Category: მსოფლიო

ამერიკის შეერთებული შტატების ეკონომიკის დარგებში გახსნა ეტაპობრივად პირველი მაისის შემდეგ დაიწყო, რის შემდეგაც სხვადასხვა ბიზნესები ახალი კორონავირუსის კიდევ ერთი დარტყმის ქვეშ აღმოჩნდა.

თანამშრომელთა დიდი ნაწილი დაავადდა. განსაკუთრებით ეს პრობლემა მომსახურების სფეროში დასაქმებული ადამიანების წინაშე დადგა. საუბარია რესტორნებზე და სასტუმროებზე. შეიძლება ითქვას, ზოგიერთ შტატში სწორედ ეს ადგილები იქცა ვირუსის გავრცელების ერთ-ერთ მთავარ წყაროდ.

კოვიდ19-ით ინფიცირებულთა რაოდენობის ზრდა ბოლო კვირების განმავლობაში დაფიქსირდა სამხრეთ და დასავლეთ შტატებში. მათ შორის ფლორიდაში, არიზონაში, ტეხასში, ჯორჯიაში, ოკლაჰომაში, სამხრეთ კაროლინასა და იუტაში.

მიუხედავად იმისა, რომ ამერიკის შეერთებული შტატების თითქმის მთელ ტერიტორიაზე პირბადით სიარული რეკომენდებული და გარკვეულ შემთხვევაში აუცილებელიცაა. მხოლოდ ერთ კვირაში ამერიკის მაჩვენებელი ინფიცირებულთა რაოდენობის მხრივ 25% -ით გაიზარდა. ექსპერტები ფიქრობენ, რომ ეს შემაშფოთებელი სტატისტიკაა.

სწორედ ამ მონაცემებიდან გამომდინარე, ამერიკული სააფთიაქო ქსელი “სი-ვი-ესი” ამერიკაში მოქმედ ბიზნესებს დახმარებას სთავაზობს. კერძოდ, კომპანიის ჯანდაცვის დეპარტამენტმა გადაწყვიტა სხვადასხვა ორგანიზაციას კოვიდ19-ის ტესტირების დიაგნოსტიკური პროგრამა მიყიდოს, რომელიც კომპანიებს დაეხმარება სწრაფად და ადგილზე აწარმოონ დაკვირვება საკუთარ თანამშრომლებზე და შეაჩერონ ვირუსის გავრცელება და შეინარჩუნონ ბიზნესი თუ ორგანიზაცია უსაფრთხოდ.

ამასთან, სააფთიაქო ქსელი “სი-ვი-ესი”, ზრდის ტესტირების რაოდენობას და გამოთქვამს მზადყოფნას, ორგანიზაციებსა და კომპანიებს დაეხმაროს სხვა დამცავი მოწყობილობების განთავსებაშიც. საუბარია ტემპერატურის გამზომავ მოწყობილობებზე და სიმპტომების შემმოწმებელ პროგრამებზე.

ამერიკაში კოვიდ19 ამ დროისთვის 2 347 102 მილიონ ადამიანს დაუდასტურდა. გარდაცვლილთა რაოდენობა კი 121 225-ს აჭარბებს. მსოფლიოში ინფიცირებულთა საერთო რაოდენობა ჯონს ჰოპკინსის უნივერსიტეტის მონაცემებით, დაახლოებით 10 მილიონია.

ყოფილი პრეზიდენტი ბარაკ ობამა, დემოკრატების სავარაუდო ნომინანტის – ჯო ბაიდენის – საარჩევნო კამპანიისთვის ფულის შესაგროვებელ პირველ ღონისძიებას, სარეკორდო 7.6 მილიონი დოლარის შეგროვებაში დაეხმარა, რომელიც 175 ათასზე მეტმა ინდივიდუალურმა შემომწირველმა გაიღო.

სამშაბათს გამართული, მცირე ოდენობის შეწირულობების შეგროვება, ობამას შესაძლებლობების ახალი გამოცდა იყო, თუ რამდენად შეძლებდა ის თავისი ყოფილი ვიცე-პრეზიდენტისთვის, რომელიც თეთრ სახლში მოხვედრას ცდილობს, საკუთარი პოპულარულობის გადაცემას. ობამას გუნდი აცხადებს, რომ ეს იყო სავარაუდოდ, დატვირთული განრიგის დასაწყისი, რომელიც შემოდგომამდე გაგრძელდება და მიზნად არა მხოლოდ საპრეზიდენტო არჩევნებში ბაიდენის დახმარებას, არამედ წარმომადგენელთა პალატაში და სენატში მოსახვედრად, დემოკრატების კამპანიის მხარდაჭერასაც ისახავს.

თეთრ სახლში ყოფნისას, ობამას ხანდახან უჭირდა სხვა დემოკრატი კანდიდატების წამოწევა. მაგალითად, 2010 წელს – წარმომადგენელთა პალატაზე, 2014 წელს კი სენატზე კონტროლი დაკარგა. მაგრამ, პრეზიდენტ დონალდ ტრამპის ეპოქაში, დემოკრატებს შავკანიან და ახალგაზრდა ამომრჩევლებში ობამას ხიბლის სჯერათ და მიაჩნიათ, რომ მას შეუძლია ბაიდენისთვის ენერგიის იმპულსის მიცემას დაეხმაროს.

წყარო: ამერიკის ხმა

შავკანიანი ამერიკელის, ჯორჯ ფლოიდის სიკვდილმა, რომელიც პოლიციის არამართლზომიერმა ქმედებებმა გამოიწვია და აშშ–ში რასიზმის წინააღმდეგ მასობრივმა საპროტესტო აქციებმა სერიოზული საზოგადოებრივი ვნებათაღელვა გამოიწვია. ქვეყანაში კვლავ ალაპარაკდნენ რასობრივ დისკრიმინაციაზე და შავკანიანთა უფლებების დარღვევაზე. ამ პრობლემას ანჯელინა ჯოლიც შეეხო, რომელმაც ყოფილ ქმართან, ბრედ პიტთან ერთად 2005 წელს ეთიოპიიდან შავკანიანი გოგონა, ზაქარა იშვილა.

მსახიობი სერიოზულად შიშობს, რომ მისი 15 წლის ქალიშვილი სისტემის “სამიზნე“ გახდება, როცა გაიზრდება. ქვეყანაში გაზრდილი რასობრივი დაძაბულობის გამო ვარსკვლავი შიშობს, რომ გარკვეულ სირთულეებს ზაქარაც შეეჯახება.

“მსოფლიოში 70 მილიონზე მეტი ადამიანი იძულებული გახდა ომისა და დევნის გამო საკუთარი სახლი დაეტოვებინა. ამერიკაშიც არსებობს რასიზმი და დისკრიმინაცია.

სისტემა, რომელიც მე მიცავს, მაგრამ ვერ იცავს ჩემს ქალიშვილს, ან ნებისმიერ სხვა ქალს, მამაკაცს თუ ბავშვს ჩვენს ქვეყანაში მისი კანის ფერის გამო, მიუღებელია.

ჩვენ თანაგრძნობიდან და კეთილი განზრახვებიდან კანონებზე და პოლიტიკაზე უნდა გადავიდეთ, რომლებიც მიმართული იქნება სისტემატური რასიზმისა და დაუსჯელობის წინააღმდეგ. პოლიციაში სამსახურეობრივი უფლებამოსილებების ბოროტად გამოყენების შეწყვეტა მხოლოდ დასაწყისია. ეს უფრო ფართოდ უნდა გავრცელდეს და ჩვენი ცხოვრების ყველა ასპექტი მოიცვას: განათლების სისტემიდან დაწყებული ჩვენი პოლიტიკით დამთავრებული “ – განაცხადა მსახიობმა Harper’s Bazaar–თან ინტერვიუში და დასძინა, რომ ადამიანები დაიღალნენ ნახევარზომებისგან, ხელისუფლების თავის მართლებისგან. ჯოლი იმედს გამოთქვამს, რომ მალე ქვეყანაში ისტორიული ცვლილებები მოხდება:

“დადგა დრო შეიცვალოს ჩვენი კანონები და ჩვენი ინსტიტუტები, ყური ვუგდოთ მათ, ვინც ყველაზე ძალიან დაზარალდა და ხმის უფლება წაერთვა.“–თქვა მსახიობმა.

დღეს, ჩინეთის მთავრობის მიერ გავრცელებული ინფორმაციის თანახმად, პეკინის ერთ-ერთ ბაზარში, ზღვის პროდუქტების სექციაში ზედაპირებზე ახალი კორონავირუსი აღმოაჩინეს. ვარაუდობენ, რომ ვირუსის ამ მასშტაბით დაფიქსირება ტერიტორიაზე არსებული დაბალი ტემპერატურისა და მაღალი ტენიანობის გამო მოხდა.

წინასწარი ანგარიშის გამოქვეყნების პარალელურად, ქვეყანაში ვირუსით ინფიცირების მაჩვენებლები ზოგიერთ ტერიტორიაზე იზრდება. შემთხვევათა დიდი რაოდენობა გასულ კვირას სწორედ საკვები პროდუქტების სინფადის ცენტრს უკავშირდება, სადაც საწყობები და სავაჭრო დარბაზები უზარმაზარ ტერიტორიაზეა განლაგებული. მისი ფართობი დაახლოებით იმდენივეა, რამდენიც ფეხბურთის 160 მოედანი. ამ ერთ-ერთი ახალი აფეთქების შედეგად, ასზე მეტი ადამიანია ინფიცირებული და ქვეყანაში ვირუსის თავიდან გავრცელების შიში გაჩნდა.

სინფადის ბაზრის დაინფიცრებულ თანამშრომელთა უმეტესობა ზღვის პროდუქტების განყოფილებაში მუშაობს, შემდეგია ხორცის – ძროხისა და ცხვრის პროდუქტები. ქვეყნის დაავადებათა კონტროლის წამყვანი ინფექციონისტი ამბობს, რომ სიმპტომები ყველაზე ადრე სწორედ ზღვის პროდუქტების გამყიდველებში დაფიქსირდა.

ეპიდემიოლოგი ამბობს, რომ ვირუსის გავცელების მიზეზების დამატებითი მოკვლევაა საჭირო, თუმცა წინასწარი შეფასებით შეიძლება ითქვას, რომ დაბალი ტემპერატურა და მაღალი ტენიანობა მის გამძლეობას ზრდის და შესაძლოა, ვირუსი სწორედ ამიტომ აფეთქდა სწორედ ზღვის პროდუქტების განყოფილებაში. ამასთან, მმართველი კომუნისტური პარტიის ერთ-ერთი წამყვანი სააგენტოს მენეჯმენტი აცხადებს, რომ საბითუმო ბაზრებში ჰიგიენის დაბალი დონე და მომარაგების ნაწილში არსებული პრობლემები დაუყოვნებლივ უნდა აღმოიფხვრას.

ჩინეთმა ამ კვირაში ევროპელი მომწოდებლებისგან ორაგულის მომარაგებაც შეწყვიტა, მოსახლეობას კი უმი ორაგულის ჭამისგან თავის შეკავებისკენ მოუწოდა, რადგან ვირუსი იმპორტირებული ორაგულის დასაჭრელ დაფებზეც აღმოჩნდა. თუმცა, ვირუსის აფეთქების ზუსტი წყარო ჯერჯერობით უცნობია.

წყარო: ამერიკის ხმა