაუშვეს.
რუსული ძალები უკრაინას წუხელ Shahed-ის 35 დრონით დაესხნენ თავს, უკრაინელებმა ყველა დრონის მოგერიება შეძლეს, – ინფორმაციას უკრაინული მედია ქვეყნის თავდაცვის ძალების საჰაერო ძალებზე დაყრდნობით ავრცელებს.
მანამდე ცნობილი გახდა, რომ ჩამოგდებული დრონების ნამსხვრევებმა კიევსა და მიკოლაივში ხანძრები გამოიწვია. არსებული ინფორმაციით, არავინ დაღუპულა ან დაშავებულა.
დანიის დედოფალმა მარგრეტე II-მ ერისადმი საახალწლო სატელევიზიო მიმართვის დროს მოულოდნელად სამეფო ტახტიდან გადადგომის შესახებ გამოაცხადა.
ტახტიდან ოფიციალური გადადგომა 14 იანვარს შედგება. სწორედ ამ დღეს შესრულდება 52 წელი შესრულდება მას შემდეგ, რაც ის დედოფალი გახდა.
მარგრეტეს წასვლის შემდეგ, დანიის მეფე მისი უფროსი ვაჟი, პრინცი ფრედერიკი გახდება.
”მე ტახტს ჩემს შვილს, გვირგვინოსან პრინც ფრედერიკს დავუტოვებ,” – თქვა მან.
83 წლის მარგრეტე II დანიის ისტორიაში სამეფო ტახტს ყველაზე ხანგრძლივი დროით იკავებდა. ის ტახტზე ავიდა მამის, მეფე ფრედერიკ IX-ის გარდაცვალების შემდეგ 1952 წელს.
ბრიტანეთის სამეფო ტრადიციისგან განსხვავებით, 55 წლის პრინცი ფრედერიკის ოფიციალური კორონაციის ცერემონია არ გაიმართება. სამაგიეროდ, სასახლე იმავე დღეს გამოაცხადებს მის ტახტზე ასვლას.
დედოფალი მარგრეტე პოპულარული ფიგურაა დანიაში და ბევრი დანიელი ელოდა, რომ ის ტახტზე სიკვდილამდე დარჩებოდა.
ყოველწლიურად საახალწლოდ ის დანიელებს სატელევიზიო ეთერში სიტყვით მიმართავს.
წელს, გარდა ტახტზე უარის თქმის მოულოდნელი განცხადებისა, მარგრეტე II-მ ისაუბრა ახლო აღმოსავლეთსა და უკრაინაში ომებზე, ასევე კლიმატის ცვლილებაზე რეაგირების მნიშვნელობაზე.
დანიის სამეფო ოჯახმა ევროპის სხვა სამეფო ოჯახების მსგავსად, თანამედროვე საზოგადოებაში არსებული პრობლემების წინაშე აღმოჩენის გამო დანიის სამეფო ოჯახმა გადაწყვიტა შეემცირებინა სამეფო ოჯახის წევრებთა რაოდენობა.
ამან გამოიწვია საჯარო განხეთქილება სამეფო ოჯახში გასულ წელს მას შემდეგ, რაც მეფისნაცვლის ფრედერიკის უმცროსი ძმის, პრინც იოაკიმის შვილებს სამეფო ტიტულები ჩამოართვეს.
Washington Post-ის შაბათის ნომერში გამოქვეყნდა გამოცემის კორესპონდენტის კეტრინ ბელტონის სტატია, რომელიც ეძღვნება საფრანგეთის უკიდურესი მემარჯვენეების ახალ მცდელობებს შეცვალონ ქვეყნის პოლიტიკა რუსეთთან ომში უკრაინის მხარდაჭერის თვალსაზრისით.
კრემლის მხარდამჭერები უკიდურესი მემარჯვენეების ფლანგიდან, იყენებენ „მჯელობებს უკრაინაში ომისთვის გადახდილი ფასის შესახებ და სულ უფრო მეტად აზავებენ მას იმ აზრთან, რომ უკრაინის მხარდაჭერა ამერიკული იდეაა და საფრანგეთი უნდა ჩამოყალიბდეს, როგორც დიდ ზესახელმწიფო და აღადგინოს კავშირები რუსეთთან“.–ასკვნის ავტორი.
კრემლმა კი, როგორც ვაშინგტონ პოსტის წყაროებით მოპოვებული დოკუმენტები ცხადყოფს, იცის მემარჯვენეების მზარდი პოპულარობის შესახებ და სურს ამით ისარგებლოს.
დოკუმენტები, რომლებზეც ბელტონი წერს, ევროპის ერთ-ერთი ქვეყნის უსაფრთხოების სამსახურის მეშვეობით იქნა მოპოვებული.
ამ დოკუმენტების თანახმად, სერგეი კირიენკომ, პუტინის შტაბის უფროსის პირველმა მოადგილემ, დაავალა კრემლის პოლიტიკურ სტრატეგებს, განავითარონ პოლიტიკური დესტაბილიზაციის კამპანია საფრანგეთში სოციალური ქსელების, ფრანგი პოლიტიკური აქტივისტების და საზოგადოებრივი აზრის ლიდერების გამოყენებით.
მაგრამ იმ პირთა კონკრეტული სახელები, ვინც ამაში უნდა იყოს გამოყენებული, დოკუმენტებში არ არის ნახსენები.
ამ პროექტის მონახაზების პირველი პრეზენტაციები კრემლს უკვე 2022 წელს გადაეცა და აჩვენა, რომ პოლიტიკურმა დაძაბულობამ საფრანგეთში, სადაც რუსეთისადმი სიმპატიით განწყობილი ადამიანების მნიშვნელოვანი ფენა დარჩა, შესაძლებელი გახადა მსგავსი პროპაგანდისტული კამპანიის განხორციელება.
წელს კრემლის რეკომენდაციები მედია სტრატეგებისთვის უფრო კონკრეტული იყო: გაზარდეთ მესიჯების რაოდენობა, რომლებიც ხელს შეუწყობდა იმ აზრს, რომ სხვისი ომისთვის ფასის გადახდა ცუდი იდეაა.
საპასუხოდ, მიღებული დოკუმენტების მიხედვით, შემუშავდა სახელმძღვანელოები „ბოტ ფერმებისთვის“. მაგალითად, ეს: შექმენით 200-სიმბოლოიანი კომენტარი შუახნის ფრანგის სახელით, რომელიც საფრანგეთის მხარდაჭერას უკრაინისადმი „იდიოტურ ავანტიურად“ მიიჩნევს.
ამ წარმოსახვითი ფრანგისთვის ერთ-ერთი არგუმენტი იქნება ის, რომ უკრაინის მხარდაჭერა იწვევს „ინფლაციას და ცხოვრების დონის დაქვეითებას“.
კრემლის სპიკერს, დიმიტრი პესკოვს ჰკითხეს ასეთი დოკუმენტების არსებობის შესახებ.
მან ამ ინორმაციას უწოდა „კიდევ ერთი ფეიკი და სრული სისულელე“ და ხაზგასმით აღნიშნა, რომ კირიენკო პრეზიდენტის ადმინისტრაციაში დაკავებულია საშინაო პოლიტიკით და რომ „მთელი ევროპა იტანჯება“ რუსეთის წინააღმდეგ დაწესებული სანქციებით და ამის კიდევ ერთხელ დამტკიცება არ არის საჭირო.
მაგრამ, როგორც ვაშინგტონ პოსტი წერს, სოციალურ ქსელებში აქტივობის ანალიზი აჩვენებს, რომ იყო მცდელობები საფრანგეთის შიდა პრობლემები პრორუსული ნარატივების პოპულარიზაციისთვის გამოყენებინათ.
Alto Intelligence არის კომპანია, რომელიც სპეციალიზირებულია ევროპაში ანომალიური ციფრული მედიის აქტივობის მონიტორინგზე. მათი დათვლით, პარიზში არაბი მოზარდის მკვლელობით გამოწვეული არეულობის შემდეგ, ამ საკითხთან დაკავშირებული ყველა კომენტარის თითქმის მესამედი მომხმარებელთა პატარა – 1,2% -იანმა ჯგუფმა უზრუნველყო.და კომენტარების ამ მასაში 24,2% პრორუსული იდეების პოპულარიზაციას ეწეოდა.
ანგარიშების უმეტესობა, რომლებმაც ეს კომენტარები დაწერეს, დაკავშირებულია ულტრამემარჯვენე პოლიტიკოსებთან – მარინ ლე პენთან, ნაციონალური გაერთიანების ხელმძღვანელთან (ყოფილი ეროვნული ფრონტი) და ერიკ ზემურთან.
შემოდგომაზე, ჰამასის თავდასხმების შემდეგ ისრაელის დასახლებებზე და ისრაელის სამხედრო ოპერაციების დაწყების შემდეგ ღაზაში, გაჩნდა მტკიცებულება, რომ ანტიისრაელური პროტესტი საფრანგეთში, ირიბად ან რუსული დეზინფორმაციული ქსელების გამოყენებით დაკავშირებული იყო მოსკოვთან.
ექვსთვიანი საპარლამენტო გამოძიება საფრანგეთის პოლიტიკაში საგარეო ჩარევის შესახებ მივიდა დასკვნამდე: “რუსეთი აწარმოებს მდგრად დეზინფორმაციულ კამპანიას ჩვენს ქვეყანაში” და ხაზი გაუსვა ლე პენის პარტიის როლს, რომელიც, ანგარიშის მიხედვით, “ბევრ განსაკუთრებულ კავშირს ინარჩუნებს კრემლთან”, და, არსებითად, მოქმედებს როგორც „საკომუნიკაციო არხი“ რუსული შეხედულებების გავრცელებაში.
ლე პენს მოსკოვთან კავშირში დიდი ხნის განმავლობაში ადანაშაულებენ, მას შემდეგ რაც მისმა პარტიამ 2014 წელს რუსეთიდან სესხი აიღო. უკრაინაში სრულმასშტაბიანი ომის დაწყების შემდეგ, ლე პენი აღარ არის ისეთი აქტიური პუტინის მხარდასაჭერი და მისი კომენტარები ომის შესახებ ძირითადად ხაზს უსვამს იმას, რომ ანტირუსული სანქციები ზიანს აყენებს საფრანგეთის ეკონომიკას.
თუმცა, მისმა “ნაციონალურმა გაერთიანებამ“ უარი თქვა უკრაინის მხარდაჭერაზე რამდენიმე საპარლამენტო კენჭისყრაში.
და ბოლო თვეებში, ამ პარტიის წევრები და სხვა ულტრამემარჯვენე პოლიტიკოსები კვლავ ალაპარაკდნენ მოსკოვთან კავშირების აღდგენის აუცილებლობაზე.
ბევრი მათგანი არ მალავს, რომ საფრანგეთის არასტაბილური პოლიტიკური ვითარება და საგარეო პოლიტიკური არასტაბილურობა რუსეთს აძლევს კარგ შანსს, შემდგომშიც სცადოს ძირგამომთხრელი საქმიანობა და რყევების გამოწვევა.
დიდი ბრიტანეთის სამეფო პროკურატურამ ბრალი წაუყენა ოთხ მამაკაცს ოქროს უნიტაზის ქურდობაში, რომელიც იტალიელი კონცეპტუალური მხატვრის მაურიციო კატელანის ნამუშევარია სახელწოდებით “ამერიკა”. უნიტაზი ინგლისში 2019 წლის შემოდგომაზე გამოფენიდან მოიპარეს.
ოთხივე ბრალდებული ოქსფორდის სასამართლოში 28 ნოემბერს გამოცხადდება სისხლის სამართლის პროცესის პირველ ეტაპზე, რომელიც დიდხანს გაჭიანურდება, რადგან ბრიტანეთის სასამართლო სისტემა უკვე გადატვირთულია და საქმეები სერიოზულად ჩამორჩება ვადას.
მსოფლიო პრესის ყურადღების ცენტრში 18-კარატიანი ოქროსგან უნიტაზი ქურდობამდე დიდი ხნით ადრე მოხვდა . ის დაახლოებით 100 კგ-ს იწონის, ღირებულება კი თითქმის 6 მილიონ დოლარად არის შეფასებული.
2016 წელს ის ნიუ-იორკში გუგენჰაიმის მუზეუმში დამონტაჟდა. მის გამოსაყენებლად რიგში 100 ათასი ადამიანი იდგა. ტუალეტის დანიშნულებისამებრ გამოსაყენებლად, წინასწარ უნდა ჩაწერილიყავით სიაში. ყველა მსურველს სამი წუთი ქონდა განკარგულებაში.
კატელანის პირველი პერსონალური გამოფენისთვის დიდ ბრიტანეთში 20 წლის განმავლობაში, ტუალეტი ბლენჰაიმის სასახლეში, მარლბოროს ჰერცოგების საგვარეულო რეზიდენციაში, ინგლისის ოქსფორდშირის საგრაფოში გადაიტანეს, იმ ოთახის მოპირდაპირედ მდებარე ოთახში, სადაც 1874 წელს უინსტონ ჩერჩილი დაიბადა .
ტუალეტის დამონტაჟებამდე ჰერცოგის ნახევარძმამ ედვარდ სპენსერ-ჩერჩილმა, ბლენჰეიმის ხელოვნების ფონდის დამფუძნებელმა აღნიშნა, რომ ტუალეტის მოპარვა, თუნდაც ვინმეს ასეთი აზრი მოსვლოდა თავში, მარტივი საქმე არ იქნებოდა.
მან Times-ს განუცხადა: ”პირველ რიგში, ის დაკავშირებულია კანალიზაციასთან და მეორეც, პოტენციურ ქურდს წარმოდგენა არ ექნება, ვინ გამოიყენა ბოლოს ტუალეტი ან რა ჭამა. ასე რომ, არა, მე არ ვაპირებ მის დაცვას.
ტუალეტი მართლაც იყო დაკავშირებული სასახლის კანალიზაციასთან და მისმა ქურდობამ მნიშვნელოვანი ზიანი გამოიწვია დატბორვის გამო.
გამოძახებით მისულმა პოლიციამ მხოლოდ ძვირფასი ხელოვნების ობიექტის გაუჩინარების ფაქტის და დაღვრილი საკანალიზაციო სისტემის არსებობის კონსტანტირება მოახდინა იმ ადგილზე, სადაც მანამდე უნიტაზი იდგა.
როგორც ვარაუდობდნენ, გამტაცებლები ნაძარცვთან ერთად ორ მანქანით წავიდნენ. გამოძიების ფარგლებში დაკავებულია რვა პირი, რომლებსაც დეტექტივები ქურდობაში ეჭვმიტანილად თვლიდნენ, თუმცა მათ შესახებ ინფორმაცია ამ დღემდე არ არსებობდა.
უნიტაზის ქურდობის შემდეგ, ბლენჰეიმის სასახლის აღმასრულებელმა დირექტორმა დომინიკ ჰარემ იმედი გამოთქვა, რომ ის, რაც მან აღწერა, როგორც უაზრო ქურდობა, ნამუშევარს უკვდავყოფს. მან დასძინა, რომ ღრმა ირონიაა, რომ ნამუშევარი, რომელიც ასახავს „ამერიკული ოცნებას“ და ელიტარულ საგანს, რომელიც ყველასთვის ხელმისაწვდომია, „ელვის სისწრაფით მოიპარეს და ცნობისმოყვარე თვალებისგან გადამალეს“.
BBC-სთან ინტერვიუში ჰარემ მაშინ თქვა: „ხელოვნების ნიმუშების დემონსტრირება რისკთან არის დაკავშირებული. ალბათ ყველაზე უსაფრთხოა მათი უბრალოდ სეიფში მოთავსება და ჩაკეტვა. თუმცა, ვფიქრობთ, რომ რისკი ღირს.”
გაბედული ძარცვიდან მალევე, კატელანმა განუცხადა New York Times-ს, თავდაპირველად მას ეგონა, რომ ეს იყო გათამაშება.
„ვინ იქნება ისეთი სულელი, რომ უნიტაზი მოიპაროს? – თქვა მან და აშკარად დაავიწყდა, რომ უნიტაზი სუფთა ოქროსგან იყო დამზადებული.
მოგვიანებით კატელანმა გამოავლინა, რომ უნიტაზი გამოშვებული სამი ვარიანტიდან ერთ-ერთი იყო.
ჯერ კიდევ გაურკვეველია ოდესმე დაბრუნდება თუ არა მოპარული ხელოვნების ნიმუში – ჯერჯერობით ძებნას არაფერი მოჰყოლია. დაკარგული ნივთის შესახებ ინფორმაციისთვის სადაზღვევო კომპანიამ 100 ათას ფუნტამდე ჯილდო დააწესა, მაგრამ არავინ გამოჩენილა, ვისაც მისი ადგილსამყოფელის შესახებ ინფორმაციის მიწოდება შეეძლო.
„ვნახავთ თუ არა კიდევ ოდესმე ამ უნიტაზს? პირადად მე მაინტერესებს, ექნება თუ არა მას ისევ ფორმა, სიმართლე რომ გითხრათ“- განუცხადა პოლიციის კომისარმა მეთიუ ბარბერმა მედიას 2021 წელს. „როცა ვინმეს ხელში ოქროს ამხელა მასა უვარდება, სავარაუდოდ ის მას სხვა ფორმით გაუკეთებს რეალიზაციას. კარგი იქნება, თუ ჩვენ ვიპოვით და დავაბრუნებთ უნიტაზს, მაგრამ პირადად მე არ ვარ დარწმუნებული, რომ იგი პირვანდელ ფორმაში იქნება შემონახული”, – დასძინა მან
აშშ-ს ახლო აღმოსავლეთში ოთხი მიზანი აქვს. ამის შესახებ პენტაგონის პრესმდივანმა პატრიკ რაიდერმა რეგიონში ვითარების კომენტირებისას ისაუბრა:
უკრაინის შეიარაღებული ძალების მთავარსარდალმა ვალერი ზალუჟნიმ მისი ტელეგრამ არხზე დაადასტურა მისი თანაშემწის, მაიორის გენადი ჩასტიაკოვის გარდაცვალება.
“ენით აუწერელი ტკივილი და მძიმე დანაკლისი უკრაინის შეიარაღებული ძალებისთვის და პირადად ჩემთვის.
დღეს, ტრაგიკულ ვითარებაში, მისივე დაბადების დღეზე, ოჯახურ წრეში გარდაიცვალა ჩემი თანაშემწე და ახლო მეგობარი მაიორი გენადი ჩასტიაკოვი.ერთ-ერთ საჩუქარში უცნობი ასაფეთქებელი მოწყობილობა აფეთქდა. გენადის ცოლი და ოთხი შვილი დარჩა. ვუსამძიმრებ ოჯახს…
სრულმასშტაბიანი შემოჭრის დაწყებიდან გენადი იყო ჩემთვის საიმედო საყრდენი, რომელმაც მთლიანად მიუძღვნა თავი უკრაინის შეიარაღებულ ძალებს და რუსეთის აგრესიის წინააღმდეგ ბრძოლას.
მიზეზები და გარემოებები წინასწარი გამოძიების ფარგლებში დადგინდება.
მარადიული ხსოვნა!“–წერს ზალუჟნი.
უკრაინის სამართალდამცავ ორგანოებში UNIAN-ის სააგენტოს წყარომ განაცხადა, რომ ზალუჟნის თანაშემწე ხელყუმბარასთან დაუდევარი მოპყრობის გამო გარდაიცვალა. მისი თქმით, გენადი ჩასტიაკოვს დაბადების დღეზე საბრძოლო ხელყუმბარები გადასცეს, რომელთაგან ერთ-ერთი დაუდევარი გამო აფეთქდა.
უკრაინის შინაგან საქმეთა სამინისტროს ინფორმაციით, გენადი ჩასტიაკოვის 13 წლის ვაჟი მძიმე დაზიანებებით საავადმყოფოში გადაიყვანეს.
აშშ-ს ცენტრალურმა სარდლობამ (CENTCOM) გამოაცხადა, რომ ახლო აღმოსავლეთში აგზავნის ატომური იარაღის მატარებელ ოჰაიოს კლასის წყალქვეშა ნავს. აშშ–ს შეიარაღებული ძალების სარდლობამ თავის განცხადებაში სხვა დეტალები არ დააკონკრეტა, თუმცა აშშ-ს ცენტრალური სარდლობის მიერ გამოქვეყნებულ ფოტოში ჩანს, რომ სუეცის არხში წყალქვეშა ნავი ალ სალამის ხიდის ქვეშ კაიროს ჩრდილო-აღმოსავლეთით გადაადგილდება.
ოჰაიოს კლასის წყალქვეშა ნავის მდებარეობის შესახებ ინფორმაციის გავრცელება იშვიათობაა, რადგან ისინი შეერთებული შტატების ეგრეთ წოდებულ “ბირთვულ ტრიადის” ნაწილია, რომელშიც ასევე შედის სახმელეთო ბაზირების ბალისტიკური რაკეტები და ბირთვული ბომბები სტრატეგიული ბომბდამშენების ბორტზე.
ოჰაიოს კლასის რამდენიმე წყალქვეშა ნავი ატარებს საკრუიზო რაკეტებს ბირთვული ქობინების ნაცვლად და შეიძლება განლაგდეს სპეციალური ოპერაციების ძალების შემადგენლობაში. გაურკვეველია, ატარებს თუ არა ამჟამად ახლო აღმოსავლეთში მოქმედი წყალქვეშა ნავი რაკეტებს ბირთვული ქობინებით.
შეერთებულმა შტატებმა მანამდე უკვე განალაგა ამ რეგიონში წყალქვეშა ნავები . კვირას გაკეთებული განცხადება ირანთან ურთიერთობების გაუარესებას დაემთხვა. ბაიდენის ადმინისტრაციამ რეგიონული პარტნიორების მეშვეობით გაუგზავნა მესიჯები ირანსა და ჰეზბოლას, რომ შეერთებული შტატები მზადაა მათ წინააღმდეგ სამხედრო ჩარევისთვის, თუ ისინი განახორციელებენ თავდასხმებს ისრაელზე.
კვირას, აშშ-ს ცენტრალურმა სარდლობამ ასევე გაავრცელა ატომური B-1 ბომბდამშენის სურათი, რომელიც ასევე მოქმედებდა ახლო აღმოსავლეთში და ასევე შეუძლია ბირთვული იარაღის ტარება.
მანამდე პრეზიდენტმა ბაიდენმა ხმელთაშუა ზღვაში ორი ავიამზიდის ჯგუფი გაგზავნა.
გარდა ამისა, ამჟამად წითელ ზღვაშია 26-ე საზღვაო ექსპედიციური ძალების მესამე საზღვაო დამრტყმელი ჯგუფი, რომელიც დაახლოებით 2000 საზღვაო ქვეითისგან შედგება.