Category: მსოფლიო

პანდემიის დაწყებიდან დღემდე ევროპაში ოჯახების დანაზოგი მნიშვნელოვნად გაიზარდა. ევროპის ცენტრობანკში აცხადებენ, რომ ამას ორი მიზეზი აქვს: კარანტინის დროს ევროპელები ფულს არ ხარჯავდნენ, გარდა ამისა, ბევრმა მათგანმა მიიღო გადაწყვეტილება ფული “შავი დღისთვის“ დააგროვოს.

თებერვლიდან მაისის ჩათვლით პერიოდში მთლიანობაში საბანკო დეპოზიტებზე ევროპელებმა 214 მილიარდი ევრო გადაინახეს, ამგვარად ევროპელთა დეპოზიტებზე უკვე 7.3 ტრილიონი ევრო დაგროვდა, რაც ისტორიაში ყველაზე მაღალი მაჩვენებელია. მარტსა და აპრილში, როცა მკაცრი შეზღუდვები მოქმედებდა, ევროზონის ქვეყნებში დანაზოგების ზრდამ 136 % შეადგინა.

ექსპერტები შიშობენ, რომ ანგარიშებზე დაგროვილი თანხები ეკონომიკის აღდგენაში არ წავა. ევროპის ცენტრობანკის ხელმძღვანელი, კრისტინ ლაგარდი ამბობს, რომ ეკონომიკური რეცესიიდან გამოსვლა გართულდება, რადგან ვაჭრობა და წარმოება კრიზისამდელ ნიშნულს ძნელად დაუბრუნდება და დიდი დრო იქნება საჭირო, სანამ ევროპელების “ფენომენალური დანაზოგი“ კვლავ გამოჩნდება მომხმარების და ინვესტიციების სფეროში. ლაგარდი ასევე აღნიშნავს, რომ პანდემიით გამოწვეული კრიზისის გამო გაიზრდება სახელმწიფო ბიუჯეტების და კომპანიების დავალიანების დონე.

კომპანია ფეისბუქი იმ პუბლიკაციების და რეკლამის განთავსების წესებს ცვლის, რომლებიც სიძულვილს ან ძალადობისკენ მოწოდებას შეიცავენ. თუ ადრე ეს წესები ე.წ. “სოციალურად მნიშვნელოვან“ კონტენს, მაგალითად მაღალჩინოსანი პოლიტიკოსების მესიჯებს ეხებოდა, ახლა მოთხოვნა ყველასთვის ერთნაირი იქნება.

კომპანიის ხელმძღვანელი, მარკ ცუკერბერგი ამბობს:

“ ჩვენ შემოგვაქვს ახალი წესები, რომლებიც სიძულვილის შემცველი კონტენტის ფართო სპექტს კრძალავს რეკლამაში. გარდა ამისა, ჩვენ დავიწყებთ შეტყობინებების მარკირებას, რომლებიც საზოგადოებრივ ინტერესს წარმოადგენენ, თუმცა ამავე დროს ჩვენს წესებს არღვევენ“.

მანამდე ერთდროულად რამდენიმე მსხვილმა კომპანიამ ფეისბუქს ბოიკოტი გამოუცხადა და უარი თქვა სოციალურ ქსელში რეკლამის განთავსებაზე პროტესტის ნიშნად “ძალადობასთან, რასიზმთან და სიძულვილთან დაკავშირებული პუბლიკაციების გამო“, ფეისბუქის ზოგიერთმა თანამშრომელმა კი ჯერ კიდევ ივნისის დასაწყისში გაფიცვის მოაწყო მას შემდეგ, რაც ცუკერბერგმა უარი თქვა დონალდ ტრამპის პოსტი ცენზურისთვის დაექვემდებარებინა.

სულ ცოტა ხნის წინ მსოფლიოში კორონავირუსით დაინფიცირებულთა რაოცენობამ 10 მილიონს გადააჭარბა, გარდაცვლილთა რიცხვამა კი 500 000–ს. ბოლო ერთ კვირაში კორონავირუსის გავრცელების მაჩვენებელი გაიზარდა. თუმცა ამჯერად ეპიცენტრი არა ევროპა, არამედ სამხრეთ ამერიკაშია. დაინფიცირებულთა და  გარდაცვლილთა რაოდენობით პირველ ადგილზეა აშშ, 2,588,421 დაინფიცირებულით და 128,082 გარდაცვლილით. მეორე ადგილზეა ბრაზილია 1,313,667 დაინფიცირებულით და 57,070 გარდაცვლილით. მესამე ადგილზეა რუსეთი, 627,646 დაინფიცირებულით და 8,969 გარდაცვლილით.

კოვიდ19-ის პანდემიის პირობებში სამხრეთ ამერიკაში სეზონური გრიპისთვის პრევენციული ზომების მიღება დაიწყეს. ჯანდაცვის ოფიციალური პირების თქმით, მნიშვნელოვანია, რომ ვაქცინაცია მოქალაქეებმა აუცილებლად უნდა ჩაიტარონ, რადგან პანდემიის გამო ისედაც მძიმე მდგომარეობაში მყოფი ჯანდაცვის სისტემებმა შეძლონ ვითარების კონტროლი.

გამომდინარე იქიდან, რომ სეზონური გრიპის და კოვიდ19-ისთვის დამახასიათებელ სიმპტომებში არის სხვაობა მაინც შეიძლება მოხდეს მოსახლეობის ნაწილში გაურკვევლობა, ჯანდაცვის სისტემებმა კი მაღალი მიმართვიანობის პერიოდში ვითარების სრული კონტროლი ვერ შეძლონ.

ახალი თავსატეხის თავიდან ასარიდებლად, არგენტინის, ჩილესა და სხვა ქვეყნების ჯანდაცვის სფეროს წარმომადგენლები ამბობენ, რომ ვაქცინაციის დაწყებას უახლოეს პერიოდში დაიწყებენ და სისტემას მაქსიმალურად გამართავენ.

სამხრეთ ამერიკის ქვეყნები ამ დროისთვის ახალი კორონავირუსის პანდემიის ეპიცენტრში არიან, გადატვირთულია საავადმყოფოები და მნიშვნელოვნად გაზრდილია როგორც დაინფიცირებულთა, ასევე გარდაცვლილთა რაოდენობა.

ჯანდაცვის სფეროს წარმომადგენლებს მიაჩნიათ, რომ თუ მოსახლეობა არ გაითვალისწინებს მითითებებს შესაძლოა ჯანდაცვის სისტემებს ძალიან დიდი პრობლემები შეექმნათ რადგან სეზონურ გრიპთან და პანდემიასთან ბრძოლა ერთმანეთის პარალელურად დიდი გამოწვევაა.

კოვიდ19 მსოფლიოში ამ დროისთვის 9 მილიონზე მეტ ადამიანს დაუდასტურდა, გარდაცვლილთა საერთო რაოდენობა კი დაახლოებით ნახევარი მილიონია.

კოვიდ19-ის დადასტურებული შემთხვევებით მსოფლიოში პირველ ადგილზე ამერიკის შეერთებული შტატები- 2,422,312, შემდეგ ბრაზილია – 1,228,114 და რუსეთის ფედერაციაა -619,936.

ამერიკის დაავადებათა კონტროლის ცენტრის და ჯანდაცვის მსოფლიო ორგანიზაციის სპეციალისტები ამბობენ, რომ პანდემიის მეორე ტალღა გაცილებით მძიმე იქნება ვიდრე პირველი ტალღა იყო. თუმცა ამ დროისთვის შეუძლებელია ზუსტად ითქვას, რომელ ქვეყანაში და როდის დაიწყება მეორე ტალღა.

საქართველო იმ ქვეყნების ჩამონათვალში მოხვდა, რომელთა მოქალაქეებს გარე საზღვრების გახსნის შემდეგ, ევროკავშირის ტერიტორიაზე შესვლა შეეძლებათ.ამის შესახებ ინფორმაციას Euronews-ი ავრცელებს.

როგორც გამოცემა  წერს, ბრიუსელში მაღალჩინოსნები დახურულ კარს მიღმა განიხილავდნენ საკითხს, თუ რომელი ქვეყნების მოქალაქეებს შეეძლებათ პირველი ივლისიდან ევროკავშირის ქვეყნებში შესვლა და რომლებს კვლავ აეკრძალებათ, მას შემდეგ, რაც ევრობლოკი გარე საზღვრებს გახსნის.

ჩამონათვალმა უკვე გამოიწვია დაპირისპირება, მას შემდეგ, რაც გაირკვა, რომ კორონავირუსით განსაკუთრებით დაზარალებული აშშ სიაში წარმოდგენილი არ არის. ასევე  სიის მიღმა რჩებიან რუსეთი და ბრაზილია.

ევროპელმა დიპლომატებმა „ევრონიუსს“ განუცხადეს, რომ ლიდერები დღევანდელ შეხვედრაზე შეთანხმებამდე ვერ მივიდნენ თუ რომელ ქვეყნებს დაუბლოკავენ კვლავაც ევროკავშირის საზღვრებს და მოლაპარაკებები პარასკევს გაგრძელდება.

„ევრონიუსმა“ ევროკავშირის დიპლომატიური წყაროებიდან იმ ქვეყნების სრული ჩამონათვალი მოიპოვა, რომლებსაც ევროპის საზღვრებს გაუხსნიან. ჩამონათვალში მოხვდა საქართველოც. თუმცა მასში არ არიან აშშ, ბრაზილია, ყატარი და რუსეთი.

ქვეყნების ჩამონათვალი, რომელთა წარმომადგენლებს ევროპაში შესვლა შეეძლებათ: ვატიკანი, მონაკო, მონტენეგრო, ანდორა, სერბეთი, ბოსნია და ჰერცოგოვინა, უკრაინა, ალბანეთი, თურქეთი, კოსოვო, ჩრდილოეთ კორეა, თურქმენეთი, ვიეტნამი, ჩინეთი, ტაილანდი, მიანმარი, მონღოლეთი, იაპონია, სამხრეთ კორეა, საქართველო, ბჰუტანი, ლიბანი, ინდონეზია, უზბეკეთი, ინდოეთი, ტაჯიკეთი, ყაზახეთი, პალაუ, ახალი ზელანდია, ავსტრალია, დომინიკა, ბაჰამის კუნძულები, სენტ-ლუსია, ურუგვაი, იამაიკა, კუბა, გაიანა, პარაგვაი, ვენესუელა, ნიკარაგუა, კოსტა – რიკა, კანადა, ანგოლა, ტუნისი, ნამიბია, უგანდა, მოზამბიკი, მავრიკი, ზამბია, რუანდა, ეთიოპია, მაროკო, ალჟირი და ეგვიპტე.

ოთხშაბათი დიდ ბრიტანეთში წლის ყველაზე ცხელი დღე იყო: ქვეყანაში ყველაზე მაღალი ტემპერატურა – 32.6 გრადუსი ცელსიუსით ლონდონის აეროპორტ ჰიტროუს რაიონში დაფიქსირდა.

ათასობით ბრიტანელმა პარკებს და პლაჟებს მიაშურა, მიუხედავად იმისა, რომ ქვეყანაში კვლავ მოქმედებს საკარანტინო ზომები. პაბები და რესტორნები მხოლოდ 4 ივლისს იხსნება. ამ დროიდანვე მსუბუქდება სოციალური დისტანცირების წესები: ადამიანებს შორის 2 მეტრიანი დისტანცია სავალდებულო აღარ იქნება. დაცული იქნება დისტანცია “მეტრი +“, ანუ დაშვებული იქნება ერთმეტრიანი დაშორება სიფრთხილის ზომების დაცვით.

აშშ–ს თავდაცვის სამინისტრო აცხადებს, რომ 20 წამყვანი ჩინური კომპანია, მათ შორის მსოფლიოში მობილური ტელეფონების და სატელეკომუნიკაციო აპარატურის ერთ–ერთი უმსხვილესი მწარმოებელი Huawei ან ჩინეთის შეიარაღებულ ძალებს ეკუთვნის, ან მის მიერ არის მხარდაჭერილი.

პენტაგონის მიერ გამოქვეყნებული ჩინური ფირმების სია, რომლებიც არმიას ინფორმაციას გადასცემენ, ამერიკული მედიის ჟურნალისტებს ჩაუვარდათ ხელში. ამ სიაში მოხვედრილი კომპანიების მიმართ აშშ–მ შესაძლოა ახალი ფინანსური სანქციები შემოიღოს.

ბოლო თვეებში ვაშინგტონი ზეწოლას ახდენს თავის მოკავშირეებზე, მათ შორის დიდ ბრიტანეთზე, რათა მათ უარი თქვან Huawei–სთვის სტრატეგიულად მნიშვნელოვანი ინფრასტრუქტურული კონტრაქტების გაფორმებაზე, კერძოდ მეხუთე თაობის მობილური კავშირის ქსელების მშენებლობაში მათ მონაწილეობაზე.

ჯანდაცვის მსოფლიო ორგანიზაცია ამბობს, რომ იმ ფონზე, როცა ქვეყნები ვირუსის გავრცელების შესაჩერებლად დაწესებულ შეზღუდვებს ამსუბუქებენ, ბიზნესებს ხსნიან, კორონავირუსის პანდემია კვლავ ძლიერდება.

„ბევრ ქვეყანაში, ეპიდემია ახლა პიკს აღწევს, ან პიკისკენ მიემართება“ – აცხადებს ჯანმოს საგანგებო სიტუაციების ხელმძღვანელი, ექიმი მაიკლ რაიანი.

ზოგიერთი ქვეყანა, მათ შორის გერმანია, სამხრეთ აფრიკა და ინდოეთი, რომელიც ყოველდღე 15 000-მდე ახალი დადასტურებული შემთხვევის შესახებ იტყობინება, შეზღუდვების კვლავ დაწესების შესაძლებლობას უშვებს და მეორე ტალღის გასამკლავებლად ემზადება.

ჯანდაცვის მსოფლიო ორგანიზაციის გენერალური დირექტორის თქმით, მაშინ, როცა მსოფლიოში პირველი მილიონი ადამიანი ახალი კორონავირუსით სამი თვის განმავლობაში დაინფიცირდა, ახლა ინფიცირების მილიონი დადასტურებული შემთხვევის გამოვლენას რვა დღე დასჭირდა.

„მთავარი საფრთხე, რაც ახლა ჩვენს წინაშე დგას, არა ვირუსი, არამედ გლობალური სოლიდარობისა და ლიდერობის არარსებობაა“ – აცხადებს ტედროს ადჰანომ გებრეიესუსი, ჯანდაცვის მსოფლიო ორგანიზაციის გენერალური დირექტორი.

ჯონს ჰოპკინსის უნივერსიტეტის მონაცემებით, ამ დროისთვის, მსოფლიოში ინფიცირების 9 მილიონზე მეტი, გარდაცვალების კი 474 000 შემთხვევა ფიქსირდება.

ორივე კატეგორიაში, ოფიციალურად დადასტურებული მონაცემებით, ამერიკის შეერთებული შტატები ლიდერობს. აშშ-ის მთავარი ინფექციონისტი, ენტონი ფაუჩი აცხადებს, რომ ქვეყანაში ტესტირებების რაოდენობა კვლავ გაიზრდება. ამის შესახებ ფაუჩიმ კონგრესში გამართულ მოსმენაზე ისაუბრა, იმ ფონზე, როცა პრეზიდენტი ტრამპი ჯანდაცვის ოფიციალურ პირებს, ტესტირების რაოდენობის შემცირებას თხოვს.

თეთრი სახლი აცხადებდა, რომ პრეზიდენტს „სერიოზულად“ არ უთქვამს, როცა განაცხადა, რომ ინფიცირების დადასტურებული შემთხვევების დიდი რაოდენობის მიზეზი, უფრო მეტი ტესტირების ჩატარებაა. თუმცა, პირეზიდენტმა ტრამპმა, სამშაბათს საკუთარი ადმინისტრაციიის განცხადების საწინააღმდეგოდ თქვა, რომ ამ განცხადების გაკეთებისას, ის არ ხუმრობდა.

კონგრესში გამართულ მოსმენაზე, ექიმმა ენტონი ფაუჩიმ განაცხადა, რომ ოპტიმისტური გათვლის შემთხვევაში, კორონავირუსის ვაქცინა, ყველაზე ადრე, შესაძლოა, მიმდინარე წლის ბოლოს იყოს ხელმისაწვდომი. თუმცა, ამასთან ერთად, ის იმასაც ხაზს უსვამს, რომ ვაქცინის არსებობა, შესაძლოა არ იყოს გარანტია, რომ აცრა ადამიანს ვირუსისგან ხანგრძლივად დაიცავს.