Category: მსოფლიო

პოლიციის სამ ოფიცერს, რომლებიც ჯორჯ ფლოიდის დაკავებაში მონაწილეობდნენ, მკვლელობაში ხელშეწყობისთვის ბრალი წაუყენეს. დერეკ შოვინს კი, პოლიციელს, რომელიც დაკავებისას ფლოიდს კისერზე 8 წუთზე მეტხანს აჭერდა მუხლს, დანაშაული დაუმძიმდა.

შოვინს ახლა მეორე ხარისხის მკვლელობის ბრალდება წაუყენეს. ახალი ბრალდება 40 წლამდე პატიმრობას ითვალისწინებს, 15 წლით მეტს, ვიდრე თავდაპირველი, მესამე ხარისხის მკვლელობა.

მინესოტის შტატში მცხოვრები 46 წლის შავკანიანი მოქალაქე ჯორჯ ფლოიდი 25 მაისს მას შემდეგ გარდაიცვალა, რაც ის ოთხმა პოლიციელმა დააკავა. დაკავების მომენტი შემთხვევით გამვლელმა ტელეფონით გადაიღო.

ვიდეოს სოციალურ ქსელებში გავრცელებას ამერიკის შეერთებულ შტატებში და მის ფარგლებს გარეთ, რასიზმის წინააღმდეგ მასობრივი საპროტესტო აქციების ტალღა მოჰყვა.

დერეკ შოვინი მხოლოდ მას შემდეგ დააკავეს, რაც ამერიკაში მასობრივი საპროტესტო აქციები დაიწყო. დღეს ამერიკის თითქმის ყველა დიდ ქალაქში კვირაზე მეტია დემონსტრაციები იმართება. აქციის მონაწილეთა ერთ-ერთი მთავარი მოთხოვნა ყველა პოლიციელის გასამართლება იყო, ვინც ფლოიდის დაკავებაში მონაწილეობდა.

წყარო: ამერიკის ხმა

შეერთებულ შტატებში მიმდინარე საპროტესტო დემონსტრაციების დროს, ცეცხლსასროლი იარაღით წუხელ ხუთი პოლიციელი დაიჭრა. საპროტესტო დემონსტრაციები მინეაპოლისში მას შემდეგ დაიწყო, რაც თეთრკანიანმა პოლიციელმა შავკანიანი მამაკაცის დაკავების დროს ძალა გამოიყენა, რის შემდეგაც ჯორჯ ფლოიდი გარდაიცვალა.

პოლიციისა და მედიის ინფორმაციით, პოლიციელებზე იარაღით თავდასხმა მას შემდეგ მოხდა, რაც პრეზიდენტმა პირობა დადო, რომ შტატებში ამერიკის ჯარს გაგზავნიდა, იმ შემთხვევაში თუ ქვეყანაში არეულობა არ შეწყება.

ორშაბათ საღამოს პრეზიდენტმა ტრამპმა თეთრი სახლის ვარდების ბაღიდან ქვეყანას მიმართა, რის შემდეგაც ის ქუჩაში გამოვიდა და თეთრ სახლთან ახლოს მდებარე წმინდა ჯონის ეკლესიასთან მივიდა. წინა ღამეს, მომიტინგეებმა ამ ისტორიული ეკლესიისთვის ცეცხლის გაჩენა სცადეს.

პრეზიდენტი ეკლესიის წინ ბიბლიით ხელში რამდენიმე წუთი იდგა და შემდეგ თეთრ სახლში დაბრუნდა. ამ ნაბიჯის შემდეგ ვითარება დაიძაბა დემონსტრაციაზე, რადგან პრეზიდენტ ტრამპის ქუჩაში გამოსვლისთვის ტერიტორიის გასაწმენდად, სამართალდამცავებმა თეთრი სახლის წინ მიმდინარე მშვიდობიანი დემონსტრაცია ცრემლსადენი გაზისა და რეზინის ტყვიების გამოყენებით დაშალეს.

სამშაბათს, ამერიკის საიდუმლო სამსახურმა, რომელსაც პრეზიდენტის დაცვა ევალება, თეთრი სახლის მიმდებარე ტერიტორია გადაკეტა.

სიტყვით გამოსვლისას პრეზიდენტმა თქვა, რომ ყველაფერს გააკეთებს იმისთვის, რომ ჯორჯ ფლოიდის სიკვდილმა უკვალოდ არ ჩაიაროს. მან ასევე დასძინა, რომ “ჩემი პირველი და უმაღლესი მოვალეობა, როგორც პრეზიდენტისა ისაა, რომ დავიცვა ჩვენი არაჩვეულებრივი ქვეყანა და ამერიკელი ხალხი. მე ფიცი დავდე, რომ დავიცავდი ჩვენი ერის კანონებს და ეს სწორედ ისაა, რასაც მე ვაკეთებ.”

პრეზიდენტის თქმით, ის მობილიზებას უკეთებს „ყველა ფედერალურ რესურსს – სამოქალაქოს და სამხედროს, ამბოხის, ძარცვის, ნგრევის და ხანძრების გაჩენის შესაჩერებლად და კანონმორჩილი ამერიკელების უფლებების დასაცავად, მათ შორის, მეორე დამატების დასაცავად. შესაბამისად, შემდეგი ზომები დაუყოვნებლივ შევა ძალაში.“

„თუ ქალაქი ან შტატი უარს იტყვის მიიღოს ზომები, რომლებიც საჭიროა საკუთარი მოქალაქეების სიცოცხლისა და საკუთრების დასაცავად, მაშინ მე ამერიკის შეერთებული შტატების ჯარს გავგზავნი და ამ პრობლემას გადავჭრი”, – თქვა პრეზიდენტმა.

ამით პრეზიდენტმა ტრამპმა მიუთითა, რომ ის აამოქმედებს 1807 წელს მიღებულ კანონს, რომელიც ამერიკის პრეზიდენტს ქვეყნის შიგნით ამერიკის შეერთებული შტატების ჯარის გაგზავნის უფლებას აძლევს.

ათობით შტატში ღამის საათებში გადაადგილებაზე შეზღუდვებია დაწესებული. 23 შტატში და ქვეყნის დედაქალაქში კი ეროვნული გვარდიაა გაგზავნილი. შეერთებულ შტატებში ამ მასშტაბის დემონსტრაციები 1968 წელს მარტინ ლუთერ კინგის მოკვლის შემდეგ არ ყოფილა.

ფეისბუქის თანამშრომლებმა პროტესტის ორგანიზება მოახდინეს კომპანიის ხელმძღვანელის, მარკ ცუკერბერგის გადაწყვეტილების წინააღმდეგ, არ წაშალოს სოციალური ქსელიდან აშშ–ს პრეზიდენტის, დონალდ ტრამპის ჩანაწერი. მათი აზრით, ამ ჩანაწერით პრეზიდენტი პოლიციას აქეზებს დემონსტრანტებს ცეცხლი გაუხსნას.

ტვიტერმა პრეზიდენტის ტრამპის ტვიტი არ წაშალა, თუმცა მას დაურთო გაფრთხილება, რომ ტვიტი შეიძლება შეიცავდეს სიტყვებს, რომლებიც ორმაგად შეიძლება იქნას გაგებული.

ტრამპმა დაწერა: “როცა იწყება ძარცვა, იწყება სროლა.“ ბევრმა ამ ფრაზაში დაინახა პოლიციისადმი მოწოდება, ნებისმიერი ძალა გამოიყენოს, თუნდაც ლეტალური შედეგით.

ფეისბუქის ხელმძღვანელმა, მარკ ცუკერბერგმა განაცხადა, რომ პრეზიდენტის სტატუსი არ წაშალეს, რადგან მომხმარებლებს უფლება აქვთ აზრი გამოხატონ, თუ ეს უშუალო და მყისიერ საფრთხეს, ზიანს ან მუქარას არ შეიცავს, რომელიც ნათლად შეიძლება გამოხატული იყოს პოლიტიკურ ტერმინებში. ცუკერბერგის თქმით, პოსტი არ წაშალეს იმიტომ, რომ ნაციონალური გვარდიის ხსენება – ეს არის სახელმწიფოს ქმედებების შესახებ გაფრთხილება და ადამიანებმა უნდა იცოდნენ, თუ ხელისუფლება ძალის გამოყენებას გეგმავს.

საპასუხოდ ფეისბუქის ათობით თანამშრომელმა განაცხადა, რომ ვირტუალურ გაფიცვაში მონაწილეობს. ბოლო თვეებია ფეისბუქის თანამშრომელთა უმრავლესობა სახლიდან მუშაობს.

პრეზიდენტმა დონალდ ტრამპმა ორშაბათს შტატებს მოუწოდა ძალადობრივი პროტესტები აღკვეთონ, რომლებმაც ბოლო კვირის განმავლობაში თითქმის ყველა დიდი ამერიკული ქალაქი მოიცვა. პრეზიდენტის თქმით, უნდა მოხდეს ოფიციალური პირების მიერ „დომინირება,“ რაც იმას ნიშნავს, რომ პოლიციამ საზოგადოებრივი წესრიგის აღსადგენად, ადამიანების დაკავება უნდა დაიწყოს.

„თქვენ უნდა [მოახდინოთ] დომინირება,“ უთხრა პრეზიდენტმა ტრამპმა გუბერნატორებს, რომლებსაც ის ტელეფონით ესაუბრა. ზარის დეტალების შესახებ „ნიუ-იორკ ტაიმსი“ იუწყება. „თუ დომინირებას [არ მოახდენთ] ისინი თქვენს დროს ფლანგავენ – ზედ გადაგივლიან და სულელებივით გამოჩნდებით.“

CBS News-მა გუბერნატორებთან ზარის აუდიო ჩანაწერიც მოიპოვა, სადაც ტრამპი ძალადობას „რადიკალურ მემარცხენეებს“ უკავშირებს.

ამერიკის მასშტაბით ათობით ქალაქში საპროტესტო დემონსტრაციები მიმდინარეობს. ეროვნული გვარდიის ჯარისკაცები 23 შტატში და ქალაქ ვაშინგტონშია გაგზავნილი.

უქმეებზე ამერიკის ბევრ ქალაქში საგანგებო ვითარება გამოცხადდა. შეერთებული შტატების მოქალაქეებს ბევრგან საღამოს და ღამის საათებში შინიდან გასვლა ეკრძალებათ. დღეისთვის საგანგებო ვითარება 20 შტატის 40-მდე ქალაქშია გამოცხადებული, სადაც რასიზმის და პოლიციის ძალადობის წინააღმდეგ გამართულმა საპროტესტო აქციებმა, თავადაც ძალადობრივი ხასიათი მიიღო.