Category: მსოფლიო

მადრიდი დამსვენებლებს მოუწოდებს, ივლისიდან ესპანეთს ესტუმრონ. ქვეყანაში საზღვრები მარტიდან დაკეტილია. მთავრობა აცხადებს, რომ ეს შეზღუდვა პირველ ივლისს მოიხსნება.

„ივლისში ჩვენ ესპანეთს ეტაპობრივად გავიხსნით საერთაშორისო ტურისტებისთვის, კარანტინს გავაუქმებთ და უსაფრთხოების უმაღლეს სტანდარტს უზრუნველვყოფთ. მოველით რომ გიმასპინძლებთ“, – განაცხადა საგარეო საქმეთა მინისტრმა არანჩა გონსალეს ლაიამ.

ესპანეთს ყოველწლიურად 80 მილიონი ადამიანი სტუმრობს. ტურიზმის სექტორი მთლიანი შიდა პროდუქტის 12 პროცენტია. ტურისტული სეზონი ესპანეთის შანსია შეამციროს მოსალოდნელი ეკონომიკური რეცესიის ეფექტები. თუმცა, ბიზნესები წელს ტურისტული სექტორის გაუმჯობესებას სკეპტიკურად უყურებენ.

მადრიდსა და ბარსელონაში რესტორნები და ბარები გაიხსნა, მაგრამ შეზღუდული რაოდენობის ხალხით. ამავდროულად, მცირე ბიზნესების ნაწილმა გადაწყვიტა, რომ გახსნის ფასი უფრო მაღალია, ვიდრე შეზღუდული მომხმარებლით მიღებული შემოსავალი, ამიტომ ისინი დახურულნი რჩებიან.

შეერთებულ შტატებში კოვიდ-19-ის გამო გარდაცვლილთა რიცხვი იზრდება და სავარაუდოდ ივნისში, 100 000 გახდება. ამის მიუხედავად, კარანტინის ზომების შემსუბუქებისთანავე, პირველივე უქმეებზე, როცა ხსოვნის დღის გამო, უქმეებს ორშაბათის დასვენებაც დაემატა, ამერიკელებმა მასობრივად სანაპიროებს და პარკებს მიაშურეს.

გასულ კვირაში ამერიკის 11 შტატში ინფიცირების ახალი შემთხვევების რეკორდული რაოდენობა დააფიქსირდა. მათ შორის არიან: მერილენდი, ვირჯინია, ნევადა, ალაბამა, არკანზასი, მინესოტა, მეინი და სხვები. ჯერჯერობით უცნობია, რამ გამოიწვია შემთხვევების ზრდა. შესაძლო მიზეზებს შორის ასახელებენ ვირუსის სარს-კოვ-2 მეორე ტალღას, შტატებში კარანტინის ზომების შემსუბუქებას და ასევე – ტესტირების გაფართოებას.

თუმცა, ამერიკელების ნაწილი გასულ უქმეებზე აშკარად შეეცადა თავი დაეღწია ყოველდღიური პრობლემების და ცუდი ახალი ამბებისგან. საკარანტინე ზომების შემსუბუქება მეტ-ნაკლებად 50-ვე შტატში ხდება და შესაბამისად, ბევრგან ოკეანის სანაპიროებიც გაიხსნა. განსაკუთრებული ხალხმრავლობა იყო მერილენდის ქალაქ ოუშენ-სითიში, რომელიც პოპულარულ საზაფხულო კურორტად ითვლება.

სამხრეთის შტატებში ბიზნესების უმეტესობა გაიხსნა. თუმცა, ჩრდილოეთის ზოგ შტატში რესტორნები და სილამაზის სალონები ჯერ ისევ დაკეტილია. მათ შორისაა ნიუ-იორკი და ილინოისი, სადაც ბიზნესების გახსნა შედარებით ნელი ტემპებით ხდება. ორივე შტატში რესტორნებს უფლება აქვთ კლიენტებს გამზადებული ულუფების შინ წაღების შეკვეთებით მოემსახურონ.

კვირას, “ნიუ-იორკ თაიმსის” პირველ გვერდი მთლიანად დაეთმო ახალი კორონავირუსის გამო გარდაცვლილ ადამიანებს. გაზეთმა ათასამდე ადამიანის სახელი, გვარი და მოკლე ამბავი გამოაქვეყნა, რათა მკითხველებისთვის უბრალო ციფრების მიღმა მდგარი, პანდემიის გამო დაკარგული სიცოცხლეები ეჩვენებინა.

“ჩვენ შევეცადეთ მსხვერპლისთვის ადამიანური სახე მიგვეცა” – უთხრა საინფორმაციო სააგენტო “როიტერს” მარკ ლეისიმ, გაზეთის ერთ-ერთმა წამყვანმა რედაქტორმა. “ვცდილობდით ეს განუწყვეტლად მზარდი რიცხვი როგორღაც გაგვეადამიანურებინა… ისინი ხომ ჩვეულებრივი ადამიანები არიან და ეს რაოდენობა კი შემზარავია” – თქვა “ნიუ-იორკ თაიმსის” რედაქტორმა.

ერთ-ერთი გარდაცვლილი 25 წლის ჰეილი ჰერეირაა, თერაპევტი. რომი კოენი 91 წლის იყო. მან გესტაპოს დევნისგან მეორე მსოფლიო ომის დროს ებრაელთა 56 ოჯახი გადაარჩინა. ლილა ფენუიკი 87 წლის იურისტი გახლდათ, პირველი შავკანიანი ქალი, რომელიც ჰარვარდის იურიდიულ ფაკულტეტზე სწავლობდა…

წყარო: ამერიკის ხმა

საფრანგეთის ქალაქ ტიუა–ლე–მარშენის  კომუნის საბჭომ პრაქტიკულად ერთსულოვნად აირჩია ქალაქის ხალ მერად ტრანსგენდერი ქალი მარი კო.

55 წლის კანდიდატი გარემოს დაცვის და ადგილობრივი ეკონომიკის განვითარების პროგრამით გამოდიოდა. ის საფრანგეთში პირველი ტრანსგენდერი მერია.

მარი კო განათლებით აგროტექნიკოსია.

ტიუა–ლე–მარშენი ქვეყნის ჩრდილო აღმოსავლეთით, ბელგიის საზღვართან მდებარე პატარა ქალაქია 600 მოსახლით.

მუნიციპალური არჩევნები იქ მარტში ჩატარდა და გამარჯვება მოუტანა პოლიტიკურ ძალას “ერთად გადავწყვიტოთ“, რომლის სიით იყრიდა კენჭს მარი კო. ქალაქის მერი მოქალაქეების მიერ პირდაპირ არ აირჩევა. მას კომუნის საბჭო იწვევს. საბჭოს 15 წევრიდან 14–მა შაბათს ხმა კო–ს მისცა.

არჩევის შემდეგ მან სააგენტო ფრანს პრესს განუცხადა, რომ ის “აქტივისტი არ არის“ და აპირებს არა გენდერულ პრობლემებზე, არამედ მუნიციპალიტეტის საქმეებზე კონცენტრირდეს.

“ხალხს იმიტომ არ ავურჩევივარ, რომ ტრანსგენდერი ვარ. მათ ჩემი პროგრამა აირჩიეს“– თქვა მან.

“ტრანსგენდერების არსებობა საზოგადოებაში და მათ მიმართ არსებული ფობიების დაძლევა, მათ შორის, მათ მიერ პოლიტიკური თუ საზოგადოებრივი საქმეების შესრულებაზეა დამოკიდებული. ვულოცავ მარი კო–ს!“– დაწერა ტვიტერზე საფრანგეთის გენდერული თანასწორბის საკითხთა მინისტრმა მარლენ შაპამ.

ტიუა–ლე–მარშენის არჩევნებმა აჩვენა, რომ ფრანგები უფრო პროგრესულები ხდებიან, ხმას აძლევენ ინდივიდის ღირსებებიდან გამომდინარე და არა მათი გენდერული კუთვნილების  მიხედვით – განაცხადა ტრანსგენდერთა ნაციონალური ასოციაციის თანადამფუძნებელმა სტეფანი ნიკომ.

აშშ–ს პირველმა ლედიმ, მელანია ტრამპმა თეთრ სახლში გილოცავთ 2020 წლის სკოლის ბოლო კლასის  კურსდამთავრებულებს უმასპინძლა. ცერემონიალს დონალდ ტრამპიც ესწრებოდა, თუმცა სიტყვით მოსწავლეებს მელანია ტრამპმა მიმართა.

“ყველამ უნდა იამაყოთ საკუთარი თავით, რომ თქვენი ცხოვრების ეს თავი დახურეთ.

შესაძლოა დღევანდელი დღე არ გამოიყურება ისე, როგორც თქვენ წარმოგედგინათ, თუმცა თქვენ გყავთ მშობლები, რომლებიც ამაყობენ თქვენით, გაქვთ თქვენი ოჯახის, მეგობრების, საზოგადოების და ჩვენი ქვეყნის მხარდაჭერა. ჩვენ უპრეცედენტო დროში ვცხოვრობთ და მიხარია რომ ვხედავ, ყოველი თქვენგანი როგორ ადაპტირდა ამ ახალ, დროებით ცხოვრების წესთან. ბევრი ღონისძიება და ზეიმი გამოტოვეთ, მაგრამ ბევრმა თქვენგანმა მოძებნა ახალი გზები კავშირისთვის და აქტიურობისთვის, კვლავ ფოკუსირეული დარჩა სწავლის დამთავრებაზე.

თქვენ დაუმტკიცეთ მთელ სამყაროს, რომ შეგიძლიათ მნიშვნელოვან საქმეს მთელი გონებით შეეჭიდოთ,  ძალა მოიკრიბოთ და წარმატებას მიაღწიოთ, ყველას გვაჩვენებთ, რომ თქვენ, ჩვენი მომავალი თაობა ფლობთ ძალას და ამერიკულ სულს.

ნუ დაიხევთ უკან, მისდიეთ თქვენს ოცნებებს.  “–უთხრა მელანია ტრამპმა მოსწავლეებს.

ბრიტანეთისგან განსხვავებით, სადაც ქვეყანაში შემსვლელთათვის ორკვირიანი სავალდებულო კარანტინი ამოქმედდება, პორტუგალია ტურისტებისთვის იხსნება. ქვეყნის მთავრობა ტურიზმის მნიშვნელობაზე საუბრობს. საგარეო საქმეთა მინისტრმა, აუგუსტო სანტოს სილვამ განაცხადა, რომ ქვეყანა ტურისტებისთვის ღიაა და მათ აეროპორტში მხოლოდ სანიტარული კონტრლი  და უსაფრთხოების წესები ელით, რომელიც უკვე მსოფლიოს ბევრ ქვეყანაში ნორმად იქცა: აეროპორტში ნიღბის ტარება და დისტანციის დაცვა სავალდებულოა. სხვამხივ, სილვას განცხადებით სახელმწიფო უწყებები მზად არიან ქვეყანაში  კორონავირუსის ახალი შემთხვევების შეტანის საფრთხეს გაუმკლავდნენ.

საფრანგეთის საგარეო საქმეთა სამინისტრო ელის, რომ ევროკავშირის შიდა საზღვრები 15 ივნისიდან გაიხსნება, მანამდე კი მეხუთე რესპუბლიკაში თანდათანობით ამსუბუქებენ შემზღუდავ ზომებს. კერძოდ, ნებადართულია პლაჟებზე გასვლა, თუმცა მხოლოდ სეირნობისა და სერბილისთვის. პლაჟზე წოლა და გარუჯვა ჯერჯერობით აკრძალულია.

შემზღუდავი ზომები შემსუბუქდა ესპანეთის რეგიონთა უმრავლესობაში. ორშაბათიდან კი კარანტინიდან გამოსვლის პირველი ეტაპი დაიწყება მადრიდსა და ბარსელონაი, სადაც რესტორნები, ბარები და კაფეები სტუმრების მომსახურებას ტერასებზე შეძლებენ. გაიხსნება მუზეუმები. დაშვებული იქნება სპორტი, სეირნობა და სუფთა ჰაერზე მცირე ჯგუფებად შეკრება. ამასთან ერთად, ნიღბების ტარება სავალდებულოა.

მკაცი საკარანტინო ზომები ესპანეთში მარტის შუა რიცხვებიდან შემოიღეს. საგანგებო მზადყოფნის რეჟიმი ამ კვირას 7 ივნისამდე გაგრძელდა. ამის შემდეგ ხელისუფლებამ პირობა დადო, რომ ქვეყნის ზოგიერთ რეგიონებს გახსნის ვიზიტორებისთვის ევროკავშირის ქვეყნებიდან, თუმცა ტურიზმის სრულფასოვან ამუშავებაზე ჯერჯერობით საუბარი არ არის.