აშშ-ის ვიცე-პრეზიდენტი და დემოკრატების საპრეზიდენტო კანდიდატი კამალა ჰარისი ამბობს, რომ პრეზიდენტად არჩევის შემთხვევაში, არ შეხვდება პუტინს სამშვიდობო მოლაპარაკებებზე, უკრაინის მონაწილეობის გარეშე.
„არა, ორმხრივად, უკრაინის გარეშე არა. უკრაინას უნდა ჰქონდეს სიტყვის თქმის საშუალება უკრაინის მომავალზე“, – განაცხადა ჰარისმა CBS-თან ინტერვიუში, როდესაც მას ჟურნალისტმა დაუსვა შეკითხვა, შეხვდება თუ არა ვლადიმერ პუტინს უკრაინაში მიმდინარე ომის გადაწყვეტის საკითხზე დიალოგისთვის.
კამალა ჰარისმა ინტერვიუს დროს ასევე გააკრიტიკა თავისი ოპონენტი, დონალდ ტრამპი უკრაინის საკითხთან მიმართებით.
“დონალდ ტრამპი რომ პრეზიდენტი ყოფილიყო, პუტინი ახლა კიევში იჯდებოდა. ის ამბობს, რომ შეუძლია ომი პირველსავე დღეს დაასრულოს. იცით ეს რას ნიშნავს? საუბარია კაპიტულაციაზე”, – თქვა ჰარისმა.ჰარისმა აღნიშნა, რომ ომის დასრულებაში წარმატების მიღწევა ვერ მოხდება, თუ უკრაინა და გაერო-ს წესდება არ მიიღებენ მონაწილეობას ამ წარმატების ფორმირებაში. მისივე თქმით, გააგრძელებს უკრაინის მხარდაჭერას.
