Category: მსოფლიო

“ეს პუტინს ნამდვილ დილემას უქმნის და ჩვენ პირდაპირ, მუდმივ კონტაქტში ვიმყოფებით უკრაინასთან”.

აცხადებს, ამერიკის შეერთებული შტატების პრეზიდენტი.

რუსეთისგან განსხვავებით, უკრაინას არ სჭირდება ის, რაც სხვას ეკუთვნის – უკრაინის საგარეო საქმეთა სამინისტროს პრესსპიკერმა, ჰეორჰი ტიხიმ პრესკონფერენციაზე კურსკში განვითარებულ მოვლენებზე ისაუბრა.

“უკრაინა, რუსეთისგან განსხვავებით, არ ისწრაფვის უცხო ტერიტორიების დაპყრობისკენ. უკრაინის მხარე არ არის დაინტერესებული კურსკის რეგიონის ტერიტორიების მითვისებით. ჩვენი მიზანი ჩვენი ხალხის სიცოცხლის შენარჩუნებაა.[…] სამწუხაროდ, უკრაინას არ შეუძლია შორი დისტანციის იარაღის გამოყენება, რათა თავი დაიცვას, ამიტომ ჩნდება საჭიროება, გავათავისუფლოთ სასაზღვრო ტერიტორიები რუსეთის ჯარებისა და შეიარაღებული ძალებისგან, რომლებიც უკრაინას [ამ ტერიტორიებიდან] ესხმიან თავს.[…] უკრაინის შეიარაღებული ძალები ცივილიზებული ევროპული სამხედრო ძალაა, რომელიც სრულად ექვემდებარება ომის კანონებსა და წეს-ჩვეულებებსა და საერთაშორისო ჰუმანიტარულ სამართალს. […] ომი უკრაინაში რუსეთმა დაიწყო და ახლა საკმაოდ მართებულია, რომ ომი რუსეთის ტერიტორიაზე ბრუნდება. რაც უფრო მალე დათანხმდება რუსეთი სამართლიანი მშვიდობის აღდგენას, მით უფრო მალე დამთავრდება უკრაინის სამხედრო მოქმედებები რუსეთის ტერიტორიაზე. სანამ პუტინი აგრძელებს ომს, ის მიიღებს უკრაინისგან შესაბამის პასუხს” – თქვა უკრაინის საგარეო საქმეთა სამინისტროს პრესსპიკერმა.

აშშ-ის ჰელსინკის კომისია პლატფორმაზე X აქვეყნებს განცხადებას “ქართული ოცნების” მხრიდან შავი ფულის გამოყენების შესახებ თაღლითური ქოლ-ცენტრებიდან.

“‘ქართული ოცნება’ ეყრდნობა შავ ფულს, თაღლითური ქოლ-ცენტრების ქსელიდან მსოფლიოს გარშემო, საიმისოდ, რომ დააფინანსოს თავისი ოპერაციები და შეავიწროვოს მისი ოპოზიცია.

სახელმწიფო დეპარტამენტი უნდა დაუპირისპირდეს ამ ქოლ-ცენტრებს, რომლებიც აფინანსებენ ‘ქართული ოცნების’ ანტიდემოკრატიულ კამპანიას ქართველი ხალხის წინააღმდეგ”–წერს ჰელსინკის კომისია.

„ქართული ოცნების“ მიერ თაღლითური ქოლცენტრების გამოყენებაზე საუბარია  ჰელსინკის კომისიის წევრი ამერიკელი კონგრესმენების წერილშიც, რომელიც მათ 31 ივლისს აშშ-ის სახელმწიფო მდივანს ენტონი ბლინკენს გაუგზავნეს და ბიძინა ივანიშვილისა და მისი ახლო გარემოცვისთვის სანქციების დაწესება მოითხოვეს.

ჰელსინკის კომისია, ანუ  აშშ-ის “ევროპის უსაფრთხოებისა და თანამშრომლობის კომისია” არის აშშ-ის ხელისუფლების კომისია, რომელიც ხელს უწყობს ადამიანის უფლებების დაცვას, სამხედრო უსაფრთხოებას და ეკონომიკურ თანამშრომლობას ევროპის, ევრაზიისა და ჩრდილოეთ ამერიკის 57 ქვეყანაში. კომისიის ცხრა წარმომადგენელი სენატის წევრია, ცხრა – წარმომადგენელთა პალატის, სამი – აღმასრულებელი ხელისუფლების ოფიციალური პირია.

კიევი და მოსკოვი ერთმანეთს ადანაშაულებენ მას შემდეგ, რაც კვირას საღამოს ევროპის უდიდეს ატომურ ელექტროსადგურთან დაკავშირებულ ობიექტზე მასიური ხანძარი გაჩნდა. ორივე მხარე აღიარებს, რომ ხანძარმა გავლენა არ მოახდინა რადიაციულ უსაფრთხოებაზე, მაგრამ ამავე დროს, ატომური ენერგიის საერთაშორისო სააგენტოს, “IAEA“ მსგავსად, ორივე მხარე მსგავსი ინციდენტების პოტენციურ საფრთხეზე საუბრობს.

უკრაინის პრეზიდენტმა ვლადიმერ ზელენსკიმ გუშინ განაცხადა, რომ ხანძარი ზაპოროჟიეს ატომურ ელექტროსადგურზე, რომელიც რუსეთის მიერ 2022 წლიდან არის ოკუპირებული, სავარაუდოდ, რუსმა სამხედროებმა გააჩინეს. ხოლო კრემლის მიერ დანიშნულმა ზაპოროჟიეს გუბერნატორმა ევგენი ბალიცკიმ განაცხადა, რომ ხანძრის მიზეზი უკრაინული მხრიდან დაბომბვა გახდა. ხანძარი გაჩნდა მას შემდეგ, რაც უკრაინულმა ძალებმა კურსკის რეგიონში რუსეთის ტერიტორიაზე შეჭრა დაიწყეს, აღნიშნავს Reuters.

ატომური ენერგიის საერთაშორისო სააგენტო (IAEA), რომლის დამკვირვებლები უზარმაზარი, ექვსრეაქტორიანი ატომური ელექტროსადგურის ტერიტორიაზე იმყოფებიან,  აცხადებს რომ მათ დაინახეს მძიმე, სქელი კვამლი “წარმოქმნილი ქარხნის ჩრდილო-დასავლეთიდან” მას შემდეგ, რაც გაიგონეს “რამდენიმე აფეთქება საღამოს განმავლობაში”. ” .

„[დამკვირვებელთა] ჯგუფს აცნობეს, რომ დღეს, სავარაუდოდ, მოხდა დრონის თავდასხმა სადგურის ერთ-ერთ გამაგრილებელ კოშკზე. IAEA-ს გენერალურმა დირექტორმა რაფაელ მარიანო გროსიმ დაადასტურა, რომ ეს არ იმოქმედებს ბირთვულ უსაფრთხოებაზე“, – ნათქვამია ორგანიზაციის განცხადებაში.

რუსეთის სახელმწიფო კორპორაცია Rosatom-ის ცნობით, ძირითადი ხანძარი 23:30 საათისთვის საგანგებო სიტუაციების სამინისტროს მეხანძრეებმა ჩააქრეს. კორპორაცია ირწმუნება, რომ “მოხდა უკრაინული დრონის პირდაპირი თავდასხმა ორი გამაგრილებელი კოშკიდან ერთზე,  რამაც გამოიწვია ხანძარი შიდა კონსტრუქციაზე“.

გამაგრილებელი გამაგრილებელი კოშკები შექმნილია სადგურის გასაგრილებლად. აქ დიდი რაოდენობით წყლის ატმოსფერული ჰაერის მიმართული ნაკადით გაგრილება ხდება.

გუშინ საღამოს უკრაინის პრეზიდენტმა ვლადიმერ ზელენსკიმ სოციალურ ქსელში  გამოაქვეყნა ფოტოები, რომლებშიც, როგორც თავად აცხადებს, ოკუპირებული ზაპოროჟიეს ატომური ელექტროსადგურის შენობიდან ამომავალი კვამლი ჩანს.

ზელენსკი ამტკიცებს, რომ ცეცხლი „რუსმა ოკუპანტებმა“ გააჩინეს.

უკრაინის ნიკოპოლის რეგიონალური სამხედრო ადმინისტრაციის ხელმძღვანელი ევგენი ევტუშენკო წერს, რომ „მოპირდაპირე სანაპიროზე არსებული წყაროებიდან მიღებული არაოფიციალური ინფორმაციით, რუსებმა გამაგრილებელ კოშკში დიდი რაოდენობით მანქანის საბურავები დაწვეს“.

რუსული მედია  “სადგურის წარმომადგენლზე“ დაყრდნობით იტყობინება, რომ სადგური ჩვეულ რეჟიმში ფუნქციონირებს.

ბელგოროდის ოლქის გუბერნატორმა ვიაჩესლავ გლადკოვმა ორშაბათს დილით სასაზღვრო  რაიონის –კრასნოიარუჟსკის მოსახლეობის ევაკუაციის დაწყების შესახებ გამოაცხადა.

”საგანგაშო დილაა. მტრის აქტივობაა კრასნოიარუჟსკის ოლქის საზღვარზე. ჩვენ ვიწყებთ კრასნოიარუჟსკის რაიონის მაცხოვრებლების უსაფრთხო ადგილებში გადაყვანას.დარწმუნებული ვარ, ჩვენი სამხედრო მოსამსახურეები ყველაფერს გააკეთებენ, რათა გაუმკლავდნენ წარმოშობილ საფრთხეს “, – განაცხადა გლადკოვმა ტელეგრამ არხზე ვიდეომიმართვაში და დასძინა, რომ ტრანსპორტი ამ მხარეში უკვე გაგზავნილია.

რუსი სამხედრო ბლოგერები იუწყებიან კვირას კრასნოიარუჟსკის რაიონის სასაზღვრო სოფელ კოლოტილოვკაზე უკრაინული შენაერთის თავდასხმის შესახებ.

გლადკოვმა სოფლის მცხოვრებლებს სამი დღის წინ წასვლისკენ მოუწოდა.

კრასნოიარუჟსკის ოლქი ბელგოროდის რეგიონის ჩრდილო-დასავლეთით მდებარეობს.  რეგიონალური ცენტრიდან, კრასნაია იარუგადან, კურსკის ოლქის სუჯამდე, სადაც უკრაინული დანაყოფები6 აგვისტოს  შევიდნენ – დაახლოებით 45 კილომეტრია.

უკრაინის შეიარაღებული ძალების ოპერაციის დაწყებამდე სასაზღვრო გამშვები პუნქტი რუსულ კოლტილოვკასა და უკრაინულ პოკროვკას შორის ერთადერთი მოქმედი საგუშაგო იყო რუსეთ-უკრაინის საზღვარზე.

რუსეთში, კურსკის ოლქში, სადაც უკვე მე-4 დღეა უკრაინული შეტევა მიმდინარეობს,  ოკუპორებული აფხაზეთიდან და ცხინვალის რეგიონებიდან მოხალისეები გადაისროლეს.  შესაბამის ინფორმაციას, ეხო კავკაზა ავრცელებს. 

“მთავარსარდალმა ვლადიმერ პუტინმა კურსკის ოლქსის მხარდაჭერისკენ მოგვიწოდა. დიდხანს ლოდინი საჭირო არაა. ჩავედით დასახმარებლად”, – აცხადებს “დონბასის ველური დივიზიის” მეთაური განცხადებაში, რომელიც ეროვნებით აფხაზია, ახრა ავიძბა.

“სარმატის ბატალიონის პერსონალი, როგორც რუსეთის მოხალისეთა კორპუსის “დონბასის ველური დივიზიის” ნაწილი,  გადავიდა საბრძოლო კონტაქტის ხაზზე კურსკის რეგიონში მტრის სამხედრო ფორმირებების განადგურების მიზნით. გამარჯვება ჩვენი იქნება”, – წერს ოსური ბატალიონის ტელეგრამ-არხი.

უკრაინის შეიარაღებულმა ძალებმა გასული ღამის განმავლობაში საზღვრისპირა და საზღვრის მახლობლად მდებარე ოლქებზე იერიშები მიიტანა. ერთ-ერთი სამიზნე, ლიპეცკის ოლქში, მდებარე “სირსკოეს” სამხედრო აეროდრომი იყო, რომელსაც იერიშის შედეგად ცეცხლი გაუჩნდა.

უკრაინის უშიშროების ძალების, СБУ-ს ინფორმაციითაეროდრომის დაბომბვის შედეგად განადგურდა რუსი ოკუპანტების 700-მდე პლანირებადი ავიაბომბი, რომლითაც რუსები უკრაინულ ქალაქებს ბომბავენ აღმოსავლეთისა და სამხრეთის ფრონტებზე.

ოლქის გუბერანტორი, იგორ არტამონოვი, ამბობს, რომ თავდასხმის შედეგად 9 ადამიანი დაშავდა და ისინი კლინიკაში გადაიყვანეს.

ჯერ-ჯერობით არ ვრცელდება ცნობები, აეროდრომზე იერიშის შედეგად, დაზიანდა თუ არა რუსული ავიაცია.

ამასთანავე რუსეთის თავდაცვის სამინისტროში ირწმუნებიან, რომ სულ ღამის განმავლობაში რუსეთის ტერიტორიაზე 75 დრონი ჩამოაგდეს. მათი მტკიცებით, აქედან 26 უვნებელყვეს ბელგოროდის ოლქში, 19 – ლიპეცკის ოლქში, 7 – კურსკის ოლქში, 5 – ბრიანსკის ოლქში, 4 – ვორონეჟის ოლქში, 1 კი – ორიოლის ოლქში. ამას გარდა, ირწმუნებიან, რომ 5 დრონი ჩამოაგდეს ოკუპირებულ ყირიმში, 8 კი – შავი ზღვის აკვატორიაში, სადაც, მათივე მტკიცებით, გაანადგურეს 7 უპილოტო კატერიც.